Author: Sorn Chhorvyvatey

ចាប់ពីថ្ងៃទី២២ ដល់ថ្ងៃទី២៥ ខែកញ្ញា ឆ្នាំ២០២៥ គណៈប្រតិភូ CGCC ដឹកនាំដោយ លោកស្រី គឹម សុផៃ ប្រធាននាយកដ្ឋានសវនកម្មផ្ទៃក្នុងរបស់ CGCC និងចូលរួមដោយ លោកស្រី កឹម ចាន់ថាវី អនុប្រធានការិយាល័យទីផ្សារ និង​អភិវឌ្ឍន៍អាជីវកម្ម និង លោក អំ ដេត អនុប្រធានការិយាល័យហេដ្ឋារចនាសម្ព័ន្ធ និងសន្តិសុខព័ត៌​មាន​វិទ្យា បានចូលរួមកម្មវិធីបណ្តុះបណ្តាល Asian Credit Supplementation Institution Confederation (ACSIC) លើកទី៣៣ ឆ្នាំ២០២៥ នៅទីក្រុង  ម៉ានីល ប្រទេសហ្វីលីពីនដែលបានរៀបចំដោយ​ស្ថាប័នធានាឥណទាននៃប្រទេសហ្វីលីពីន​ (PHILGUARANTEE) ក្រោមប្រធានបទ ការបង្កើតលទ្ធភាពធានាឥណទានដើម្បីកៀរគរមូលនិធិសម្រាប់ការអភិវឌ្ឍន៍សេដ្ឋកិច្ចប្រកបដោយចីរភាពនិងបរិយាបន្ន (Enabling Credit Guarantees to Mobilize Funds for Sustainable and Inclusive Economic Development) ”។

កម្មវិធីបណ្តុះបណ្តាលនេះមានការចូលរួមពីគណៈប្រតិភូប្រមាណ ៨៥នាក់ មកពីស្ថាប័នសមាជិក និងអ្នកសង្កេតការណ៍របស់ ACSIC ១៣ស្ថាប័ន មកពី ១១ប្រទេស ផ្សេងៗគ្នា។ ព្រឹត្តិការណ៍នេះចាត់ទុកជាវេទិកាមួយដើម្បីបង្ហាញពីការអនុវត្តល្អបំផុត ក្នុងការជំរុញកិច្ចសហការ និងស្វែងរកវិធីសាស្រ្តប្រកបដោយភាពច្នៃប្រឌិតក្នុងការពង្រឹងការផ្តល់ហិរញ្ញប្បទានសម្រាប់សហគ្រាសធុនតូច និងមធ្យម (SMEs)។

ក្នុងអំឡុងពេលនៃកម្មវិធីបណ្តុះបណ្តាល អ្នកចូលរួមទាំងអស់ បានចូលរួមក្នុងការពិភាក្សាដ៏រឹងមាំជាមួយអ្នកជំនាញអន្តរជាតិ តំណាងរដ្ឋាភិបាល និងស្ថាប័នសមាជិក ACSIC ដែលផ្តោតលើការកែលម្អលទ្ធភាពទទួលបានហិរញ្ញវត្ថុសម្រាប់សហគ្រាសធុនតូច និងមធ្យម ដោយផ្តោតជាពិសេសលើតួនាទីសំខាន់នៃការធានាឥណទានក្នុងការជំរុញការអភិវឌ្ឍន៍ប្រកបដោយចីរភាព។

កម្មវិធីបណ្តុះបណ្តាលនេះក៏បានផ្តល់ឱកាសដ៏មានតម្លៃសម្រាប់ប្រតិភូរបស់ CGCC ក្នុងការពង្រីកបណ្តាញទំនាក់ទំនងជាមួយស្ថាប័នធានាឥណទានផ្សេងទៀត ដែលជាការបើកផ្លូវទៅកាន់កិច្ចសហប្រតិបត្តិការនាពេលអនាគត់និងការចែករំលែកចំណេះដឹងដែលនឹងជួយគាំទ្រដល់ការអភិវឌ្ឍន៍របស់ CGCC ។  សំខាន់ជាងនេះ ប្រតិភូរបស់ CGCC ក៏បានសិក្សាពីរបៀបដែលកម្មវិធីបណ្តុះបណ្តាល ACSIC ត្រូវបានធ្វើឡើង ដែលជាបទពិសោធន៍ដ៏មានប្រយោជន៍សម្រាប់ CGCC ក្នុងការធ្វើជាម្ចាស់ផ្ទះកម្មវិធីបណ្តុះបណ្តាល ACSIC លើកទី៣៤ នៅឆ្នាំ២០២៦ ដែលកម្ពុជាជាប្រទេសម្ចាស់ផ្ទះ។

នាថ្ងៃទី១២ ខែកញ្ញា ឆ្នាំ២០២៥ នៅខេត្តព្រៃវែង សាជីវកម្មធានាឥណទានកម្ពុជា (CGCC) និងមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តព្រៃវែង បានសហការរៀបចំកម្មវិធី EPIC វគ្គទី៦ ស្តីអំពី “គន្លឹះក្នុងការទទួលបាន និងការប្រើប្រាស់ហិរញ្ញប្បទានផ្លូវការ ប្រកបដោយការទទួលខុសត្រូវ និងប្រសិទ្ធភាព” ក្រោមអធិបតីភាព លោក វ៉ាន់ សុភាព ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តព្រៃវែង និងវត្តមានជាកិត្តិយសរបស់ លោក ណូ លីដា អគ្គនាយក CGCC លោក លឹម មិញ នាយកប្រតិបត្តិសមាគមអ្នកផ្គត់ផ្គង់ទឹកស្អាតកម្ពុជា និងមានការចូលរួមពីសិក្ខាកាមដែលជាម្ចាស់សហគ្រាសខ្នាតមីក្រូ តូច និងមធ្យម ម្ចាស់សិប្បកម្ម ជាពិសេសប្រតិបត្តិករផ្គត់ផ្គង់ទឹកស្អាតនៅក្នុងខេត្តព្រៃវែង និងបណ្តាខេត្តនានា សរុប ៥១រូប ព្រមទាំងបុគ្គលិករបស់ស្ថាប័ន និងមន្ទីរ សរុបប្រមាណ៧០រូប។

ជារបៀបវារៈនៃកម្មវិធី EPIC 6 សិក្ខាកាម និងអ្នកចូលរួមទទួលបានការស្វែងយល់អំពី “យន្តការធានាឥណទាន ក្នុងការគាំទ្រលទ្ធភាពទទួលបានហិរញ្ញប្បទានរបស់សហគ្រាសធុនតូច និងមធ្យម”  តាមរយៈបទបង្ហាញដោយ លោក អេង តុងងី ប្រធាននាយកដ្ឋានគ្រប់គ្រងហានិភ័យ និងអនុលោមភាពនៃ CGCC ដែលក្នុងនោះក៏មាននូវការចែករំលែកអំពីគម្រោងធានាឥណទានសម្រាប់អភិវឌ្ឍសេវាសាធារណៈ (UDGS) សម្រាប់ប្រតិបត្តិករទឹកស្អាតឯកជន ដែលជាគម្រោងធានាឥណទាន ជាមួយនឹងលក្ខខណ្ឌអនុគ្រោះ ក្នុងគោលបំណងគាំទ្រ និងបង្កើនលទ្ធភាពទទួលបានហិរញ្ញប្បទានផ្លូវការក្នុងការគាំទ្រដល់ប្រតិបត្តិករទឹកស្អាតឯកជន។

ស្របជាមួយនឹងយន្តការធានាឥណទានរបស់ CGCC លោក ហួត សារ៉ាត់ នាយកការិយាល័យសេវាហិរញ្ញវត្ថុ សហគ្រាសខ្នាតតូច និងមធ្យម នៃធនាគារពាណិជ្ជកម្មក្រៅប្រទេស នៃកម្ពុជា (FTB) ក៏បានចែករំលែកអំពី “នីតិវិធីនៃការវាយតម្លៃឥណទាន និងដំណោះស្រាយហិរញ្ញវត្ថុសម្រាប់សហគ្រាសខ្នាតតូច និងមធ្យម” និងបានគូសបញ្ជាក់អំពីដំណោះស្រាយហិរញ្ញវត្ថុដែលធនាគារFTB អាចផ្តល់ជូនដល់ប្រតិបត្តិករទឹកស្អាតឯកជន និងម្ចាស់អាជីវកម្ម/សហគ្រាសផងដែរ។

បន្ថែមពីនេះ សិក្ខាកាមបានស្វែងយល់អំពីប្រធានបទបណ្តុះបណ្តាលគោលស្តីអំពី “គន្លឹះក្នុងការទទួលបាន និងការប្រើប្រាស់ហិរញ្ញប្បទានផ្លូវការ ប្រកបដោយការទទួលខុសត្រូវ និងប្រសិទ្ធភាព” ដែលចែករំលែកដោយ លោក ទិត្យ កំរង អ្នកឯកទេស​ផ្នែកចំណេះ​ដឹង​ហិរញ្ញវត្ថុ និងជាស្ថាបនិក ក្រុមហ៊ុន ឫទ្ធិពល និងអេបកត់លុយ។ ក្រោយពីបានសិក្សាស្វែងយល់លើប្រធានបទបណ្តុះបណ្តាល សិក្ខាកាមទាំងអស់បានបែងចែកជា៤ក្រុម និងពិភាក្សាក្នុងការបង្កើតផែនការហិរញ្ញវត្ថុអាជីវកម្ម ដោយផ្អែកលើតារាងគម្រោងចំណូល ចំណាយ រយៈពេល១ឆ្នាំ។ ជាលទ្ធផលនៃការពិភាក្សា សិក្ខាកាមបានចែករំលែកអំពីគម្រោងចំណូល ចំណាយអាជីវកម្មតាមក្រុមនីមួយៗ ព្រមទាំងទទួលបានយោបល់កែលម្អពីគ្រូបង្គោលផងដែរ។

EPIC គឺជាកម្មវិធីកសាងសមត្ថភាពសហគ្រិនរបស់ CGCC ដែលនឹងនាំមកនូវប្រធានបទពាក់ព័ន្ធការប្រតិ​បត្តិនិងគ្រប់គ្រងអាជីវកម្ម ដើម្បីអភិវឌ្ឍសមត្ថភាពសហគ្រាសធុនមីក្រូ តូច និងមធ្យម តាមរយៈកិច្ចសហការជាមួយស្ថាប័នពាក់ព័ន្ធ/គ្រឹះស្ថានហិរញ្ញវត្ថុចូលរួម៕

កាលពីថ្ងៃទី១១ ដល់ថ្ងៃទី១៣ ខែកញ្ញា ឆ្នាំ២០២៥ នៅមជ្ឍមណ្ឌលសន្និបាត និងពិព័រណ៍កោះពេជ្រ CGCC បានចូលរួមជាអ្នកសហការរៀបចំមួយក្នុងកម្មវិធី “ពិព័រណ៍ផលិតផលខ្មែរ ឆ្នាំ២០២៥” ក្រោមប្រធានបទ “ពង្រឹង និងពង្រីកសមត្ថភាពផលិតក្នុងស្រុក” ដែលបានរៀបចំឡើងដោយសម័្ពន្ធសមាគមសហគ្រាសធុនតូច និងមធ្យមកម្ពុជា (FASMEC) ក្រោមអធិបតីភាពដ៏ខ្ពង់ខ្ពស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ដ្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ, តំណាងដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

គួរបញ្ជាក់ផងដែរថា កម្មវិធីតាំងពិព័រណ៍ផលិតផលខ្មែរ ឆ្នាំ២០២៥ នេះ  មានប្រមាណ ៣០០ស្តង់ ដែលបានដាក់តាំងនូវផលិតផលខ្មែរផលិតក្នុងស្រុកជាង ១០០ប្រភេទ ដែលក្នុងនោះ CGCC ក៏បានចូលរួមចំណែកមួយក្នុងការលើកកម្ពស់ផលិតផលិតក្នុងស្រុក សំដៅលើការផ្ដល់ការធានាឥណទានលើកម្ចីអាជីវកម្ម ដើម្បីបង្កើនបរិយាបន្នហិរញ្ញវត្ថុ និងលើកស្ទួយការផលិតក្នុងស្រុក ដែលកំពុងមានសន្ទុះកើនឡើងយ៉ាងខ្លាំងនាពេលបច្ចុប្បន្ន។

កាលពីថ្ងៃទី៩ ដល់ថ្ងៃទី១១ ខែកញ្ញា ឆ្នាំ២០២៥ នៅខេត្តកំពង់ធំ និងសៀមរាប CGCC តំណាងដោយ លោកស្រី សាន សុខរីណា ប្រធានជាន់ខ្ពស់នៃការិយាល័យអភិវឌ្ឍន៍ផលិតផល និងសហប្រតិបត្តិការរបស់ CGCC បានចូលរួមទស្សនកិច្ចសិក្សា និងផ្សព្វផ្សាយលើកទី៣  អំពីសហគ្រាសជលផលក្រោយប្រមូលផល គាំទ្រដោយគម្រោង CAPFISH-Capture ក្រោមប្រធានបទ “គម្រោង CAPFISH-Capture នឹងបញ្ចប់ សមិទ្ធិផលនៅតែបន្ត”។

ទស្សនកិច្ចសិក្សា និងផ្សព្វផ្សាយលើកទី៣នេះ  ក៏មានការចូលរួមដ៏ខ្ពង់ខ្ពស់ពីសំណាក់ លោកជំទាវ អ៊ឹម រចនា អនុរដ្ឋលេខា​ធិការ​​​ក្រសួងកសិកម្ម រុក្ខាប្រមាញ់ និងនេសាទ, អ្នកតំណាងរដ្ឋបាលជលផល, ប្រតិភូសហភាពអឺរ៉ុប និងស្ថានទូតប្រទេសអឺរ៉ុបផ្សេងទៀត, បុគ្គលមានឥទ្ធិពល (Social Media Influencers), តំណាង CGCC, អ្នកសារព័ត៌មាន, ក្រុមការងារគម្រោង UNIDO​ និងបានទស្សនកិច្ចសិក្សាផ្ទាល់ទៅកាន់ទីតាំងអាជីវកម្មផ្ទាល់ របស់សហគ្រាសដៃគូអាជីវកម្ម ដែលស្ថិតនៅក្នុងវិស័យជលផលក្រោយប្រមូលផលចំនួន ៣។

គួរបញ្ជាក់ផងដែរថា កម្មវិធី ISF គឺជាគំរូហិរញ្ញវត្ថុថ្មីមួយរបស់គម្រោង CAPFISH-Capture ក្រោមការគាំទ្រថវិកាពីសហភាពអឺរ៉ុប (EU) អនុវត្តដោយអង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO Cambodia) និងរដ្ឋបាលជលផល (FiA) ហើយកម្មវិធីនេះត្រូវបានគ្រប់គ្រង និងចាត់ចែងមូលនិធិដោយ CGCC។ កម្មវិធីនេះ ធ្វើឡើងដើម្បីជម្រុញដល់សហគ្រាស ដៃគូអាជីវកម្ម ដែលស្ថិតនៅក្នុងវិស័យជលផលក្រោយប្រមូលផល ដើម្បីបង្កើននូវផលិតភាព នៃផលិតផល ជាពិសេសលើលកម្ពស់ស្តង់ដា ចំណីអាហារ ឱ្យមានលក្ខណៈប្រកួតប្រជែងក្នុងទីផ្សារ ទាំងក្នុងនិងក្រៅប្រទេស។