កាលពីថ្ងៃទី១៤ ដល់ថ្ងៃទី២៧ ខែកញ្ញា ឆ្នាំ២០២៥ លោក ញឹម សូរិយា នាយកនាយកដ្ឋានហិរញ្ញវត្ថុ និងវិភាគអាជីវកម្ម និងកញ្ញា ជុំ សិលារ័ត្ន ប្រធានការិយាល័យអភិវឌ្ឍន៍អាជីវកម្ម  (ធានាសញ្ញាប័ណ្ណ) របស់​ CGCC បានតំណាងឱ្យកម្ពុជាចូលរួមក្នុង កម្មវិធី KOICA Fellowship Program on Capacity Building on Innovative Financing on MSMEs (2025–2027)  នៅទីក្រុងសេអ៊ូល សាធារណរដ្ឋកូរ៉េខាងត្បូង។

កម្មវិធីនេះរៀបចំឡើងដោយ Korea International Cooperation Agency (KOICA) សហការជាមួយ Korea Credit Guarantee Fund (KODIT) ដោយមានការចូលរួមពីគ្រូបង្គោលដែលមានជំនាញនិងបទពិសោធន៍ជាច្រើនរូប និងសិក្ខាកាមពីស្ថាប័នពាក់ព័ន្ធនឹងវិស័យហិរញ្ញវត្ថុ និងសហគ្រាសធុនតូចនិងមធ្យមនៃបណ្តាប្រទេសចំនួន៦ផ្សេងទៀត ដើម្បីផ្សព្វផ្សាយចំណេះដឹង និងចែករំលែកបទពិសោធន៍ដោយផ្តោតសំខាន់លើយន្តការធានាឥណទាននិងហិរញ្ញប្បទានបៃតង។

ក្នុងរយៈពេលពីរសប្តាហ៍ កម្មវិធីនេះបានផ្តល់ឱកាសឱ្យសិក្ខាកាមទទួលបានចំណេះដឹង តាមរយៈសិក្ខាសាលា និងទស្សនកិច្ចសិក្សា ពាក់ពន្ធ័នឹងប្រធានបទដូចជា៖

• ការអភិវឌ្ឍប្រកបដោយចីរភាព និង ហិរញ្ញវត្ថុអន្តរកាល
• យន្តការហិរញ្ញវត្ថុបៃតង និងការរួមបញ្ចូល ESG នៅក្នុងប្រព័ន្ធហិរញ្ញវត្ថុ
• ផែនទីផ្លូវនៃការផ្លាស់ប្តូរទៅកាន់សេដ្ឋកិច្ចបៃតងរបស់កូរ៉េ និង Green Taxonomy
• ឧបករណ៍ជំនួយហិរញ្ញវត្ថុដូចជា Loan Guarantees, P-CBOs (Primary Collateralized Bond Obligations), និង Public-Private Partnership Guarantees
• ការវាស់វែងកាបូន និងប្រព័ន្ធ MRV (Monitoring, Reporting, and Verification)
• ដំណើរទស្សនកិច្ចទៅកាន់ក្រុមហ៊ុនអាជីវកម្មបៃតង និងសហគ្រិនច្នៃប្រឌិត ដែលទទួលបានការគាំទ្រពីស្ថាប័នហិរញ្ញវត្ថុកូរ៉េ

កម្មវិធីនេះបានបង្ហាញពីប្រព័ន្ធធានាឥណទានដ៏រឹងមាំរបស់កូរ៉េ និងវិធីសាស្ត្រច្នៃប្រឌិតនានាដើម្បីកាត់បន្ថយហានិភ័យក្នុងការផ្តល់ហិរញ្ញវត្ថុសម្រាប់ MSMEs។ CGCC ក្នុងនាមជាស្ថាប័នក្នុងស្រុកមួយដែលផ្តល់ការធានាឥណទានសម្រាប់អាជីវកម្ម មានបំណងយកបទពិសោធន៍ និងចំណេះដឹងដែលទទួលបានក្នុងកម្មវិធីនេះ ដើម្បីបន្តពង្រឹងយុទ្ធសាស្ត្រ និងការអភិវឌ្ឍផលិតផល របស់ខ្លួន ជាពិសេសក្នុងហិរញ្ញប្បទានបៃតង (Green Finance) និង ហិរញ្ញវត្ថុប្រកបដោយនិរន្តរភាព (Sustainable Finance) ដើម្បីពង្រឹងបន្ថែមនូវការបង្កើនបរិយាបន្នហិរញ្ញវត្ថុ បង្កើនភាពធន់នឹងហានិភ័យ និងអភិវឌ្ឍសេដ្ឋកិច្ចជាតិឱ្យមានភាពបៃតង និងចីរភាព។