CGCC

Menu
Menu
Menu

Author: Sorn Chhorvyvatey

ស្វែងយល់អំពីដំណើរការធានាសញ្ញាបណ្ណរបស់ CGCC

Posted on by Sorn Chhorvyvatey

ដំណើរការនៃការធានាសញ្ញាបណ្ណរបស់សាជីវកម្មធានាឥណទានកម្ពុជា (CGCC)៖ ជំហានសាមញ្ញសម្រាប់អ្នកបោះផ្សាយ

ការបោះផ្សាយសញ្ញាបណ្ណស្តាប់ទៅហាក់ដូចជាស្មុគស្មាញ ប៉ុន្តែជាមួយការគាំទ្រពីសាជីវកម្មធានាឥណទានកម្ពុជា (CGCC) ដំណើរការត្រូវបានរៀបចំឡើងយ៉ាងល្អនិងងាយស្រួលខុសពីការគិតរបស់អ្នក។ ការធានាសញ្ញាបណ្ណរបស់ CGCC ជួយបង្កើនទំនុកចិត្តរបស់វិនិយោគិន បង្កើនកម្រិតឥណទានរបស់អ្នក និងទទួលបានដើមទុនជាមួយលក្ខខណ្ឌល្អប្រសើរជាងមុន។ ដំណើរការដាក់ពាក្យស្នើសុំ ត្រូវបានរៀបចំឡើងដើម្បីណែនាំដល់ក្រុមហ៊ុនបោះផ្សាយសញ្ញាបណ្ណតាមដំណាក់កាលនីមួយៗ ចាប់ពីការបង្ហាញចំណាប់អារម្មណ៍ដំបូង រហូតដល់ការធានាផ្លូវការ។ ដំណាក់កាលនីមួយៗមានតម្លាភាព ដោយ CGCC ធ្វើការយ៉ាងជិតស្និទ្ធជាមួយក្រុមហ៊ុនបោះផ្សាយសញ្ញាបណ្ណ ដើម្បីធានាថាពួកគេបានត្រៀមខ្លួនរួចជាស្រេច។

ជំហានទី ១៖ លិខិតបព្ជាក់ចំណាប់អារម្មណ៍

ដំណើរការទាំងមូលចាប់ផ្តើមដោយ លិខិតបញ្ជាក់ចំណាប់អារម្មណ៍ដ៏សាមញ្ញមួយ។ តាមរយៈការចែករំលែកនូវ ព័ត៌មានលម្អិតជាមូលដ្ឋានរបស់ក្រុមហ៊ុន របាយការណ៍ហិរញ្ញវត្ថុដែលបានធ្វើសវនកម្មរយៈពេល ៣ឆ្នាំចុងក្រោយ ព័ត៌មានអំពីសញ្ញាបណ្ណ បញ្ជីឈ្មោះវិនិយោគិនសក្តានុពល ព័ត៌មានអភិបាលកិច្ចសាជីវកម្មនិងកិច្ចព្រមព្រៀងជាមួយក្រុមហ៊ុនធានាទិញមូលបត្រ។ CGCC នឹងពិនិត្យលើលក្ខខណ្ឌដំបូង។ ដំណាក់កាលនេះមានភាពរហ័ស និងមិនស្មុគស្មាញ។

ជំហានទី ២៖ ការដាក់ពាក្យស្នើសុំជាផ្លូវការ

បន្ទាប់ពីការត្រួតពិនិត្យលើលក្ខខណ្ឌដំបូងបានបញ្ចប់ ក្រុមហ៊ុនបោះផ្សាយសញ្ញាបណ្ណត្រូវបានអញ្ជើញឱ្យដាក់ពាក្យស្នើសុំធានាសញ្ញាបណ្ណជាផ្លូវការ។ ឯកសារតម្រូវរួមមាន ទម្រង់ពាក្យស្នើសុំធានាសញ្ញាបណ្ណរបស់ CGCC ផែនការអាជីវកម្ម ផែនការថវិកាលម្អិតដែលភ្ជាប់ជាមួយការព្យាករណ៍លំហូរសាច់ប្រាក់ ឯកសារពាក់ព័ន្ធនឹងក្រុមហ៊ុន ចំណាត់ថ្នាក់ឥណទាន អាជ្ញាបណ្ណ និងលិខិតអនុញ្ញាតបទប្បញ្ញត្តិពាក់ព័ន្ធទាំងអស់។  បន្ថែមពីនេះ ក្រុមហ៊ុនបោះផ្សាយសញ្ញាបណ្ណត្រូវរំពឹងថា នឹងផ្តល់នូវរបាយការណ៍ត្រួតពិនិត្យបំពេញកាតព្វកិច្ចតាមច្បាប់ ផ្នែកគតិយុត្ត ផ្នែកហិរញ្ញវត្ថុ ប្រតិបត្តិការ និងរបាយការណ៍ផលប៉ះពាល់សង្គមនិងបរិស្ថាន។ ឯកសារធានា កិច្ចសន្យាសំខាន់ៗជាមួយភាគីពាក់ព័ន្ធ និងឯកសារផ្សេងទៀតអាចត្រូវបានស្នើសុំបន្ថែមតាមការចាំបាច់។

ជំហានទី ៣៖ ការសិក្សាវាយតម្លៃ

ក្នុងដំណាក់កាលវាយតម្លៃ ដែលជាការវាយតម្លៃតាមឯកសារដែលបានផ្តល់ឱ្យ CGCC ត្រួតពិនិត្យលើពាក្យស្នើសុំធានាសញ្ញាបណ្ណ ដើម្បីវាយតម្លៃភាពរឹងមាំផ្នែកហិរញ្ញវត្ថុ កម្រិតនៃឥណទាន និងលទ្ធភាពសម្រេចបាននៃគម្រោងរបស់ក្រុមហ៊ុនបោះផ្សាយសញ្ញាបណ្ណ។ ការវាយតម្លៃនេះរួមបញ្ចូលទាំងការវិភាគលើរបាយការណ៍ហិរញ្ញវត្ថុដែលបានធ្វើសវនកម្ម ការព្យាករណ៍លំហូរសាច់ប្រាក់ អភិបាលកិច្ចសាជីវកម្ម និងហានិភ័យសំខាន់ៗដើម្បីធានាថាសញ្ញាបណ្ណនោះបំពេញតាមលក្ខខណ្ឌនិងសូចនាករហានិភ័យរបស់ CGCC មុនពេលបន្តទៅដំណាក់កាលចុះត្រួតពិនិត្យបំពេញកាតព្វកិច្ចតាមច្បាប់។

ជំហានទី ៤៖ ការអនុម័តជាគោលការណ៍

បន្ទាប់ពីការវាយតម្លៃលើឯកសាររួចមក CGCC អាចចេញលិខិតអនុម័តជាគោលការណ៍ ដែលបង្ហាញពីការអនុម័តបឋមដើម្បីបន្តនីតិវិធីបន្ទាប់។ លិខិតអនុម័តជាគោលការណ៍បញ្ជាក់ថា ក្រុមហ៊ុនបោះផ្សាយសញ្ញាបណ្ណបានបំពេញតាមលក្ខខណ្ឌ និងសូចនាករហានិភ័យដំបូង ហើយនឹងកំណត់លក្ខខណ្ឌសម្រាប់ដំណាក់កាលបន្តនៃការចុះត្រួតពិនិត្យបំពេញកាតព្វកិច្ចតាមច្បាប់ មុននឹងឈានដល់ការអនុម័តចុងក្រោយ។

ជំហានទី ៥៖ ការចុះត្រួតពិនិត្យបំពេញកាតព្វកិច្ចតាមច្បាប់

បន្ទាប់ពីទទួលបានលិខិតអនុម័តជាគោលការណ៍ CGCC នឹងធ្វើការចុះត្រួតពិនិត្យបំពេញកាតព្វកិច្ចតាមច្បាប់លម្អិត ដែលគ្របដណ្តប់លើផ្នែកហិរញ្ញវត្ថុ ផ្លូវច្បាប់ ប្រតិបត្តិការ ផលប៉ះពាល់បរិស្ថាននិងសង្គម របស់ក្រុមហ៊ុនបោះផ្សាយសញ្ញាបណ្ណ។ ដំណើរការនេះរួមមាន៖ ការចុះពិនិត្យទីតាំង ការសម្ភាសន៍ថ្នាក់ដឹកនាំ និងការផ្ទៀងផ្ទាត់ឯកសារ និងរបាយការណ៍សំខាន់ៗ ដូចជារបាយការណ៍នៃការចុះត្រួតពិនិត្យបំពេញកាតព្វកិច្ចតាមច្បាប់ដោយយកចិត្តទុកដាក់ផ្នែកហិរញ្ញវត្ថុ និងច្បាប់ជាដើម។ គោលបំណងគឺដើម្បីបញ្ជាក់នូវភាពគួរឱ្យទុកចិត្តជារួម ភាពរឹងមាំនៃអភិបាលកិច្ចសាជីវកម្ម និងសមត្ថភាពរបស់ក្រុមហ៊ុនបោះផ្សាយសញ្ញាបណ្ណ មុននឹងឈានទៅដល់ការអនុម័តចុងក្រោយ។

ជំហានទី ៦៖ ការអនុម័តជាផ្លូវការ និងការចេញលិខិតធានា

បន្ទាប់ពីបញ្ចប់ការចុះត្រួតពិនិត្យបំពេញកាតព្វកិច្ចតាមច្បាប់ទាំងស្រុង និងឈានទៅដល់ដំណាក់កាលអនុម័តជាផ្លូវការ ដែលជាជំហានចុងក្រោយមុនការធានា។ នៅដំណាក់កាលនេះ ការវាយតម្លៃ និងលក្ខខណ្ឌទាំងអស់ត្រូវបានព្រមព្រៀងទាំងអស់គ្នា មុននឹងឈានដល់ ការចុះហត្ថលេខាលើកិច្ចព្រមព្រៀងធានា និងការចុះអនុវត្តការធានាសញ្ញាបណ្ណជាផ្លូវការ។

អនុសាសន៍សម្រាប់ក្រុមហ៊ុនដែលចង់បោះផ្សាយសញ្ញាបណ្ណ

ក្រុមហ៊ុនដែលមានបំណងចង់បោះផ្សាយសញ្ញាបណ្ណត្រូវបានលើកទឹកចិត្តឱ្យចាប់ផ្តើមរៀបចំឯកសារសំខាន់ៗឱ្យបានឆាប់ជាមុនដូចជា របាយការណ៍ហិរញ្ញវត្ថុដែលបានធ្វើសវនកម្ម ការព្យាករណ៍អាជីវកម្ម របាយការណ៍ចុះត្រួតពិនិត្យបំពេញកាតព្វកិច្ចតាមច្បាប់ និងជាពិសេសការធ្វើចំណាត់ថ្នាក់ឥណទាន។ ការរៀបចំជាមុនអាចជួយសម្រួលដល់ការវាយតម្លៃ ដែលនាំឱ្យការអនុម័តមានភាពរលូន និងលឿនជាងមុន។

តើអ្នកបានត្រៀមខ្លួនចាប់ផ្តើមដំណើរការធានាសញ្ញាបណ្ណហើយឬនៅ?

ជាមួយនឹងការជួយគាំទ្ររបស់ CGCC ដំណើរការធានាសញ្ញាបណ្ណ មិនត្រឹមតែអាចគ្រប់គ្រងបានល្អប៉ុណ្ណោះទេ ប៉ុន្តែវាក៏ជាជំហានដ៏មានតម្លៃ ឆ្ពោះទៅរកភាពជោគជ័យនៅក្នុងទីផ្សារផងដែរ។ ក្រុមការងាររបស់យើងត្រៀមខ្លួនជាស្រេចដើម្បីជួយណែនាំអ្នកចាប់ពីការសាកសួរព័ត៌មានដំបូង រហូតដល់ការធានាជាផ្លូវការ។ ដើម្បីស្វែងយល់បន្ថែមអំពីការធានាសញ្ញាបណ្ណរបស់ CGCC ដែលគាំទ្រដល់ការបោះផ្សាយសញ្ញាបណ្ណរបស់អ្នក សូមទាក់ទងមកកាន់ក្រុមការងាររបស់យើងសម្រាប់ព័ត៌មានបន្ថែមតាមរយៈអុីមែល និងលេខទូរសព្ទដូចខាងក្រោម៖

  • អុីមែល: [email protected]
  • ទូរស័ព្ទ: ០២៣ ៧២២ ១២៣
  • គេហទំព័រ: www.cgcc.com.kh/bond-guarantee

អាននិងទាញយកជា PDF: ស្វែងយល់អំពីដំណើរការធានាសញ្ញាបណ្ណរបស់ CGCC

 

ជួបជាមួយសហគ្រិនស្រ្ដី ដែលកែច្នៃសំណល់ស្នែង ជាវត្ថុលម្អ និងគ្រឿងអលង្ការ

Posted on by Sorn Chhorvyvatey

ខ្ញុំឈ្មោះ គួន ចិន្ដា ជាម្ចាស់សិប្បកម្មសុមនា ផលិតផលស្នែង។ ខ្ញុំបើកអាជីវកម្មរបស់ខ្ញុំ តាំងពីឆ្នាំ២០០៣ ក្នុងគោលបំណងដោះស្រាយបញ្ហាកាកសំណល់នៅបរិវេណផ្ទះរបស់ខ្ញុំ។ ការចាប់ផ្ដើមអាជីវកម្មមួយនេះ មិនមានភាពងាយស្រួលឡើយ ពោល ខ្ញុំត្រូវជំនះកត្ដាសង្គម បញ្ហាជីវភាព និងការស្វែងរកទីផ្សារ។ ខ្ញុំធ្លាប់បោះបង់អាជីវកម្មនេះមួយរយៈ ប៉ុន្ដែដោយសារចិត្តស្រឡាញ់ និងជំនាញរបស់ប្ដីខ្ញុំ ពួកយើងបានឡើងមកភ្នំពេញក្នុងឆ្នាំ២០១៥ ដើម្បីចាប់ផ្ដើមនិងពង្រឹងអាជីវកម្មសារជាថ្មី។

បច្ចុប្បន្ន អាជីវកម្មរបស់ខ្ញុំមានបុគ្គលិកចំនួន ៥រូប រួមទាំងស្វាមីរបស់ខ្ញុំ ដែលជាអ្នកកែច្នៃ និងរចនាម៉ូត។ បន្ថែមពីនេះ គាត់ក៏បង្ហាត់បង្រៀនកូនជាងផងដែរ។ រីឯខ្ញុំ ជាអ្នកចាត់ចែងទូទៅនៃអាជីវកម្មមួយនេះ រួមទាំងការលក់ និងការធ្វើទីផ្សារ។ ការចាប់ផ្ដើមដំបូង ពួកយើងកែច្នៃជាផលិតផលតាំងលម្អក្នុងផ្ទះ ជារូបសំណាក ហើយនាំចេញទៅក្រៅប្រទេសដោយសារពេលនោះ យើងមានសមាគមទំនុកបម្រុងក្នុងការស្វែងរកអតិថិជននាំចេញទៅក្រៅប្រទេស។ ប៉ុន្ដែ ដោយសារផលលំបាកក្នុងការដឹកជញ្ជូន និងបាក់បែកពេលទៅដល់ទីនោះ ពួកយើងក៏បានកែច្នៃជារបស់ប្រើប្រាស់ និងគ្រឿងអលង្ការ ដូចជាខ្សែក ជញ្ជៀន និងខ្សែដៃ។

ជាអកុសល សមាគមនោះបានបិទ ការបញ្ជាទិញបានធ្លាក់ចុះ។ ពួកយើងបាត់អតិថិជនក្រៅស្រុកមួយចំនួន ដែលបណ្ដាលឱ្យអាជីវកម្មរបស់យើងធ្លាក់ចុះ ស្របពេលនឹងវិបត្តិកូវីដកំពុងផ្ទុះ។ ក្នុងអំឡុងពេលកូវីដ យើងបានបិទតូបអាជីវកម្មរបស់យើង ហើយយើងព្យាយាមលក់តាមបណ្ដាញសង្គម។  ការលក់ដំបូង ដាច់គួរសម ប៉ុន្ដែមួយរយៈក្រោយមានការថយចុះ យើងក៏ចាប់ផ្ដើមដាក់លក់នៅតាមស្ដង់តាំងពិព័រណ៌នៅពេលស្ថានភាពធូរស្បើយ។ បច្ចុប្បន្ន ខ្ញុំដាក់លក់ផលិតផលរបស់ខ្ញុំចំនួន ២ទីតាំង៖ ទីមួយនៅផ្សារទំនើប ជីប ម៉ុង ២៧១ និងចុងសប្ដាហ៍នៅផ្លូវថ្មើរជើង (Walk Street)។

ក្នុងនាមជាម្ចាស់អាជីវកម្ម ខ្ញុំយល់ថា ការអភិវឌ្ឍសមត្ថភាពគឺជារឿងសំខាន់ពីព្រោះវាជាឱកាសក្នុងការស្វែងរកចំណេះដឹងថ្មីៗដើម្បីពង្រឹង និងអភិវឌ្ឍអាជីវកម្ម។ ជារឿយៗ នាងខ្ញុំតែងឆ្លៀតពេលចូលរួមក្នុងវគ្គកសាងសមត្ថភាពជាមួយសមាគម ស្ថាប័ន និងភាគីពាក់ព័ន្ធនានា។ ជាឧទាហរណ៍ នៅពេលដែលនាងខ្ញុំបានចូលរួមវគ្គបណ្ដុះបណ្ដាល EPIC ខ្ញុំបានស្វែងយល់អំពីការបង្កើតផែនការអាជីវកម្ម ការបំផុសគំនិតឱ្យខ្ញុំគិតអំពីអាជីវកម្មរបស់ខ្ញុំ ថានៅចំណុចណា និងមានភាពខ្វះខាតអ្វីខ្លះ។ ទន្ទឹមនឹងនេះ ខ្ញុំក៏បានស្វែងយល់ពីកម្ចីអាជីវកម្ម គន្លឹះក្នុងការស្វែងរកប្រភពទុនឱ្យបានច្រើន និងការរៀបចំគោលដៅនៃផែនការអាជីវកម្មប្រកបដោយប្រសិទ្ធភាព។

ផ្អែកតាមបទពិសោធអាជីវកម្មរបស់ខ្ញុំ ខ្ញុំយល់ថា ម្ចាស់អាជីវកម្មទាំងអស់គួរមានភាពបត់បែនក្នុងប្រតិបត្តិការអាជីវកម្មរបស់ខ្លួន ជាពិសេសការស្ដាប់ពីតម្រូវការ និងមតិកែលម្អរបស់អតិថិជន ព្រមទាំងពង្រឹងយុទ្ធសាស្រ្ដ និងវិធីសាស្រ្ដទីផ្សារ ដើម្បីឱ្យអតិថិជនស្គាល់ពីគុណភាព និងផលិតផលរបស់អ្នក៕

អាននិងទាញយកជា PDF: សហគ្រិនស្រ្ដី ដែលកែច្នៃសំណល់ស្នែង ជាវត្ថុលម្អ និងគ្រឿងអលង្ការ

 

CGCC, CWA, FTB និង Water.org បង្កើតភាពជាដៃគូយុទ្ធសាស្ត្រ ដើម្បីបង្កើនលទ្ធភាពទទួលបានហិរញ្ញប្បទានផ្លូវការ សម្រាប់គាំទ្រវិស័យទឹកស្អាតនៅកម្ពុជា

Posted on by Sorn Chhorvyvatey

ទាញយកសេចក្តីប្រកាសព័ត៌មាន

 

 

CGCC ចូលរួមវេទិកាអន្តរជាតិថ្នាក់ដឹកនាំជាន់ខ្ពស់ របស់សមាគមគ្រឹះស្ថានហិរញ្ញវត្ថុអភិវឌ្ឍន៍ក្នុងតំបន់អាស៊ី-ប៉ាស៊ីហ្វិក និងអាហ្រ្វិក នៅទីក្រុងម៉ាកាវ ប្រទេសចិន

Posted on by Sorn Chhorvyvatey

នៅថ្ងៃទី២២ ដល់ ២៤ ខែតុលា ឆ្នាំ២០២៥ នៅទីក្រុងម៉ាកាវ ប្រទេសចិន គណៈប្រតិភូ CGCC លោក ណូ លីដា អគ្គនាយក CGCC អមដោយលោក សែ គឹមវាសនា បុគ្គលិកជំនាញជាន់ខ្ពស់ផ្នែកទីផ្សារ និងទំនាក់ទំនង បានអញ្ជើញចូលរួមវេទិកាអន្តរជាតិថ្នាក់ដឹកនាំជាន់ខ្ពស់ របស់សមាគមគ្រឹះស្ថានហិរញ្ញវត្ថុអភិវឌ្ឍន៍ក្នុងតំបន់អាស៊ី–ប៉ាស៊ីហ្វិក ក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជា អគ្គនាយកធនាគារអភិវឌ្ឍន៍ជនបទ និងកសិកម្ម (ARDB) និងជាប្រធានក្រុមប្រឹក្សាភិបាលសមាគមគ្រឹះស្ថានហិរញ្ញវត្ថុអភិវឌ្ឍន៍ក្នុងតំបន់អាស៊ី និងប៉ាស៊ីហ្វិក (ADFIAP)។

វេទិកាអន្តរជាតិនេះ ត្រូវបានរៀបចំឡើងក្រោមប្រធានបទ “អនាគតនៃភាពធន់៖ ការប្រើប្រាស់ហិរញ្ញវត្ថុប្រកបដោយចីរភាព សម្រាប់ការអភិវឌ្ឍនៅតំបន់អាស៊ី-ប៉ាស៊ីហ្វិក និងអាហ្វ្រិក” ដោយបានពិភាក្សា និងផ្លាស់ប្ដូរយោបល់គ្នា លើប្រធានបទពាក់ព័ន្ធសំខាន់ៗ រួមមាន ដំណោះស្រាយហិរញ្ញវត្ថុ ប្រកបដោយនវានុវត្តន៍, ហិរញ្ញប្បទានអាកាសធាតុ, យុទ្ធសាស្រ្ដកសាងភាពធន់ដើម្បីជំរុញស្ថិរភាពសេដ្ឋកិច្ច,  ហិរញ្ញវត្ថុឌីជីថលនិងបច្ចេកវិទ្យាហិរញ្ញវត្ថុ, និងការ លើកកម្ពស់កិច្ចសហការក្នុងការអភិវឌ្ឍវិស័យហិរញ្ញវត្ថុ៕

 

CGCC, CWA, FTB និង Water.org បង្កើតភាពជាដៃគូយុទ្ធសាស្ត្រ ដើម្បីបង្កើនលទ្ធភាពទទួលបានហិរញ្ញប្បទានផ្លូវការ សម្រាប់គាំទ្រវិស័យទឹកស្អាតនៅកម្ពុជា

Posted on by Sorn Chhorvyvatey

នាថ្ងៃទី ៣០ ខែតុលា ឆ្នាំ ២០២៥ នៅទីស្នាក់ការកណ្តាលរបស់សាជីវកម្មធានាឥណទានកម្ពុជា (CGCC) មានការរៀបចំកម្មវិធីចុះហត្ថលេខាលើ (១) កិច្ចព្រមព្រៀងធានាឥណទានជាកញ្ចប់ សម្រាប់គម្រោងធានាឥណទានដើម្បីអភិវឌ្ឍសេវាសាធារណៈ សម្រាប់ប្រតិបត្តិករទឹកស្អាតកម្ពុជារវាង សាជីវកម្មធានាឥណទានកម្ពុជា (CGCC) និងធនាគារពាណិជ្ជកម្មក្រៅប្រទេស នៃកម្ពុជា (FTB), និង (២) អនុស្សរណៈនៃការយោគយល់គ្នា (MOU) រវាង CGCC និង សមាគមអ្នកផ្គត់ផ្គង់ទឹកកម្ពុជា (CWA), និង (៣) MOU រវាង CGCC និងអង្គការ Water.org។

កម្មវិធីចុះហត្ថលេខានេះ ត្រូវបានរៀបចំឡើង ក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត ម៉ី វ៉ាន់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងឯកឧត្តម អ៊ុំ សុថា រដ្ឋលេខាធិការក្រសួងឧស្សាហកម្ម វិទ្យាសាស្រ្ដ បច្ចេកវិទ្យា និងនវានុវត្តន៍ និងត្រូវបានចុះហត្ថលេខាដោយ លោក ណូ លីដា អគ្គនាយក CGCC, លោក ឌិត ​សុចល ប្រធាននាយកប្រតិបត្តិធនាគារ FTB,​ លោក លឹម មិញ នាយកប្រតិបត្តិ CWA, និងលោកស្រី ហ្គេ សាន់តូស នាយកតំបន់អាស៊ីអាគ្នេយ៍ នៃអង្គការ Water.org ។ ពិធីចុះកិច្ចព្រមព្រៀងនេះ​ មានអ្នកចូលរួម សរុបប្រមាណ ៧០រូប ដែលជា ប្រតិបត្តិករទឹកស្អាត, ថ្នាក់គ្រប់គ្រង, ព្រមទាំងបុគ្គលិកនៃស្ថាប័នទាំងបួននេះ។

 គម្រោងធានាឥណទានដើម្បីអភិវឌ្ឍសេវាសាធារណៈ សម្រាប់ប្រតិបត្តិករទឹកស្អាតកម្ពុជា គឺជាគំនិតផ្តួចផ្តើមក្នុងការគាំទ្រប្រតិបតិ្តករទឹកស្អាតឱ្យទទួលបានហិរញ្ញប្បទានគ្រប់គ្រាន់ តាមរយៈការធានាឥណទានដែលមានលក្ខខណ្ឌអនុគ្រោះ។

លោក ណូ លីដា អគ្គនាយក CGCC មានប្រសាសន៍ឱ្យដឹងថា៖ “ការផ្គត់ផ្គង់ទឹកស្អាត គឺជាសេវាសាធារណៈចាំបាច់ និងត្រូវការពង្រីកបន្ថែមនៅកម្ពុជា សម្រាប់សុខុមាលភាពរបស់ប្រជាជន និងការអភិវឌ្ឍសង្គម-សេដ្ឋកិច្ច។ CGCC មានមោទនភាពដែលបានរៀបចំគម្រោងធានាឥណទានជាក់លាក់មួយ ដើម្បីគាំទ្រដល់ការអភិវឌ្ឍវិស័យទឹកស្អាតនៅកម្ពុជា ដោយផ្តល់ការធានាដែលមានលក្ខខណ្ឌអនុគ្រោះ។ គម្រោងនេះ អាចដាក់ឱ្យដំណើរការទៅបាន ដោយមានការសហការជាមួយដៃគូពាក់ព័ន្ធសំខាន់ៗ រួមមាន ធនាគារ FTB, សមាគមអ្នកផ្គត់ផ្គង់ទឹកស្អាតកម្ពុជា និងអង្គការ Water.org។ ស្ថាប័ននីមួយៗ នឹងចូលរួមចំណែកក្នុងការអនុវត្តគម្រោងធានាឥណទានដើម្បីអភិវឌ្ឍសេវាសាធារណៈនេះ ឱ្យមានប្រសិទ្ធភាពខ្ពស់ ជាពិសេស ចូលរួមធានាថាកម្ចីមានការធានាត្រូវបានផ្តល់ជូនដល់ប្រតិបត្តិករទឹកស្អាតចំទិសដៅ ដែលមានសក្តានុពល និងមានហានិភ័យសមស្របអាចគ្រប់គ្រងបាន។ក្នុងដំណាក់កាលដំបូងនៃគម្រោងធានាឥណទាននេះ CGCC និង FTB ប្តេជ្ញាផ្តល់កម្ចីមានការធានាសរុប ៥ លានដុល្លារអាមេរិក ជូនដល់បណ្តាប្រតិបត្តិករទឹកស្អាតនៅកម្ពុជា។”

តាមរយៈគម្រោងនេះ CGCC នឹងផ្តល់ការធានាលើកម្ចីដែលបញ្ចេញដោយធនាគារ FTB ដែលជាធនាគារដៃគូរបស់ CGCC ចាប់ពីពីឆ្នាំ២០២១ មក ជូនដល់ប្រតិបត្តិករទឹកស្អាតនៅកម្ពុជា។

លោក ឌិត ​សុចល ប្រធាននាយកប្រតិបត្តិធនាគារ FTB  មានប្រសាសន៍ឱ្យដឹងថា៖ “ការចុះហត្ថលេខាលើកិច្ចព្រមព្រៀងធានាឥណទាន និងអនុស្សរណៈនៃការយោគយល់គ្នាលើគម្រោងធានាឥណទានដើម្បីអភិវឌ្ឍ សេវាសាធារណៈសម្រាប់ប្រតិបត្តិករទឹកស្អាតឯកជន រវាងធនាគារ FTB និង CGCC ឆ្លុះបញ្ចាំងឱ្យឃើញពីទំនាក់ទំនងដ៏ល្អ ចាប់តាំងពីឆ្នាំ ២០២១ ដោយបានពង្រីកកិច្ចសហការជាបន្តបន្ទាប់ ជាមួយការអនុវត្តទំហំឥណទានសរុបប្រមាណជាង ១៩លានដុល្លារអាមេរិក ក្នុងនោះឥណទានសម្រាប់ប្រតិបត្តិករទឹកស្អាត សរុបប្រមាណជាង ២.៣ លានដុល្លារអាមេរិក។ តាមរយៈការសហការនេះ ស្ថាប័នទាំងពីរបានព្យាយាមខិតខំ និងតែងតែស្វែងយល់បន្ថែមពីការច្នៃប្រឌិតថ្មីៗលើបញ្ហាពាក់ព័ន្ធនឹងវិស័យទឹកស្អាត​​ និងការសហការរួមគ្នាឆ្ពោះទៅរកការគ្រប់គ្រងប្រព័ន្ធទឹកស្អាតនៅប្រទេសកម្ពុជាប្រកបដោយនិរន្តរភាព។”

ដើម្បីកាត់បន្ថយហានិភ័យ និងកំណត់ប្រតិបត្តិករទឹកស្អាតឱ្យបានចំគោលដៅ CGCC និង FTB នឹងសហការគ្នាផ្តល់កម្ចីមានការធានាជូនដល់ប្រតិបត្តិករទឹកស្អាត ដែលជាសមាជិករបស់សមាគមអ្នកផ្គត់ផ្គង់ទឹកស្អាតកម្ពុជា និងធ្លាប់ ឬកំពុងទទួលបានជំនួយបច្ចេកទេស ឬការគាំទ្រហិរញ្ញវត្ថុពីអង្គការ Water.org ផងដែរ។

តាមរយៈនេះ លោក លឹម មិញ នាយកប្រតិបត្តិសមាគមអ្នកផ្គត់ផ្គង់ទឹកស្អាតកម្ពុជា បានលើកឡើងថា៖ “ភាពជាដៃគូនេះ គឺជាជំហានដ៏សំខាន់មួយសម្រាប់ប្រតិបត្តិករផ្គត់ផ្គង់ទឹកស្អាតឯកជន ដែលកំពុងខិតខំអភិវឌ្ឍ និងពង្រីកសេវាកម្មផ្គត់ផ្គង់ទឹកស្អាតឱ្យបានពេញលេញក្នុងតំបន់អាជ្ញាបណ្ណរបស់ពួកគេ។ ការចូលរួមរបស់ CWA ក្នុងគម្រោងនេះ គឺដើម្បីជំរុញឱ្យសមាជិកទទួលបានឱកាសប្រើប្រាស់ហិរញ្ញប្បទានផ្លូវការ ដែលមានភាពច្បាស់លាស់ សុវត្ថិភាព និងអាចជួយបំពេញគោលដៅជាសកលក្នុងការទទួលបានទឹកស្អាតនៅឆ្នាំ ២០៣០។”

បន្ថែមពីនេះ លោកស្រី ហ្គេ សាន់តូស នាយកតំបន់អាស៊ីអាគ្នេយ៍ នៃអង្គការ Water.org មានប្រសាសន៍ថា៖​ “Water.org បានចាប់ផ្តើមដំណើរការនៅប្រទេសកម្ពុជាតាំងពីឆ្នាំ ២០២២ ហើយតាមរយៈការសហការយ៉ាងរឹងមាំ ពួកយើងបានជួយគាំទ្រប្រជាពលរដ្ឋជាង ២,១៩ លាននាក់ និងកៀរគរថវិកាបានជាង ២៨១ លានដុល្លារ ដល់វិស័យទឹកស្អាត​ និង​អនាម័យ​​។ ទោះបីជាមានវឌ្ឍនភាពគួរឱ្យកត់សម្គាល់ក៏ដោយ អត្រានៃចំនួនប្រជាជនដែលមានលទ្ធភាពទទួលបានទឹកស្អាត និងអនាម័យប្រកបដោយសុវត្ថិភាពនៅតែមិនទាន់គ្រប់គ្រាន់ ក្នុងការសម្រេចឱ្យបាននូវគោលដៅអភិវឌ្ឍន៍​ប្រកបដោយចីរភាពទី៦ (SDG 6) នៅប្រទេសកម្ពុជានៅឡើយទេ។ ដូច្នេះ Water.org មានសេចក្តីរីករាយក្នុងការគាំទ្រគម្រោងធានាឥណទានដើម្បីអភិវឌ្ឍសេវាសាធារណៈ សម្រាប់ប្រតិបត្តិករទឹកស្អាតនៅកម្ពុជា។”

គម្រោងធានាឥណទានដើម្បីអភិវឌ្ឍសេវាសាធារណៈ (UDGS) គឺជាគំរូហិរញ្ញវត្ថុថ្មីមួយដែលបង្កើតឡើងដើម្បីបង្កើនលទ្ធភាពទទួលបានហិរញ្ញប្បទានផ្លូវការរបស់ប្រតិបត្តិករទឹកស្អាតឯកជន ដោះស្រាយបញ្ហាប្រឈមលើទ្រព្យធានា និងការធានាឥណទានជាមួយនឹងលក្ខខណ្ឌអនុគ្រោះ។ ជាផ្នែកមួយនៃភាពជាដៃគូ​យុទ្ធសាស្រ្ដនេះ ភាគីទាំងបួននឹងបង្កើនកិច្ចសហប្រតិបត្ដិការក្នុងការលើកកម្ពស់ និងគាំទ្រការរីកចម្រើនរបស់​អាជីវកម្ម​​តាមរយៈ​ការផ្ដល់ហិរញ្ញប្បទានប្រតិបត្តិការ ស្របតាមគោលនយោបាយរបស់រាជរដ្ឋាភិបាល ក្នុងការ​សម្រេចគោលដៅជាសកល នៃលទ្ធភាពប្រើប្រាស់ទឹកស្អាតនៅឆ្នាំ២០៣០៕

 

 

CGCC, CWA, FTB និង Water.org បង្កើតភាពជាដៃគូយុទ្ធសាស្ត្រ ដើម្បីបង្កើនលទ្ធភាពទទួលបានហិរញ្ញប្បទានផ្លូវការ សម្រាប់គាំទ្រវិស័យទឹកស្អាតនៅកម្ពុជា

Posted on by Sorn Chhorvyvatey

(ភ្នំពេញ)៖ នៅទីស្នាក់ការកណ្តាលរបស់សាជីវកម្មធានាឥណទានកម្ពុជា (CGCC) នាថ្ងៃទី៣០ ខែតុលា ឆ្នាំ២០២៥ មានការរៀបចំកម្មវិធីចុះហត្ថលេខាលើ ១៖ កិច្ចព្រមព្រៀងធានាឥណទានជាកញ្ចប់ សម្រាប់គម្រោងធានាឥណទានដើម្បីអភិវឌ្ឍសេវាសាធារណៈ សម្រាប់ប្រតិបត្តិករទឹកស្អាតកម្ពុជារវាង សាជីវកម្មធានាឥណទានកម្ពុជា (CGCC) និងធនាគារពាណិជ្ជកម្មក្រៅប្រទេស នៃកម្ពុជា (FTB), និង២៖ អនុស្សរណៈនៃការយោគយល់គ្នា (MOU) រវាង CGCC និង សមាគមអ្នកផ្គត់ផ្គង់ទឹកកម្ពុជា (CWA), និង ៣៖ MOU រវាង CGCC និងអង្គការ Water.org។

កម្មវិធីចុះហត្ថលេខាលនេះ ត្រូវបានរៀបចំឡើង ក្រោមអធិបតីភាពលោកបណ្ឌិត ម៉ី វ៉ាន់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងលោក អ៊ុំ សុថា រដ្ឋលេខាធិការក្រសួងឧស្សាហកម្ម វិទ្យាសាស្រ្ដ បច្ចេកវិទ្យា និងនរានុវត្តន៍ និងត្រូវបានចុះហត្ថលេខាដោយ លោក ណូ លីដា អគ្គនាយក CGCC, លោក ឌិត សុចល ប្រធាននាយកប្រតិបត្តិធនាគារ FTB, លោក លឹម មិញ នាយកប្រតិបត្តិ CWA, និងលោកស្រី ហ្គេ សាន់តូស នាយកតំបន់អាស៊ីអាគ្នេយ៍ នៃអង្គការ Water.org ។ ពិធីចុះកិច្ចព្រមព្រៀងនេះ មានអ្នកចូលរួម សរុបប្រមាណ ៧០រូប ដែលជាប្រតិបត្តិករទឹកស្អាត, ថ្នាក់គ្រប់គ្រង, ព្រមទាំងបុគ្គលិកនៃស្ថាប័នទាំងបួននេះ។

គម្រោងធានាឥណទានដើម្បីអភិវឌ្ឍសេវាសាធារណៈ សម្រាប់ប្រតិបត្តិករទឹកស្អាតកម្ពុជា គឺជាគំនិតផ្តួចផ្តើមក្នុងការគាំទ្រប្រតិបតិ្តករទឹកស្អាតឱ្យទទួលបានហិរញ្ញប្បទានគ្រប់គ្រាន់ តាមរយៈការធានាឥណទានដែលមានលក្ខខណ្ឌអនុគ្រោះ។

លោក ណូ លីដា អគ្គនាយក CGCC បានឱ្យដឹងថា៖ «ការផ្គត់ផ្គង់ទឹកស្អាត គឺជាសេវាសាធារណៈចាំបាច់ និងត្រូវការពង្រីកបន្ថែមនៅកម្ពុជា សម្រាប់សុខុមាលភាពរបស់ប្រជាជន និងការអភិវឌ្ឍសង្គម-សេដ្ឋកិច្ច។ CGCC មានមោទនភាពដែលបានរៀបចំគម្រោងធានាឥណទានជាក់លាក់មួយ ដើម្បីគាំទ្រដល់ការអភិវឌ្ឍវិស័យទឹកស្អាតនៅកម្ពុជា ដោយផ្តល់ការធានាដែលមានលក្ខខណ្ឌអនុគ្រោះ។ គម្រោងនេះ អាចដាក់ឱ្យដំណើរការទៅបាន ដោយមានការ ការសហការជាមួយដៃគូពាក់ព័ន្ធសំខាន់ៗ រួមមាន ធនាគារ FTB, សមាគមអ្នកផ្គត់ផ្គង់ទឹកស្អាតកម្ពុជា និងអង្គការ Water.org។ ស្ថាប័ននីមួយៗ នឹងចូលរួមចំណែកក្នុងការអនុវត្តគម្រោងធានាឥណទានដើម្បីអភិវឌ្ឍសេវាសាធារណៈនេះ ឱ្យមានប្រសិទ្ធភាពខ្ពស់ ជាពិសេស ចូលរួមធានាថាកម្ចីមានការធានាត្រូវបានផ្តល់ជូនដល់ប្រតិបត្តិករទឹកស្អាតចំទិសដៅ ដែលមានសក្តានុពល និងមានហានិភ័យសមស្របអាចគ្រប់គ្រងបាន។ ក្នុងដំណាក់កាលដំបូងនៃគម្រោងធានាឥណទាននេះ CGCC និង FTB ប្តេជ្ញាផ្តល់កម្ចីមានការធានាសរុប ៥ លានដុល្លារអាមេរិក ជូនដល់បណ្តាប្រតិបត្តិករទឹកស្អាតនៅកម្ពុជា»។

តាមរយៈគម្រោងនេះ CGCC នឹងផ្តល់ការធានាលើកម្ចីដែលបញ្ចេញដោយធនាគារ FTB ដែលជាធនាគារដៃគូរបស់ CGCC ចាប់ពីពីឆ្នាំ២០២១ មក ជូនដល់ប្រតិបត្តិករទឹកស្អាតនៅកម្ពុជា។

លោក ឌិត សុចល ប្រធាននាយកប្រតិបត្តិធនាគារ FTB បានឱ្យដឹងថា៖ «ការចុះហត្ថលេខាលើកិច្ចព្រមព្រៀងធានាឥណទាន និងអនុស្សរណៈនៃការយោគយល់គ្នាលើគម្រោងធានាឥណទានដើម្បីអភិវឌ្ឍ សេវាសាធារណៈសម្រាប់ប្រតិបត្តិករទឹកស្អាតឯកជន រវាងធនាគារ FTB និង CGCC ឆ្លុះបញ្ចាំងឱ្យឃើញពីទំនាក់ទំនងដ៏ល្អ ចាប់តាំងពីឆ្នាំ ២០២១ ដោយបានពង្រីកកិច្ចសហការជាបន្តបន្ទាប់ ជាមួយការអនុវត្តទំហំឥណទានសរុបប្រមាណជាង ១៩លានដុល្លារអាមេរិក ក្នុងនោះឥណទានសម្រាប់ប្រតិបត្តិករទឹកស្អាត សរុបប្រមាណជាង ២,៣ លានដុល្លារអាមេរិក។ តាមរយៈការសហការនេះ ស្ថាប័នទាំងពីរបានព្យាយាមខិតខំ និងតែងតែស្វែងយល់បន្ថែមពីការច្នៃប្រឌិតថ្មីៗលើបញ្ហាពាក់ព័ន្ធនឹងវិស័យទឹកស្អាត និងការសហការរួមគ្នាឆ្ពោះទៅរកការគ្រប់គ្រងប្រព័ន្ធទឹកស្អាត នៅប្រទេសកម្ពុជាប្រកបដោយ និរន្តរភាព»។

ដើម្បីកាត់បន្ថយហានិភ័យ និងកំណត់ប្រតិបត្តិករទឹកស្អាតឱ្យបានចំគោលដៅ CGCC និង FTB នឹងសហការគ្នាផ្តល់កម្ចីមានការធានាជូនដល់ប្រតិបត្តិករទឹកស្អាត ដែលជាសមាជិករបស់សមាគមអ្នកផ្គត់ផ្គង់ទឹកស្អាតកម្ពុជា និងធ្លាប់ ឬកំពុងទទួលបានជំនួយបច្ចេកទេស ឬការគាំទ្រហិរញ្ញវត្ថុពីអង្គការ Water.org ផងដែរ។

តាមរយៈនេះ លោក លឹម មិញ នាយកប្រតិបត្តិសមាគមអ្នកផ្គត់ផ្គង់ទឹកស្អាតកម្ពុជា បានលើកឡើងថា៖ «ភាពជាដៃគូនេះ គឺជាជំហានដ៏សំខាន់មួយសម្រាប់ប្រតិបត្តិករផ្គត់ផ្គង់ទឹកស្អាតឯកជន ដែលកំពុងខិតខំអភិវឌ្ឍ និងពង្រីកសេវាកម្មផ្គត់ផ្គង់ទឹកស្អាតឱ្យបានពេញលេញក្នុងតំបន់អាជ្ញាបណ្ណរបស់ពួកគេ។ ការចូលរួមរបស់ CWA ក្នុងគម្រោងនេះ គឺដើម្បីជំរុញឱ្យសមាជិកទទួលបានឱកាសប្រើប្រាស់ហិរញ្ញប្បទានផ្លូវការ ដែលមានភាពច្បាស់លាស់ សុវត្ថិភាព និងអាចជួយបំពេញគោលដៅជាសកលក្នុងការទទួលបានទឹកស្អាតនៅឆ្នាំ ២០៣០»។

បន្ថែមពីនេះ លោកស្រី ហ្គេ សាន់តូស នាយកតំបន់អាស៊ីអាគ្នេយ៍ នៃអង្គការ Water.org បានថ្លែងថា៖ «Water.org បានចាប់ផ្តើមដំណើរការនៅប្រទេសកម្ពុជាតាំងពីឆ្នាំ ២០២២ ហើយតាមរយៈការសហការយ៉ាងរឹងមាំ ពួកយើងបានជួយគាំទ្រប្រជាពលរដ្ឋជាង ២,១៩ លាននាក់ និងកៀរគរថវិកាបានជាង ២៨១ លានដុល្លារ ដល់វិស័យទឹកស្អាត និងអនាម័យ។ ទោះបីជាមានវឌ្ឍនភាពគួរឱ្យកត់សម្គាល់ក៏ដោយ អត្រានៃចំនួនប្រជាជនដែលមានលទ្ធភាពទទួលបានទឹកស្អាត និងអនាម័យប្រកបដោយសុវត្ថិភាពនៅតែមិនទាន់គ្រប់គ្រាន់ ក្នុងការសម្រេចឱ្យបាននូវគោលដៅអភិវឌ្ឍន៍ប្រកបដោយចីរភាពទី៦ (SDG 6) នៅប្រទេសកម្ពុជានៅឡើយទេ។ ដូច្នេះ Water.org មានសេចក្តីរីករាយក្នុងការគាំទ្រគម្រោងធានាឥណទានដើម្បីអភិវឌ្ឍសេវាសាធារណៈ សម្រាប់ប្រតិបត្តិករទឹកស្អាតនៅកម្ពុជា»។

គម្រោងធានាឥណទានដើម្បីអភិវឌ្ឍសេវាសាធារណៈ (UDGS) គឺជាគំរូហិរញ្ញវត្ថុថ្មីមួយដែលបង្កើតឡើងដើម្បីបង្កើនលទ្ធភាពទទួលបានហិរញ្ញប្បទានផ្លូវការរបស់ប្រតិបត្តិករទឹកស្អាតឯកជន ដោះស្រាយបញ្ហាប្រឈមលើទ្រព្យធានា និងការធានាឥណទានជាមួយនឹងលក្ខខណ្ឌអនុគ្រោះ។ ជាផ្នែកមួយនៃភាពជាដៃគូយុទ្ធសាស្រ្ដនេះ ភាគីទាំងបួននឹងបង្កើនកិច្ចសហប្រតិបត្ដិការក្នុងការលើកកម្ពស់ និងគាំទ្រការរីកចម្រើនរបស់អាជីវកម្មតាមរយៈការផ្ដល់ហិរញ្ញប្បទានប្រតិបត្តិការ ស្របតាមគោលនយោបាយរបស់រាជរដ្ឋាភិបាល ក្នុងការសម្រេចគោលដៅជាសកល នៃលទ្ធភាពប្រើប្រាស់ទឹកស្អាតនៅឆ្នាំ២០៣០។

សូមជម្រាបថា CGCC គឺជាសហគ្រាសសាធារណៈ ក្រោមអាណាព្យាបាលបច្ចេកទេស និងហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ ដែលមានបេសកកម្មចម្បងក្នុងការផ្តល់ការធានាឥណទាន ដើម្បីបង្កើនបរិយាបន្នហិរញ្ញវត្ថុ និងអភិវឌ្ឍសហគ្រាសធុនតូច និងមធ្យម។ ផលិតផល និងសេវាកម្មចម្បងរបស់ CGCC រួមមាន ការធានាកម្ចីក្នុងវិស័យធនាគារ, ការធានាសញ្ញាបណ្ណក្នុងវិស័យមូលបត្រ, និងកម្មវិធីកសាងសមត្ថភាពសហគ្រិនរបស់ CGCC ដែលហៅកាត់ថា (EPIC)។ គិតត្រឹមបំណាច់ខែកញ្ញា ឆ្នាំ២០២៥ CGCC បានអនុម័តការធានាឥណទាន ចំនួន ៧,៣២៧ គណនី លើកម្ចីអាជីវកម្ម ប្រមាណ ៤២០,២៦ លានដុល្លារ នៅទូទាំងប្រទេស។ សម្រាប់ព័ត៌មានអំពីគម្រោង UDGS សូមចូលទៅកាន់គេហទំព័រ www.cgcc.com.kh ឬទំនាក់ទំនង CGCC តាមរយៈលេខទូរស័ព្ទ៖ 023 722 123។

ធនាគារពាណិជ្ជក្នុងស្រុកទី១នៅកម្ពុជា ដែលទទួលបានការទុកចិត្តចាប់តាំងពីឆ្នាំ១៩៧៩ គឺធនាគារ FTB បានដើរតួនាទីយ៉ាងសំខាន់ក្នុងការជួយលើកកម្ពស់ និងអភិវឌ្ឍទីផ្សារ សេដ្ឋកិច្ចនិងសង្គមជាតិតាមរយៈការជំរុញ គាំទ្រ និងផ្តល់សេវាហិរញ្ញវត្ថុជាមូលដ្ឋានចាំបាច់ដល់អតិថិជន អាជីវករ និងពាណិជ្ជករក្នុងស្រុក។ គិតត្រឹមឆ្នាំ២០២៥ ទ្រព្យសកម្មសរុបរបស់ធនាគារបានកើនឡើងដល់ ២,៣ ពាន់លានដុល្លារអាមេរិក។ ធនាគារ FTB នឹងបន្តជួយគាំទ្រអតិថិជនឱ្យកាន់តែរីកចម្រើន និងមានវិបុលភាពបន្ថែមទៀត ក្រោមចក្ខុវិស័យរយៈពេលវែងរបស់ខ្លួន ដើម្បីក្លាយជាធនាគារពាណិជ្ជដែលទទួលបានការពេញចិត្តជាងគេនៅក្នុងព្រះរាជាណាចក្រកម្ពុជា។

សមាគមអ្នកផ្គត់ផ្គង់ទឹកស្អាតកម្ពុជា គឺជាសមាគមអព្យាក្រឹត មិនស្វែងរកប្រាក់កម្រៃជាឯកជន។ សមាគមត្រូវបានបង្កើតឡើងក្រោមជំនួយបច្ចេកទេស និងហិរញ្ញវត្ថុ របស់គម្រោង MSME ឧបត្ថម្ភដោយ ទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ (USAID) នៅថ្ងៃទី២៨ ខែធ្នូ ឆ្នាំ២០១១ ដោយមានស្ថាបនិកចំនួន ៣រូប និងត្រូវបានក្រសួងមហាផ្ទៃសម្រេចអនុញ្ញាតឱ្យចុះឈ្មោះក្នុងបញ្ជីសមាគមតាមរយៈលិខិតលេខ ១០៧៧ សជណ ចុះថ្ងៃទី០៦ ខែសីហា ឆ្នាំ២០១២។ ក្រសួងមហាផ្ទៃបានចេញសេចក្តីប្រកាសលេខ ២៩០១ ប្រក ចុះថ្ងៃទី០៨ ខែវិច្ឆិកា ឆ្នាំ២០២១ សម្រេចចុះឈ្មោះសមាគមអ្នកផ្គត់ផ្គង់ទឹកស្អាតកម្ពុជា ឡើងវិញក្នុងបញ្ជីសមាគមសម្រាប់នីតិបុគ្គល នៅក្រសួងមហាផ្ទៃ។
សមាគម បង្កើតឡើងក្នុងគោលបំណងប្រមូលផ្តុំអ្នករួមអាជីព ឬរួមវិជ្ជាជីវៈទាំងអស់ក្នុងវិស័យផ្គត់ផ្គង់ទឹកស្អាតនៅក្នុងព្រះរាជាណាចក្រកម្ពុជា ដោយមិនប្រកាន់និន្នាការនយោបាយអ្វីឡើយ។ ត្រឹមដំណាច់ត្រីមាសទី៣ ឆ្នាំ២០២៥ សមាគម មានសមាជិក សរុបចំនួន ៣៤២ ក្នុងនោះសមាជិកអាជីពចំនួន ២៨៦ស្ថានីយ និងសមាជិកគាំទ្រចំនួន ៥៦ ដែលបាននឹងកំពុងប្រតិបត្តិការនៅក្នុង ២៣រាជធានី/ខេត្ត នៃព្រះរាជាណាចក្រកម្ពុជា។

Water.org គឺជាអង្គការមិនស្វែងរកប្រាក់ចំណេញសកលមួយដែលកំពុងធ្វើការ ដើម្បីជំរុញឱ្យមានទឹកស្អាត និងអនាម័យមកកាន់ពិភពលោក និងធ្វើឱ្យវាមានសុវត្ថិភាព អាចប្រើប្រាស់បាន និងសន្សំសំចៃ។ អង្គការ Water.org បានបង្កើតឡើងដោយលោក Gary White និងលោក Matt Damon ដើម្បីជាអ្នកត្រួសត្រាយផ្លូវសម្រាប់ដំណោះស្រាយហិរញ្ញវត្ថុដែលជំរុញដោយទីផ្សារចំពោះវិបត្តិទឹកជាសកល។ អង្គការ Water.org ជួយប្រជាជនឱ្យទទួលបានទឹកស្អាត និងអនាម័យតាមរយៈហិរញ្ញប្បទានដែលមានតម្លៃសមរម្យ ដូចជាប្រាក់កម្ចីខ្នាតតូចជាដើម។ ស្ថាប័នកំពូលរបស់អង្គការ ក៏បានសហការជាមួយអ្នកផ្តល់សេវាទឹកស្អាតផងដែរ ដែលអាចឱ្យពួកគេពង្រីកសេវាកម្មរបស់ពួកគេដើម្បីបង្កើនលទ្ធភាពទទួលបានទឹកស្អាត និងអនាម័យ៕

Credit to: Fresh News, ចេញផ្សាយថ្ងៃទី៣១ ខែតុលា ឆ្នាំ២០២៥

 

កម្មវិធីកសាងសមត្ថភាព និងជំនាញសម្រាប់សហគ្រាសធុនតូច និងមធ្យម (BCC) ឆ្នាំ២០២៥ នៅរាជធានីភ្នំពេញ

Posted on by Sorn Chhorvyvatey

នាថ្ងៃទី១៦ ខែតុលា ឆ្នាំ២០២៥ សាជីវកម្មធានាឥណទានកម្ពុជា (CGCC) និង ធនាគារ មេយប៊ែង ខេមបូឌា​ (Maybank) បានសហការគ្នាជាលើកទី៧ ក្នុងការរៀបចំកម្មវិធីកសាងសមត្ថភាព និងជំនាញសម្រាប់សហគ្រាសធុនតូច និងមធ្យម (BCC) ស្ដីអំពី «ការកសាងពាណិជ្ជសញ្ញា និងផលិតផលកម្ពុជា» ដែលមានការចូលរួមពីម្ចាស់សិប្បកម្ម ម្ចាស់សហគ្រាសធុនតូច និងមធ្យម ប្រមាណ ៤០រូប ព្រមទាំងអ្នកប្រឹក្សាហិរញ្ញវត្ថុ ថ្នាក់ដឹកនាំ និងបុគ្គលិកនៃស្ថាប័នទាំងពីរ។

កម្មវិធីនេះ មានគោលបំណងផ្ដល់នូវគន្លឹះ និងវិធីសាស្ត្រជាក់ស្តែង សម្រាប់ការកសាងអត្តសញ្ញាណម៉ាកដែលគួរឱ្យទុកចិត្ត និងមានការប្រកួតប្រជែង សម្រាប់ទីផ្សារស្រុក និងក្រៅស្រុក។ បន្ថែមពីនេះ ក៏មាន ការចែករំលែកពីការពង្រឹងសមត្ថភាពលើប្រតិបត្តិការអាជីវកម្ម រួមទាំងការគ្រប់គ្រង ការពង្រីកទីផ្សារ ការផលិត និងគ្រប់គ្រងលំហូរសាច់ប្រាក់ និងរបាយការណ៍ហិរញ្ញវត្ថុផងដែរ។  

ជារបៀបវារៈនៃកម្មវិធី សិក្ខាកាមបានស្វែងយល់ពីវគ្គចែករំលែក ពីវាគ្មិនកិត្តិយសកញ្ញា ដាវ សាលីន ក្រោមប្រធានបទ «មិនត្រឹមតែជាម៉ាកសញ្ញា តែជាសាច់រឿង ដែលបង្កើតអត្តសញ្ញាណឱ្យម៉ាកសញ្ញានៅកម្ពុជា» និងឯកឧត្តម លាង ឡេង អគ្គនាយកនៃក្រុមហ៊ុន លាង ឡេង ស៊ស ឯ.ក ក្រោមប្រធានបទ «ការបង្កើនគុណភាព និងសុវត្ថិភាពផលិតផលក្នុងស្រុក»។

 

ទន្ទឹមនឹងនេះ ក៏មានការចូលរួមពីវាគ្មិនកិត្តិយស កញ្ញា នួន ស្រីនាង នាយិកាផ្នែកគ្រប់គ្រង់របាយការណ៍ហិរញ្ញវត្ថុ និងតារាងតុល្យការ ដែលកញ្ញាបានចែករំលែកលើប្រធានបទ «ការកត់ត្រាបញ្ជីគណនេយ្យ និងកម្រងរបាយការណ៍ហិរញ្ញវត្ថុ» និងលោក តាំង ហុកឡេង នាយកឥណទានអាជីវកម្មខ្នាតតូច និងមធ្យម នៃធនាគារ មេយប៊ែង ខេមបូឌា បានចែករំលែកនូវប្រធានបទ «ការគាំទ្រពាណិជ្ជសញ្ញាក្នុងស្រុក តាមរយៈដំណោះស្រាយហិរញ្ញប្បទានសម្រាប់សហគ្រាសធុនតូច និងមធ្យមរបស់ធនាគារ មេយប៊ែង»។

 

CGCC មានមោទនភាពក្នុងការចាប់ដៃគូជាមួយធនាគារ Maybank ក្នុងបេសកកម្មការជួយដល់ការអភិវឌ្ឍសហគ្រាសខ្នាតតូច និងមធ្យម នៅកម្ពុជា។ គិតត្រឹមបំណាច់ខែកញ្ញា ឆ្នាំ២០២៥ CGCC និង Maybank បានសហការផ្ដល់កម្ចីអាជីវកម្មប្រមាណ ប្រមាណជាង ២៨ លានដុល្លាសហរដ្ឋអាមេរិក តាមរយៈគម្រោងធានាឥណទានរបស់CGCC។ វគ្គកសាងសមត្ថភាពនេះ ត្រូវបានរៀបចំឡើងជាលើកទី ២ ក្នុងឆ្នាំ២០២៥ ដែលក្នុងខែសីហាកន្លងមកនេះ ត្រូវបានរៀបចំនៅខេត្តបាត់ដំបង ដើម្បីចែករំលែកចំណេះដឹងអំពីការត្រៀមខ្លួនសម្រាប់ទីផ្សារ និងភាពជាដៃគូអាជីវកម្មយុទ្ធសាស្ត្រនៅក្នុងបរិបទពាណិជ្ជកម្មដែលកំពុងផ្លាស់ប្តូរ ដល់សហគ្រិននាំចេញអង្ករ ម្ចាស់រោងម៉ាស៊ីនកិនស្រូវ ដែលអញ្ជើញមកពីតំបន់ភូមិភាគពាយ័ព្យនៃប្រទេសកម្ពុជា៕

 

CGCC ចូលរួមកិច្ចពិភាក្សាពិសេសស្ដីពី ការទទួលបានហិរញ្ញប្បទានសម្រាប់ប្រតិបត្តិករផ្គត់ផ្គង់ទឹកស្អាត ក្នុងកម្មវិធី CamWater 2025

Posted on by Sorn Chhorvyvatey

នៅថ្ងៃទី១៤ ខែតុលា ឆ្នាំ២០២៥ លោកស្រី ពិន ម៉ានីកា ប្រធានជាន់ខ្ពស់ នៃការិយាល័យទីផ្សារ និងអភិវឌ្ឍន៍អាជីវកម្ម បានចូលរួមជាវាគ្មិនកិត្តិយសនៅក្នុងកិច្ចពិភាក្សានៅក្នុងព្រឹត្តិការណ៍សនិ្នសីទ និងពិព័រណ៍វិស័យទឹកស្អាតអន្តរជាតិលំដាប់លេខ១ នៅកម្ពុជា CamWater 2025 ដែលប្រព្រឹត្តិឡើងនៅ មណ្ឌលសន្និបាត និងពិព័រណ៍កោះពេជ្រ។

កិច្ចពិភាក្សានេះបានប្រមូលផ្តុំអ្នកដឹកនាំ និងអ្នកជំនាញពីវិស័យទឹកស្អាត និងវិស័យហិរញ្ញវត្ថុ ដើម្បីផ្លាស់ប្តូរគំនិត និងស្វែងរកដំណោះស្រាយអនុវត្តក្នុងការកែលម្អឱកាសទទួលបានហិរញ្ញប្បទានសម្រាប់ប្រតិបត្តិករទឹកស្អាតនៅកម្ពុជា។ 

នៅក្នុងឱកាសនោះដែរលោកស្រី ពិន ម៉ានីកា ក៏បានលើកឡើងអំពី យន្ដការរបស់ CGCC សំដៅលើការធានាឥណទាន ក្នុងការជួយសម្រួលដល់ស្ថាប័នហិរញ្ញវត្ថុក្នុងការបញ្ចេញកម្ចី ដល់ប្រតិបត្តិករផ្គត់ផ្គង់ទឹកស្អាតដើម្បីទទួលបានហិរញ្ញប្បទានបន្ថែមដើម្បីជំរុញការវិនិយោគក្នុងវិស័យទឹកស្អាតនៅកម្ពុជា។

 

ចូលរួមក្នុងពិធីបិទបញ្ចប់គម្រោងអភិវឌ្ឍន៍ជលផលក្រោយប្រមូលផល (CAPFISH-CAPTURE)

Posted on by Sorn Chhorvyvatey

កាលពីថ្ងៃទី១៣ ខែតុលា ឆ្នាំ២០២៥ លោកស្រី សាន សុខរីណា ប្រធានជាន់ខ្ពស់ នៃការិយាល័យអភិវឌ្ឍផលិតផល និងសហប្រតិបត្តិការ តំណាងលោក ណូ លីដា អគ្គនាយកនៃសាជីវកម្មធានាឥណទានកម្ពុជា បានអញ្ជើញចូលរួមក្នុងពិធីបិទបញ្ចប់គម្រោងអភិវឌ្ឍន៍ជលផលក្រោយប្រមូលផល (CAPFISH-CAPTURE) ដែលរៀបចំឡើងដោយអង្គការ UNIDO ក្រោមអធីបតីភាពដ៏ខ្ពង់ខ្ពស់របស់ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ, ឯកឧត្តម អ៊ីហ្គ័រ ឌ្រីសម៉ាន់ (Igor DRIESMANS) ឯកអគ្គរដ្ឋទូតសហភាពអឺរ៉ុបប្រចាំព្រះរាជាណាចក្រកម្ពុជា និងលោក ដេហ្សេណេ តេហ្សេរ៉ា(Dejene TEZERA) ប្រធាននាយកដ្ឋាននៃអង្គការយូនីដូ(UNIDO)។

គម្រោង CAPFISH CAPTURE នេះបានរួមចំណែកយ៉ាងសកម្មក្នុងការជំរុញកំណើនវិស័យជលផលនៅកម្ពុជា តាមរយៈការលើកកម្ពស់ សុវត្ថិភាពម្ហូបអាហារ បរិយាបន្នសហគ្រិនភាព និងការអភិវឌ្ឍផ្នែកឧស្សាហកម្មប្រកបដោយចីរភាព។

 

សិក្ខាសាលាបច្ចេកទេសបិទបញ្ចប់គម្រោង CAPFish-Capture (លទ្ធផលទី២) ស្តីពី ការជំរុញសមត្ថភាពប្រកួតប្រជែង ដើម្បីកំណើនអាជីវកម្មក្នុងវិស័យជលផលកាន់តែប្រសើរឡើងនៅកម្ពុជា

Posted on by Sorn Chhorvyvatey

នៅថ្ងៃទី៨ ខែតុលា ឆ្នាំ២០២៥ លោក ណូ លីដា អគ្គនាយក CGCC និងលោកស្រី សាន សុខរីណា ប្រធានជាន់ខ្ពស់ទទួលបន្ទុកការិយាល័យ អភិវឌ្ឍន៍ផលិតផល និងសហប្រតិបត្តិការរបស់​ CGCC បានចូលរួមក្នុងសិក្ខាសាលាបច្ចេកទេសបិទបញ្ចប់គម្រោង CAPFish-Capture (លទ្ធផលទី២) ក្រោមប្រធានបទ “ការជំរុញសមត្ថភាពប្រកួតប្រជែង ដើម្បីកំណើនអាជីវកម្មក្នុងវិស័យជលផលកាន់តែប្រសើរឡើងនៅកម្ពុជា” ដែលរៀបរៀបចំឡើងដោយអង្គការ UNIDO សហការជាមួយរដ្ឋបាលជលផល (FiA) និងសហភាពអឺរ៉ុប ក្រោមការអញ្ជើញជាអធិបតីភាពដោយ ឯកឧត្តម ហាស់ សារ៉េត រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងមានការចូលរួមពីអ្នកបង្កើតគោលនយោបាយ ដៃគូអភិវឌ្ឍន៍ និងអ្នកតំណាងផ្នែកឯកជនរួមគ្នាជាច្រើន ក្នុងគោលបំណងពិនិត្យមើលសមិទ្ធផលគម្រោង ចែករំលែកមេរៀន និងស្វែងយល់ពីយុទ្ធសាស្ត្រសម្រាប់កំណើនវិស័យឯកជនប្រកបដោយនិរន្តរភាពក្នុងវិស័យជលផលរបស់កម្ពុជា។

នាឱកាសនោះដែរ លោក ណូ លីដា ក៏បានចូលរួមជាវាគ្មិនកិត្តិយសលើកិច្ចពិភាក្សាទី១ ក្រោមប្រធានបទ៖ “ការគាំទ្រផ្នែកសុវត្ថិភាពម្ហូបអាហារ និងសហហិរញ្ញប្បទានដើម្បីជំរុញការប្រកួតប្រជែងរបស់វិស័យឯកជន” រួមជាមួយនឹងតំណាងមកពីរដ្ឋបាលជលផល តំណាងគ្រឹះស្ថានហិរញ្ញវត្ថុចូលរួម អ្នកជំនាញអន្តរជាតិផ្នែកអភិវឌ្ឍវិស័យឯកជន  ដែលផ្តោតលើការលើកកម្ពស់ការផ្តល់ហិរញ្ញប្បទានខ្សែសង្វាក់តម្លៃ ការអនុលោមតាមសុវត្ថិភាពចំណីអាហារ និងការប្រកួតប្រជែង ដើម្បីពង្រឹងលទ្ធភាពទទួលបានទីផ្សារសម្រាប់ផលិតផលជលផលកម្ពុជា។

ជាមួយគ្នានេះលោកស្រី សាន សុខរីណា ក៏បានចូលរួមជាវាគ្មិនកិត្តិយសលើកិច្ចពិភាក្សាទី២ ក្រោមប្រធានបទ៖ “ការគាំទ្រផ្នែកសេវាកម្មអភិវឌ្ឍអាជីវកម្ម និងការចូលរួមរបស់សមាគមនក្នុងការអភិវឌ្ឍវិស័យឯកជនដើម្បីជំរុញកំណើនប្រកបដោយបរិយាប័ន្ន និងចីរភាព” ដែលផ្ដោតទៅលើការយល់ដឹងអំពីសារៈសំខាន់របស់ផែនការអាជីវកម្មសម្រាប់សហគ្រាសជលផលនៅកម្ពុជាក្នុងការទទួលបានហិរញ្ញប្បទានដើម្បីគាំទ្រដល់ការអភិវឌ្ឍអាជីវកម្មជលផលប្រកបដោយនិរន្តរភាព។

សិក្ខាសាលាបានបញ្ចប់ដោយមានការទទួលស្គាល់ពីអ្នករួមចំណែកសំខាន់ៗ និងអ្នកដឹកនាំនៃការផ្លាស់ប្តូរ ដែលបានគាំទ្រការកែលម្អខ្សែសង្វាក់តម្លៃ និងកំណើនអាជីវកម្មរួមបញ្ចូល។ តាមរយៈការចូលរួមយ៉ាងសកម្មក្នុងកិច្ចពិភាក្សានេះ CGCC បានបញ្ជាក់ជាថ្មីពីការប្តេជ្ញាចិត្ត ក្នុងការជំរុញភាពច្នៃប្រឌិត ភាពជាដៃគូ និងភាពប្រកួតប្រជែងក្នុងខ្សែសង្វាក់តម្លៃជលផលរបស់កម្ពុជា។