CGCC

Menu
Menu
Menu

Category: ស្វែងយល់ពីការធានាឥណទាន

ជួបជាមួយសហគ្រិនស្រ្ដីឆ្នើមក្នុងវិស័យស្រូវអង្ករ៖ ពីអាជីវកម្មបែបគ្រួសារ ទៅកាន់ទីផ្សារអន្ដរជាតិ

Posted on by Sorn Chhorvyvatey

លោកស្រី ឡ សេងលាភ សព្វថ្ងៃជាប្រធានក្រុមហ៊ុនកិនស្រូវ សេកមាស និងជាស្ថាបនិកក្រុមហ៊ុន ឡ អៀកហេង សេកមាស រ៉ាយស៍។ លោកស្រី បានបន្ដវេនមុខរបរកិនស្រូវពីលោកឪពុករបស់លោកស្រី ចាប់តាំងពីឆ្នាំ១៩៩៤ មក ដែលជាអាជីវកម្មខ្នាតតូចលក្ខណៈគ្រួសារ។ ដោយសង្កេតឃើញពីសក្ដានុពល, តម្រូវការទីផ្សារ, និងក្ដីស្រមៃក្នុងការនាំចេញអង្ករទៅក្រៅប្រទេស លោកស្រីបានចាប់ផ្ដើមគំនិតអភិវឌ្ឍ និងពង្រីកអាជីវកម្មក្នុងឆ្នាំ២០១១។

លោកស្រីបានលើកឡើងពីប្រវត្តិនៃការចាប់ផ្តើមការនាំចេញអង្ករថា លោកស្រីធ្លាប់បានប្រើប្រាស់កម្ចីជាទុនបង្វិលប្រមូលទិញស្រូវ ដែលអាចបង្កើនចំនួនស្ដុកដែលលោកស្រីអាចលក់ចេញនូវទំហំធំជាងមុន ពោលក្នុងឆ្នាំ២០១៤ លោកស្រី បានសម្រេចក្ដីស្រមៃក្នុងការនាំចេញអង្ករជាលើកដំបូង។ សព្វថ្ងៃ ក្រុមហ៊ុនរបស់លោកស្រី បាននាំចេញអង្ករទៅកាន់អឺរ៉ុប សហរដ្ឋអាមេរិក ហើយភាគច្រើនទៅទីផ្សារប្រទេសចិន។

លោកស្រីបានឱ្យដឹងថា ការពង្រីកអាជីវកម្ម ពិតជាមានភាពលំបាក ដោយសារលោកស្រីមានដើមទុនតិច និងចំណេះដឹងអំពីស្ដង់ដាគ្រឿងម៉ាស៊ីន នៅមានកម្រិត។ ប៉ុន្ដែកត្តាទាំងនេះ ក៏មិនបានបញ្ឈប់លោកស្រីឡើយ ពោលលោកស្រីបានខិតខំចំណាយពេលសិក្សា និងប្រមូលប្រភពទុន ដើម្បីបំពាក់គ្រឿងបរិក្ខារ ស្របតាមស្ដង់ដា ទៅតាមតម្រូវការប្រតិបត្តិការអាជីវកម្មរបស់លោកស្រី។

លោកស្រី បានចែករំលែកថា៖ “ខ្ញុំពង្រីកតាមដំណាក់កាល ក្នុងមួយឆ្នាំយើងត្រូវពង្រីកផ្នែកណាខ្លះ យើងត្រូវមានគោលដៅច្បាស់លាស់ ថាក្នុងមួយឆ្នាំយើងចង់ពង្រីកអ្វីបន្ថែម ដែលអាចផលិតជាអង្ករបាន។”

ការពង្រីកអាជីវកម្មតាមរយៈតម្រូវការទុនរបស់លោកស្រី បានបន្តរហូតដល់ពេលមួយដែល លោកស្រី ទទួលបានព័ត៌មានអំពីការធានាឥណទានលើកម្ចីអាជីវកម្ម ដែលគ្មានទ្រព្យធានាពីសហព័ន្ធស្រូវអង្ករកម្ពុជា ហើយលោកស្រីក៏បានដាក់ស្នើកម្ចីជាទុនបង្វិលក្នុងការពង្រីកអាជីវកម្មមួយនេះ។ លោកស្រីបានបន្ថែមថា៖ “កម្ចីមានការធានានេះ មានសារៈប្រយោជន៍ច្រើន ដោយសារយើងមានកម្ចី (មុន) នៅធនាគារពាណិជ្ជអស់ហើយ តែបន្ទាប់ពី CGCC មិនតម្រូវឱ្យមានទ្រព្យធានា គឺយើងអាចស្នើកម្ចីមានការធានាពីខាង (ធនាគារដៃគូ) CGCC មកធ្វើជាទុនបន្ថែម។”

លោកស្រីក៏បានរំលឹកឡើងវិញដែរថា លោកស្រី បានចាប់ផ្ដើមអាជីវកម្មជាមួយលោកឪពុក ពីមានបុគ្គលិក ២រូប រហូតដល់សព្វថ្ងៃលោកស្រី មានបុគ្គលិកសរុបចំនួន ៤០រូប ហើយទិន្នផលកិនស្រូវក្នុងមួយថ្ងៃចំនួន ៥កុងតឺន័រ (២៤តោន ក្នុងមួយកុងតឺន័រ) រហូតដល់បច្ចុប្បន្ន លោកស្រីអាចផលិតបានចន្លោះពី ៨ ទៅ ១០កុងតឺន័រ។ ទន្ទឹមនឹងនេះ លោកស្រី ក៏មានលទ្ធភាពក្នុងការទទួលទិញស្រូវសើម ជាមធ្យមក្នុងមួយថ្ងៃ ប្រមាណ ៦០០តោន ផ្ទុយពីពេលមុន ដែលការប្រមូលទិញមិនដល់ ១០០តោនផង ដោយសារការហាលស្រូវត្រូវបានធ្វើឡើងតាមលក្ខណៈប្រពៃណី។

លោកស្រី បានបន្ថែមថា៖ “ពីមុន ខ្ញុំមានលទ្ធភាពត្រឹមតែទិញ (ស្រូវ) ដែលកសិករគាត់ដឹកយកមកលក់រាយ តែបន្ទាប់ពីខ្ញុំបានពង្រីកខ្លួន (អាជីវកម្ម) មក ខ្ញុំបានបំពាក់ឡសម្ងួត ទិញស្រូវដែលដឹកតាមឡាន និងក្នុងបរិមាណច្រើន។”

លោកស្រីនៅតែមានទិសដៅចង់ពង្រីក និងចូលរួមចំណែកនាំចេញអង្ករកម្ពុជាឱ្យបានកាន់តែច្រើនជាងនេះ ក្នុងគោលបំណងផ្សព្វផ្សាយផលិតផលអង្ករកម្ពុជា ជាពិសេស ជួយដល់ប្រជាកសិករដែលដាំដុះស្រូវឱ្យមានទីផ្សារអាចលក់ចេញ និងបង្កើនការនាំចេញដែលគាំទ្រដល់សេដ្ឋកិច្ចកម្ពុជា។ គួរបញ្ជាក់ផងដែរថា លោកស្រី បានទទួលបណ្ណសរសើរ និងពានរង្វាន់សហគ្រាសឆ្នើម ដែលបានប្រើប្រាស់កម្ចីមានការធានា ប្រកបដោយប្រសិទ្ធភាពខ្ពស់ពី CGCC នៅដើមឆ្នាំ២០២៦ ក្រោមអធិបតីដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ៕

អាននិងទាញយកជា PDF: ជួបជាមួយសហគ្រិនស្រ្ដីឆ្នើមក្នុងវិស័យស្រូវអង្ករ៖ ពីអាជីវកម្មបែបគ្រួសារ ទៅកាន់ទីផ្សារអន្ដរជាតិ

 

 

ជួបជាមួយម្ចាស់សិប្បកម្មកែច្នៃត្រីខ្នាតតូច ប៉ុន្តែមានក្តីស្រមៃធំ

Posted on by Sorn Chhorvyvatey

ខេត្តសៀមរាប៖ នាងខ្ញុំឈ្មោះ គឹម សុភ័ស្ស ជាម្ចាស់សិប្បកម្មស្ពតឡៃហ្វូត។ សព្វថ្ងៃ នាងខ្ញុំផលិតត្រីងៀត ផ្អក កង្កែបបោក និងផលិតផលបន្ទាប់បន្សំកែច្នៃដូចជា ស្បែកត្រី និងឆ្អឹងត្រីបំពងជាដើម។ ពីដើមឡើយ ប្រតិបត្តិការអាជីវកម្មរបស់នាងខ្ញុំ ជាមុខរបរបែបគ្រួសារតជំនាន់ពីម្ដាយ ប៉ុន្ដែក្នុងឆ្នាំ២០១៩ នាងខ្ញុំនិងស្វាមី បានចាប់ផ្ដើមផ្ដោតលើការអភិវឌ្ឍ និងពង្រឹងស្ដង់ដាផលិតផល។ សព្វថ្ងៃនេះ សិប្បកម្មនាងខ្ញុំមានបុគ្គលិកពេញម៉ោងចំនួន ៣នាក់ និងបុគ្គលិកក្រៅម៉ោងចំនួន ២នាក់។

ការចាប់ផ្ដើមអាជីវកម្មរបស់នាងខ្ញុំ ពីដំបូងមានភាពលំបាក ដោយប្រព្រឹត្តទៅតាមលក្ខណៈប្រពៃណី ដែលបន្សល់ពីម្ដាយ។ ការផលិតរបស់ពួកខ្ញុំ មិនអាចបំពេញតម្រូវការទីផ្សារបានឡើយ ព្រោះយើងពឹងផ្អែកច្រើនលើលក្ខខណ្ឌធម្មជាតិ ហើយផលិតបានតែក្នុងរដូវប្រាំងប៉ុណ្ណោះ។ បន្ថែមពីនេះ យើងមិនមានចំណេះដឹងគ្រប់គ្រាន់ពីសុវត្ថិភាព និងស្ដង់ដាចំណីអាហារនោះទេ ព្រមទាំងខ្វះបច្ចេកវិទ្យា និងម៉ាស៊ីនទំនើបក្នុងការសម្រួលសង្វាក់ផលិតកម្មរបស់យើង។ កាលនោះបរិមាណផលិតរបស់សិប្បកម្មនាងខ្ញុំគឺមានកម្រិតតិចតួចបំផុត ហើយខ្ញុំក៏មិនមានទំនុកចិត្ត ក្នុងការទទួលការបញ្ជាទិញក្នុងបរិមាណច្រើនៗឡើយ។

ក្នុងឆ្នាំ២០២៤ ខ្ញុំទទួលបានព័ត៌មានពីគម្រោងកម្មវិធីហិរញ្ញវត្ថុគាំទ្រការវិនិយោគ (ISF) ពីមិត្តភក្ដិរបស់ខ្ញុំ។ បន្ទាប់មក ខ្ញុំក៏បានខិតខំស្វែងរកព័ត៌មានបន្ថែម និងដាក់ពាក្យស្នើសុំការគាំទ្រក្រោមគម្រោងនេះ។ ជាលទ្ធផល នាងខ្ញុំទទួលបានការគាំទ្រក្នុងការពង្រឹងសមត្ថភាពកែច្នៃផលិតផលឱ្យមានស្ដង់ដា និងការធ្វើទំនើបកម្មហេដ្ឋារចនាសម្ព័ន្ធនៃខ្សែសង្វាក់ផលិតកម្មរបស់ខ្ញុំ។

នៅក្នុងគម្រោងនេះ នាងខ្ញុំទទួលបានការគាំទ្រផ្នែកសម្ភារៈដូចជា ផ្ទះសម្ងួតសូឡា និងទូក្លាសេ។ ទន្ទឹមនឹងនេះ ខ្ញុំទទួលបានវគ្គបណ្ដុះបណ្ដាលពង្រឹងសមត្ថភាពផ្នែកផលិតកម្ម សុវត្ថិភាពចំណីអាហារ និងការបញ្ជាក់ការអនុលោមតាមលក្ខខណ្ឌតម្រូវនៃនិមិត្តសញ្ញាគុណភាពផល ផលិតផលជលផលកម្ពុជា (CQS) សម្របសម្រួលដោយអង្គការ UNIDO។ មួយផ្នែកទៀត នាងខ្ញុំទទួលបានកម្ចីមានការធានាពី CGCC តាមរយៈធនាគារដៃគូរបស់ CGCC ក្រោមគម្រោង ISF នេះ ដើម្បីជាទុនក្នុងការកែលម្អហេដ្ឋារចនាសម្ព័ន្ធ ទៅតាមបទដ្ឋាន និងស្ដង់ដាអគារ សម្រាប់សិប្បកម្ម ព្រមទាំងការទិញឧបករណ៍ប្រើប្រាស់មួយចំនួនបន្ថែមទៀត។

ក្រោយពីទទួលបានការគាំទ្រពីគម្រោង និងកម្ចីមានការធានាពី CGCC ផលចំណេញនៃអាជីវកម្មរបស់ខ្ញុំ បានកើនឡើងប្រមាណ ២០%។ ជាក់ស្ដែង ពីមុននាងខ្ញុំអាចផលិតបានពីចន្លោះ ២០ ទៅ ៣០គីឡូក្រាម (ត្រីស្រស់) ក្នុងមួយថ្ងៃតែប៉ុណ្ណោះ។  រីឯបច្ចុប្បន្ន នាងខ្ញុំអាចផលិតបានដល់ទៅចន្លោះ ពី១០០ ទៅ១៥០គីឡូក្រាមក្នុងមួយថ្ងៃ ឬលើសពីនេះ តាមតម្រូវការបញ្ជាទិញជាក់ស្ដែង។ ជាមធ្យម ទិន្នផលត្រីងៀតស្ងួតនាងខ្ញុំអាចផលិតបានចន្លោះពី៥០ ទៅ ៧០គីឡូក្រាមក្នុងមួយថ្ងៃ ផ្ទុយពីមុនដែលនាងខ្ញុំអាចផលិតបានក្រោម ១០គីឡូក្រាមប៉ុណ្ណោះ។

នាងខ្ញុំ ពិតជាមានមោទនភាពចំពោះការរីកចម្រើនមួយនេះ ពីព្រោះវាមិនត្រឹមតែបង្កើនចំណូលសម្រាប់អាជីវកម្មរបស់នាងខ្ញុំទេ តែវាក៏បានបង្កើតការងារដល់បុគ្គលិក, បង្កើនចំណូលដល់អ្នកនេសាទ និងចិញ្ចឹមត្រី ព្រមទាំងអ្នកលក់គ្រឿងទេសផងដែរ។

បន្ថែមពីនេះ នាងខ្ញុំមានភាពជឿជាក់ចំពោះផលិតផលរបស់ខ្ញុំ ដោយសារបច្ចុប្បន្ន ត្រីងៀតរបស់ខ្ញុំបានឆ្លងកាត់មន្ទីរពិសោធន៍ និងមានការចុះបញ្ជីត្រឹមត្រូវ។ សព្វថ្ងៃ ផលិតផលនាងខ្ញុំបានដាក់លក់នៅទីផ្សារក្នុងខេត្តសៀមរាប និងមានឈ្មួញយកទៅលក់នៅកន្លែងដាក់លក់តាមបណ្ដាខេត្ត និងតាមភោជនីយដ្ឋាននានា។ ទន្ទឹមនឹងនេះ សិប្បកម្មនាងខ្ញុំ កំពុងធ្វើការជាមួយផ្សារទំនើប អុីអនម៉ល និងផ្សារទំនើបជីប ម៉ុង ដើម្បីស្វែងរកឱកាសដាក់លក់ផលិតផលរបស់ខ្ញុំនៅក្នុងផ្សារទំនើបទាំងនេះ។ នាងខ្ញុំសង្ឃឹមមុតមាំថាផលិតផលរបស់នាងខ្ញុំ នឹងមានវត្តមានឆាប់ៗនៅផ្សារទំនើបទាំងនេះ នៅដើមឆ្នាំ២០២៦។ លើសពីនេះ នាងខ្ញុំរំពឹងថា ២ឆ្នាំ ខាងមុខទៀត ផលិតផលស្ពតឡៃហ្វូត នឹងមានលក់ជាផ្លូវការលើឆាកអន្ដរជាតិ៕

អាននិងទាញយកជា PDF: ជួបជាមួយម្ចាស់សិប្បកម្មកែច្នៃត្រីខ្នាតតូច ប៉ុន្តែមានក្តីស្រមៃធំ

 

ស្វែងយល់អំពីដំណើរការធានាសញ្ញាបណ្ណរបស់ CGCC

Posted on by Sorn Chhorvyvatey

ដំណើរការនៃការធានាសញ្ញាបណ្ណរបស់សាជីវកម្មធានាឥណទានកម្ពុជា (CGCC)៖ ជំហានសាមញ្ញសម្រាប់អ្នកបោះផ្សាយ

ការបោះផ្សាយសញ្ញាបណ្ណស្តាប់ទៅហាក់ដូចជាស្មុគស្មាញ ប៉ុន្តែជាមួយការគាំទ្រពីសាជីវកម្មធានាឥណទានកម្ពុជា (CGCC) ដំណើរការត្រូវបានរៀបចំឡើងយ៉ាងល្អនិងងាយស្រួលខុសពីការគិតរបស់អ្នក។ ការធានាសញ្ញាបណ្ណរបស់ CGCC ជួយបង្កើនទំនុកចិត្តរបស់វិនិយោគិន បង្កើនកម្រិតឥណទានរបស់អ្នក និងទទួលបានដើមទុនជាមួយលក្ខខណ្ឌល្អប្រសើរជាងមុន។ ដំណើរការដាក់ពាក្យស្នើសុំ ត្រូវបានរៀបចំឡើងដើម្បីណែនាំដល់ក្រុមហ៊ុនបោះផ្សាយសញ្ញាបណ្ណតាមដំណាក់កាលនីមួយៗ ចាប់ពីការបង្ហាញចំណាប់អារម្មណ៍ដំបូង រហូតដល់ការធានាផ្លូវការ។ ដំណាក់កាលនីមួយៗមានតម្លាភាព ដោយ CGCC ធ្វើការយ៉ាងជិតស្និទ្ធជាមួយក្រុមហ៊ុនបោះផ្សាយសញ្ញាបណ្ណ ដើម្បីធានាថាពួកគេបានត្រៀមខ្លួនរួចជាស្រេច។

ជំហានទី ១៖ លិខិតបព្ជាក់ចំណាប់អារម្មណ៍

ដំណើរការទាំងមូលចាប់ផ្តើមដោយ លិខិតបញ្ជាក់ចំណាប់អារម្មណ៍ដ៏សាមញ្ញមួយ។ តាមរយៈការចែករំលែកនូវ ព័ត៌មានលម្អិតជាមូលដ្ឋានរបស់ក្រុមហ៊ុន របាយការណ៍ហិរញ្ញវត្ថុដែលបានធ្វើសវនកម្មរយៈពេល ៣ឆ្នាំចុងក្រោយ ព័ត៌មានអំពីសញ្ញាបណ្ណ បញ្ជីឈ្មោះវិនិយោគិនសក្តានុពល ព័ត៌មានអភិបាលកិច្ចសាជីវកម្មនិងកិច្ចព្រមព្រៀងជាមួយក្រុមហ៊ុនធានាទិញមូលបត្រ។ CGCC នឹងពិនិត្យលើលក្ខខណ្ឌដំបូង។ ដំណាក់កាលនេះមានភាពរហ័ស និងមិនស្មុគស្មាញ។

ជំហានទី ២៖ ការដាក់ពាក្យស្នើសុំជាផ្លូវការ

បន្ទាប់ពីការត្រួតពិនិត្យលើលក្ខខណ្ឌដំបូងបានបញ្ចប់ ក្រុមហ៊ុនបោះផ្សាយសញ្ញាបណ្ណត្រូវបានអញ្ជើញឱ្យដាក់ពាក្យស្នើសុំធានាសញ្ញាបណ្ណជាផ្លូវការ។ ឯកសារតម្រូវរួមមាន ទម្រង់ពាក្យស្នើសុំធានាសញ្ញាបណ្ណរបស់ CGCC ផែនការអាជីវកម្ម ផែនការថវិកាលម្អិតដែលភ្ជាប់ជាមួយការព្យាករណ៍លំហូរសាច់ប្រាក់ ឯកសារពាក់ព័ន្ធនឹងក្រុមហ៊ុន ចំណាត់ថ្នាក់ឥណទាន អាជ្ញាបណ្ណ និងលិខិតអនុញ្ញាតបទប្បញ្ញត្តិពាក់ព័ន្ធទាំងអស់។  បន្ថែមពីនេះ ក្រុមហ៊ុនបោះផ្សាយសញ្ញាបណ្ណត្រូវរំពឹងថា នឹងផ្តល់នូវរបាយការណ៍ត្រួតពិនិត្យបំពេញកាតព្វកិច្ចតាមច្បាប់ ផ្នែកគតិយុត្ត ផ្នែកហិរញ្ញវត្ថុ ប្រតិបត្តិការ និងរបាយការណ៍ផលប៉ះពាល់សង្គមនិងបរិស្ថាន។ ឯកសារធានា កិច្ចសន្យាសំខាន់ៗជាមួយភាគីពាក់ព័ន្ធ និងឯកសារផ្សេងទៀតអាចត្រូវបានស្នើសុំបន្ថែមតាមការចាំបាច់។

ជំហានទី ៣៖ ការសិក្សាវាយតម្លៃ

ក្នុងដំណាក់កាលវាយតម្លៃ ដែលជាការវាយតម្លៃតាមឯកសារដែលបានផ្តល់ឱ្យ CGCC ត្រួតពិនិត្យលើពាក្យស្នើសុំធានាសញ្ញាបណ្ណ ដើម្បីវាយតម្លៃភាពរឹងមាំផ្នែកហិរញ្ញវត្ថុ កម្រិតនៃឥណទាន និងលទ្ធភាពសម្រេចបាននៃគម្រោងរបស់ក្រុមហ៊ុនបោះផ្សាយសញ្ញាបណ្ណ។ ការវាយតម្លៃនេះរួមបញ្ចូលទាំងការវិភាគលើរបាយការណ៍ហិរញ្ញវត្ថុដែលបានធ្វើសវនកម្ម ការព្យាករណ៍លំហូរសាច់ប្រាក់ អភិបាលកិច្ចសាជីវកម្ម និងហានិភ័យសំខាន់ៗដើម្បីធានាថាសញ្ញាបណ្ណនោះបំពេញតាមលក្ខខណ្ឌនិងសូចនាករហានិភ័យរបស់ CGCC មុនពេលបន្តទៅដំណាក់កាលចុះត្រួតពិនិត្យបំពេញកាតព្វកិច្ចតាមច្បាប់។

ជំហានទី ៤៖ ការអនុម័តជាគោលការណ៍

បន្ទាប់ពីការវាយតម្លៃលើឯកសាររួចមក CGCC អាចចេញលិខិតអនុម័តជាគោលការណ៍ ដែលបង្ហាញពីការអនុម័តបឋមដើម្បីបន្តនីតិវិធីបន្ទាប់។ លិខិតអនុម័តជាគោលការណ៍បញ្ជាក់ថា ក្រុមហ៊ុនបោះផ្សាយសញ្ញាបណ្ណបានបំពេញតាមលក្ខខណ្ឌ និងសូចនាករហានិភ័យដំបូង ហើយនឹងកំណត់លក្ខខណ្ឌសម្រាប់ដំណាក់កាលបន្តនៃការចុះត្រួតពិនិត្យបំពេញកាតព្វកិច្ចតាមច្បាប់ មុននឹងឈានដល់ការអនុម័តចុងក្រោយ។

ជំហានទី ៥៖ ការចុះត្រួតពិនិត្យបំពេញកាតព្វកិច្ចតាមច្បាប់

បន្ទាប់ពីទទួលបានលិខិតអនុម័តជាគោលការណ៍ CGCC នឹងធ្វើការចុះត្រួតពិនិត្យបំពេញកាតព្វកិច្ចតាមច្បាប់លម្អិត ដែលគ្របដណ្តប់លើផ្នែកហិរញ្ញវត្ថុ ផ្លូវច្បាប់ ប្រតិបត្តិការ ផលប៉ះពាល់បរិស្ថាននិងសង្គម របស់ក្រុមហ៊ុនបោះផ្សាយសញ្ញាបណ្ណ។ ដំណើរការនេះរួមមាន៖ ការចុះពិនិត្យទីតាំង ការសម្ភាសន៍ថ្នាក់ដឹកនាំ និងការផ្ទៀងផ្ទាត់ឯកសារ និងរបាយការណ៍សំខាន់ៗ ដូចជារបាយការណ៍នៃការចុះត្រួតពិនិត្យបំពេញកាតព្វកិច្ចតាមច្បាប់ដោយយកចិត្តទុកដាក់ផ្នែកហិរញ្ញវត្ថុ និងច្បាប់ជាដើម។ គោលបំណងគឺដើម្បីបញ្ជាក់នូវភាពគួរឱ្យទុកចិត្តជារួម ភាពរឹងមាំនៃអភិបាលកិច្ចសាជីវកម្ម និងសមត្ថភាពរបស់ក្រុមហ៊ុនបោះផ្សាយសញ្ញាបណ្ណ មុននឹងឈានទៅដល់ការអនុម័តចុងក្រោយ។

ជំហានទី ៦៖ ការអនុម័តជាផ្លូវការ និងការចេញលិខិតធានា

បន្ទាប់ពីបញ្ចប់ការចុះត្រួតពិនិត្យបំពេញកាតព្វកិច្ចតាមច្បាប់ទាំងស្រុង និងឈានទៅដល់ដំណាក់កាលអនុម័តជាផ្លូវការ ដែលជាជំហានចុងក្រោយមុនការធានា។ នៅដំណាក់កាលនេះ ការវាយតម្លៃ និងលក្ខខណ្ឌទាំងអស់ត្រូវបានព្រមព្រៀងទាំងអស់គ្នា មុននឹងឈានដល់ ការចុះហត្ថលេខាលើកិច្ចព្រមព្រៀងធានា និងការចុះអនុវត្តការធានាសញ្ញាបណ្ណជាផ្លូវការ។

អនុសាសន៍សម្រាប់ក្រុមហ៊ុនដែលចង់បោះផ្សាយសញ្ញាបណ្ណ

ក្រុមហ៊ុនដែលមានបំណងចង់បោះផ្សាយសញ្ញាបណ្ណត្រូវបានលើកទឹកចិត្តឱ្យចាប់ផ្តើមរៀបចំឯកសារសំខាន់ៗឱ្យបានឆាប់ជាមុនដូចជា របាយការណ៍ហិរញ្ញវត្ថុដែលបានធ្វើសវនកម្ម ការព្យាករណ៍អាជីវកម្ម របាយការណ៍ចុះត្រួតពិនិត្យបំពេញកាតព្វកិច្ចតាមច្បាប់ និងជាពិសេសការធ្វើចំណាត់ថ្នាក់ឥណទាន។ ការរៀបចំជាមុនអាចជួយសម្រួលដល់ការវាយតម្លៃ ដែលនាំឱ្យការអនុម័តមានភាពរលូន និងលឿនជាងមុន។

តើអ្នកបានត្រៀមខ្លួនចាប់ផ្តើមដំណើរការធានាសញ្ញាបណ្ណហើយឬនៅ?

ជាមួយនឹងការជួយគាំទ្ររបស់ CGCC ដំណើរការធានាសញ្ញាបណ្ណ មិនត្រឹមតែអាចគ្រប់គ្រងបានល្អប៉ុណ្ណោះទេ ប៉ុន្តែវាក៏ជាជំហានដ៏មានតម្លៃ ឆ្ពោះទៅរកភាពជោគជ័យនៅក្នុងទីផ្សារផងដែរ។ ក្រុមការងាររបស់យើងត្រៀមខ្លួនជាស្រេចដើម្បីជួយណែនាំអ្នកចាប់ពីការសាកសួរព័ត៌មានដំបូង រហូតដល់ការធានាជាផ្លូវការ។ ដើម្បីស្វែងយល់បន្ថែមអំពីការធានាសញ្ញាបណ្ណរបស់ CGCC ដែលគាំទ្រដល់ការបោះផ្សាយសញ្ញាបណ្ណរបស់អ្នក សូមទាក់ទងមកកាន់ក្រុមការងាររបស់យើងសម្រាប់ព័ត៌មានបន្ថែមតាមរយៈអុីមែល និងលេខទូរសព្ទដូចខាងក្រោម៖

  • អុីមែល: [email protected]
  • ទូរស័ព្ទ: ០២៣ ៧២២ ១២៣
  • គេហទំព័រ: www.cgcc.com.kh/bond-guarantee

អាននិងទាញយកជា PDF: ស្វែងយល់អំពីដំណើរការធានាសញ្ញាបណ្ណរបស់ CGCC

 

ជួបជាមួយសហគ្រិនស្រ្ដី ដែលកែច្នៃសំណល់ស្នែង ជាវត្ថុលម្អ និងគ្រឿងអលង្ការ

Posted on by Sorn Chhorvyvatey

ខ្ញុំឈ្មោះ គួន ចិន្ដា ជាម្ចាស់សិប្បកម្មសុមនា ផលិតផលស្នែង។ ខ្ញុំបើកអាជីវកម្មរបស់ខ្ញុំ តាំងពីឆ្នាំ២០០៣ ក្នុងគោលបំណងដោះស្រាយបញ្ហាកាកសំណល់នៅបរិវេណផ្ទះរបស់ខ្ញុំ។ ការចាប់ផ្ដើមអាជីវកម្មមួយនេះ មិនមានភាពងាយស្រួលឡើយ ពោល ខ្ញុំត្រូវជំនះកត្ដាសង្គម បញ្ហាជីវភាព និងការស្វែងរកទីផ្សារ។ ខ្ញុំធ្លាប់បោះបង់អាជីវកម្មនេះមួយរយៈ ប៉ុន្ដែដោយសារចិត្តស្រឡាញ់ និងជំនាញរបស់ប្ដីខ្ញុំ ពួកយើងបានឡើងមកភ្នំពេញក្នុងឆ្នាំ២០១៥ ដើម្បីចាប់ផ្ដើមនិងពង្រឹងអាជីវកម្មសារជាថ្មី។

បច្ចុប្បន្ន អាជីវកម្មរបស់ខ្ញុំមានបុគ្គលិកចំនួន ៥រូប រួមទាំងស្វាមីរបស់ខ្ញុំ ដែលជាអ្នកកែច្នៃ និងរចនាម៉ូត។ បន្ថែមពីនេះ គាត់ក៏បង្ហាត់បង្រៀនកូនជាងផងដែរ។ រីឯខ្ញុំ ជាអ្នកចាត់ចែងទូទៅនៃអាជីវកម្មមួយនេះ រួមទាំងការលក់ និងការធ្វើទីផ្សារ។ ការចាប់ផ្ដើមដំបូង ពួកយើងកែច្នៃជាផលិតផលតាំងលម្អក្នុងផ្ទះ ជារូបសំណាក ហើយនាំចេញទៅក្រៅប្រទេសដោយសារពេលនោះ យើងមានសមាគមទំនុកបម្រុងក្នុងការស្វែងរកអតិថិជននាំចេញទៅក្រៅប្រទេស។ ប៉ុន្ដែ ដោយសារផលលំបាកក្នុងការដឹកជញ្ជូន និងបាក់បែកពេលទៅដល់ទីនោះ ពួកយើងក៏បានកែច្នៃជារបស់ប្រើប្រាស់ និងគ្រឿងអលង្ការ ដូចជាខ្សែក ជញ្ជៀន និងខ្សែដៃ។

ជាអកុសល សមាគមនោះបានបិទ ការបញ្ជាទិញបានធ្លាក់ចុះ។ ពួកយើងបាត់អតិថិជនក្រៅស្រុកមួយចំនួន ដែលបណ្ដាលឱ្យអាជីវកម្មរបស់យើងធ្លាក់ចុះ ស្របពេលនឹងវិបត្តិកូវីដកំពុងផ្ទុះ។ ក្នុងអំឡុងពេលកូវីដ យើងបានបិទតូបអាជីវកម្មរបស់យើង ហើយយើងព្យាយាមលក់តាមបណ្ដាញសង្គម។  ការលក់ដំបូង ដាច់គួរសម ប៉ុន្ដែមួយរយៈក្រោយមានការថយចុះ យើងក៏ចាប់ផ្ដើមដាក់លក់នៅតាមស្ដង់តាំងពិព័រណ៌នៅពេលស្ថានភាពធូរស្បើយ។ បច្ចុប្បន្ន ខ្ញុំដាក់លក់ផលិតផលរបស់ខ្ញុំចំនួន ២ទីតាំង៖ ទីមួយនៅផ្សារទំនើប ជីប ម៉ុង ២៧១ និងចុងសប្ដាហ៍នៅផ្លូវថ្មើរជើង (Walk Street)។

ក្នុងនាមជាម្ចាស់អាជីវកម្ម ខ្ញុំយល់ថា ការអភិវឌ្ឍសមត្ថភាពគឺជារឿងសំខាន់ពីព្រោះវាជាឱកាសក្នុងការស្វែងរកចំណេះដឹងថ្មីៗដើម្បីពង្រឹង និងអភិវឌ្ឍអាជីវកម្ម។ ជារឿយៗ នាងខ្ញុំតែងឆ្លៀតពេលចូលរួមក្នុងវគ្គកសាងសមត្ថភាពជាមួយសមាគម ស្ថាប័ន និងភាគីពាក់ព័ន្ធនានា។ ជាឧទាហរណ៍ នៅពេលដែលនាងខ្ញុំបានចូលរួមវគ្គបណ្ដុះបណ្ដាល EPIC ខ្ញុំបានស្វែងយល់អំពីការបង្កើតផែនការអាជីវកម្ម ការបំផុសគំនិតឱ្យខ្ញុំគិតអំពីអាជីវកម្មរបស់ខ្ញុំ ថានៅចំណុចណា និងមានភាពខ្វះខាតអ្វីខ្លះ។ ទន្ទឹមនឹងនេះ ខ្ញុំក៏បានស្វែងយល់ពីកម្ចីអាជីវកម្ម គន្លឹះក្នុងការស្វែងរកប្រភពទុនឱ្យបានច្រើន និងការរៀបចំគោលដៅនៃផែនការអាជីវកម្មប្រកបដោយប្រសិទ្ធភាព។

ផ្អែកតាមបទពិសោធអាជីវកម្មរបស់ខ្ញុំ ខ្ញុំយល់ថា ម្ចាស់អាជីវកម្មទាំងអស់គួរមានភាពបត់បែនក្នុងប្រតិបត្តិការអាជីវកម្មរបស់ខ្លួន ជាពិសេសការស្ដាប់ពីតម្រូវការ និងមតិកែលម្អរបស់អតិថិជន ព្រមទាំងពង្រឹងយុទ្ធសាស្រ្ដ និងវិធីសាស្រ្ដទីផ្សារ ដើម្បីឱ្យអតិថិជនស្គាល់ពីគុណភាព និងផលិតផលរបស់អ្នក៕

អាននិងទាញយកជា PDF: សហគ្រិនស្រ្ដី ដែលកែច្នៃសំណល់ស្នែង ជាវត្ថុលម្អ និងគ្រឿងអលង្ការ

 

ជួបជាមួយម្ចាស់អាជីវកម្មដែលទទួលបានកម្ចីដែលមានការធានាពី CGCC ក្រោមគម្រោងធានាឥណទានសម្រាប់វិស័យជលផលក្រោយប្រមូលផល

Posted on by Sorn Chhorvyvatey

វិស័យជលផល ជាវិស័យយ៉ាងសំខាន់មួយក្នុងការទ្រទ្រង់ និងជំរុញកំណើនសេដ្ឋកិច្ចកម្ពុជា។ មិនតែប៉ុណ្ណោះ វិស័យនេះ ដើរតួនាទីយ៉ាងសំខាន់ក្នុងការធានានិរន្ដរភាពសន្ដិសុខស្បៀង ប្រភពចំណូល និងការផ្ដល់ឱកាសការងារដល់ប្រជាពលរដ្ឋកម្ពុជា។

ខ្ញុំបាទឈ្មោះ ចាវ សួស្ដី សព្វថ្ងៃជាម្ចាស់សិប្បកម្មផលិតផលជលផល ចាវ សួស្ដី។ ខ្ញុំបានចាប់ផ្ដើមបើកប្រតិបត្តិការអាជីវកម្មរបស់ខ្ញុំ នៅឆ្នាំ២០២២ ជាអាជីវកម្មលក្ខណៈគ្រួសារ ក្រោយខ្ញុំបម្រើការងារជាមួយក្រុមហ៊ុនឯកជនមួយក្នុងវិស័យកសិកម្មដែលផ្តោតលើវារីវប្បកម្មជាងមួយទសវត្ស។ ការចាប់ផ្ដើមរបស់ខ្ញុំ កើតឡើងដោយសារក្ដីស្រមៃ និងក្ដីស្រឡាញ់ក្នុងវិស័យកែច្នៃផលិតផល ជាពិសេសបទពិសោធន៍ ចំណេះនិងជំនាញដែលខ្ញុំមានស្រាប់នៅក្នុងវិស័យវារីវប្បកម្ម។ ប្រតិបត្តិការអាជីវកម្មដំបូងរបស់ខ្ញុំ មានបុគ្គលិកក្រៅម៉ោងចំនួន ៤រូប រហូតដល់ឆ្នាំ២០២៤ បានកើនឡើងរហូតដល់ ៨រូប ហើយចាប់ពីឆ្នាំ២០២៣ ផលិតផលរបស់ខ្ញុំបានចែកចាយ និងផ្គត់ផ្គង់ ២៥ខេត្ត/ក្រុង តាមបណ្ដាអាហារដ្ឋាននានា។ បន្ថែមពីនេះ ក្នុងឆ្នាំ២០២៥ ខ្ញុំក៏បានបង្កើនផលិតភាពនិងកែច្នៃផលិតផលបន្ថែមទៀត រួមមានប្រហុកមណ្ឌល, ម្សៅត្រីប្រមាមណ្ឌល, និងម្សៅត្រីមណ្ឌល។

ក្នុងនាមជាម្ចាស់អាជីវកម្ម ការស្វែងរក និងការកៀរគរទុនសម្រាប់ពង្រីក និងអភិវឌ្ឍអាជីវកម្ម គឺជារឿងដ៏លំបាកមួយសម្រាប់ខ្ញុំ ដោយសារការខ្វះទ្រព្យធានាក្នុងការដាក់ស្នើកម្ចីអាជីវកម្ម។ ខ្ញុំធ្លាប់បរាជ័យក្នុងការដាក់ស្នើកម្ចី ដោយសារខ្វះទ្រព្យធានា និងកង្វះខាតការរៀបចំឯកសារ។ ប៉ុន្ដែក្នុងឆ្នាំ២០២៤ ខ្ញុំទទួលបានព័ត៌មានពីគម្រោង កម្មវិធីហិរញ្ញវត្ថុគាំទ្រការវិនិយោគ (ISF) ពីគម្រោងអភិវឌ្ឍន៍ជលផលក្រោយប្រមូលផល (CAPFISH CAPTURE) ស្របពេលខ្ញុំមានគោលបំណងក្នុងការបង្កើនផលិតភាពនិងពង្រីកអាជីវកម្ម។

ដោយស្ថានភាពអំណោយផល និងការទទួលបានគាំទ្រពីគម្រោង និង CGCC ដែលជាអ្នកគ្រប់គ្រងមូលនិធិរបស់គម្រោង ខ្ញុំក៏បានចាប់ឱកាសនេះ ដើម្បីសិក្សាពីលទ្ធភាពស្នើកម្ចី ហើយខ្ញុំបានជួបពិភាក្សាជាមួយធនាគារមេយប៊ែង ដែលជាគ្រឹះស្ថានហិរញ្ញវត្ថុចូលរួមមួយរបស់ CGCC ជាមួយនឹងជំនឿទុកចិត្តក្នុងការប្រឹក្សា និងការទទួលបានកម្ចីអាជីវកម្ម។

ការធានាពី CGCC លើកម្ចីអាជីវកម្មរបស់ខ្ញុំ ពិតមានសារៈសំខាន់ណាស់ ដោយសារជាធម្មតាមិនថាបុគ្គល ឬម្ចាស់អាជីវកម្មទេ ភាគច្រើនតែងតែមានជាប់ទ្រព្យតម្កល់ជាមួយកម្ចីចាស់នៅធនាគារមុន ហើយប្រសិនបើចង់ស្នើកម្ចីបន្ថែម ច្រើនតែមិនងាយមានទ្រព្យធានាដែលនៅសល់នោះទេ។ ជាមួយនឹងកម្ចីមានការធានា ខ្ញុំមានឱកាសក្នុងការពង្រីក និងកែលម្អហេដ្ឋារចនាសម្ព័ន្ធ ព្រមទាំងការទិញគ្រឿងបរិក្ខារ ដើម្បីជំរុញប្រសិទ្ធភាព និងបង្កើនផលិតភាពអាជីវកម្មរបស់ខ្ញុំ។ ជាសមិទ្ធផល ខ្ញុំគ្រោងនឹងចេញនូវកញ្ចប់ផលិតផលចំនួន ៣ទំហំបន្ថែម គឺទម្ងន់១០ក្រាម ១០០ក្រាម និង២០០ក្រាម។ ខ្ញុំរំពឹងថា ខ្ញុំនឹងអាចនាំចេញផលិតផលរបស់ខ្ញុំទៅកាន់ទីផ្សារអន្ដរជាតិនាពេលខាងមុខ នៅឆ្នាំ២០២៦ ព្រោះខ្ញុំមានគ្រឿងបរិក្ខារគ្រប់គ្រាន់ ដែលសិប្បកម្មខ្ញុំអាចផលិតក្នុងបរិមាណច្រើន និងផ្គត់ផ្គង់ទាន់ពេលវេលា។

ដើម្បីស្នើកម្ចីអាជីវកម្មបានជោគជ័យ ខ្ញុំគិតថាម្ចាស់អាជីវកម្មគ្រប់រូបត្រូវតែមានការតាំងចិត្តខ្ពស់ក្នុងការរៀបចំផែនការអាជីវកម្ម ការទទួលស្គាល់ពីចំណុចខ្វះខាត និងការស្វែងរកយន្ដការគាំទ្រសម្រាប់អាជីវកម្មរបស់ខ្លួន។ ជាពិសេស ការកំណត់គោលដៅអាជីវកម្មនិងផែនការចំណាយលើប្រាក់កម្ចីដែលទទួលបាន ផ្អែកទៅតាមផែនការអាជីវកម្មដែលបានកំណត់ និងជាពិសេស ត្រូវកត់ត្រារបាយការណ៍ហិរញ្ញវត្ថុឱ្យបានច្បាស់លាស់ ពីចំណូល ចំណាយ ចំណេញ និងខាតប្រចាំខែ និងប្រចាំឆ្នាំ៕

អាននិងទាញយកជា PDF: ម្ចាស់អាជីវកម្មដែលទទួលបានកម្ចីដែលមានការធានាពី CGCC ក្រោមគម្រោងធានាឥណទានសម្រាប់វិស័យជលផលក្រោយប្រមូលផល

 

ការស្វែងយល់អំពីការធ្វើចំណាត់ថ្នាក់ឥណទានលើសញ្ញាបណ្ណ

Posted on by Sorn Chhorvyvatey

ស្របពេលដែលទីផ្សារមូលបត្របំណុលសាជីវកម្មរបស់ប្រទេសកម្ពុជាកំពុងមានភាពរីកចម្រើន, ការធ្វើចំណាត់ថ្នាក់ឥណទានលើក្រុមហ៊ុនបោះផ្សាយមូលបត្របំណុលសាធារណៈកាន់តែមានសារៈសំខាន់សម្រាប់ក្រុមហ៊ុនដែលបោះផ្សាយ, អ្នកវិនិយោគិន, និយ័តករ, និងស្ថាប័នធានាឥណទាន។

ចំណាត់ថ្នាក់ឥណទាន គឺជាស្តង់ដារនៃការវាស់វែងហានិភ័យឥណទាន, ដែលនាំមកនូវតម្លាភាព និងទំនុកចិត្តខ្ពស់សម្រាប់ទីផ្សារក៏ដូចជាផ្ដល់នូវភាពសាមញ្ញក្នុងការប្រៀបធៀបពីក្រុមហ៊ុនមួយទៅក្រុមហ៊ុនមួយ។ ការធ្វើចំណាត់ថ្នាក់ឥណទានជាព័ត៌មានជួយដល់ការកំណត់តម្លៃសញ្ញាបណ្ណ, ការវាយតម្លៃភាពសក្ដិសមនៃឥណទាន និងការគាំទ្រការអនុលោមតាមបទប្បញ្ញតិ និងគោលការណ៍ ឬលក្ខខណ្ឌវិនិយោគ។ ដូច្នេះហើយទើបការយល់ដឹងពីរបៀបធ្វើចំណាត់ថ្នាក់ឥណទានអាចជួយឱ្យយើងធ្វើការសម្រេចចិត្តដោយឆ្លាតវៃ បង្កើនទំនុកចិត្តដល់វិនិយោគិន និងពង្រឹងភាពជឿជាក់ និងប្រសិទ្ធភាពនៃទីផ្សារហិរញ្ញវត្ថុកម្ពុជា។

តើការធ្វើចំណាត់ថ្នាក់ឥណទានលើសញ្ញាបណ្ណជាអ្វី?

ការធ្វើចំណាត់ថ្នាក់ឥណទានលើសញ្ញាបណ្ណគឺជាការវាយតម្លៃឯករាជ្យដោយភ្នាក់ងារវាយតម្លៃទៅលើសមត្ថភាពគ្រប់គ្រាន់ក្នុងការបំពេញកាតព្វកិច្ចហិរញ្ញវត្ថុរបស់អ្នកបោះផ្សាយសញ្ញាបណ្ណ។ ចំណាត់ថ្នាក់ឥណទានទាំងនេះត្រូវបានវាយតម្លៃដោយភ្នាក់ងារវាយតម្លៃឥណទានអន្តរជាតិដូចជា Standard & Poor’s (S&P), Moody’s និង Fitch Ratings ក៏ដូចជាស្ថាប័នក្នុងស្រុកក្រុមហ៊ុន រ៉េតធីង អេជេនស៊ី អហ្វ ខេមបូឌា Rating Agency of Cambodia (RAC) ដែលទទួលស្គាល់ដោយនិយ័តករមូលបត្រកម្ពុជា។

ខណ:ដែលភ្នាក់ងារនីមួយៗវាយតម្លៃផ្អែកតាមស្តង់ដាររបស់ខ្លួន ការវាយតម្លៃផ្អែកលើគុណភាពឥណទាន កម្រិតហានិភ័យជាទូទៅនោះចែកជាបី ១. កម្រិតដែលអាចវិនិយោគបាន ២. កម្រិតដែលមិនគួរវិនិយោគ ៣. មិនមានការវាយតម្លៃ។ សញ្ញាបណ្ណដែលស្ថិតក្នុងកម្រិតដែលអាចវិនិយោគបាន ជាទូទៅមានហានិភ័យទាប មានស្ថិរភាព ប៉ុន្តែផ្ដល់អត្រាការប្រាក់ទាប។ ផ្ទុយទៅវិញសញ្ញាបណ្ណដែលស្ថិតក្នុងកម្រិតដែលមិនគួរវិនិយោគ ជាទូទៅមានហានិភ័យខ្ពស់និងផ្តល់អត្រាការប្រាក់ខ្ពស់។ ជាឧទាហរណ៍ក្នុងតារាងខាងក្រោម សញ្ញាបណ្ណដែលស្ថិតក្នុងកំរិតដែលអាចវិនិយោគបានគឺមានចំណាត់ថ្នាក់ចាប់ពី Baa3/BBB ឡើងទៅ។Aaa/AAA គឺជាចំណាត់ថ្នាក់ដែលខ្ពស់ជាងគេបំផុតស្របពេលដែល D គឺជាចំណាត់ថ្នាក់ដែលទាបជាងគេបំផុត។ ភាពខុសផ្នែកនៃសញ្ញាបូក (+) ឬដក (-) ត្រូវបានកំណត់ ដើម្បីផ្ដល់ភាពខុសគ្នាកាន់តែល្អិតល្អន់ក្នុងប្រភេទចំណាត់ថ្នាក់នីមួយៗ។

និមិត្តសញ្ញាកម្រិតចំណាត់ថ្នាក់ឥណទានមានភាពដូចគ្នាពីប្រភេទអាជីវកម្មមួយទៅអាជីវកម្មមួយ។ ឧទាហរណ៍ ការវាយតម្លៃ BBB ដែលផ្ដល់ឱ្យអ្នកខ្ចីក្នុងវិស័យសេវាកម្មមានកម្រិតហានិភ័យ ដូចគ្នានិងការវាយតម្លៃ BBB ក្នុងក្រុមហ៊ុនមួយក្នុងវិស័យផលិតកម្ម។ ការផ្ដល់ចំណាត់ថ្នាក់ឆ្លុះបញ្ចាំងពីភាពសក្តិសមនៃឥណទានទាំងមូលរបស់អ្នកខ្ចី ប៉ុន្តែមិនឆ្លុះបញ្ចាំងពីហានិភ័យជាក់លាក់នៃកម្ចីជាក់លាក់នោះទេ។ Facility Rating គឺជាការវាយតម្លៃទៅលើហានិភ័យឥណទានសម្រាប់កម្ចីជាក់លាក់ណាមួយដោយផ្អែកទៅលើកត្តាមួយចំនួន ដូចជាប្រភេទនៃទ្រព្យធានា លំដាប់អាទិភាពនៃឥណទាន លទ្ធភាពនៃការសងត្រឡប់។ ឧទាហរណ៍ កម្ចីដែលត្រូវបានធានាដោយអចលនទ្រព្យអាចទទួលបាន Facility Rating ខ្ពស់ជាងកម្ចីដែលមិនមានការធានាពីអ្នកបោះផ្សាយសញ្ញាបណ្ណដែលមានចំណាត់ថ្នាក់ BBB ដូចគ្នាដោយសារតែការខាតបង់ដែលរំពឹងទុកមានភាពទាបជាងក្នុងករណីការខកខានបំពេញកាតព្វកិច្ចបំណុល។

ការផ្ដល់ចំណាត់ថ្នាក់ឥណទាន

ភ្នាក់ងារផ្ដល់ចំណាត់ថ្នាក់ឥណទានវាយតម្លៃហានិភ័យឥណទានរបស់អ្នកបោះផ្សាយសញ្ញាបណ្ណ យោងលើការវិភាគចម្រុះរវាងកត្តាតួលេខនិងគុណភាព។ តួលេខដែលយកមកវិភាគនោះរួមមានលទ្ធផលហិរញ្ញវត្ថុដូចជាលំហូរសាច់ប្រាក់លទ្ធភាពនៃការប្រើប្រាស់កម្ចីភាពអាចបង្វែរជាសាច់ប្រាក់និងរចនាសម្ព័ន្ធទុនជាដើម។ ចំណែកឯកតាគុណភាពរួមមានហានិភ័យនៃវិស័យអាជីវកម្ម ហានិភ័យប្រទេស កម្រិតសមត្ថភាពនៃអាជីវកម្ម គុណភាពនៃការគ្រប់គ្រង គុណភាពអភិបាលកិច្ច និងបរិយាកាសបទប្បញ្ញតិ។ បន្ទាប់ពីធ្វើការវាយតម្លៃភាពសក្ដិសម ឥណទានរួចមក ភ្នាក់ងារផ្ដល់ចំណាត់ថ្នាក់ ពិនិត្យមើលលក្ខខណ្ឌនៃសញ្ញាបណ្ណមួយចំនួនដូចជា លំដាប់អាទិភាពនៃឥណទាន ទ្រព្យធានានិងវិធីសាស្រ្ដនៃការបង្កើតគុណភាពឥណទាន (ឩ.ការធានាផ្សេងៗ)។ ការវាយតម្លៃឥណទានបង្ហាញពីលទ្ធភាពសងនិងធ្វើឡើងដោយគណ:កម្មាធិការវាយតម្លៃ និងត្រូវបានត្រួតពិនិត្យជាទៀងទាត់បើសិនជាអាចមានការផ្លាស់ប្ដូរ។

ការផ្ដល់ចំណាត់ថ្នាក់ គឺជាការសន្មតទៅកាន់ពេលអនាគតពី ៦ខែ ទៅ ២ឆ្នាំទៅតាមការវិភាគរបស់ភ្នាក់ងារវាយតម្លៃ។ ការវិភាគទៅមុខនេះបានពិចារណាអំពីសមត្ថភាពក្នុងការបំពេញកាតព្វកិច្ចហិរញវត្ថុដែលអាចកើតឡើងប៉ុន្តែចំណាត់ថ្នាក់ឥណទានមិនមែនជាការធានានូវលទ្ធផលនាពេលអនាគតទេ។ ទោះបីជាការធ្វើចំណាត់ថ្នាក់ឥណទានជាមធ្យោបាយមួយដ៏សំខាន់ដើម្បីកំណត់ហានិភ័យនៃសញ្ញាបណ្ណ វិនិយោគិនត្រូវបានលើកទឹកចិត្តមិនឱ្យពឹងផ្អែកលើការវាយតម្លៃនេះទាំងស្រុងក្នុងការសម្រេចចិត្តទេ។ ដូច្នេះវិនិយោគិនគួរប្រើប្រាស់ចំណាត់ថ្នាក់ឥណទាននេះជាជំនួយបន្ថែមទៅលើការត្រួតពិនិត្យ ឬវិភាគដោយខ្លួនឯង ដូចជាការវិភាគទៅលើរបាយការណ៍ហិរញ្ញវត្ថុ យល់ដឹងឱ្យច្បាស់អំពីលក្ខខណ្ឌដែលទាក់ទងនឹងសញ្ញាបណ្ណព្រមទាំងវិភាគលក្ខខណ្ឌទីផ្សារនិងសេដ្ឋកិច្ច មុននឹងសម្រេចចិត្តវិនិយោគយោងលើព័ត៌មានដែលគ្រប់គ្រាន់។

ការប្រើប្រាស់ការផ្ដល់ចំណាត់ថ្នាក់ឥណទាននៅក្នុងទីផ្សារសញ្ញាបណ្ណនៅប្រទេសកម្ពុជា

ការវាយតម្លៃឥណទានដោយភ្នាក់ងារវាយតម្លៃក្នុងស្រុកនិងអន្តរជាតិ ពិតជាមានសារ:សំខាន់ក្នុងការធ្វើឱ្យមានតម្លាភាព ការកំណត់តម្លៃដែលមានភាពត្រឹមត្រូវ និងលើកកម្ពស់ទំនុកចិត្តវិនិយោគិននៅក្នុងទីផ្សារសញ្ញាបណ្ណដែលកំពុងរីកចម្រើននៅប្រទេសកម្ពុជា។ ចំណាត់ថ្នាក់ឥណទានផ្ដល់នូវស្ដង់ដារនៃការវាយតម្លៃលើហានិភ័យឥណទាន និងជួយដល់ការត្រួតពិនិត្យពីស្ថាប័ននិយ័តករ ក៏ដូចជាបង្កើនការទាក់ទាញទៅកាន់វិនិយោគិនដែលវិនិយោគរយ:ពេលវែង។ សាជីវកម្មធានាឥណទានកម្ពុជា (CGCC) មានតួនាទីជាយុទ្ធសាស្រ្ដដ៏សំខាន់ក្នុងការគាំទ្រការអភិវឌ្ឍទីផ្សារមូលបត្របំណុលជាពិសេសតាមរយ:ការធានាសញ្ញាបណ្ណរូបិយប័ណ្ណចារឹកជាប្រាក់រៀលដែលបានចុះបញ្ជីនៅផ្សារមូលបត្រកម្ពុជា (CSX)។ ការធានាឥណទានលើសញ្ញាបណ្ណ ជួយឱ្យចំណាត់ថ្នាក់ឥណទាន (Credit Rating) របស់សញ្ញាបណ្ណដែលត្រូវបានបោះផ្សាយមានភាពប្រសើរឡើងផងដែរ និងចូលរួមបង្កីនការជឿទុកចិត្តរបស់វិនិយោគិន និងទាក់ទាញការវិនិយោគលើសញ្ញាបណ្ណដែលមានការធានា។

ឯកសារយោង:

Corporate Finance Institute. (n.d.). Bond Ratings.

Fidelity. (n.d.). Bond Ratings: What they are and how they work.

S&P Global Ratings. (2022). Guide to credit rating essentials: What are credit ratings and how do they work?

Credit Guarantee Corporation of Cambodia (CGCC). (n.d.). Bond Guarantee.

Yog INFRA (2025) Credit Risk Assessment – CGCC Training 2025. Phnom Penh: Credit Guarantee Corporation of Cambodia.

 

អាននិងទាញយកជា PDF៖ ការស្វែងយល់អំពីការធ្វើចំណាត់ថ្នាក់ឥណទានលើសញ្ញាបណ្ណ

 

ហេតុអ្វីបានជា Kaizen មានសារៈសំខាន់សម្រាប់ទាំងបុគ្គលម្នាក់ៗ និងអង្គភាពស្ថាប័នផ្សេងៗទូទាំងពិភពលោក?

Posted on by Sorn Chhorvyvatey

Kaizen ជាពាក្យជប៉ុន មានអត្ថន័យថា “ការកែលម្អជាបន្តបន្ទាប់”។ វាគោរពតាមផ្នត់គំនិតនៃការធ្វើការផ្លាស់ប្តូរតូចៗ ប៉ុន្តែធ្វើវាជាបន្តបន្ទាប់ ដើម្បីកែលម្អដំណើរការ លុបបំបាត់កាកសំណល់ បន្ថយការខាតបង់ និងបង្កើនប្រសិទ្ធភាពនិងកំលាំងផលិតភាពជាញឹកញាប់ ដោយមិនចាំបាច់ប្រើធនធានបន្ថែមឡើយ។ Kaizen ក៏ជំរុញឱ្យមានការចូលរួមរបស់បុគ្គលិកកាន់តែខ្លាំង ការធ្វើការជាក្រុមល្អប្រសើរ ការចំណាយតិចលើដំណើរការ ការបង្កើតស្តង់ដារលម្អិត និងការរីកចំរើនប្រកបដោយចីរភាព។ វាគាំទ្រចំពោះការបង្កើតនូវភាពច្នៃប្រឌិត ការកែលម្អគុណភាព និងភាពពេញចិត្តរបស់អតិថិជន ដោយផ្អែកលើការផ្តល់អំណាចនិងការចូលរួមរបស់បុគ្គលិកគ្រប់កម្រិត។ តាមរយៈការលើកកម្ពស់នៃការចូលរួមយ៉ាងសកម្មចាប់ពីកម្រិតនៃអ្នកគ្រប់គ្រងខ្ពស់រហូតដល់បុគ្គលិកជួរមុខរបស់ស្ថាប័ន Kaizen បង្កើតវប្បធម៌នៃការកែលម្អជាបន្តបន្ទាប់ និងភាពជោគជ័យប្រកបដោយចីរភាព។

ដើម្បីអោយកាន់តែយល់ច្បាស់ពីផ្នត់គំនិតរបស់ Kaizen ឧទាហរណ៍អំពីការអនុវត្ត Kaizen ត្រូវបានលើកឡើងដូចខាងក្រោម៖

បន្ទាប់ពីអនុវត្ត ផ្នត់គំនិត Kaizen ស្ថាប័នធនាគារមួយអាចកាត់បន្ថយពេលវេលា ដំណើរការខ្ចីប្រាក់ពី ៧ថ្ងៃ ចុះមកត្រឹម ៣ថ្ងៃ ដោយប្រើធនធានដែលមានស្រាប់ដដែល។ ក្រុមការងារចម្រុះបានកំណត់បញ្ហាឧបសគ្គដូចជា ការងារដែលស្ទួនៗ ឬជាន់គ្នា និងការយឺតយ៉ាវក្នុងការប្រាស្រ័យទាក់ទង។ ដូចនេះ ធនាគារបានប្រើទម្រង់ឌីជីថលរួម បញ្ជីត្រួតពិនិត្យស្តង់ដារ ការបង្កើតការប្រាស្រ័យទាក់ទងប្រសើរឡើង និងកិច្ចប្រជុំសង្ខេបប្រចាំថ្ងៃប្រកបដោយប្រសិទ្ធិភាព។

លទ្ធផលដែលទទួលបានគឺ: ការដំណើរការបានលឿនជាងមុន ភាពពេញចិត្តរបស់អតិថិជនកើនឡើងខ្ពស់ ក្រុមការងារធ្វើការរួសរាន់ និងផលិតភាពកើនឡើងខ្ពស់គួរឱ្យកត់សំគាល់។

៥s គឺជាគោលការណ៍ ៥ ដែលជួយបង្កើតបរិយាកាសការងារល្អដែលមានស្ថិរភាព ប្រសិទ្ធភាព និងមានប្រសិទ្ធផលខ្ពស់៖

១.  Sort (សម្រិតសម្រាំង): លុបចេញផ្នែកឬកិច្ចការដែលមិនចាំបាច់ចេញពីកន្លែងធ្វើការ។ ទុកតែអ្វីឬកិច្ចការដែលត្រូវការពិតប្រាកដសម្រាប់ការងារ។ ឧទាហរណ៍: ការិយាល័យមួយមានរបស់រញ៉េរញ៉ៃនៅលើតុ។ បុគ្គលិកបានយកឯកសារចាស់ៗដែលមិនចាំបាច់ សម្ភារៈដែលមិនប្រើប្រាស់ និងវត្ថុផ្ទាល់ខ្លួនចេញ។ បន្ទាប់មក រក្សាទុកតែឧបករណ៍ចាំបាច់ប៉ុណ្ណោះដែលនៅសល់លើតុ។ ដូច្នេះហើយបរិយាកាសការងារត្រូវបានរៀបចំឱ្យស្អាតល្អ ងាយស្រួលរកវត្ថុដែលត្រូវការ កាត់បន្ថយការរំខាន ធ្វើអោយមានអារម្មណ៏ស្រស់ស្រាយ និងជួយលើសុខភាពផងដែរ។

២. Set in Order (សណ្តាប់ធ្នាប់): រៀបចំឧបករណ៍ និងសម្ភារៈឱ្យមានលំដាប់លំដោយ ហើយងាយស្រួលស្វែងរកនិងចំណេញពេលវេលា។ ឧទាហរណ៍: ឃ្លាំងមួយមិនមានការរៀបចំផលិតផលនិងសម្ភារៈតាមលំដាប់លំដោយ នាំឱ្យយឺតក្នុងការដឹកជញ្ជូន និងខាតបង់ពេលវេលានិងប្រាក់ចំនេញ និងបង្កភាពមិនពេញចិត្តរបស់អតិថិជន។  បន្ទាប់ពីបានដាក់ស្លាកត្រឹមត្រូវបំបែកតាមប្រភេទផលិតផល សម្ភារៈ និងតាមចំនួនប្រើប្រាស់ ក៏ដូចជាប្រើពណ៌ និងប្រព័ន្ធបញ្ជីឌីជីថល វាបានជួយឱ្យការរកផលិតផល និងសម្ភារៈបានលឿន ងាយស្រួល ចំណេញពេលវា និងបង្កើនភាពពេញចិត្តរបស់អតិថិជន។

៣. Shine (សម្អាត): សម្អាតកន្លែងធ្វើការជាប្រចាំ។ ការរក្សាភាពស្អាតជានិរន្តិ៍ ជួយសម្រួលសុវត្ថិភាព សុខភាពល្អ បង្កើនសោភ័ណ្ឌភាពបញ្ញាស្មារតី និងរកឃើញបញ្ហាសក្តានុពលជាច្រើនទាន់ពេល។ ឧទាហរណ៍: កន្លែងធ្វើការស្អាតនាំឱ្យបញ្ហា ឬសម្ភារៈត្រូវបានរកឃើញលឿន ហើយជួយរក្សាវប្បធម៌វិន័យនៃការងារ និងរក្សាបាននូវផាសុកភាព។

៤. Standardize (ស្តង់ដារ): បង្កើតនីតិវិធីនិងស្តង់ដារ ក្នុងការថែរក្សាភាពស្អាត និងការរៀបចំល្អ។ ឧទាហរណ៍: ក្រុមគ្រួសារមួយតែងតែភ្លេចការងារប្រចាំថ្ងៃរបស់សមាជិកគ្រួសារម្នាក់ៗ ប៉ុន្តែបន្ទាប់មកបានដាក់ចេញតារាងតួនាទីនិងកាលវិភាគប្រចាំថ្ងៃ ហើយបិតឬភ្ជាប់នៅកន្លែងមួយដែលងាយមើលឃើញ។ ទង្វើនេះបានជួយឱ្យសមាជិកគ្រួសារម្នាក់មានវិន័យផ្ទាល់ខ្លួន ដឹងពីតួនាទីប្រចាំថ្ងៃ និងការទទួលខុសត្រូវរួម។

៥.  Sustain  (ស្ថិតស្ថេរ):  បង្កើតវប្បធម៌នៃវិន័យ។ ត្រូវធ្វើឱ្យប្រាកដថា គោលការណ៍ ៥S ត្រូវបានអនុវត្តឱ្យបានខ្ជាប់ខ្ជួនជាបន្តបន្ទាប់និងរក្សាទម្លាប់ល្អ។ ឧទាហរណ៍: ក្រុមគ្រួសារបានសម្អាតបន្ទប់ទទួលភ្ញៀវ តែប៉ុន្តែស្ទើរមិនអាចរក្សាសភាពល្អបានជានិរន្តិ៍។ បន្ទាប់មកបានដាក់ចេញនូវគោលការណ៍ “ដាក់សម្ភារៈត្រឡប់ទៅកន្លែងដើមវិញនៅពេលដែលប្រើប្រាស់រួចរាល់” ដែលបិតភ្ជាប់នៅជញ្ជាំងដែលងាយមើលឃើញ និងសមាជិកគ្រួសារម្នាក់ៗអនុវត្តគោលការណ៍នេះជារៀងរាល់ថ្ងៃ។ ជាលទ្ធផល កន្លែងទទួលភ្ញៀវនៅរក្សាភាពស្អាតជានិច្ច។

គោលការណ៍ទាំង៥នេះ ត្រូវបានរចនាឡើងដើម្បីបង្កើតសវនកម្មនៃការកែលម្អជាបន្តបន្ទាប់ ដោយលើកកម្ពស់វប្បធម៌ដែលមានការផ្លាស់ប្តូរតូចៗបែបស្ថិរភាពក្នុងរយៈពេលវែង។ ដោយអនុវត្តគោលការណ៍ទាំងនេះជាប្រចាំ ស្ថាប័នអាចបង្កើនកំលាំងផលិតភាព ការច្នៃប្រឌិត នវានុវត្តន៍ បំបាត់កិច្ចការឬរបស់ដែលគ្មានប្រយោជន៍ក្នុងដំណើរការ និងបង្កើតបរិយាកាសការងារដែលមានលំនឹង និងប្រសើរជាងមុន។ ដំណើរនៃការកែលម្អនេះមិនត្រឹមតែបង្កើនលទ្ធផលល្អប៉ុណ្ណោះទេ ប៉ុន្តែថែមទាំងជំរុញឱ្យបុគ្គលិកទទួលយកការច្នៃប្រឌិត និងចូលរួមសកម្មក្នុងការផ្តល់អត្ថប្រយោជន៍ដល់ភាពជោគជ័យរបស់ស្ថាប័នក្នុងរយៈវែងផងដែរ។

សរុបសេចក្តីមក បុគ្គលម្នាក់ៗ និងស្ថាប័នត្រូវបានលើកទឹកចិត្តក្នុងការអនុវត្តផ្នត់គំនិត Kaizen ជាប្រចាំ ដើម្បីបង្កើតភាពប្រសើរនៃជីវិត ក៏ដូចជាធានាលើការរីកចម្រើនលូតលាស់ប្រកបដោយចីរភាពរបស់បុគ្គលម្នាក់ៗនិងស្ថាប័ននីមួយៗ។ ចុះពេលណាអ្នកនឹងចាប់ផ្តើមអនុវត្តផ្នត់គំនិត Kaizen នេះ?

អាននិងទាញយកជា PDF: KAIZEN

 

 

ការយល់ដឹងពីការធានាសញ្ញាបណ្ណ

Posted on by Sorn Chhorvyvatey

តើសញ្ញាបណ្ណជាអ្វី? ចុះបើសញ្ញាបណ្ណមានការធានា?

សញ្ញាបណ្ណគឺជាបណ្ណបំណុលដែលផ្តល់ការប្រាក់ និងមានឥណប្រតិទានចាប់ពី១ឆ្នាំឡើងទៅ។ សញ្ញាបណ្ណគឺជាឧបករណ៍ហិរញ្ញប្បទានមួយប្រភេទ ដែលគេសង្កេតឃើញមាន ៣ប្រភេទគឺ សញ្ញាបណ្ណធម្មតា សញ្ញាបណ្ណមានវត្ថុធានា និងសញ្ញាបណ្ណមានការធានា។ សញ្ញាបណ្ណត្រូវបានគេរៀបចំឱ្យមានលក្ខណៈងាយស្រួលក្នុងការជួញដូរ និងជាទូទៅបោះផ្សាយដោយក្រុមហ៊ុន រដ្ឋាភិបាលនិងអ្នកបោះផ្សាយសម្រាប់គោលបំណងពិសេស។  សញ្ញាបណ្ណក៏ជាទ្រព្យមួយប្រភេទ ដែលអ្នកវិនិយោគជាច្រើនដូចជា ក្រុមហ៊ុនធានារ៉ាប់រង ក្រុមហ៊ុនបរធនបាល និងធនាគារកណ្តាលជាដើមតែងមាននៅក្នុងផលបត្រវិនិយោគរបស់ពួកគេ។

ខណៈដែលការប្រាក់របស់សញ្ញាបណ្ណមានច្រើនប្រភេទ នៅកម្ពុជាយើងសង្កេតឃើញមានសញ្ញាបណ្ណដែលមានការប្រាក់ថេរ និងអណ្តែតនៅលើទីផ្សារ។ សញ្ញាបណ្ណការប្រាក់ថេរផ្តល់នូវការទូទាត់ការប្រាក់ក្នុងចំនួនដូចៗគ្នាក្នុងរយៈពេលទៀងទាត់មួយ ដែលអាចជារៀងរាល់ខែ ត្រីមាស ឆមាស ឬឆ្នាំ។ ចំណែកសញ្ញាបណ្ណការប្រាក់អណ្តែតវិញផ្តល់នូវការប្រាក់ទីផ្សារយោង (MRR) ណាមួយបូកជាមួយនឹងគម្លាតការប្រាក់អ្នកបោះផ្សាយ (issuer-specific spread) ដែលជាគម្លាតឥណទាន (credit spread)។ សញ្ញាបណ្ណអាចបោះផ្សាយជារូបិយបណ្ណច្រើនប្រភេទ។ សញ្ញាបណ្ណដែលទូទាត់ការប្រាក់និងប្រាក់ដើមជារូបិយបណ្ណតែមួយហៅថាសញ្ញាបណ្ណរូបិយបណ្ណទោល (single currency)។ សញ្ញាបណ្ណដែលទូទាត់ការប្រាក់ជារូបិយបណ្ណមួយ ហើយទូទាត់ប្រាក់ដើមជារូបិយបណ្ណមួយផ្សេងទៀត ហៅថាសញ្ញាបណ្ណរូបិយបណ្ណទ្វេ (dual currency)។ នៅកម្ពុជា សញ្ញាបណ្ណត្រូវចារឹកជាប្រាក់រៀល តែអាចទូទាត់ជាប្រាក់ដុល្លារបាន។

សញ្ញាបណ្ណមានការធានាមានការប្រាក់និងប្រាក់ដើមត្រូវបានធានាថាទូទាត់សងដោយភាគីទីបីណាមួយ នៅពេលអ្នកបោះផ្សាយខកខានមិនបានសងបំណុល។ ភាគីទីបីដែលជាបុគ្គលធានា គឺអាចជារដ្ឋាភិបាល ក្រុមហ៊ុនឯកជន ក្រុមហ៊ុនធានារ៉ាប់រង ឬក្រុមហ៊ុនមេរបស់អ្នកបោះផ្សាយនោះ។ បុគ្គលធានាផ្តល់ការធានាដល់អ្នកវិនិយោគលើសញ្ញាបណ្ណលើហានិភ័យឥណទានរបស់អ្នកបោះផ្សាយ នៅពេលអ្នកបោះផ្សាយខកខានក្នុងការបំពេញកាតព្វកិច្ចសងទាន់ពេលវេលានូវការប្រាក់ និង/ឬប្រាក់ដើមនៅក្នុងរយៈកាលរបស់សញ្ញាបណ្ណ។ សំណងនេះអាចបង្កើនទំនុកចិត្តរបស់វិនិយោគិន និងអាចធ្វើឱ្យសញ្ញាបណ្ណមានការធានា មានការប្រាក់ទាប ប៉ុន្តែអ្នកបោះផ្សាយត្រូវបង់កម្រៃធានា ដែលអត្រានៃកម្រៃនោះស្ថិតលើស្ថានភាពហានិភ័យរបស់ពួកគេផ្ទាល់។ ជាមួយនឹងការធានានេះ សញ្ញាបណ្ណដែលត្រូវបោះផ្សាយនឹងទទួលបានចំណាត់ថ្នាក់ឥណទានស្មើនឹងចំណាត់ថ្នាក់ឥណទានរបស់បុគ្គលធានា។ ហេតុនេះ ការធានាសញ្ញាបណ្ណផ្តល់ជម្រើសវិនិយោគមួយដែលមានសុវត្ថិភាពជាងដល់អ្នកវិនិយោគ ហើយផ្តល់ជម្រើសហិរញ្ញប្បទានដែលមានចំណាយការប្រាក់ទាបជាងដល់អ្នកបោះផ្សាយ។

ទោះជាយ៉ាងណា ការធានាសញ្ញាបណ្ណនឹងទាមទារនូវលក្ខខណ្ឌ (covenant) តម្រូវ និងកញ្ចប់ធានា/វត្ថុធានា (security package) ពីអ្នកបោះផ្សាយ ផ្អែកតាមការសិក្សាវាយតម្លៃ។ បុគ្គលធានាវាយតម្លៃអ្នកបោះផ្សាយជាចម្បងលើស្ថានភាពហិរញ្ញវត្ថុ អភិបាលកិច្ចសាជីវកម្ម និងផែនការធុរកិច្ចអនាគតជាដើម។ បុគ្គលធានាក៏ចុះត្រួតពិនិត្យការបំពេញកាតព្វកិច្ចតាមច្បាប់ ដោយធ្វើការជួបផ្ទាល់នៅទីតាំងរបស់អ្នកបោះផ្សាយ ដើម្បីសិក្សាលម្អិតលើស្ថានភាពហិរញ្ញវត្ថុ ប្រតិបត្តិការ គតិយុត្ត ពន្ធដារ និងផ្នែកផ្សេងៗទៀត។ បន្ទាប់ពីបញ្ចប់ដំណើរការនេះ បុគ្គលធានាអាចធ្វើការសន្និដ្ឋានបានថាតើអាចផ្តល់ការធានា សញ្ញាបណ្ណឬយ៉ាងណា ហើយត្រូវកំណត់លក្ខខណ្ឌតម្រូវនិងកញ្ចប់ធានា/វត្ថុធានាយ៉ាងណាខ្លះ។ លក្ខខណ្ឌតម្រូវគឺជាលក្ខខណ្ឌគតិយុត្តនៃកិច្ចសន្យាដែលអ្នកបោះផ្សាយត្រូវអនុលោមតាម ហើយជាទូទៅគឺពាក់ព័ន្ធនឹងការកំណត់ផ្នែកហិរញ្ញវត្ថុដែលអាចជា ការកម្រិតលើអនុបាតលីវើរ៉េច កម្រិតអប្បបរមានៃអនុបាតលទ្ធភាពសងបំណុល និងអនុបាតប្រុងប្រយ័ត្នផ្សេងទៀតដូចជា អនុបាតសន្ទនិយភាព អនុបាតសាធនភាព អនុបាតឥណទានមិនដំណើរការនិងអនុបាតផ្សេងទៀតកំណត់ដោយធនាគារកណ្តាល ប្រសិនបើអ្នកបោះផ្សាយគឺជាគ្រឹះស្ថានធនាគារនិងហិរញ្ញវត្ថុ។ ចំពោះកញ្ចប់ធានាឬវត្ថុធានាគឺជាទ្រព្យដែលមានគុណភាពនិងតម្លៃដែលគាំទ្រដល់ការជំពាក់របស់អ្នកបោះផ្សាយ ដែលអាចជាប្រាក់បញ្ញើនៅធនាគារ អចលនវត្ថុ ការធានាផ្ទាល់ខ្លួន មូលនិធិរក្សាទុកដោយឡែកជាដើម។ ជាងនេះទៅទៀត ការធានាសញ្ញាបណ្ណក៏តម្រូវឱ្យមានឯកសារគតិយុត្តមួយចំនួន ដែលក្នុងនោះចែងពីលក្ខខណ្ឌនិងការកំណត់អំពីការធានានិងការទាមទារសងត្រឡប់។

ខណៈដែលបុគ្គលធានាផ្តល់ការសន្យាលើទំនួលខុសត្រូវនៃបំណុលជំនួសឱ្យអ្នកបោះផ្សាយ បុគ្គលធានាក៏អាចស្វែងរកបុគ្គលធានាផ្សេងទៀតដើម្បីបែងចែកហានិភ័យផងដែរ។ ការធានាបន្តនេះអនុញ្ញាតឱ្យបុគ្គលធានាទាំងពីរទទួលបានចំណែកអ៊ិចស្ប៉ូស័រទៅតាមកម្រិតហានិភ័យទទួលយកបានរបស់ខ្លួន។ នៅកម្ពុជា សាជីវកម្មធានាឥណទានកម្ពុជា (CGCC) គឺជាអង្គភាពដំបូងនិងតែមួយដែលបានទទួលស្គាល់ជាបុគ្គលធានាសញ្ញាបណ្ណដោយនិយ័តករមូលបត្រកម្ពុជា។ ការធានាសញ្ញាបណ្ណរបស់ CGCC រួមមានការធានាទាំងស្រុងដោយ CGCC និងការធានាបន្ត។ ចំពោះការធានាទាំងស្រុង CGCC ធ្វើការធានាដោយឥតលក្ខខណ្ឌនិងមិនអាចលុបបានលើទំហំសញ្ញាបណ្ណបោះផ្សាយ ១០០ភាគរយ និងលើការប្រាក់។ នៅពាក់កណ្តាលឆ្នាំ២០២៤ CGCC បានបោះជំហានដ៏សំខាន់មួយក្នុងការជំរុញបេសកកម្មធានាសញ្ញាបណ្ណ ដោយបានផ្តួចផ្តើមកិច្ចសហប្រតិបត្តិការជាមួយ Private Infrastructure and Development Group (PIDG) និង GuarantCo Ltd ដែលជាបុត្រសម្ព័ន្ធរបស់ PIDG ។ ស្ថាប័នទាំងបីបានព្រមព្រៀងធ្វើប្រតិបត្តិការធានាបន្តលើសញ្ញាបណ្ណបោះផ្សាយនៅកម្ពុជាដើម្បីគាំទ្រការអភិវឌ្ឍន៍ទីផ្សារសញ្ញាបណ្ណក្នុងស្រុក។

ដោយហេតុថា ការធានាសញ្ញាបណ្ណរបស់ CGCC នឹងផ្តល់ដល់សញ្ញបណ្ណបោះផ្សាយក្នុងទំហំទាបបំផុតត្រឹម ៨ពាន់លានរៀល (ប្រមាណ ២លានដុល្លារអាមេរិក) សហគ្រាសនិងសាជីវកម្មដែលត្រូវការទុនអាចពិចារណាបោះផ្សាយសញ្ញាបណ្ណ ជាជម្រើសបន្ថែមលើកម្ចីពីធនាគារ។ សហគ្រាសនិងសាជីវកម្ម ជាមួយទីប្រឹក្សាហិញ្ញវត្ថុ ឬក្រុមហ៊ុនមូលបត្រដែលធានាទិញសញ្ញាបណ្ណ អាចរៀបចំរយៈកាលរបស់សញ្ញាបណ្ណ អត្រាការប្រាក់ ការសងប្រាក់ដើម និងលក្ខខណ្ឌផ្សេងទៀត ទៅតាមការដែលខ្លួនចង់បាន។ ជាមួយគ្នានេះដែរ CGCC មិនបានកំណត់ការធានាសញ្ញាបណ្ណទៅត្រឹមវិស័យណាមួយនោះទេ ដូច្នេះរាល់សំណើពីអ្នកមានបំណងបោះផ្សាយនឹងត្រូវបើកទូលាយក្នុងការទទួលយកមកសិក្សាវាយតម្លៃ៕

អាននិងទាញយកជា PDF: https://www.cgcc.com.kh/wp-content/uploads/2025/06/Understanding-Bond-Guarantee.pdf

 

ស្វែងយល់អំពីការធានាឥណទាន – កិច្ចសម្ភាសន៍ជាមួយប្រធានសហព័ន្ធស្រូវអង្ករកម្ពុជា

Posted on by Sorn Chhorvyvatey

១. តើសហព័ន្ធស្រូវអង្ករកម្ពុជា (CRF) យល់ឃើញដូចម្តេច ចំពោះយន្តការធានាឥណទានរបស់សាជីវកម្មធានាឥណទានកម្ពុជា? ហេតុអ្វីបានជា CRF ចូលរួមជាដៃគូសហការជាមួយរបស់ CGCC?

ជាបឋម  ខ្ញុំសូមថ្លែងអំណរគុណដល់រាជរដ្ឋាភិបាលដែលបានផ្តួចផ្តើមគំនិតនិងបានបង្កើតនូវស្ថាប័ន CGCC នេះឡើង ដែលជាផ្នែកមួយយ៉ាងសំខាន់ សម្រាប់បន្ថែមនូវលទ្ធភាពដើម្បីទទួលបានឥណទានបន្ថែមដល់វិស័យឯកជននៅកម្ពុជាពីធនាគារឯកជននានា។

ចំពោះយន្តការធានាឥណទានរបស់ សាជីវកម្មធានាឥណទានកម្ពុជា (CGCC) គឺជាយន្តការមួយដែលល្អ ហើយមានលក្ខណៈបត់បែនទៅតាមស្ថានភាពជាក់ស្តែងនៃការវិវឌ្ឍសេដ្ឋកិច្ចជាតិ  ហើយក៏ជាយន្តការមួយដែលអាចផ្តល់នូវការបំពេញបន្ថែមលើកំលាំងហិរញ្ញវត្ថុ របស់សហគ្រាសធុនតូច និងមធ្យម ឱ្យកាន់តែរីកធំឡើងបន្ថែមទៀត។ ដោយសារហេតុផលនៃសារៈប្រយោជន៍ទាំងនេះហើយ ទើបសហព័ន្ធស្រូវអង្ករកម្ពុជា (CRF) បានចូលរួមធ្វើជាដៃគូសហការជាមួយសាជីវកម្មធានាឥណទានកម្ពុជា ដើម្បីជួយដោះស្រាយលើបញ្ហាកង្វះទុនបង្វិលជូនដល់សមាជិករបស់ខ្លួន។

២. តើគម្រោងធានាឥណទានរបស់ CGCC ជាពិសេសគម្រោងធានាឥណទានលើការនាំចេញអង្ករ បានផ្តល់អត្ថប្រយោជន៍ចំពោះ CRF និងសមាជិករបស់ CRF យ៉ាងដូចម្តេចខ្លះ?

គម្រោងធានាឥណទានរបស់ CGCC ជាពិសេសគម្រោងឥណទានលើការនាំចេញអង្ករ (Rice Export Guarantee Scheme) បានផ្តល់ផលប្រយោជន៍ដល់សមាជិកសហព័ន្ធស្រូវអង្ករកម្ពុជា លើការបង្កើតជម្រើសបន្ថែមក្នុងការទទួលបានឥណទានសម្រាប់យកទៅប្រមូលទិញស្រូវពីប្រជាកសិករ ឱ្យបានកាន់តែច្រើនឡើងសម្រាប់កិនកែច្នៃលក់ក្នុងស្រុក និងនាំចេញ។ ជាក់ស្តែងតាមរយៈគម្រោងធានាឥណទាននេះ ស្រូវប្រមាណជាជិត១២០.០០០តោន បានប្រមូលទិញបន្ថែមពីប្រជាកសិករ ដោយសារការទទួលបានការធានាឥណទាននេះ។

៣. ក្រោមគម្រោងធានាឥណទានលើការនាំចេញអង្ករ តើមានសមាជិករបស់សហព័ន្ធ បានទទួលនូវកម្ចីដែលមានការធានាពី CGCC តាមរយៈគ្រឹះស្ថានហិរញ្ញវត្ថុចូលរួមរបស់ CGCC ប៉ុន្មានក្រុមហ៊ុន/រោងម៉ាស៊ីន និងក្នុងទំហំកម្ចីសរុបប៉ុន្មាន? តើកម្ចីទាំងនោះត្រូវបានប្រើប្រាស់ក្នុងគោលបំណងអ្វីខ្លះ?

រយៈកាលកន្លងមកនេះ មានសមាជិកចំនួន ២១រោងម៉ាស៊ីនកិនស្រូវ ដែលបានទទួលកម្ចីក្រោមការធានាពី CGCC តាមរយៈគ្រឹះស្ថានហិរញ្ញវត្ថុចំនួន៧។ កម្ចីទាំងនោះត្រូវបានប្រើប្រាស់ជាទុនបង្វិល សម្រាប់ប្រមូលទិញស្រូវពីប្រជាកសិករសម្រាប់កិនកែច្នៃ និងលក់ដល់ក្រុមហ៊ុននាំចេញអង្ករទៅកាន់ទីផ្សារអន្តរជាតិ។

៤. តើក្រុមហ៊ុននាំចេញអង្ករ/រោងម៉ាស៊ីនកិនស្រូវ ដែលជាសមាជិករបស់ CRF គួររៀបចំខ្លួនយ៉ាងដូចម្តេច ដើម្បីទទួលបានកម្ចីដែលមានការធានាពី CGCC តាមរយៈគ្រឹះស្ថានហិរញ្ញវត្ថុចូលរួមរបស់ CGCC?

សហគ្រាសទាំងអស់ដែលជាសមាជិករបស់សហព័ន្ធស្រូវអង្ករកម្ពុជា ត្រូវតែមានការរៀបចំនូវបញ្ជីស្នាមឱ្យបានត្រឹមត្រូវ ស្របតាមបទដ្ឋានស្តង់ដារគណនេយ្យ និងបានបំពេញនូវកាតព្វកិច្ចពន្ធដារគ្រប់ប្រភេទដែលមានជាធរមាន និងបានបំពេញលក្ខខណ្ឌពេញលេញជាសមាជិកសមាព័ន្ធស្រូវអង្ករកម្ពុជាផងដែរ។ មិនតែប៉ុណ្ណោះ សហគ្រាសទាំងនេះត្រូវតែបំពេញលក្ខខណ្ឌតម្រូវរបស់គ្រឹះស្ថានហិរញ្ញវត្ថុដែលចូលរួមរបស់ CGCC ផងដែរ។

៥. ក្នុងឆ្នាំ២០២៥ តើ CRF មានយុទ្ធសាស្រ្ត ឬផែនការដូចម្តេច ដើម្បីបន្តបង្កើនការគាំទ្រដល់សមាជិករបស់ខ្លួន ក្នុងការទទួលបានហិរញ្ញប្បទានសម្រាប់ជំរុញការនាំចេញអង្ករ  ស្របតាមគោលនយោបាយរបស់រាជរដ្ឋាភិបាលកម្ពុជា?

សម្រាប់ឆ្នាំ ២០២៥ សហព័ន្ធស្រូវអង្ករកម្ពុជា មានផែនការជំរុញទីផ្សារនាំចេញឱ្យមានកំណើនបន្ថែមទៀត ដើម្បីបង្កើនកំលាំងផលិតរបស់សមាជិកឱ្យពេញលេញនិងអស់លទ្ធភាព ព្រោះវាជាកត្តាជំរុញដល់សមាជិកឱ្យមានតម្រូវការទុនបន្ថែម ក្នុងការប្រមូលទិញនូវសន្និធិស្រូវទុកសម្រាប់កិនកែច្នៃ និងនាំចេញទៅកាន់ទីផ្សារអន្តរជាតិ។ បន្ថែមលើសពីនេះ សហព័ន្ធស្រូវអង្ករកម្ពុជា នឹងជួយបណ្តុះបណ្តាលដល់សមាជិកលើការប្រើប្រាស់និងការគ្រប់គ្រងហិរញ្ញវត្ថុឱ្យមានប្រសិទ្ធភាព តម្លាភាព និងគណនេយ្យភាពជាងមុន ដើម្បីជាប្រយោជន៍សម្រាប់ការទទួលបានហិរញ្ញវត្ថុផ្លូវការតាមរយៈការធានាឥណទានបន្ថែមទៀតពី CGCC៕

អាននិងទាញយកជា PDF: https://www.cgcc.com.kh/wp-content/uploads/2025/06/Interview-with-President-of-CRF.pdf

 

ជួបជាមួយម្ចាស់អាជីវកម្មដែលទទួលបានកម្ចីដែលមានការធានាពី CGCC

Posted on by Sorn Chhorvyvatey

ក្តីស្រម៉ៃរបស់ខ្ញុំ គឺចង់វិនិយោគលើអាជីវកម្មដែលអាចជួយដល់សុខុមាលភាពរបស់មនុស្ស ដោយសារតែមនុស្សអាចរស់នៅបានដោយសារសុខភាព និងស្មារតីល្អ។ នេះហើយជាមូលហេតុចម្បងដែលជំរុញចិត្តរបស់ខ្ញុំ និងភរិយារបស់ខ្ញុំ ឱ្យបង្កើតអាជីវកម្មចំនួន២ឡើងមក គឺក្រុមហ៊ុន អេឌីខេរ៉ាយស៍ (អង្ករដីខ្មែរ) និងមុនីគ្លីនិក។ សម្រាប់ក្រុមហ៊ុនអង្ករដីខ្មែរ ខ្ញុំបានផ្តួចផ្តើមបង្កើតឡើងមកដោយជឿជាក់ថា អង្ករគឺជាប្រភពអាហារចម្បងរបស់មនុស្ស ដោយសារតែចំនួនប្រជាជនមានការកើនឡើងរៀងរាល់ថ្ងៃ តែផ្ទៃដីដាំដុះកសិកម្ម បែរជាកាន់តែថមថយទៅ រីឯមុនីគ្លីនិកគឺត្រូវបានបង្កើតឡើងជាមួយនឹងភរិយារបស់ខ្ញុំ ក្នុងចក្ខុវិស័យផ្តល់នូវការថែទាំនិងព្យាបាលសុខភាព តាមរយៈសេវាសុខាភិបាលដែលមានតម្លៃសមរម្យ ប្រកបដោយគុណភាពស្តង់ដារ។

តាមរយៈបទពិសោធន៍នៃការបំពេញការងារនៅក្រុមហ៊ុននាំចេញអង្ករដ៏ធំមួយក្នុងប្រទេសកម្ពុជា ខ្ញុំបានសិក្សារៀនសូត្រ និងបានចុះឃើញផ្ទាល់ពីស្ថានភាពរបស់ប្រជាកសិករដាំដុះស្រូវនៅតាមជនបទ ទើបខ្ញុំសម្រេចចិត្តចាប់ផ្តើមបង្កើតដេប៉ូលក់អង្ករក្នុងស្រុកឈ្មោះថា អង្ករដីខ្មែរ និងបានពង្រីកវិសាលភាព នៅឆ្នាំ២០២១ ក្លាយជាក្រុមហ៊ុនអេឌីខេរ៉ាយស៍ ដែលជាក្រុមហ៊ុនផលិតអង្ករមានគុណភាពខ្ពស់ គោរពតាមស្តង់ដារសុវត្ថិភាពចំណីអាហារ និងផ្តល់ឱ្យកសិករនូវទីផ្សារដែលមាននិរន្តរភាព និងបង្កើនប្រាក់ចំណូលតាមរយៈការចុះកិច្ចសន្យាផ្គត់ផ្គង់ស្រូវមកកាន់ក្រុមហ៊ុនរបស់ខ្ញុំ។ រីឯមុនីគ្លីនិក គឺជាគ្លីនិកព្យាបាល និងថែទាំសុខភាព ដែលត្រូវបានបង្កើតឡើងនៅក្នុងឆ្នាំ២០១៨ តាមរយៈការចាប់ដៃជាមួយភរិយារបស់ខ្ញុំ ឈរលើឆន្ទៈក្នុងការប្តេជ្ញាផ្តល់នូវសេវាសុខភាពជូនដល់ប្រជាជនខ្មែរ ប្រកបដោយគុណភាព និងតម្លៃសមរម្យ ជាពិសេសទៅលើការព្យាបាលជំងឺទឹកនោមផ្អែម និងការត្រួតពិនិត្យសុខភាពជាប្រចាំក្នុងការការពារជំងឺធ្ងន់ធ្ងរនានា។

ពិតណាស់ គោលការណ៍នៃការប្រកបអាជីវកម្ម យើងតែងតែចង់អភិវឌ្ឍនិងពង្រីកឱ្យកាន់តែធំ។ មិនខុសពីអាជីវកម្មគ្លីនិករបស់ខ្ញុំនេះទេ ដែលនៅពេលដល់ដំណាក់កាលត្រូវពង្រីកអាជីវកម្ម យើងមានតម្រូវការទិញសម្ភារបរិក្ខារទំនើបៗ ដើម្បីបង្កើនស្តង់ដាររបស់គ្លីនិក។ ការសម្រេចចិត្តស្នើកម្ចីពីគ្រឹះស្ថានធនាគារ គឺជាមធ្យោបាយតែមួយគត់ដែលខ្ញុំជឿជាក់ថា អាចបំពេញនូវក្តីស្រម៉ៃរបស់ខ្ញុំនិងភរិយារបស់ខ្ញុំ ឱ្យកើតជារូបរាងបាន។ ប៉ុន្តែខ្ញុំមិនមានទ្រព្យធានាជាប្លង់ដី ឬប្លង់ផ្ទះ ក្នុងការតម្កល់នៅធនាគារនោះទេ តែបញ្ហាប្រឈមនេះត្រូវបានដោះស្រាយ តាមរយៈការធានាឥណទានរបស់ CGCC ដែលបានសម្រួលឱ្យខ្ញុំទទួលបានកម្ចីពីធនាគារព្រីនស៍ សម្រាប់ការទិញសម្ភារបរិក្ខារគ្លីនិក។

ការទទួលបានការធានាពី CGCC លើកម្ចីរបស់ខ្ញុំនេះ វាមិនមែនជារឿងចៃដន្យនោះទេ តែជាការទទួលបានតាមរយៈការចូលរួមកម្មវិធីកសាងសមត្ថភាពសហគ្រិនរបស់ CGCC ដែលហៅកាត់ថា EPIC វគ្គទី១ នៃឆ្នាំ២០២៤ កាលពីខែឧសភា ឆ្នាំ២០២៤ កន្លងទៅ ដែលធ្វើឱ្យខ្ញុំបានស្គាល់ពី CGCC និងស្គាល់ពីធនាគារដៃគូដែលអាចផ្តល់កម្ចីដល់អាជីវកម្មដែលមានសក្តានុពល ជាមួយនឹងផែនការអាជីវកម្មច្បាស់លាស់ ហើយអាចដោះស្រាយនឹងបញ្ហាប្រឈមខ្វះទ្រព្យធានា។ ក្រោយពីទទួលបានកម្ចីរួច ខ្ញុំបានយកទៅទិញសម្ភារបរិក្ខារពេទ្យបន្ថែមសម្រាប់ដាក់នៅអគារគ្លីនិកដែលបាននិងកំពុងសាងសង់បន្ថែម ស្របនឹងគោលដៅរបស់កម្ចី ផែនការអាជីវកម្ម និងផែនការវិនិយោគច្បាស់លាស់របស់ខ្ញុំ។ បន្ថែមពីលើនេះ ខ្ញុំក៏មានគម្រោងក្នុងការស្នើកម្ចីបន្ថែមសម្រាប់ជាទុនបង្វិលក្នុងការទិញស្រូវពីកសិករ ដើម្បីបង្កើនការផលិតអង្កររបស់ក្រុមហ៊ុនអង្ករដីខ្មែររបស់ខ្ញុំនាពេលអនាគតផងដែរ។

ក្នុងនាមជាម្ចាស់អាជីវកម្មមួយរូប ខ្ញុំយល់ថា ការស្វែងយល់ពីចំណេះដឹងហិរញ្ញវត្ថុពិតជាមានសារៈសំខាន់ណាស់ ព្រោះអាចធ្វើឱ្យយើងគិតគូរបានល្អិតល្អន់លើការវិនិយោគបានគ្រប់ជ្រុងជ្រោយ ជាក់ស្តែងលើការទិញទ្រព្យ (Asset) ដើម្បីបង្កើនចំណូល ជាជាងការទិញទ្រព្យសកម្មដែលមិនអាចបម្លែងជាចំណូលបាន។ មួយវិញទៀត បើយើងចេះមានចំណេះដឹងហិរញ្ញវត្ថុ វាក៏អាចជួយឱ្យយើងចេះគ្រប់គ្រងធនធានមនុស្សដូចជា ការគិតគូរលើចំនួនបុគ្គលិក ប្រាក់ខែ ការលើកទឹកចិត្ត អត្ថប្រយោជន៍នានាផងដែរ៕

អាននិងទាញយកជា PDF: ជួបជាមួយម្ចាស់អាជីវកម្មដែលទទួលបានកម្ចីដែលមានការធានាពី CGCC