ព័ត៌មានថ្មីៗ Archives

កិច្ចព្រមព្រៀង ស្តីពីគម្រោងធានាឥណទានបោះដុំ និងគម្រោងធានាឥណទានដើម្បីជំរុញសេដ្ឋកិច្ច រវាងធនាគារពាណិជ្ជ ឈីហ្វ (ខេមបូឌា) ម.ក និងសាជីវកម្មធានាឥណទានកម្ពុជា បានចុះហត្ថលេខា

Posted on ខែឧសភា 21, 2026ខែឧសភា 22, 2026 by Sorn Chhorvyvatey

(ភ្នំពេញ)៖ ធនាគារពាណិជ្ជ ឈីហ្វ (ខេមបូឌា) ម.ក និងសាជីវកម្មធានាឥណទានកម្ពុជា (CGCC) បានចុះហត្ថលេខាជាផ្លូវការលើកិច្ចព្រមព្រៀង ស្តីពីគម្រោងធានាឥណទានបោះដុំក្នុងទំហំ៥លានដុល្លាអាមេរិក (Wholesale Guarantee Scheme – WGS) និងគម្រោងធានាឥណទានជំរុញសេដ្ឋកិច្ច (Economic Stimulus Guarantee Scheme – ESGS) នាថ្ងៃទី២០ ខែឧសភា ឆ្នាំ២០២៦ នៅការិយាល័យ CGCC។

កិច្ចព្រមព្រៀងនេះ ត្រូវបានចុះហត្ថលេខាដោយ លោកបណ្ឌិត លឹម អូន ប្រធានអគ្គនាយកប្រតិបត្តិធនាគារ ឈីហ្វ និងលោក ណូ លីដា អគ្គនាយក CGCC ដោយមានការចូលរួមពីថ្នាក់ដឹកនាំ និងតំណាងនៃស្ថាប័នទាំងពីរ។

បន្ទាប់ពីពិធីចុះហត្ថលេខាលើកិច្ចព្រមព្រៀងនៅថ្ងៃនេះ ធនាគារពាណិជ្ជ ឈីហ្វ (ខេមបូឌា) ម.ក បានក្លាយជាគ្រឹះស្ថានហិរញ្ញវត្ថុចូលរួមរបស់ CGCC ជាផ្លូវការដែលនឹងអនុញ្ញាតឱ្យធនាគារ ឈីហ្វ ពង្រីកការបញ្ចេញឥណទានក្រោមការធានារបស់ CGCC ទៅកាន់អាជីវកម្មសក្តានុពលនៅកម្ពុជា ជាពិសេសសហគ្រាសធុនតូច និងមធ្យម (SMEs) ដែលប្រឈមនឹងបញ្ហាកង្វះទ្រព្យធានាសម្រាប់ការស្នើសុំកម្ចីពីធនាគារ។

លោក ណូ លីដា អគ្គនាយក CGCC បានថ្លែងថា «CGCC ស្វាគមន៍នូវភាពជាដៃគូជាមួយស្ថាប័នហិរញ្ញវត្ថុដែលចូលរួម (PFIs) ដូចជា ធនាគារឈីហ្វ Chief ដែលទទួលស្គាល់អំពីតម្លៃនៃការធានាឥណទាន និងប្រើប្រាស់ការធានាឥណទានប្រកបដោយបុរេសកម្ម ដើម្បីគាំទ្រដល់អាជីវកម្មដែលមានសក្តានុពល។ ជាមួយនឹងការធានារបស់ CGCC, យើងសង្ឃឹមថា ធនាគារ ឈីហ្វ នឹងអាចពង្រីកការគាំទ្រផ្នែកហិរញ្ញវត្ថុទៅកាន់សហគ្រាសខ្នាតតូច និងមធ្យម (SMEs) ដែលមានសក្តានុពលខ្ពស់នៅក្នុងប្រទេសកម្ពុជា។ ឧទាហរណ៍ ធនាគារ ឈីហ្វ អាចផ្តល់ប្រាក់កម្ចីជាមួយនឹងសមាមាត្រកម្ចីធៀបនឹងតម្លៃទ្រព្យបញ្ចាំ (loan-to-value) ខ្ពស់ជាងមុន, រក្សាទុនបម្រុងទាបជាងមុនសម្រាប់កម្ចីដែលមានការធានា, និងអាចផ្តល់កម្ចីជូនដល់អតិថិជនដែលមិនអាចទទួលបានកម្ចី ប្រសិនបើគ្មានការធានា»។

លោកបានបន្តថា «តាមរយៈភាពជាដៃគូនេះ យើងចង់ឃើញ ធនាគារ ឈីហ្វ ពង្រីកការផ្តល់កម្ចីរបស់ខ្លួន ដោយមិនចាំបាច់ពង្រីកហានិភ័យ តាមសមាមាត្រនៃការពង្រីកកម្ចី ព្រោះ CGCC នឹងចូលរួមចែករំលែកហានិភ័យ។ CGCC ប្រកាន់ភ្ជាប់ក្នុងការកែលម្អជាបន្តបន្ទាប់លើការងារអាទិភាពជាយុទ្ធសាស្ត្រចម្បង ៥៖ ដំណើរការ (Process) ភាពជាដៃគូ(Partnership) ផលិតផល (Product) មនុស្ស (People) និងគោលនយោបាយ(Policy) ដើម្បីគាំទ្រដៃគូរបស់យើង និងប្រព័ន្ធអេកូឡូស៊ីហិរញ្ញវត្ថុ ឱ្យបានកាន់តែប្រសើរ»។

លោកបណ្ឌិត លឹម អូន ប្រធានអគ្គនាយកប្រតិបត្តិធនាគារ ឈីហ្វ បានថ្លែងថា «ចំពោះធនាគារ ឈីហ្វ នេះជា ព្រឹត្តិការណ៍ដ៏សំខាន់មួយ និងជាជំហានឈានទៅមុខដ៏មានអត្តន័យ ដែលបានក្លាយជាស្ថាប័នហិរញ្ញវត្ថុចូលរួម (PFI) ជាផ្លូវការ ក្រោមកម្មវិធីធានាឥណទានរបស់ CGCC។ ភាពជាដៃគូនេះបានឆ្លុះបញ្ចាំងពីការប្តេជ្ញាចិត្តរួមគ្នារបស់យើងក្នុងការគាំទ្រកំណើនសេដ្ឋកិច្ចកម្ពុជា តាមរយៈការពង្រឹងលទ្ធភាពទទួលបានហិរញ្ញប្បទានសម្រាប់អាជីវកម្ម និង បុគ្គល ជាក់ស្តែងសម្រាប់សហគ្រាសធុនតូច និង មធ្យម (SMEs) ដែលជាឆ្អឹងខ្នងនៃសេដ្ឋកិច្ចកម្ពុជា។ យើងខ្ញុំជឿជាក់យ៉ាងមុតមាំថា កិច្ចសហការនេះនឹងបង្កើតឱកាសដ៏មានអត្ថន័យសម្រាប់អតិថិជនរបស់យើង និងចូលរួមចំណែកជាវិជ្ជមានដល់ការអភិវឌ្ឍសេដ្ឋកិច្ចប្រកបដោយចីរភាពនៅកម្ពុជា»។

លោកបានបន្តថា «ចំពោះធនាគារឈីហ្វ យើងខ្ញុំបន្តប្តេជ្ញាចិត្តចំពោះការផ្តល់ឥណទានប្រកបដោយទំនួលខុសត្រូវ (Responsible Lending) ផ្តល់សេវាកម្មផ្តោតលើអតិថិជនជាចម្បង និងផ្តល់ការគាំទ្រដល់វិស័យអាទិភាព នៃសេដ្ឋកិច្ចកម្ពុជា។ តាមរយៈការចាប់ដៃគូជាមួយ CGCC យើងខ្ញុំមានទំនុកចិត្តយ៉ាងមុតមាំថា យើងអាចរួមគ្នាពង្រឹង បរិយាបន្នហិរញ្ញវត្ថុនៅកម្ពុជា និងផ្តល់ការគាំទ្រកាន់តែប្រសើរដល់អតិថិជនដែលត្រូវការជំនួយផ្នែកហិរញ្ញប្បទានយ៉ាងពិតប្រាកដ»។

តាមរយៈភាពជាដៃគូនេះ CGCC និងធនាគារ ឈីហ្វ មានទិសដៅក្នុងការគាំទ្រក្រុមហ៊ុន/អាជីវកម្មតាមរយៈគម្រោងធានាឥណទានចំនួនពីររបស់ CGCC គឺ WGS និង ESGS។ ក្រោមគម្រោង WGS, CGCC នឹងផ្តល់ការធានាលើកម្ចីអាជីវកម្មដែលមានស្រាប់របស់ធនាគារ ឈីហ្វ ដើម្បីចែករំលែកហានិភ័យជាមួយធនាគារ និងកាត់បន្ថយកម្រិតថ្លឹងហានិភ័យលើអ៊ិចស្ពូស៊ើដែលមានការធានា។ តាមរយៈ WGS ធនាគារ ឈីហ្វ នឹងអាចពង្រីកលទ្ធភាពក្នុងការផ្តល់កម្ចីរបស់ធនាគារ និងជំរុញឱ្យធនាគារអាចផ្តល់ហិរញ្ញប្បទានបន្ថែមទៅកាន់ SMEs ដែលមានសក្តានុពលកាន់តែច្រើន។ ដោយឡែក ក្រោមគម្រោង ESGS, CGCC នឹងផ្តល់ការធានាលើកម្ចីអាជីវកម្មថ្មីរបស់ធនាគារ ឈីហ្វដែលផ្តល់ដល់ក្រុមហ៊ុន/អាជីវកម្ម រួមទាំងសហគ្រាសធុនមីក្រូ តូច និងមធ្យម (MSMEs) និងក្រុមហ៊ុនធំៗ ជាមួយនឹងវិសាលភាពនៃការធានារហូតដល់ ៩០% នៃប្រាក់ដើម និងលក្ខខណ្ឌធានាអនុគ្រោះនានា។ គម្រោង WGS និង ESGS នឹងចូលរួមចំណែកគាំទ្រធនាគារ ឈីហ្វ ក្នុងការពង្រីកលទ្ធភាពផ្តល់ហិរញ្ញប្បទានសម្រាប់អាជីវកម្មដែលប្រឈមនឹងបញ្ហាកង្វះទ្រព្យធានា ព្រមទាំងរួមចំណែកដល់ការអភិវឌ្ឍវិស័យឯកជន និងភាពធន់នៃសេដ្ឋកិច្ចកម្ពុជា៕

អំពី CGCC

CGCC គឺជាសហគ្រាសសាធារណៈ ដែលត្រូវបានបង្កើតឡើងដោយអនុក្រឹត្យលេខ ១៤០ អនក្រ.បក ចុះថ្ងៃទី១ ខែកញ្ញា ឆ្នាំ២០២០ ក្រោមអាណាព្យាបាលបច្ចេកទេស និងហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ នៃព្រះរាជាណាចក្រកម្ពុជា។ CGCC មានបេសកកម្មចម្បងក្នុងការផ្ដល់ការធានាឥណទាន ដើម្បីបង្កើនបរិយាបន្នហិរញ្ញវត្ថុ និងរួមចំណែកដល់កំណើនសេដ្ឋកិច្ច។ផលិតផល និងសេវាកម្មសំខាន់ៗរបស់ CGCC រួមមាន ការធានាលើកម្ចីអាជីវកម្មការធានាលើការបោះផ្សាយសញ្ញាបណ្ណ និងការកសាងសមត្ថភាពសម្រាប់សហគ្រាសធុនមីក្រូ តូច និងមធ្យម (MSMEs)។ គិតត្រឹមបំណាច់ខែមេសាឆ្នាំ២០២៦ CGCC បានផ្តល់ការធានាលើកម្ចីអាជីវកម្មចំនួន ៩.៨០៨ គណនី ក្នុងទំហំសរុប ៥៦៧,៦៣ លានដុល្លារអាមេរិក។

អំពីធនាគារ ឈីហ្វ

ធនាគារពាណិជ្ជ ឈីហ្វ (ខេមបូឌា) ម.ក គឺជាធនាគារពាណិជ្ជមួយនៅកម្ពុជា ដែលផ្តល់ដំណោះស្រាយហិរញ្ញវត្ថុដែលអាចទុកចិត្តបាន និងមានភាពបត់បែន ដល់បុគ្គល និងអាជីវកម្ម ដោយផ្តោតជាពិសេសលើ SMEs។ ធនាគារ ឈីហ្វ បានទទួលអាជ្ញាបណ្ណប្រតិបត្តិការជាធនាគារឯកទេស នៅថ្ងៃទី៥ ខែធ្នូ ឆ្នាំ២០១៣ ហើយបន្ទាប់មកបានទទួលអាជ្ញាបណ្ណធនាគារពាណិជ្ជពីធនាគារជាតិនៃកម្ពុជា នៅថ្ងៃទី៦ ខែមិថុនា ឆ្នាំ២០១៨។ ធនាគារ ឈីហ្វ ផ្តល់សេវាហិរញ្ញវត្ថុជាច្រើន រួមមាន ប្រាក់បញ្ញើ ឥណទាន សេវាទូទាត់ និងដំណោះស្រាយហិរញ្ញវត្ថុសម្រាប់អាជីវកម្ម ដើម្បីគាំទ្រសកម្មភាពសេដ្ឋកិច្ច និងពាណិជ្ជកម្មនៅកម្ពុជា។

គិតត្រឹមខែធ្នូ ឆ្នាំ២០២៥ ធនាគារ CHIEF BANK បានរាយការណ៍ពីទ្រព្យសកម្មសរុបចំនួន ៤០២ លានដុល្លារអាមេរិក ដែលកើនឡើង ៤៣% បើប្រៀបធៀបទៅនឹងឆ្នាំ២០២៤ ដោយមានប្រាក់កម្ចី និងបុរេប្រទានសរុបចំនួន ២៧៧ លានដុល្លារ និងប្រាក់បញ្ញើអតិថិជនសរុបចំនួន ២៩៥ លានដុល្លារ។ លទ្ធផលទាំងនេះឆ្លុះបញ្ចាំងពីភាពរឹងមាំផ្នែកមូលធន ការគ្រប់គ្រងហានិភ័យប្រកបដោយប្រយ័ត្នប្រយែង និងទំនុកចិត្តជាបន្តរបស់អតិថិជនចំពោះធនាគារ CHIEF BANK។

Credit to: FRESH NEWS, Published on 20 May 2026

សាជីវកម្មធានាឥណទានកម្ពុជា និងធនាគារពាណិជ្ជ ឈីហ្វ សហការគ្នា លើគម្រោងធានាឥណទានបោះដុំ និងគម្រោង ធានាឥណទានជំរុញសេដ្ឋកិច្ច

Posted on ខែឧសភា 21, 2026ខែឧសភា 22, 2026 by Sorn Chhorvyvatey

ធនាគារពាណិជ្ជ ឈីហ្វ (ខេមបូឌា) ម.ក និងសាជីវកម្មធានាឥណទានកម្ពុជា (CGCC) បានចុះហត្ថលេខាជាផ្លូវការលើកិច្ចព្រមព្រៀងស្តីពីគម្រោងធានាឥណទានបោះដុំក្នុងទំហំ៥លានដុល្លាអាមេរិក (Wholesale Guarantee Scheme – WGS) និងគម្រោងធានាឥណទានជំរុញសេដ្ឋកិច្ច (Economic Stimulus Guarantee Scheme – ESGS) នាថ្ងៃទី២០ ខែឧសភា ឆ្នាំ២០២៦ នៅការិយាល័យ CGCC។ កិច្ចព្រមព្រៀងនេះ ត្រូវបានចុះហត្ថលេខាដោយ បណ្ឌិត លឹម អូន ប្រធានអគ្គនាយកប្រតិបត្តិធនាគារ ឈីហ្វ និងលោក ណូ លីដា អគ្គនាយក CGCC ដោយមានការចូលរួមពីថ្នាក់ដឹកនាំ និងតំណាងនៃស្ថាប័នទាំងពីរ។

បន្ទាប់ពីពិធីចុះហត្ថលេខាលើកិច្ចព្រមព្រៀងនៅថ្ងៃនេះ ធនាគារពាណិជ្ជ ឈីហ្វ (ខេមបូឌា) ម.ក បានក្លាយជាគ្រឹះស្ថានហិរញ្ញវត្ថុចូលរួមរបស់ CGCC ជាផ្លូវការ ដែលនឹងអនុញ្ញាតឱ្យធនាគារ ឈីហ្វ ពង្រីកការបញ្ចេញឥណទានក្រោមការធានារបស់ CGCC ទៅកាន់អាជីវកម្មសក្តានុពលនៅកម្ពុជា ជាពិសេសសហគ្រាសធុនតូច និងមធ្យម (SMEs) ដែលប្រឈមនឹងបញ្ហាកង្វះទ្រព្យធានាសម្រាប់ការស្នើសុំកម្ចីពីធនាគារ។

លោក ណូ លីដា អគ្គនាយក CGCC បានមានប្រសាសន៍ថា “CGCC ស្វាគមន៍នូវភាពជាដៃគូជាមួយស្ថាប័នហិរញ្ញវត្ថុដែលចូលរួម (PFIs) ដូចជា ធនាគារ ឈីហ្វ Chief ដែលទទួលស្គាល់អំពីតម្លៃនៃការធានាឥណទាន និងប្រើប្រាស់ការធានាឥណទាន ប្រកបដោយបុរេសកម្ម ដើម្បីគាំទ្រដល់អាជីវកម្មដែលមានសក្តានុពល។ ជាមួយនឹងការធានារបស់ CGCC, យើងសង្ឃឹមថា ធនាគារ ឈីហ្វ នឹងអាចពង្រីកការគាំទ្រផ្នែកហិរញ្ញវត្ថុទៅកាន់សហគ្រាសខ្នាតតូច និងមធ្យម (SMEs) ដែលមានសក្តានុពលខ្ពស់នៅក្នុងប្រទេសកម្ពុជា។ ឧទាហរណ៍ ធនាគារ ឈីហ្វ អាចផ្តល់ប្រាក់កម្ចីជាមួយនឹងសមាមាត្រកម្ចីធៀបនឹងតម្លៃទ្រព្យបញ្ចាំ (loan-to-value) ខ្ពស់ជាងមុន, រក្សាទុនបម្រុងទាបជាងមុនសម្រាប់កម្ចីដែលមានការធានា, និងអាចផ្តល់កម្ចីជូនដល់អតិថិជនដែលមិនអាចទទួលបានកម្ចី ប្រសិនបើគ្មានការធានា។ តាមរយៈភាពជាដៃគូនេះ យើងចង់ឃើញ ធនាគារ ឈីហ្វ ពង្រីកការផ្តល់កម្ចីរបស់ខ្លួន ដោយមិនចាំបាច់ពង្រីកហានិភ័យ តាមសមាមាត្រនៃការពង្រីកកម្ចី ព្រោះ CGCC នឹងចូលរួមចែករំលែកហានិភ័យ។ CGCCប្រកាន់ភ្ជាប់ក្នុងការកែលម្អជាបន្តបន្ទាប់លើការងារអាទិភាពជាយុទ្ធសាស្ត្រចម្បង ៥៖ ដំណើរការ (Process) ភាពជាដៃគូ (Partnership) ផលិតផល (Product) មនុស្ស (People) និងគោលនយោបាយ (Policy) ដើម្បីគាំទ្រដៃគូរបស់យើង និងប្រព័ន្ធអេកូឡូស៊ីហិរញ្ញវត្ថុ ឱ្យបានកាន់តែប្រសើរ។”

បណ្ឌិត លឹម អូន ប្រធានអគ្គនាយកប្រតិបត្តិធនាគារ ឈីហ្វ បានមានប្រសាសន៍ថា “ ចំពោះធនាគារ ឈីហ្វ នេះជា ព្រឹត្តិការណ៍ដ៏សំខាន់មួយ និងជាជំហានឈានទៅមុខដ៏មានអត្តន័យ ដែលបានក្លាយជាស្ថាប័នហិរញ្ញវត្ថុចូលរួម (PFI) ជាផ្លូវការ ក្រោមកម្មវិធីធានាឥណទានរបស់ CGCC។ ភាពជាដៃគូនេះបានឆ្លុះបញ្ចាំងពីការប្តេជ្ញាចិត្តរួមគ្នារបស់យើងក្នុងការគាំទ្រកំណើនសេដ្ឋកិច្ចកម្ពុជា តាមរយៈការពង្រឹងលទ្ធភាពទទួលបានហិរញ្ញប្បទានសម្រាប់អាជីវកម្ម និងបុគ្គល ជាក់ស្តែងសម្រាប់សហគ្រាសធុនតូច និងមធ្យម (SMEs) ដែលជាឆ្អឹងខ្នងនៃសេដ្ឋកិច្ចកម្ពុជា។ យើងខ្ញុំជឿជាក់យ៉ាងមុតមាំថា កិច្ចសហការនេះនឹងបង្កើតឱកាសដ៏មានអត្ថន័យសម្រាប់អតិថិជនរបស់យើង និងចូលរួមចំណែកជាវិជ្ជមានដល់ការអភិវឌ្ឍសេដ្ឋកិច្ចប្រកបដោយចីរភាពនៅកម្ពុជា។ ចំពោះធនាគារឈីហ្វ យើងខ្ញុំបន្តប្តេជ្ញាចិត្តចំពោះការផ្តល់ឥណទានប្រកបដោយទំនួលខុសត្រូវ (Responsible Lending) ផ្តល់សេវាកម្មផ្តោតលើអតិថិជនជាចម្បង និងផ្តល់ការគាំទ្រដល់វិស័យអាទិភាព នៃសេដ្ឋកិច្ចកម្ពុជា។ តាមរយៈការចាប់ដៃគូជាមួយ CGCC យើងខ្ញុំមានទំនុកចិត្តយ៉ាងមុតមាំថា យើងអាចរួមគ្នាពង្រឹង បរិយាបន្នហិរញ្ញវត្ថុនៅកម្ពុជា និងផ្តល់ការគាំទ្រកាន់តែប្រសើរដល់អតិថិជនដែលត្រូវការជំនួយផ្នែកហិរញ្ញប្បទានយ៉ាងពិតប្រាកដ។”

Credit to: Cambonomist, Published on 20 May 2026

ក្រុមហ៊ុនធានាឥណទានកម្ពុជា និងឡាវ ចុះអនុស្សរណៈនៃការយោគយល់គ្នា ដើម្បីគាំទ្រដល់កំណើន MSME

Posted on ខែឧសភា 15, 2026 by Sorn Chhorvyvatey

សាជីវកម្មធានាឥណទានកម្ពុជា (CGCC) និងក្រុមហ៊ុន Credit Guarantee Sole Company Limited (LCGC) កាលពីថ្ងៃចន្ទ បានចុះហត្ថលេខាលើអនុស្សរណៈនៃការយោគយល់គ្នា (MOU) ដើម្បីបង្កើនការអភិវឌ្ឍសេវាកម្មធានាឥណទាន និងការរីកចម្រើនដ៏រឹងមាំរបស់សហគ្រាសធុនមីក្រូ តូច និងមធ្យម (MSMEs) នៅក្នុងប្រទេសទាំងពីរ។

អនុស្សរណៈនៃការយោគយល់គ្នានេះត្រូវបានចុះហត្ថលេខាដោយលោក ណូ លីដា អគ្គនាយកនៃ CGCC និងលោក វង់ គីតលួង (Wong Keet Loong) អគ្គនាយកនៃ LCGC ព្រមទាំងមានតំណាងជាន់ខ្ពស់មកពីក្រសួងពាណិជ្ជកម្មនិងឧស្សាហកម្មឡាវ, ក្រសួងហិរញ្ញវត្ថុ, ធនាគារជាតិនៃសាធារណរដ្ឋប្រជាមានិតឡាវ ចូលរួមជាសាក្សី សរុបចំនួន ៣០ នាក់ នៅទីក្រុងភ្នំពេញ កាលពីថ្ងៃទី១១ ខែឧសភា។

ថ្លែងក្នុងពិធីចុះហត្ថលេខា លោក លីដា បានមានប្រសាសន៍ថា “អនុស្សរណៈនៃការយោគយល់គ្នារវាង CGCC និង LCGC នឹងនាំមកនូវអត្ថប្រយោជន៍ទៅវិញទៅមកតាមរយៈកិច្ចសហការក្នុងការកសាងសមត្ថភាព ការផ្លាស់ប្តូរព័ត៌មាន និងការកែលម្អប្រតិបត្តិការ”។

លោកបានបន្ថែមថា “វាបង្ហាញពីការចាប់ផ្តើមនៃភាពជាដៃគូដ៏យូរអង្វែង និងមានឥទ្ធិពលរវាងស្ថាប័នទាំងពីររបស់យើង។ នវានុវត្តន៍មិនត្រូវបានកំណត់ដោយភាពចាស់ទុំរបស់គ្រឹះស្ថាននោះទេ។ ទោះបីជា CGCC បានចាប់ផ្តើមប្រតិបត្តិការមុន LCGC ក៏ដោយ ក៏អាចមានផ្នែកដែល LCGC អនុវត្តបានល្អជាង ហើយយើងស្វាគមន៍ឱកាសទាំងនោះដើម្បីរៀន និងកែលម្អជាមួយគ្នា”។

ក្នុងឱកាសថ្លែងសុន្ទរកថា លោក Wong បានមានប្រសាសន៍ថា “យើងមានកិត្តិយសដែលបានចុះហត្ថលេខាលើអនុស្សរណៈនៃការយោគយល់គ្នានេះជាមួយ CGCC នៅថ្ងៃនេះ ដោយបង្កើតកិច្ចសហការជាយុទ្ធសាស្ត្រសម្រាប់ LCGC។ CGCC មានមូលដ្ឋានគ្រឹះរឹងមាំ និងមានភាពចាស់ទុំក្នុងរយៈពេល ៥ ឆ្នាំចុងក្រោយនេះ ទៅជាគ្រឹះស្ថានធានាឥណទានគំរូមួយនៅក្នុងតំបន់”។

អគ្គនាយក LCGC បានកត់សម្គាល់ថា ភាពជាដៃគូនេះនឹងគាំទ្រដល់ការអភិវឌ្ឍរបស់ LCGC ក្នុងការកែលម្អលទ្ធភាពទទួលបានហិរញ្ញប្បទានសម្រាប់ MSMEs នៅក្នុងប្រទេសឡាវ។

លោកបានបន្តថា “អនុស្សរណៈនៃការយោគយល់គ្នានេះបង្កើតក្របខ័ណ្ឌដែលមានរចនាសម្ព័ន្ធសម្រាប់កិច្ចសហការជាបន្តបន្ទាប់រវាង CGCC និង LCGC ក្នុងការអភិវឌ្ឍ និងការអនុវត្តគម្រោងធានាឥណទាន ដើម្បីគាំទ្រ MSMEs ក៏ដូចជាក្នុងការផ្លាស់ប្តូរចំណេះដឹងលើចំណាត់ថ្នាក់បៃតង (green taxonomy) និងគម្រោងធានាហិរញ្ញប្បទានអាកាសធាតុ/បៃតង”។

លោកបានបន្ថែមថា “ក្នុងនាមជាគ្រឹះស្ថានធានាឥណទានដែលបង្កើតឡើងដោយរដ្ឋាភិបាល និងគ្រប់គ្រងដោយរដ្ឋ អង្គភាពទាំងពីរចែករំលែកអាណត្តិរួមមួយដើម្បីបន្ធូរបន្ថយការរឹតបន្តឹងហិរញ្ញប្បទានសម្រាប់ MSMEs ដែលជាវិស័យមួយដែលបម្រើជាមូលដ្ឋានគ្រឹះនៃការអភិវឌ្ឍសេដ្ឋកិច្ចក្នុងតំបន់”។

Credit to: Khmer Times, Published on 14 May 2026

ឯកឧត្តមអគ្គបណ្ឌិតសភាចារ្យ អូនព័ន្ធមុនីរ័ត្ន អញ្ជើញជាអធិបតី ក្នុងពិធីអបអរសាទរខួប ៥ឆ្នាំ របស់ CGCC “៥ឆ្នាំ នៃការធានាឥណទានជាយុទ្ធសាស្រ្ដ សម្រាប់ការអភិវឌ្ឍសេដ្ឋកិច្ចប្រកបដោយបរិយាបន្ន”

Posted on ខែមករា 28, 2026 by Sorn Chhorvyvatey

នៅថ្ងៃទី២៧ ខែមករា ឆ្នាំ២០២៦ ក្រសួងសេដ្ឋកិច្ច និងហិរញ្ញវត្ថុ និងសាជីវកម្មធានាឥណទានកម្ពុជា (CGCC) បានសហការរៀបចំខួប៥ឆ្នាំ របស់ CGCC ក្រោមប្រធានបទ “៥ឆ្នាំ នៃការធានាឥណទានជាយុទ្ធសាស្រ្ដ សម្រាប់ការអភិវឌ្ឍសេដ្ឋកិច្ចប្រកបដោយបរិយាបន្ន” ក្រោមអធិបតីភាពដ៏ខ្ពង់ខ្ពស់របស់ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ នៅសណ្ឋាគារសាន់ & មូន រីវើសាយ។

ពិធីនេះ ត្រូវបានរៀបចំឡើង ក្នុងគោលបំណងពិនិត្យ និងអបអរសមិទ្ធផលសំខាន់ៗ, ការវាយតម្លៃអំពី វឌ្ឍនភាពនៃដំណើរការយន្ដការធានាឥណទាន ក្នុងរយៈពេល ៥ឆ្នាំ កន្លងមក, ការប្រគល់ពានរង្វាន់ និងបណ្ណសរសើរជូនគ្រឹះស្ថានហិរញ្ញវត្ថុចូលរួម, សហគ្រាសឆ្នើម និងបុគ្គលិកឆ្នើមរបស់ CGCC, ព្រមទាំងការប្រមូលធាតុចូលពីភាគីពាក់ព័ន្ធ អំពីយន្ដការការធានាឥណទាន ក្នុងការកសាងប្រព័ន្ធហិរញ្ញវត្ថុ ប្រកបដោយបរិយាបន្ន, ភាពធន់, និងចីរភាពនៅក្នុងប្រទេសកម្ពុជា។ កម្មវិធីនេះ មានអ្នកចូលរួម ដែលអញ្ជើញមកពីស្ថាប័នរដ្ឋ, ដៃគូអភិវឌ្ឍន៍ជាតិ និងអន្ដរជាតិ, ធនាគារ និងគ្រឹះស្ថានមីក្រូហិរញ្ញវត្ថុ, ក្រុមហ៊ុនមូលបត្រ, សមាគមអាជីវកម្ម, និងស្ថាប័នពាក់ព័ន្ធនានា សរុបប្រមាណ ១៥០រូប។

នៅក្នុងពិធីនេះ ឯកឧត្តមអគ្គបណ្ឌិតសភាចារ្យ បានដាក់សម្ពោធជាផ្លូវការនូវ “គម្រោងធានាឥណទានឯកត្តឥណទានពិសេស” ដែលត្រូវបានបង្កើតឡើង ដើម្បីគាំទ្រគោលនយោបាយ, យុទ្ធសាស្រ្ដ, និងវិស័យអាទិភាពរបស់រាជរដ្ឋាភិបាល ដូចជា វិស័យស្រូវអង្ករ, ស្វាយចន្ទី, កម្មន្ដសាល, ការអភិវឌ្ឍលំនៅឋានសង្គម និងលំនៅឋានតម្លៃសមរម្យ ។ល។ គម្រោងនេះ អនុញ្ញាតឱ្យម្ចាស់អាជីវកម្ម អាចដាក់ពាក្យបង្ហាញចំណាប់អារម្មណ៍ មក CGCC ដោយផ្ទាល់ ក្នុងការទទួលបានការធានាឥណទានលើកម្ចីរហូតដល់ ១០ លានដុល្លារ ក្នុងមួយកម្ចី សម្រាប់ការប្រើប្រាស់ជាទុនបង្វិល និងពង្រីកអាជីវកម្ម និងអនុញ្ញាតឱ្យ CGCC ចូលរួមវាយតម្លៃលទ្ធភាពសងរបស់អ្នកខ្ចី រួមជាមួយគ្រឹះស្ថានហិរញ្ញវត្ថុចូលរួម ដើម្បីធានាបាននូវប្រសិទ្ធភាពនៃការផ្តល់ហិរញ្ញប្បទាន។

លើសពីនេះ ឯកឧត្តមអគ្គបណ្ឌិតសភាចារ្យ បានផ្ដល់ពានរង្វាន់ និងបណ្ណសរសើរ ជូនគ្រឹះស្ថានហិរញ្ញវត្ថុចូលរួមឆ្នើម របស់ CGCC រួមមាន៖ ធនាគារ វឌ្ឍនៈអាស៊ី (ABA), ធនាគារ មេយប៊ែង ខេមបូឌា(Maybank), និង ធនាគារស្ថាបនា (Sathapana Bank) ដែលបានបញ្ចេញកម្ចីមានការធានាច្រើនជាងគេ ក្នុងឆ្នាំ២០២៥ និងសហគ្រាសឆ្នើម ចំនួន៣ រួមមាន៖ រោងចក្រធុនតូចកិនស្រូវ សេកមាស, ក្រុមហ៊ុន បាយ័ន ហេរីធេច ហូលឌីង គ្រុប, និង ទឹកស្អាត សំណាង ឌីណា លំចង់ ដែលបានប្រើប្រាស់កម្ចីមានការធានា ប្រកបដោយប្រសិទ្ធភាពខ្ពស់ ព្រមទាំងបានប្រគល់បណ្ណសរសើរជូនបុគ្គលិកឆ្នើមរបស់ CGCC ចំនួន ១០រូប ដែលបានបំពេញការងារ ប្រកបដោយការទទួលខុសត្រូវ, វិជ្ជាជីវៈ, និងបុរេសកម្ម ដើម្បីកសាង និងអភិវឌ្ឍ សាជីវកម្មធានាឥណទានកម្ពុជា នាពេលកន្លងមក។

ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន បានលើកឡើងថា៖ “ការបង្កើត CGCC នេះឡើង គឺជាការគិតគូរជាយុទ្ធសាស្ត្រ ដ៏ល្អិតល្អន់ និង ដ៏ត្រឹមត្រូវ របស់រាជរដ្ឋាភិបាល, ក្នុងនីតិកាលទី ៦ នៃរដ្ឋសភា, ក្រោមការដឹកនាំ ប្រកបដោយគតិបណ្ឌិតដ៏ខ្ពង់ខ្ពស់ និង ចក្ខុវិស័យវែងឆ្ងាយ របស់ សម្តេចអគ្គមហាសេនាបតីតេជោ ហ៊ុន សែន, អតីតនាយករដ្ឋមន្រ្តី និង បច្ចុប្បន្នជា ប្រធានព្រឹទ្ធសភា, ក្នុងការអនុវត្តវិធានការអន្តរាគមន៍ តាមរយៈយន្តការធានាឥណទាន, សំដៅស្តារ និង ជំរុញកំណើនសេដ្ឋកិច្ច, ជាពិសេស ក្នុងអំឡុងវិបត្តិនៃជំងឺកូវីដ-១៩ ជាសកល, ដោយផ្អែកលើឧត្តមានុវត្តជាអន្តរជាតិ ក៏ដូចជា ការវិវត្តនៃបរិបទសង្គម-សេដ្ឋកិច្ចជាក់ស្តែង របស់កម្ពុជា។ យន្តការធានាឥណទាន បានចូលរួមចំណែកយ៉ាងសំខាន់ ក្នុងការអនុវត្តគោល-នយោបាយគន្លឹះនានា របស់រាជរដ្ឋាភិបាល រួមមាន៖ ទី១. ការលើកកម្ពស់បរិយាបន្នហិរញ្ញវត្ថុ, ជាពិសេស សម្រាប់សហគ្រាសធុន តូច និង មធ្យម, តាមរយៈ ការបង្កើនលទ្ធភាពទទួលបាននូវហិរញ្ញប្បទាន; ទី២. ការពង្រឹងការអភិវឌ្ឍវិស័យឯកជន តាមរយៈ ការគាំទ្រឲ្យមានការវិនិយោគ, ការពង្រីកប្រតិបត្តិការអាជីវកម្ម, និង ការបង្កើតការងារបន្ថែម ឲ្យបាន កាន់តែច្រើន, ជាពិសេស សម្រាប់យុវជន; និង ទី៣. ការពង្រឹងភាពធន់នៃសេដ្ឋកិច្ច តាមរយៈ ការបង្កើនទំនុកចិត្តក្នុងទីផ្សារ និង ការរួមគ្នាគ្រប់គ្រងហានិភ័យ, ជាពិសេស ក្នុងអំឡុងវិបត្តិ ឬ បញ្ហាប្រឈមពីកត្តាខាងក្រៅ, ដែលមិនចំណុះនឹងការគ្រប់គ្រងរបស់កម្ពុជា ។

CGCC គឺជាសហគ្រាសសាធារណៈ ក្រោមអាណាព្យាបាលបច្ចេកទេស និងហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ ដែលមានបេសកកម្មចម្បងក្នុងការផ្ដល់ការធានាឥណទាន ដើម្បីបង្កើនបរិយាបន្នហិរញ្ញវត្ថុ និងរួមចំណែក ដល់កំណើនសេដ្ឋកិច្ច។ នៅក្នុងរយៈពេល ៥ឆ្នាំ កន្លងមកនេះ CGCC បានដាក់ឱ្យដំណើរការការធានាឥណទាន ឯកត្តឥណទាន ចំនួន ៧ គម្រោង, ការធានាឥណទានជាកញ្ចប់ ចំនួន ១៧ កិច្ចព្រមព្រៀង, ការធានាលើការបោះផ្សាយសញ្ញាបណ្ណរបស់ក្រុមហ៊ុនចំនួន ១ , និងការធានាឥណទានបោះដុំចំនួន ៣

កិច្ចព្រមព្រៀង ព្រមទាំងបានដាក់ឱ្យដំណើរការកម្មវិធីកសាងសមត្ថភាពសហគ្រិនរបស់ CGCC (EPIC)។ តាមរយៈគម្រោងទាំងអស់នេះ CGCC បានអនុម័តការធានាឥណទាន ចំនួន ៩.៥៥៦ គណនី លើកម្ចី ប្រមាណ ៥២១,២៨ លានដុល្លារ គិតត្រឹមថ្ងៃទី៣១ ខែធ្នូ ឆ្នាំ២០២៥។

credit to: ទូរទស្សន៍ជាតិកម្ពុជា ចេញផ្សាយថ្ងៃទី២៧ ខែមករា ឆ្នាំ២០២៦

CGCC, CWA, FTB និង Water.org បង្កើតភាពជាដៃគូយុទ្ធសាស្ត្រ ដើម្បីបង្កើនលទ្ធភាពទទួលបានហិរញ្ញប្បទានផ្លូវការ សម្រាប់គាំទ្រវិស័យទឹកស្អាតនៅកម្ពុជា

Posted on ខែវិច្ឆិកា 1, 2025ខែវិច្ឆិកា 10, 2025 by Sorn Chhorvyvatey

(ភ្នំពេញ)៖ នៅទីស្នាក់ការកណ្តាលរបស់សាជីវកម្មធានាឥណទានកម្ពុជា (CGCC) នាថ្ងៃទី៣០ ខែតុលា ឆ្នាំ២០២៥ មានការរៀបចំកម្មវិធីចុះហត្ថលេខាលើ ១៖ កិច្ចព្រមព្រៀងធានាឥណទានជាកញ្ចប់ សម្រាប់គម្រោងធានាឥណទានដើម្បីអភិវឌ្ឍសេវាសាធារណៈ សម្រាប់ប្រតិបត្តិករទឹកស្អាតកម្ពុជារវាង សាជីវកម្មធានាឥណទានកម្ពុជា (CGCC) និងធនាគារពាណិជ្ជកម្មក្រៅប្រទេស នៃកម្ពុជា (FTB), និង២៖ អនុស្សរណៈនៃការយោគយល់គ្នា (MOU) រវាង CGCC និង សមាគមអ្នកផ្គត់ផ្គង់ទឹកកម្ពុជា (CWA), និង ៣៖ MOU រវាង CGCC និងអង្គការ Water.org។

កម្មវិធីចុះហត្ថលេខាលនេះ ត្រូវបានរៀបចំឡើង ក្រោមអធិបតីភាពលោកបណ្ឌិត ម៉ី វ៉ាន់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងលោក អ៊ុំ សុថា រដ្ឋលេខាធិការក្រសួងឧស្សាហកម្ម វិទ្យាសាស្រ្ដ បច្ចេកវិទ្យា និងនរានុវត្តន៍ និងត្រូវបានចុះហត្ថលេខាដោយ លោក ណូ លីដា អគ្គនាយក CGCC, លោក ឌិត សុចល ប្រធាននាយកប្រតិបត្តិធនាគារ FTB, លោក លឹម មិញ នាយកប្រតិបត្តិ CWA, និងលោកស្រី ហ្គេ សាន់តូស នាយកតំបន់អាស៊ីអាគ្នេយ៍ នៃអង្គការ Water.org ។ ពិធីចុះកិច្ចព្រមព្រៀងនេះ មានអ្នកចូលរួម សរុបប្រមាណ ៧០រូប ដែលជាប្រតិបត្តិករទឹកស្អាត, ថ្នាក់គ្រប់គ្រង, ព្រមទាំងបុគ្គលិកនៃស្ថាប័នទាំងបួននេះ។

គម្រោងធានាឥណទានដើម្បីអភិវឌ្ឍសេវាសាធារណៈ សម្រាប់ប្រតិបត្តិករទឹកស្អាតកម្ពុជា គឺជាគំនិតផ្តួចផ្តើមក្នុងការគាំទ្រប្រតិបតិ្តករទឹកស្អាតឱ្យទទួលបានហិរញ្ញប្បទានគ្រប់គ្រាន់ តាមរយៈការធានាឥណទានដែលមានលក្ខខណ្ឌអនុគ្រោះ។

លោក ណូ លីដា អគ្គនាយក CGCC បានឱ្យដឹងថា៖ «ការផ្គត់ផ្គង់ទឹកស្អាត គឺជាសេវាសាធារណៈចាំបាច់ និងត្រូវការពង្រីកបន្ថែមនៅកម្ពុជា សម្រាប់សុខុមាលភាពរបស់ប្រជាជន និងការអភិវឌ្ឍសង្គម-សេដ្ឋកិច្ច។ CGCC មានមោទនភាពដែលបានរៀបចំគម្រោងធានាឥណទានជាក់លាក់មួយ ដើម្បីគាំទ្រដល់ការអភិវឌ្ឍវិស័យទឹកស្អាតនៅកម្ពុជា ដោយផ្តល់ការធានាដែលមានលក្ខខណ្ឌអនុគ្រោះ។ គម្រោងនេះ អាចដាក់ឱ្យដំណើរការទៅបាន ដោយមានការ ការសហការជាមួយដៃគូពាក់ព័ន្ធសំខាន់ៗ រួមមាន ធនាគារ FTB, សមាគមអ្នកផ្គត់ផ្គង់ទឹកស្អាតកម្ពុជា និងអង្គការ Water.org។ ស្ថាប័ននីមួយៗ នឹងចូលរួមចំណែកក្នុងការអនុវត្តគម្រោងធានាឥណទានដើម្បីអភិវឌ្ឍសេវាសាធារណៈនេះ ឱ្យមានប្រសិទ្ធភាពខ្ពស់ ជាពិសេស ចូលរួមធានាថាកម្ចីមានការធានាត្រូវបានផ្តល់ជូនដល់ប្រតិបត្តិករទឹកស្អាតចំទិសដៅ ដែលមានសក្តានុពល និងមានហានិភ័យសមស្របអាចគ្រប់គ្រងបាន។ ក្នុងដំណាក់កាលដំបូងនៃគម្រោងធានាឥណទាននេះ CGCC និង FTB ប្តេជ្ញាផ្តល់កម្ចីមានការធានាសរុប ៥ លានដុល្លារអាមេរិក ជូនដល់បណ្តាប្រតិបត្តិករទឹកស្អាតនៅកម្ពុជា»។

តាមរយៈគម្រោងនេះ CGCC នឹងផ្តល់ការធានាលើកម្ចីដែលបញ្ចេញដោយធនាគារ FTB ដែលជាធនាគារដៃគូរបស់ CGCC ចាប់ពីពីឆ្នាំ២០២១ មក ជូនដល់ប្រតិបត្តិករទឹកស្អាតនៅកម្ពុជា។

លោក ឌិត សុចល ប្រធាននាយកប្រតិបត្តិធនាគារ FTB បានឱ្យដឹងថា៖ «ការចុះហត្ថលេខាលើកិច្ចព្រមព្រៀងធានាឥណទាន និងអនុស្សរណៈនៃការយោគយល់គ្នាលើគម្រោងធានាឥណទានដើម្បីអភិវឌ្ឍ សេវាសាធារណៈសម្រាប់ប្រតិបត្តិករទឹកស្អាតឯកជន រវាងធនាគារ FTB និង CGCC ឆ្លុះបញ្ចាំងឱ្យឃើញពីទំនាក់ទំនងដ៏ល្អ ចាប់តាំងពីឆ្នាំ ២០២១ ដោយបានពង្រីកកិច្ចសហការជាបន្តបន្ទាប់ ជាមួយការអនុវត្តទំហំឥណទានសរុបប្រមាណជាង ១៩លានដុល្លារអាមេរិក ក្នុងនោះឥណទានសម្រាប់ប្រតិបត្តិករទឹកស្អាត សរុបប្រមាណជាង ២,៣ លានដុល្លារអាមេរិក។ តាមរយៈការសហការនេះ ស្ថាប័នទាំងពីរបានព្យាយាមខិតខំ និងតែងតែស្វែងយល់បន្ថែមពីការច្នៃប្រឌិតថ្មីៗលើបញ្ហាពាក់ព័ន្ធនឹងវិស័យទឹកស្អាត និងការសហការរួមគ្នាឆ្ពោះទៅរកការគ្រប់គ្រងប្រព័ន្ធទឹកស្អាត នៅប្រទេសកម្ពុជាប្រកបដោយ និរន្តរភាព»។

ដើម្បីកាត់បន្ថយហានិភ័យ និងកំណត់ប្រតិបត្តិករទឹកស្អាតឱ្យបានចំគោលដៅ CGCC និង FTB នឹងសហការគ្នាផ្តល់កម្ចីមានការធានាជូនដល់ប្រតិបត្តិករទឹកស្អាត ដែលជាសមាជិករបស់សមាគមអ្នកផ្គត់ផ្គង់ទឹកស្អាតកម្ពុជា និងធ្លាប់ ឬកំពុងទទួលបានជំនួយបច្ចេកទេស ឬការគាំទ្រហិរញ្ញវត្ថុពីអង្គការ Water.org ផងដែរ។

តាមរយៈនេះ លោក លឹម មិញ នាយកប្រតិបត្តិសមាគមអ្នកផ្គត់ផ្គង់ទឹកស្អាតកម្ពុជា បានលើកឡើងថា៖ «ភាពជាដៃគូនេះ គឺជាជំហានដ៏សំខាន់មួយសម្រាប់ប្រតិបត្តិករផ្គត់ផ្គង់ទឹកស្អាតឯកជន ដែលកំពុងខិតខំអភិវឌ្ឍ និងពង្រីកសេវាកម្មផ្គត់ផ្គង់ទឹកស្អាតឱ្យបានពេញលេញក្នុងតំបន់អាជ្ញាបណ្ណរបស់ពួកគេ។ ការចូលរួមរបស់ CWA ក្នុងគម្រោងនេះ គឺដើម្បីជំរុញឱ្យសមាជិកទទួលបានឱកាសប្រើប្រាស់ហិរញ្ញប្បទានផ្លូវការ ដែលមានភាពច្បាស់លាស់ សុវត្ថិភាព និងអាចជួយបំពេញគោលដៅជាសកលក្នុងការទទួលបានទឹកស្អាតនៅឆ្នាំ ២០៣០»។

បន្ថែមពីនេះ លោកស្រី ហ្គេ សាន់តូស នាយកតំបន់អាស៊ីអាគ្នេយ៍ នៃអង្គការ Water.org បានថ្លែងថា៖ «Water.org បានចាប់ផ្តើមដំណើរការនៅប្រទេសកម្ពុជាតាំងពីឆ្នាំ ២០២២ ហើយតាមរយៈការសហការយ៉ាងរឹងមាំ ពួកយើងបានជួយគាំទ្រប្រជាពលរដ្ឋជាង ២,១៩ លាននាក់ និងកៀរគរថវិកាបានជាង ២៨១ លានដុល្លារ ដល់វិស័យទឹកស្អាត និងអនាម័យ។ ទោះបីជាមានវឌ្ឍនភាពគួរឱ្យកត់សម្គាល់ក៏ដោយ អត្រានៃចំនួនប្រជាជនដែលមានលទ្ធភាពទទួលបានទឹកស្អាត និងអនាម័យប្រកបដោយសុវត្ថិភាពនៅតែមិនទាន់គ្រប់គ្រាន់ ក្នុងការសម្រេចឱ្យបាននូវគោលដៅអភិវឌ្ឍន៍ប្រកបដោយចីរភាពទី៦ (SDG 6) នៅប្រទេសកម្ពុជានៅឡើយទេ។ ដូច្នេះ Water.org មានសេចក្តីរីករាយក្នុងការគាំទ្រគម្រោងធានាឥណទានដើម្បីអភិវឌ្ឍសេវាសាធារណៈ សម្រាប់ប្រតិបត្តិករទឹកស្អាតនៅកម្ពុជា»។

គម្រោងធានាឥណទានដើម្បីអភិវឌ្ឍសេវាសាធារណៈ (UDGS) គឺជាគំរូហិរញ្ញវត្ថុថ្មីមួយដែលបង្កើតឡើងដើម្បីបង្កើនលទ្ធភាពទទួលបានហិរញ្ញប្បទានផ្លូវការរបស់ប្រតិបត្តិករទឹកស្អាតឯកជន ដោះស្រាយបញ្ហាប្រឈមលើទ្រព្យធានា និងការធានាឥណទានជាមួយនឹងលក្ខខណ្ឌអនុគ្រោះ។ ជាផ្នែកមួយនៃភាពជាដៃគូយុទ្ធសាស្រ្ដនេះ ភាគីទាំងបួននឹងបង្កើនកិច្ចសហប្រតិបត្ដិការក្នុងការលើកកម្ពស់ និងគាំទ្រការរីកចម្រើនរបស់អាជីវកម្មតាមរយៈការផ្ដល់ហិរញ្ញប្បទានប្រតិបត្តិការ ស្របតាមគោលនយោបាយរបស់រាជរដ្ឋាភិបាល ក្នុងការសម្រេចគោលដៅជាសកល នៃលទ្ធភាពប្រើប្រាស់ទឹកស្អាតនៅឆ្នាំ២០៣០។

សូមជម្រាបថា CGCC គឺជាសហគ្រាសសាធារណៈ ក្រោមអាណាព្យាបាលបច្ចេកទេស និងហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ ដែលមានបេសកកម្មចម្បងក្នុងការផ្តល់ការធានាឥណទាន ដើម្បីបង្កើនបរិយាបន្នហិរញ្ញវត្ថុ និងអភិវឌ្ឍសហគ្រាសធុនតូច និងមធ្យម។ ផលិតផល និងសេវាកម្មចម្បងរបស់ CGCC រួមមាន ការធានាកម្ចីក្នុងវិស័យធនាគារ, ការធានាសញ្ញាបណ្ណក្នុងវិស័យមូលបត្រ, និងកម្មវិធីកសាងសមត្ថភាពសហគ្រិនរបស់ CGCC ដែលហៅកាត់ថា (EPIC)។ គិតត្រឹមបំណាច់ខែកញ្ញា ឆ្នាំ២០២៥ CGCC បានអនុម័តការធានាឥណទាន ចំនួន ៧,៣២៧ គណនី លើកម្ចីអាជីវកម្ម ប្រមាណ ៤២០,២៦ លានដុល្លារ នៅទូទាំងប្រទេស។ សម្រាប់ព័ត៌មានអំពីគម្រោង UDGS សូមចូលទៅកាន់គេហទំព័រ www.cgcc.com.kh ឬទំនាក់ទំនង CGCC តាមរយៈលេខទូរស័ព្ទ៖ 023 722 123។

ធនាគារពាណិជ្ជក្នុងស្រុកទី១នៅកម្ពុជា ដែលទទួលបានការទុកចិត្តចាប់តាំងពីឆ្នាំ១៩៧៩ គឺធនាគារ FTB បានដើរតួនាទីយ៉ាងសំខាន់ក្នុងការជួយលើកកម្ពស់ និងអភិវឌ្ឍទីផ្សារ សេដ្ឋកិច្ចនិងសង្គមជាតិតាមរយៈការជំរុញ គាំទ្រ និងផ្តល់សេវាហិរញ្ញវត្ថុជាមូលដ្ឋានចាំបាច់ដល់អតិថិជន អាជីវករ និងពាណិជ្ជករក្នុងស្រុក។ គិតត្រឹមឆ្នាំ២០២៥ ទ្រព្យសកម្មសរុបរបស់ធនាគារបានកើនឡើងដល់ ២,៣ ពាន់លានដុល្លារអាមេរិក។ ធនាគារ FTB នឹងបន្តជួយគាំទ្រអតិថិជនឱ្យកាន់តែរីកចម្រើន និងមានវិបុលភាពបន្ថែមទៀត ក្រោមចក្ខុវិស័យរយៈពេលវែងរបស់ខ្លួន ដើម្បីក្លាយជាធនាគារពាណិជ្ជដែលទទួលបានការពេញចិត្តជាងគេនៅក្នុងព្រះរាជាណាចក្រកម្ពុជា។

សមាគមអ្នកផ្គត់ផ្គង់ទឹកស្អាតកម្ពុជា គឺជាសមាគមអព្យាក្រឹត មិនស្វែងរកប្រាក់កម្រៃជាឯកជន។ សមាគមត្រូវបានបង្កើតឡើងក្រោមជំនួយបច្ចេកទេស និងហិរញ្ញវត្ថុ របស់គម្រោង MSME ឧបត្ថម្ភដោយ ទីភ្នាក់ងារសហរដ្ឋអាមេរិកដើម្បីអភិវឌ្ឍន៍អន្តរជាតិ (USAID) នៅថ្ងៃទី២៨ ខែធ្នូ ឆ្នាំ២០១១ ដោយមានស្ថាបនិកចំនួន ៣រូប និងត្រូវបានក្រសួងមហាផ្ទៃសម្រេចអនុញ្ញាតឱ្យចុះឈ្មោះក្នុងបញ្ជីសមាគមតាមរយៈលិខិតលេខ ១០៧៧ សជណ ចុះថ្ងៃទី០៦ ខែសីហា ឆ្នាំ២០១២។ ក្រសួងមហាផ្ទៃបានចេញសេចក្តីប្រកាសលេខ ២៩០១ ប្រក ចុះថ្ងៃទី០៨ ខែវិច្ឆិកា ឆ្នាំ២០២១ សម្រេចចុះឈ្មោះសមាគមអ្នកផ្គត់ផ្គង់ទឹកស្អាតកម្ពុជា ឡើងវិញក្នុងបញ្ជីសមាគមសម្រាប់នីតិបុគ្គល នៅក្រសួងមហាផ្ទៃ។
សមាគម បង្កើតឡើងក្នុងគោលបំណងប្រមូលផ្តុំអ្នករួមអាជីព ឬរួមវិជ្ជាជីវៈទាំងអស់ក្នុងវិស័យផ្គត់ផ្គង់ទឹកស្អាតនៅក្នុងព្រះរាជាណាចក្រកម្ពុជា ដោយមិនប្រកាន់និន្នាការនយោបាយអ្វីឡើយ។ ត្រឹមដំណាច់ត្រីមាសទី៣ ឆ្នាំ២០២៥ សមាគម មានសមាជិក សរុបចំនួន ៣៤២ ក្នុងនោះសមាជិកអាជីពចំនួន ២៨៦ស្ថានីយ និងសមាជិកគាំទ្រចំនួន ៥៦ ដែលបាននឹងកំពុងប្រតិបត្តិការនៅក្នុង ២៣រាជធានី/ខេត្ត នៃព្រះរាជាណាចក្រកម្ពុជា។

Water.org គឺជាអង្គការមិនស្វែងរកប្រាក់ចំណេញសកលមួយដែលកំពុងធ្វើការ ដើម្បីជំរុញឱ្យមានទឹកស្អាត និងអនាម័យមកកាន់ពិភពលោក និងធ្វើឱ្យវាមានសុវត្ថិភាព អាចប្រើប្រាស់បាន និងសន្សំសំចៃ។ អង្គការ Water.org បានបង្កើតឡើងដោយលោក Gary White និងលោក Matt Damon ដើម្បីជាអ្នកត្រួសត្រាយផ្លូវសម្រាប់ដំណោះស្រាយហិរញ្ញវត្ថុដែលជំរុញដោយទីផ្សារចំពោះវិបត្តិទឹកជាសកល។ អង្គការ Water.org ជួយប្រជាជនឱ្យទទួលបានទឹកស្អាត និងអនាម័យតាមរយៈហិរញ្ញប្បទានដែលមានតម្លៃសមរម្យ ដូចជាប្រាក់កម្ចីខ្នាតតូចជាដើម។ ស្ថាប័នកំពូលរបស់អង្គការ ក៏បានសហការជាមួយអ្នកផ្តល់សេវាទឹកស្អាតផងដែរ ដែលអាចឱ្យពួកគេពង្រីកសេវាកម្មរបស់ពួកគេដើម្បីបង្កើនលទ្ធភាពទទួលបានទឹកស្អាត និងអនាម័យ៕

Credit to: Fresh News, ចេញផ្សាយថ្ងៃទី៣១ ខែតុលា ឆ្នាំ២០២៥

ABA និង CGCC សហការផ្ដល់លទ្ធភាពកាន់តែទូលំទូលាយ ដើម្បីអាជីវកម្មនានាទទួលហិរញ្ញប្បទាន តាមរយៈគម្រោងធានាឥណទាន

Posted on ខែសីហា 8, 2025ខែសីហា 8, 2025 by Sorn Chhorvyvatey

(ភ្នំពេញ)៖ ធនាគារ ABA និងសាជីវកម្មធានាឥណទានកម្ពុជា (CGCC) បានចុះហត្ថលេខាលើកិច្ចព្រមព្រៀងគម្រោងធានាឥណទានចំនួនពីរ រួមមាន១៖ គម្រោងធានាឥណទានដើម្បីជំរុញសេដ្ឋកិច្ច (ESGS) និង២៖ គម្រោងធានាឥណទានសម្រាប់ការនាំចេញអង្ករ ជំហានទី២ (REGS 2)។ ពិធីចុះហត្ថលេខានេះ ត្រូវបានរៀបចំឡើង នៅការិយាល័យកណ្តាលធនាគារ ABA ដោយមានការអញ្ជើញចូលរួមពីលោក Bibhu Pandey អគ្គនាយករងប្រតិបត្តិ និងជានាយកឥណទាននៃធនាគារ ABA និង លោក ណូ លីដា អគ្គនាយក CGCC ព្រមទាំងក្រុមការងាររបស់ស្ថាប័នទាំងពីរ។

ការចុះហត្ថលេខាលើកិច្ចព្រមព្រៀងទាំងពីរនេះ បានបញ្ជាក់ពីការប្តេជ្ញាចិត្តយ៉ាងមុតមាំ និងកិច្ច សហការដ៏រឹងមាំរវាងធនាគារ ABA និង CGCC ក្នុងការគាំទ្រអាជីវកម្ម ជាពិសេសសហគ្រាសធុនតូច និងមធ្យមក្នុងប្រទេសកម្ពុជា ដោយពង្រីកវិសាលភាពឲ្យកាន់តែទូលំទូលាយ ដើម្បីអាជីវកម្មនានាទទួលបានកម្ចីផ្លូវការ តាមរយៈគម្រោងធានាឥណទានដែលមានរចនាសម្ពន្ធត្រឹមត្រូវ។

ក្រោមគម្រោង ESGS នេះ CGCC អាចផ្តល់ការធានាទៅលើកម្ចីដែលផ្ដល់ដោយធនាគារ ABA ជូនដល់អាជីវកម្មដែលមានគុណវុឌ្ឍជាមួយនឹងវិសាលភាពនៃការធានារហូតដល់៩០% និងកម្រៃធានាឥណទានចាប់ពី០.៧៥។ ជាមួយនឹងការធានារបស់ CGCC ធនាគារABA នឹងអាចបង្កើនការផ្តល់កម្ចីចាំបាច់បន្ថែមទៀតដល់អាជីវកម្មដែលមានសក្តានុពល ដើម្បីគាំទ្រដល់ ភាពធន់នៃសេដ្ឋកិច្ចក្នុងកាលៈទេសៈដ៏លំបាកនេះ។

ជាមួយគ្នានេះ គម្រោង REGS 2 ក៏បានឆ្លុះបញ្ចាំងពីកិច្ចខិតខំប្រឹងប្រែងរួម ក្នុងការជំរុញសេដ្ឋកិច្ចកម្ពុជានៅក្នុងវិស័យកសិកម្មផងដែរ។ គម្រោងនេះនឹងផ្តល់នូវកម្ចីមានការធានា ដល់ក្រុមហ៊ុននាំចេញអង្ករ និងរោងម៉ាស៊ីនកិនស្រូវ ដែលខ្វះទ្រព្យធានា សំដៅបង្កើនភាពប្រកួតប្រជែងរបស់អង្ករកម្ពុជា លើទីផ្សារអន្តរជាតិ ដែលបន្តលើកកម្ពស់វិស័យដ៏សំខាន់មួយនេះ សម្រាប់ការអភិវឌ្ឍជនបទ។ គិតត្រឹមនៅថ្ងៃទី៣១ ខែកក្កដា ឆ្នាំ២០២៥ កម្ចីមានការធានាពី CGCC ប្រមាណជា៣៨លានដុល្លារអាមេរិក ត្រូវបានផ្ដល់ជូនអាជីវកម្ម ក្រោមគម្រោងREGS។

លោក Bibhu Pandey បានថ្លែងថា «យើងខ្ញុំនៅធនាគារ ABA មានមោទនភាពយ៉ាងក្រៃលែង ក្នុងការពង្រីកភាពជាដៃគូយុទ្ធសាស្ដ្រនេះ ជាមួយ CGCC តាមរយៈគម្រោងធានាឥណទានទាំងពីរ។ គំនិតផ្តួចផ្តើមដ៏មានសារៈសំខាន់នេះ គូសបញ្ជាក់ពីការប្តេជ្ញាចិត្តរបស់យើងខ្ញុំចំពោះការផ្ដល់ហិរញ្ញប្បទានប្រកបដោយបរិយាបន្ន និងការអភិវឌ្ឍសេដ្ឋកិច្ចរយៈពេលវែង។ ក្នុងដំណើររួមគ្នានេះ យើងខ្ញុំនឹងនៅតែបន្តគាំទ្របណ្ដាធុរកិច្ច និងអាជីវកម្មគ្រប់ប្រភេទ ដើម្បីឲ្យពួកគេសម្រេចបាននូវ សក្តានុពលពេញលេញ»។

លោក ណូ លីដា ក៏បានថ្លែងថា «ធនាគារ ABA និង CGCC បានចុះហត្ថលេខាលើកិច្ចព្រមព្រៀងធានាឥណទានជាលើកដំបូងកាលពីឆ្នាំ២០២១។ ចាប់តាំងពីពេលនោះមក ធនាគារ ABA បានបង្កើនការបញ្ចេញកម្ចី តាមរយៈគម្រោងធានារបស់ CGCC ជាលំដាប់ ដើម្បីគាំទ្រផ្នែកហិរញ្ញវត្ថុដល់សហគ្រាសធុនតូច និងមធ្យម (SME) ក្នុងវិស័យអាទិភាព។ ថ្ងៃនេះ យើងខ្ញុំពិតជាមានក្តីសោមនស្សដែលបានពង្រីកកិច្ចសហការនេះកាន់តែស៊ីជម្រៅ តាមរយៈគម្រោង ESGS និង REGS2»។

លោកបានគួសបញ្ជាក់ផងដែរថា «REGS2 គឺជាផលបត្រគម្រោងធានាឥណទានដំបូងបង្អស់របស់យើងខ្ញុំជាមួយធនាគារ ABA ដែលនឹងបង្កើនប្រសិទ្ធភាពនៃ ការបញ្ចេញកម្ចី មានការធានាជូនដល់អតិថិជន។ ខ្ញុំជឿជាក់ថា ការចូលរួមរបស់ធនាគារ ABA ក្នុង គម្រោងទាំងពីរនេះ នឹងផ្ដល់លទ្ធភាពដល់អាជីវកម្ម កាន់តែច្រើនឲ្យទទួលបានកម្ចី សម្រាប់ពង្រីកអាជីវកម្មរបស់ពួកគាត់។ តាមរយៈការផ្តល់កម្ចីរបស់ធនាគារ ABA និងការធានាឥណទានរបស់ CGCC យើងរួមគ្នាពង្រឹងលទ្ធភាពរបស់សហគ្រាសធុនតូច និងមធ្យម ឲ្យទទួលបានហិរញ្ញប្បទាន»។

ដោយសម្លឹងឆ្ពោះទៅមុខប្រកបដោយសុទិដ្ឋិនិយម ធនាគារ ABA និង CGCC នឹងនៅតែបន្តកិច្ចខិតខំប្រឹងប្រែងរបស់ខ្លួន ក្នុងការបង្កើនលទ្ធភាពអាជីវកម្ម ឲ្យទទួលបានហិរញ្ញប្បទានកាន់តែទូលំទូលាយ ក្នុងន័យលើកកម្ពស់សហគ្រិនភាព និងរួមចំណែកជួយឲ្យទិដ្ឋភាពសេដ្ឋកិច្ចកាន់តែមានភាពធន់ និងពិពិធភាព៕

Credit to: Fresh News Plus, Published on 07 August 2025

CGCC ដាក់ឱ្យដំណើការគម្រោងធានាឥណទានដើម្បីជំរុញសេដ្ឋកិច្ចជាមួយទំហំសរុប ២០០លានដុល្លារ

Posted on ខែកក្កដា 2, 2025ខែកក្កដា 3, 2025 by Sorn Chhorvyvatey

សាជីវកម្មធានាឥណទានកម្ពុជា (CGCC) បានប្រកាសដាក់ឱ្យដំណើរការជាផ្លូវការនូវ “គម្រោងធានា ឥណទានដើម្បីជំរុញសេដ្ឋកិច្ច – Economic Stimulus Guarantee Scheme(ESGS)” ដែលមានទំហំសរុប ២០០លានដុល្លារ ចាប់ពីថ្ងៃទី០១ ខែកក្កដា ដើម្បីចូលរួមជំរុញសកម្មភាពសេដ្ឋកិច្ច ខណៈស្ថានភាពសេដ្ឋកិច្ចសកល និងក្នុងតំបន់នៅប្រឈមនឹងភាពមិនប្រាកដប្រជាខ្ពស់។

យោងតាមសេចក្តីប្រកាសព័ត៌មានរបស់ CGCC កាលពីថ្ងៃទី៣០ ខែមិថុនា ESGS គឺជាគម្រោងធានាឯកត្តឥណទាន ដែលត្រូវ បានដាក់ឱ្យដំណើរការ បន្ទាប់ពី “គម្រោងធានាឥណទានដើម្បីស្តារអាជីវកម្ម – Business Recovery Guarantee Scheme (BRGS)” ដែលត្រូវបានដាក់ចេញ កាលពីថ្ងៃទី២៩ ខែមីនា ឆ្នាំ២០២១ ត្រូវបានអស់សុពលភាព នៅ ថ្ងៃទី៣០ ខែមិថុនា ឆ្នាំ២០២៥ ស្របតាមការឯកភាពដ៏ខ្ពង់ខ្ពស់បំផុតរបស់ ឯកឧត្តមអគ្គបណ្ឌិតសភាចារ្យ ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។

«ក្រោមគម្រោង ESGS, CGCC បង្កើនវិសាលភាពនៃការធានាជាអតិបរមា រហូតដល់ ៩០% នៃប្រាក់ដើម និង កំណត់កម្រៃធានាឥណទានអប្បបរមាទាបបំផុតត្រឹម ០,៧៥% នៃសន្និធិទំហំការធានាឥណទាន និងមាន លក្ខខណ្ឌអនុគ្រោះមួយចំនួនទៀត ដើម្បីគាំទ្រគ្រឹះស្ថានហិរញ្ញវត្ថុចូលរួម (PFIs) ក្នុងការបង្កើនការផ្តល់កម្ចី អាជីវកម្មដែលចាំបាច់ ជូនដល់សហគ្រាសធុនមីក្រូ តូច និងមធ្យម (MSMEs) និងខ្នាតធំ សំដៅចូលរួមជំរុញ កំណើនសេដ្ឋកិច្ច ស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា»។ នេះបើយោងតាម CGCC។

លោក ណូ លីដា អគ្គនាយកនៃសារជីវកម្មធានាឥណទានកម្ពុជា មានប្រសាសន៍នៅថ្ងៃទី ១៥ ខែមករា ឆ្នាំ ២០២៥ ថា សាជីវកម្មធានាឥណទានកម្ពុជា បានធានារ៉ាប់រងរហូតដល់ ៨០% នៃប្រាក់កម្ចីរបស់សហគ្រាសខ្នាតតូច និងមធ្យម ខណៈរាជរដ្ឋាភិបាល រំពឹងថា ធនាគារ និងគ្រឹះស្ថានមីក្រូហិរញ្ញវត្ថុ នឹងអាចមានលទ្ធភាពច្រើនជាងមុនក្នុងការបញ្ចេញឥណទានតាមតម្រូវការជូនទៅដល់សហគ្រាសខ្នាតតូច និងមធ្យម ដែលរួមមានក្នុងវិស័យស្រូវអង្ករផងដែរ ដែលមានសក្ដានុពល ប៉ុន្តែគាត់ខ្វះទ្រព្យធានា ឬហានិភ័យកម្រិតណាមួយ ដែលធនាគារ និងគ្រឹះស្ថានមីក្រូហិរញ្ញវត្ថុមិនអាចរ៉ាប់រងបាន ដូច្នេះរាជរដ្ឋាបាលតាមរយៈ CGCC នឹងចូលខ្លួនមក ជួយធានាទៅលើឥណទានរបស់សហគ្រាសខ្នាតតូច និងមធ្យម។

លោកថា កន្លងមក សាជីវកម្មធានាឥណទានកម្ពុជា បានគាំទ្រជាច្រើនទៅលើការបញ្ចេញឥណទានបន្ថែមដល់ សហគ្រាសខ្នាតតូច និងមធ្យម នៅកម្ពុជាលើកម្ចី ២៥៦,៥៨ លានដុល្លារ ក្នុងនោះវិស័យស្រូវអង្ករត្រូវបានចាត់ទុកថា ជាវិស័យអាទិភាព ដែលគិតត្រឹមដំណាច់ឆ្នាំ ២០២៤ មានសហគ្រាសខ្នាតមីក្រូ តូច និងមធ្យមចំនួន ១៣៧ គណនី ត្រូវបានធានា គិតជាទំហំទឹកប្រាក់ប្រមាណជាង ៣០ លានដុល្លារ។

លោក ណូ លីដា បញ្ជាក់បន្ថែមថា កាលពីខែឧសភា ឆ្នាំ ២០២៤ សាជីវកម្មធានាឥណទានកម្ពុជា បានដាក់ចេញនូវគម្រោងជាក់លាក់មួយដើម្បីជំរុញការនាំចេញស្រូវ-អង្កររបស់កម្ពុជា ដែលហៅថា គម្រោងធានាឥណទានសម្រាប់ការនាំចេញអង្ករក្នុងជំហានទី១ ដែលមានទឹកប្រាក់ទំហំដំបូងចំនួន ៣០ លានដុល្លារ ដែលមានស្ថាប័នហិរញ្ញវត្ថុចូលរួមចំនួន ៧ ខណៈឥណទានចំនួនជាង ២០លានដុល្លារ ត្រូវបានបញ្ចេញរួចហើយរហូតមកដល់ពេលនេះ។

CGCC គឺជាសហគ្រាសសាធារណៈ ក្រោមអាណាព្យាបាលបច្ចេកទេស និងហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ ដែលមានបេសកកម្មចម្បងក្នុងការផ្តល់ការធានាឥណទាន ដើម្បីបង្កើនបរិយាបន្នហិរញ្ញវត្ថុ និង អភិវឌ្ឍសហគ្រាសធុនតូច និងមធ្យម។ ផលិតផល និងសេវាកម្មចម្បងរបស់ CGCC រួមមាន ការធានាកម្ចីក្នុងវិស័យ ធនាគារ, ការធានាសញ្ញាបណ្ណក្នុងវិស័យមូលបត្រ, និងកម្មវិធីកសាងសមត្ថភាពសហគ្រិនរបស់ CGCC ដែល ហៅកាត់ថា (EPIC)។ គិតត្រឹមថ្ងៃបំណាច់ខែឧសភា ឆ្នាំ២០២៥ CGCC បានអនុម័តការធានាឥណទានចំនួន ៤.៨៧៧ គណនី លើកម្ចីអាជីវកម្ម ប្រមាណ ២៩៤,៣២ លានដុល្លារ នៅទូទាំងប្រទេស៕

Credit to: កម្ពុជាថ្មីប្រចាំថ្ងៃ, ចេញផ្សាយថ្ងៃទី០១ ខែកក្កដា ឆ្នាំ២០២៥

ឱកាសសម្រាប់សហគ្រាសកែច្នៃត្រី កម្មវិធី ISF ផ្ដល់ហិរញ្ញប្បទានអាជីវកម្ម

Posted on ខែកុម្ភៈ 27, 2025ខែមីនា 3, 2025 by Sorn Chhorvyvatey

ភ្នំពេញ៖ សាជីវកម្មធានាឥណទានកម្ពុជា (CGCC) និងគម្រោងអភិវឌ្ឍន៍ជលផលក្រោយប្រមូលផល (CAPFISH-Capture) បានប្រារឰនូវវឌ្ឍនភាពដ៏សំខាន់មួយក្នុងការពង្រឹងបរិយាប័ន្នហិរញ្ញវត្ថុ និងអភិវឌ្ឍសហគ្រាសខ្នាតមីក្រូ តូច និងមធ្យម (MSMEs) ក្នុងវិស័យជលផលក្រោយប្រមូលផលនៅកម្ពុជា។

ពិធីចុះហត្ថលេខាជាផ្លូវការ នៅថ្ងៃទី២១ ខែកុម្ភៈ ឆ្នាំ២០២៥ លើកិច្ចព្រមព្រៀងគាំទ្រសហគ្រាសកែច្នៃផលផលិតផលជលផលចំនួន ១១ ត្រូវបានរៀបចំឡើងក្រោមកម្មវិធីហិរញ្ញវត្ថុគាំទ្រការវិនិយោគ (ISF) ដែលទទួលបានទុនហិរញ្ញវត្ថុប្រមាណ ៣២ម៉ឺនដុល្លារ។

កម្មវិធី ISF គឺជាគំរូហិរញ្ញវត្ថុថ្មីមួយរបស់គម្រោង CAPFISH-Capture ក្រោមការគាំទ្រថវិកាពីសហភាពអឺរ៉ុប (EU) អនុវត្តដោយអង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO) និងរដ្ឋបាលជលផល (FiA) ហើយកម្មវិធីនេះត្រូវបានគ្រប់គ្រងនិងចាត់ចែងមូលនិធិដោយ CGCC។

យោងតាមសេចក្ដីប្រកាសព័ត៌មានរួម បានឱ្យដឹងថា៖ «កម្មវិធី ISF មានទម្រង់ជាហិរញ្ញវត្ថុបដិភាគ កៀរគរការវិនិយោគសរុបប្រមាណ ២,៥០លាន ដុល្លារអាមេរិក»។

ការវិនិយោគនោះមានកញ្ចប់មូលនិធិគម្រោងគាំទ្រជាសម្ភារបរិក្ខារចំនួន ១លាន ដុល្លារអាមេរិក (៤០% នៃការវិនិយោគសរុប) ប្រាក់កម្ចីអាជីវកម្មពីគ្រឹះស្ថានហិរញ្ញវត្ថុចូលរួមរបស់ CGCC ជាមួយនឹងការធានាឥណទានពី CGCC ចំនួន ១,២៥លានដុល្លារអាមេរិក (៥០%) និងសហវិនិយោគផ្ទាល់ពីសហគ្រាសចំនួន ២៥០.០០០ ដុល្លារអាមេរិក (១០%)។

សេចក្ដីប្រកាសរួម បានបន្ដថា៖ «ចាប់តាំងពីការដាក់ឱ្យដំណើការនៅចុងឆ្នាំ២០២៤ រហូតមកដល់បច្ចុប្បន្ននេះ កម្មវិធី ISF បាននិងកំពុងគាំទ្រសហគ្រាសជុំដំបូងចំនួន ១១ និងសហគ្រាសជាច្រើនទៀតស្ថិតក្នុងដំណើរការជ្រើសរើសនៃកម្មវិធី»។

ជាមួយកញ្ចប់ហិរញ្ញប្បទានដំបូងរបស់គម្រោងចំនួន ៣២ម៉ឺនដុល្លារអាមេរិក បានទាក់ទាញទុនវិនិយោគបន្ថែមជាប្រាក់កម្ចីមានការធានាចំនួន ៣៤ម៉ឺនដុល្លារអាមេរិក ពីគ្រឹះស្ថានហិរញ្ញវត្ថុចូលរួមរបស់ CGCC ចំនួន ២ ស្ថាប័ន គឺធនាគារអេស៊ីលីដា និងធនាគារមេយប៊ែង រួមជាមួយសហវិនិយោគពីសហគ្រាសផ្ទាល់ចំនួន ៥៨ម៉ឺនដុល្លារអាមេរិក។

កម្មវិធី ISF ផ្តោតការគាំទ្រជាចម្បងដល់សហគ្រាសជលផលក្រោយប្រមូលផលដែលចង់បង្កើនប្រតិបត្តិការអាជីវកម្ម និងពង្រីក ទីផ្សារទាំងក្នុង និងក្រៅស្រុក។ កម្មវិធីផ្តល់ភាពអង់អាច និងការយកចិត្តទុកដាក់ដល់អាជីវកម្មដែលដឹកនាំដោយស្ត្រី យុវជន និងជនមានពិការភាព។

តាមរយៈគំរូហិរញ្ញវត្ថុថ្មីនៃកម្មវិធី ISF នេះ គម្រោង CAPFISH-Capture និង CGCC នឹងបន្ដគាំទ្រសហគ្រាសស្ថិតក្នុងខ្សែច្រវាក់តម្លៃជលផលក្រោយប្រមូលផល ក្នុងការអនុវត្តសុវត្ថិភាពម្ហូបអាហារ និងស្តង់ដារទីផ្សារ។

កញ្ចប់គាំទ្របច្ចេកទេសដែលឆ្លើយតបពេញលេញទៅនឹងតម្រូវការជាក់លាក់របស់សហគ្រាស រួមមានការបង្កើតផែនការអាជីវកម្ម ការផ្សារភ្ជាប់ទីផ្សារ ការបំពេញបានតាមលក្ខខណ្ឌតម្រូវផ្នែកសុវត្ថិភាពម្ហូបអាហារ បរិស្ថាន និងសង្គមជាដើម។

សហគ្រាសជលផលក្រោយប្រមូលផលដែលមានចំណាប់អារម្មណ៍ សូមដាក់ពាក្យឥឡូវនេះ! ផ្អែកតាមថវិកាមានកំណត់ ដាក់ពាក្យស្នើសុំមុន មានឱកាសទទួលបានមុន៕

Credit to: ភ្នំពេញ ប៉ុស្តិ៍, ចេញផ្សាយនាថ្ងៃទី២៦ ខែកុម្ភ: ឆ្នាំ២០២៥

CMA និង CGCC រួមគ្នាលើកកម្ពស់បរិយាបន្នហិរញ្ញវត្ថុនៅកម្ពុជា

Posted on ខែមករា 30, 2025ខែសីហា 8, 2025 by Sorn Chhorvyvatey

ភ្នំពេញ៖ សមាគមមីក្រូហិរញ្ញវត្ថុកម្ពុជា(CMA) និងសាជីវកម្មធានាឥណទានកម្ពុជា (CGCC) បានចុះអនុស្សរណៈនៃការយោគយល់គ្នា (MOU) ដើម្បីលើកកម្ពស់បរិយាបន្នហិរញ្ញវត្ថុ ប្រកបដោយនិរន្តរភាពនៅកម្ពុជា។ ការប្រកាសពីភាពជាដៃគូនេះ ធ្វើឡើង នៅក្នុងក្នុង សន្និបាតស្តីពី«ការធ្វើនវានុវត្តន៍យន្តការធានាឥណទាន ដើម្បីគាំទ្រហិរញ្ញប្បទានបៃតង» កាលពីថ្ងៃទី២៤ ខែមករា។

យោងតាមសេចក្តីប្រកាសព័ត័មានរួម របស់ CMA និង CGCC កិច្ចសហប្រតិបត្តិការនេះ មានរយៈពេល៣ឆ្នាំ និងមានគោលបំណងជំរុញដល់ការអភិវឌ្ឍគ្រឹះស្ថានធនាគារ និងហិរញ្ញវត្ថុ (BFIs) និងគាំទ្រសហគ្រាសធុនមីក្រូ ខ្នាតតូច និងមធ្យម (MSMEs) តាមរយៈការអភិវឌ្ឍសមត្ថភាព សេវាហិរញ្ញវត្ថុឌីជីថល និងការលើកកម្ពស់ចំណេះដឹងផ្នែកហិរញ្ញវត្ថុ។

តាមរយៈ MOUនេះ ស្ថាប័នទាំងពីរ ប្តេជ្ញាដូច្នេះ៖ «CMA និង CGCC នឹងធ្វើការរួមគ្នា ដើម្បីពង្រឹង និងអភិវឌ្ឍសមត្ថភាព MSMEs BFIs និងភាគីពាក់ព័ន្ធនានា ដោយរៀបចំវគ្គបណ្តុះបណ្តាល សិក្ខាសាលា និងធ្វើការសិក្សាស្រាវជ្រាវនានា ក្នុងគោលដៅលើកកំពស់ចំណេះដឹងផ្នែកហិរញ្ញវត្ថុ ជំរុញសេវា ហិញ្ញវត្ថុឌីជីថល និងការគាំទ្រគំនិតផ្តួចផ្តើមវិស័យបៃតងនៅកម្ពុជា។»។

ស្ថាប័នទាំងពីរប្តេជ្ញាចិត្ត ប្រើប្រាស់ធនធានដែល ខ្លួនមាន ដើម្បីធានាឱ្យបាន នូវការអនុវត្តប្រកបដោយជោគជ័យ នូវគំនិតផ្តួចផ្តើម ផ្សេងៗក្នុងគោលបំណងជំរុញការរួមចំណែក របស់វិស័យហិរញ្ញវត្ថុ ដល់ការអភិវឌ្ឍសេដ្ឋកិច្ចកម្ពុជា។ នេះបើតាមសេចក្តីប្រកាសព័ត៌មានដដែល។

លោក ហួត អៀងតុង តំណាងសមាគមមីក្រូហិរញ្ញវត្ថុកម្ពុជា បានមានប្រសាសន៍ថា «កិច្ចសហ ប្រតិបត្តិការនេះ គឺជាជំហ៊ានដ៏សំខាន់មួយក្នុងការលើកកម្ពស់បរិយាបន្នហិរញ្ញវត្ថុនៅកម្ពុជា។

លោក ហួត អៀងតុង បន្តថា៖«តាមរយៈការរួមបញ្ចូលគ្នាទាំងធនធាន និងជំនាញ យើងអាចបង្កើតនូវប្រព័ន្ធហិរញ្ញវត្ថុដ៏រឹងមាំ ដែលគាំទ្រការលូតលាស់ នៃអាជីវកម្មធុនមីក្រូ តូច និងមធ្យម (MSMEs) ព្រមទាំងចូលរួមក្នុងការអភិវឌ្ឍនៅ ប្រទេសកម្ពុជាប្រកបដោយនិរន្តរភាព។»

ក្នុងពិធីនោះដែរ លោក ណូ លីដា អគ្គនាយក CGCC បានមានប្រសាសន៍ថាអនុស្សរណៈនៃការយោគយល់គ្នានេះ គឺជាសក្ខីភាពនៃការប្តេជ្ញាចិត្តរួមគ្នា របស់ CGCC និង CMA ក្នុងការជំរុញកំណើនសេដ្ឋកិច្ច និងនិរន្តរភាពនៅកម្ពុជា។

លោក ណូ លីដា បន្ថែមថា៖ «CGCC មានសេចក្តីសោមនស្សក្នុងការ សហការជាមួយ CMA ដើម្បីពង្រឹងចំណេះដឹងផ្នែកហិរញ្ញវត្ថុ និងផ្តល់លទ្ធភាពទទួលបានសេវាហិរញ្ញ វត្ថុកាន់តែប្រសើរឡើង។ CGCC និង CMA ក៏ដូចជាសមាជិករបស់ CMA នឹងមានឱកាសជាច្រើន ក្នុងការប្រើប្រាស់ការធានាឥណទាន ដើម្បីបង្កើនការផ្តល់ប្រាក់កម្ចីចាំបាច់ដល់អាជីវកម្ម ដែលមិនមានលទ្ធ ភាពទទួលបានសេវាហិរញ្ញវត្ថុនៅទូទាំងប្រទេស។ »៕

Credit to: Thmey Thmey, Published on 26 January 2025

អគ្គនាយកនៃសាជីវកម្មធានាឥណទានកម្ពុជា៖ វិស័យស្រូវអង្ករ ត្រូវបានចាត់ទុកជាវិស័យអាទិភាព សម្រាប់ការជួយធានាឥណទាន

Posted on ខែមករា 21, 2025ខែមករា 21, 2025 by Sorn Chhorvyvatey

(ភ្នំពេញ)៖ លោក ណូ លីដា អគ្គនាយកនៃសាជីវកម្មធានាឥណទានកម្ពុជា (CGCC) បានថ្លែងអះអាងថា វិស័យស្រូវអង្ករ ត្រូវបានចាត់ទុកជាវិស័យអាទិភាព សម្រាប់ការធានាឥណទានរបស់ CGCC។

លោកបានបញ្ជាក់ថា ដោយគិតត្រឹមដំណាច់ខែធ្នូ ឆ្នាំ២០២៤ CGCC បានធានាឥណទាននៅក្នុងវិស័យស្រូវអង្ករចំនួន ១៣៧ គណនី គិតជាទំហំទឹកប្រាក់ជាង ៣០លានដុល្លារ និងបានដាក់ចេញនូវគម្រោងជាក់លាក់ចំពោះការនាំចេញស្រូវអង្ករកម្ពុជា។

លោកបញ្ជាក់បន្ថែមថា សម្រាប់ឆ្នាំ២០២៥នេះ CGCC បង្កើតទំហំធានាឥណទាននៅក្នុងវិស័យស្រូវអង្កររហូតដល់ ៥០លានដុល្លារ។

ការលើកឡើងរបស់លោក ណូ លីដា ធ្វើឡើងក្នុងសន្និសីទសារព័ត៌មាន ស្តីពីស្ថានភាពថ្លៃស្រូវ និងការប្រមូលផលស្រូវប្រាំង ដែលរៀបចំដោយក្រសួងកសិកម្ម និងអង្គភាពអ្នកនាំពាក្យរាជរដ្ឋាភិបាល៕

សូមស្តាប់ការពន្យល់របស់លោក ណូ លីដា អគ្គនាយកនៃសាជីវកម្មធានាឥណទានកម្ពុជា