តំណាងក្រសួងសេដ្ឋកិច្ច និងហិរញ្ញវត្ថុ / ឯកឧត្តម ម៉ី វ៉ាន់ បច្ចុប្បន្ន ជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការ នៃអគ្គលេខាធិការដ្ឋាន នៃអាជ្ញាធរសេវាហិរញ្ញវត្ថុមិនមែនធនាគារ។ ឯកឧត្តមបានចាប់ផ្តើមវិថីការងារជាមួយនឹងក្រសួងសេដ្ឋកិច្ចនិងហិរញ្ញវត្ថុ ចាប់តាំងពីឆ្នាំ១៩៩៤ មកម្ល៉េះ។ នៅក្នុងឆ្នាំ១៩៩៩ ឯកឧត្តមត្រូវបានតែងតាំងជាជំនួយការរបស់ រដ្ឋលេខាធិការ នៃក្រសួងសេដ្ឋកិច្ច និងហិរញ្ញវត្ថុ ហើយក្រោយមក នៅក្នុងឆ្នាំ២០០២ ឯកឧត្តមត្រូវបានតែងតាំងជាប្រធាននាយកដ្ឋានឧស្សាហកម្មហិរញ្ញវត្ថុ នៃក្រសួងសេដ្ឋកិច្ចនិងហិរញ្ញវត្ថុ និងបានក្លាយជាអគ្គនាយកនៃអគ្គនាយកដ្ឋានឧស្សាហកម្មហិរញ្ញវត្ថុ នៅក្នុងឆ្នាំ២០១៣។ ឯកឧត្តមបានបញ្ចប់ថ្នាក់បណ្ឌិត ផ្នែកគ្រប់គ្រងធុរកិច្ច ពីសាកលវិទ្យាល័យ PRESTONE University សហរដ្ឋអាមេរិក នៅឆ្នាំ២០០៩ អនុបណ្ឌិតផ្នែកសេដ្ឋកិច្ចនយោបាយ នៅឆ្នាំ ១៩៩៩ ពីសាកលវិទ្យាល័យ D'AUVERGNE ប្រទេសបារាំង និងទទួលបានបរិញ្ញាបត្រផ្នែកសេដ្ឋកិច្ច នៅឆ្នាំ ១៩៩៣ និងច្បាប់ពាណិជ្ជកម្ម នៅឆ្នាំ ១៩៩៤ នៅប្រទេសកម្ពុជា។