នាថ្ងៃទី២១ ខែមីនា ឆ្នាំ២០២៥ សាជីវកម្មធានាឥណទានកម្ពុជា(CGCC) និងធនាគារពាណិជ្ជកម្មក្រៅប្រទេសនៃកម្ពុជា (FTB) បានសហការរៀបចំពិធីចុះហត្ថលេខាលើកិច្ចព្រមព្រៀង ស្តីពី គម្រោងធានាឥណទានសម្រាប់វិស័យជលផលក្រោយប្រមូលផល ក្រោមវត្តមានរបស់ថ្នាក់គ្រប់គ្រង និងបុគ្គលិកនៃ CGCC, ធនាគារ FTB, និងតំណាងអង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO) ក្នុងគោលបំណងប្រកាសជាផ្លូវការ នូវការពង្រីកកិច្ចសហការបន្ថែមរវាងស្ថាប័នទាំងពីរ លើការផ្តល់កម្ចីដែលមានការធានាពី CGCC តាមរយៈធនាគារ FTB ដល់សហគ្រាស ដែលស្ថិតនៅក្នុងវិស័យជលផលក្រោយប្រមូលផល និងអ្នកផ្គត់ផ្គង់ដែលពាក់ព័ន្ធ។
គម្រោងធានាឥណទានសម្រាប់វិស័យជលផលក្រោយប្រមូលផលរបស់ CGCC ត្រូវបានបង្កើតឡើងដើម្បីផ្តល់ឥណទានដែលមានការធានាជូនដល់ក្រុមហ៊ុន/អាជីវកម្ម ឬសហគ្រាសដែលស្ថិតនៅក្នុងវិស័យជលផលក្រោយប្រមូលផល ក្រោមកម្មវិធីហិរញ្ញវត្ថុគាំទ្រការវិនិយោគ (ISF) ដែលជាគំរូហិរញ្ញវត្ថុថ្មីមួយរបស់គម្រោងអភិវឌ្ឍន៍ជលផលក្រោយប្រមូលផល (CAPFISH-Capture) ក្រោមការគាំទ្រថវិកាពីសហភាពអឺរ៉ុប (EU) អនុវត្តដោយអង្គការ UNIDO និងរដ្ឋបាលជលផល ហើយកម្មវិធីនេះត្រូវបានគ្រប់គ្រងមូលនិធិដោយ CGCC។ សហគ្រាសដែលស្ថិតនៅក្នុងវិស័យជលផលក្រោយប្រមូលផល អាចដាក់ពាក្យស្នើសុំការគាំទ្រពីគម្រោង ISF លើជំនួយបច្ចេកទេស ដើម្បីកែលម្អប្រតិបត្តិការអាជីវកម្ម ការលើកកម្ពស់ការអនុវត្តសុវត្ថិភាពម្ហូបអាហារ និងកញ្ចប់មូលនិធិរបស់គម្រោងគាំទ្រជាសម្ភារបរិក្ខារ ដើម្បីជំរុញនវានុវត្តន៍ និងបង្កើនប្រសិទ្ធភាព និងប្រសិទ្ធផលប្រតិបត្តិការអាជីវកម្ម ព្រមទាំងឥណទានអាជីវកម្មដែលមានការធានាពី CGCC តាមរយៈគ្រឹះស្ថានហិរញ្ញវត្ថុចូលរួម (PFI) របស់ CGCC រួមមានធនាគារ FTB ដែលបានចុះកិច្ចព្រមព្រៀងលើគម្រោងធានាឥណទានសម្រាប់វិស័យជលផលក្រោយប្រមូលនេះជាមួយ CGCC។
លោក ណូ លីដា អគ្គនាយក CGCC បានមានប្រសាសន៍ឲ្យដឹងថា ៖ “CGCC មានសេចក្តីរីករាយដែលធនាគារ FTB ក្លាយជាគ្រឹះស្ថានហិរញ្ញវត្ថុចូលរួមថ្មីមួយបន្ថែមទៀត ដើម្បីអនុវត្តកម្មវិធីហិរញ្ញវត្ថុគាំទ្រការវិនិយោគ (ISF) របស់ CGCC។ ការចូលរួមរបស់ធនាគារ FTB នឹងធ្វើឱ្យការអនុវត្តកម្មវិធី ISF កាន់តែមានប្រសិទ្ធភាព ឆ្លើយតបនឹងតម្រូវការរបស់សហគ្រាសក្នុងវិស័យជលផលក្រោយប្រមូលផល ក្នុងការទទួលបានការគាំទ្រហិរញ្ញវត្ថុ និងកម្ចីមានការធានា ដែលចាំបាច់ ដើម្បីលើកកម្ពស់ភាពប្រកួតប្រជែង ផលិតភាព និងស្តង់ដារអាជីវកម្មរបស់សហគ្រាស ដែលមានសក្តានុពលក្នុងវិស័យជលផលក្រោយប្រមូលផលនៅកម្ពុជា។”
លោក ឌិត សុចល ប្រធាននាយកប្រតិបត្តិនៃធនាគារ FTB បានមានប្រសាសន៍ឲ្យដឹងថា ៖ “ស្ថាប័នយើងទាំងពីរ បានត្រៀមខ្លួនរួចជាស្រេចក្នុងការបង្កើន ពង្រីកកិច្ចសហការរួមគ្នា និងរំពឹងថា អាចជួយជំរុញនវានុវត្តន៍ បង្កើនប្រសិទ្ធភាព ប្រសិទ្ធផលប្រតិបត្តិការអាជីវកម្មដល់ក្រុមហ៊ុន ឬសហគ្រាស ដែលស្ថិតនៅក្នុងវិស័យជលផលក្រោយប្រមូលផល សម្រាប់អ្នកផ្គត់ផ្គង់ក្នុងស្រុក និងនាំចេញទៅកាន់ទីផ្សារអន្តរជាតិ។ កិច្ចព្រមព្រៀងនេះបានឆ្លុះបញ្ចាំងពីការចូលរួមដ៏សកម្ម និងការផ្សារភ្ជាប់ទំនាក់ទំនងដ៏ល្អរវាងធនាគារ FTB ជាមួយ CGCC ចាប់តាំងពីឆ្នាំ ២០២១ ជាមួយការរំពឹងទទួលបានជោគជ័យ និងការរក្សាកិច្ចសហប្រតិបត្តិការគ្រប់ជ្រុងជ្រោយរវាងស្ថាប័នទាំងពីរ។”
តាមរយៈកិច្ចព្រមព្រៀងលើគម្រោងធានាឥណទានសម្រាប់វិស័យជលផលក្រោយប្រមូលផលនេះ CGCC និងធនាគារ FTB ប្តេជ្ញាចូលរួមចំណែកគាំទ្រសហគ្រាសស្ថិតក្នុងខ្សែច្រវាក់តម្លៃជលផលក្រោយប្រមូលផល សំដៅបង្កើនផលិតភាព ការអនុវត្តសុវត្ថិភាពម្ហូបអាហារ លើកកម្ពស់គុណភាពផលិតផលជលផល ដើម្បីឈានចូលទីផ្សារថ្មីរួមទាំង ទីផ្សារអន្តរជាតិ កែលម្អប្រតិបត្តិការអាជីវកម្មឱ្យមានប្រសិទ្ធផល និរន្តរភាព និងបរិយាបន្ន។
សហគ្រាសជលផលក្រោយប្រមូលផលដែលមានចំណាប់អារម្មណ៍ សូមដាក់ពាក្យស្នើសុំកញ្ចប់ហិរញ្ញគាំទ្រការវិនិយោគ (ISF) ឥឡូវនេះ! ផ្អែកតាមថវិកាមានកំណត់ ដាក់ពាក្យស្នើសុំមុន មានឱកាសទទួលបានមុន។
សម្រាប់ព័ត៌មានបន្ថែមអំពីកម្មវិធីISF និងដំណើរការដាក់ពាក្យស្នើសុំ សូមចូលទៅកាន់៖ https://www.cgcc.com.kh/en/post-harvest-fishery-guarantee-scheme/
សារអេឡិចត្រូនិក៖ [email protected]
អំពីធនាគារ FTB៖ ក្នុងនាមជាធនាគារពាណិជ្ជក្នុងស្រុកទី១នៅកម្ពុជា ដែលទទួលបានការទុកចិត្តចាប់តាំងពីឆ្នាំ ១៩៧៩ ធនាគារ FTB បានដើរតួនាទីយ៉ាងសំខាន់ក្នុងការជួយលើកកម្ពស់ និងអភិវឌ្ឍទីផ្សារ និងសេដ្ឋកិច្ច និងសង្គមជាតិតាមរយៈការជំរុញ គាំទ្រ និងផ្តល់សេវាហិរញ្ញវត្ថុជាមូលដ្ឋានចាំបាច់ដល់អតិថិជន អាជីវករ និងពាណិជ្ជករក្នុងស្រុក។ គិតត្រឹមឆ្នាំ២០២៤ ទ្រព្យសកម្មសរុបរបស់ធនាគារបានកើនឡើងដល់ ២,២៨ ពាន់លានដុល្លារអាមេរិក ឥណទានសរុបចំនួន ១,៣៤ ពាន់លានដុល្លារ និងប្រាក់បញ្ញើសរុបជាង ១,៩៣ ពាន់លានដុល្លារ។ ធនាគារ FTB នឹងបន្តជួយគាំទ្រអតិថិជនឱ្យកាន់តែរីកចម្រើន និងមានវិបុលភាពបន្ថែមទៀត ក្រោមចង្ខុវិស័យរយៈពេលវែងរបស់ខ្លួន ដើម្បីក្លាយជាធនាគារពាណិជ្ជ ដែលទទួលបានការពេញចិត្តជាងគេនៅក្នុងព្រះរាជាណាចក្រកម្ពុជា។
អំពី CGCC៖ CGCC គឺជាសហគ្រាសសាធារណៈ ដែលត្រូវបានបង្កើតឡើងដោយអនុក្រឹត្យរបស់រាជរដ្ឋាភិបាលកម្ពុជា ក្នុងខែកញ្ញា ឆ្នាំ២០២០ ដែលស្ថិតក្រោមអាណាព្យាបាលបច្ចេកទេស និងហិរញ្ញវត្ថុរបស់ក្រសួងសេដ្ឋកិច្ច និងហិរញ្ញវត្ថុ។ CGCC មានបេសកកម្មចម្បងក្នុងការផ្តល់ការធានាឥណទាន ដើម្បីបង្កើនបរិយាបន្នហិរញ្ញវត្ថុ និងអភិវឌ្ឍសហគ្រាសធុនតូច និងមធ្យម។ គិតត្រឹមចុងខែកុម្ភៈ ឆ្នាំ២០២៥ CGCC បានអនុម័តការធានាឥណទានជូនដល់ ៣.៩៧៩ គណនី ក្នុងទំហំទឹកប្រាក់កម្ចីប្រហាក់ប្រហែល ២៧៤,១៤ លានដុល្លារ៕
