CGCC

Menu
Menu
Menu

Tag: សិក្ខាសាលា

CGCC ចូលរួមក្នុងកម្មវិធីបណ្តុះបណ្តាល ACSIC លើកទី៣៣ ឆ្នាំ២០២៥ នៅទីក្រុងម៉ានីល ប្រទេសហ្វីលីពីន

Posted on by Sorn Chhorvyvatey

ចាប់ពីថ្ងៃទី២២ ដល់ថ្ងៃទី២៥ ខែកញ្ញា ឆ្នាំ២០២៥ គណៈប្រតិភូ CGCC ដឹកនាំដោយ លោកស្រី គឹម សុផៃ ប្រធាននាយកដ្ឋានសវនកម្មផ្ទៃក្នុងរបស់ CGCC និងចូលរួមដោយ លោកស្រី កឹម ចាន់ថាវី អនុប្រធានការិយាល័យទីផ្សារ និង​អភិវឌ្ឍន៍អាជីវកម្ម និង លោក អំ ដេត អនុប្រធានការិយាល័យហេដ្ឋារចនាសម្ព័ន្ធ និងសន្តិសុខព័ត៌​មាន​វិទ្យា បានចូលរួមកម្មវិធីបណ្តុះបណ្តាល Asian Credit Supplementation Institution Confederation (ACSIC) លើកទី៣៣ ឆ្នាំ២០២៥ នៅទីក្រុង  ម៉ានីល ប្រទេសហ្វីលីពីនដែលបានរៀបចំដោយ​ស្ថាប័នធានាឥណទាននៃប្រទេសហ្វីលីពីន​ (PHILGUARANTEE) ក្រោមប្រធានបទ ការបង្កើតលទ្ធភាពធានាឥណទានដើម្បីកៀរគរមូលនិធិសម្រាប់ការអភិវឌ្ឍន៍សេដ្ឋកិច្ចប្រកបដោយចីរភាពនិងបរិយាបន្ន (Enabling Credit Guarantees to Mobilize Funds for Sustainable and Inclusive Economic Development) ”។

កម្មវិធីបណ្តុះបណ្តាលនេះមានការចូលរួមពីគណៈប្រតិភូប្រមាណ ៨៥នាក់ មកពីស្ថាប័នសមាជិក និងអ្នកសង្កេតការណ៍របស់ ACSIC ១៣ស្ថាប័ន មកពី ១១ប្រទេស ផ្សេងៗគ្នា។ ព្រឹត្តិការណ៍នេះចាត់ទុកជាវេទិកាមួយដើម្បីបង្ហាញពីការអនុវត្តល្អបំផុត ក្នុងការជំរុញកិច្ចសហការ និងស្វែងរកវិធីសាស្រ្តប្រកបដោយភាពច្នៃប្រឌិតក្នុងការពង្រឹងការផ្តល់ហិរញ្ញប្បទានសម្រាប់សហគ្រាសធុនតូច និងមធ្យម (SMEs)។

ក្នុងអំឡុងពេលនៃកម្មវិធីបណ្តុះបណ្តាល អ្នកចូលរួមទាំងអស់ បានចូលរួមក្នុងការពិភាក្សាដ៏រឹងមាំជាមួយអ្នកជំនាញអន្តរជាតិ តំណាងរដ្ឋាភិបាល និងស្ថាប័នសមាជិក ACSIC ដែលផ្តោតលើការកែលម្អលទ្ធភាពទទួលបានហិរញ្ញវត្ថុសម្រាប់សហគ្រាសធុនតូច និងមធ្យម ដោយផ្តោតជាពិសេសលើតួនាទីសំខាន់នៃការធានាឥណទានក្នុងការជំរុញការអភិវឌ្ឍន៍ប្រកបដោយចីរភាព។

កម្មវិធីបណ្តុះបណ្តាលនេះក៏បានផ្តល់ឱកាសដ៏មានតម្លៃសម្រាប់ប្រតិភូរបស់ CGCC ក្នុងការពង្រីកបណ្តាញទំនាក់ទំនងជាមួយស្ថាប័នធានាឥណទានផ្សេងទៀត ដែលជាការបើកផ្លូវទៅកាន់កិច្ចសហប្រតិបត្តិការនាពេលអនាគត់និងការចែករំលែកចំណេះដឹងដែលនឹងជួយគាំទ្រដល់ការអភិវឌ្ឍន៍របស់ CGCC ។  សំខាន់ជាងនេះ ប្រតិភូរបស់ CGCC ក៏បានសិក្សាពីរបៀបដែលកម្មវិធីបណ្តុះបណ្តាល ACSIC ត្រូវបានធ្វើឡើង ដែលជាបទពិសោធន៍ដ៏មានប្រយោជន៍សម្រាប់ CGCC ក្នុងការធ្វើជាម្ចាស់ផ្ទះកម្មវិធីបណ្តុះបណ្តាល ACSIC លើកទី៣៤ នៅឆ្នាំ២០២៦ ដែលកម្ពុជាជាប្រទេសម្ចាស់ផ្ទះ។

 

កម្មវិធីកសាងសមត្ថភាពសហគ្រិនរបស់សាជីវកម្មធានាឥណទានកម្ពុជា (EPIC) វគ្គទី៦

Posted on by Sorn Chhorvyvatey

នាថ្ងៃទី១២ ខែកញ្ញា ឆ្នាំ២០២៥ នៅខេត្តព្រៃវែង សាជីវកម្មធានាឥណទានកម្ពុជា (CGCC) និងមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តព្រៃវែង បានសហការរៀបចំកម្មវិធី EPIC វគ្គទី៦ ស្តីអំពី “គន្លឹះក្នុងការទទួលបាន និងការប្រើប្រាស់ហិរញ្ញប្បទានផ្លូវការ ប្រកបដោយការទទួលខុសត្រូវ និងប្រសិទ្ធភាព” ក្រោមអធិបតីភាព លោក វ៉ាន់ សុភាព ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តព្រៃវែង និងវត្តមានជាកិត្តិយសរបស់ លោក ណូ លីដា អគ្គនាយក CGCC លោក លឹម មិញ នាយកប្រតិបត្តិសមាគមអ្នកផ្គត់ផ្គង់ទឹកស្អាតកម្ពុជា និងមានការចូលរួមពីសិក្ខាកាមដែលជាម្ចាស់សហគ្រាសខ្នាតមីក្រូ តូច និងមធ្យម ម្ចាស់សិប្បកម្ម ជាពិសេសប្រតិបត្តិករផ្គត់ផ្គង់ទឹកស្អាតនៅក្នុងខេត្តព្រៃវែង និងបណ្តាខេត្តនានា សរុប ៥១រូប ព្រមទាំងបុគ្គលិករបស់ស្ថាប័ន និងមន្ទីរ សរុបប្រមាណ៧០រូប។

ជារបៀបវារៈនៃកម្មវិធី EPIC 6 សិក្ខាកាម និងអ្នកចូលរួមទទួលបានការស្វែងយល់អំពី “យន្តការធានាឥណទាន ក្នុងការគាំទ្រលទ្ធភាពទទួលបានហិរញ្ញប្បទានរបស់សហគ្រាសធុនតូច និងមធ្យម”  តាមរយៈបទបង្ហាញដោយ លោក អេង តុងងី ប្រធាននាយកដ្ឋានគ្រប់គ្រងហានិភ័យ និងអនុលោមភាពនៃ CGCC ដែលក្នុងនោះក៏មាននូវការចែករំលែកអំពីគម្រោងធានាឥណទានសម្រាប់អភិវឌ្ឍសេវាសាធារណៈ (UDGS) សម្រាប់ប្រតិបត្តិករទឹកស្អាតឯកជន ដែលជាគម្រោងធានាឥណទាន ជាមួយនឹងលក្ខខណ្ឌអនុគ្រោះ ក្នុងគោលបំណងគាំទ្រ និងបង្កើនលទ្ធភាពទទួលបានហិរញ្ញប្បទានផ្លូវការក្នុងការគាំទ្រដល់ប្រតិបត្តិករទឹកស្អាតឯកជន។

ស្របជាមួយនឹងយន្តការធានាឥណទានរបស់ CGCC លោក ហួត សារ៉ាត់ នាយកការិយាល័យសេវាហិរញ្ញវត្ថុ សហគ្រាសខ្នាតតូច និងមធ្យម នៃធនាគារពាណិជ្ជកម្មក្រៅប្រទេស នៃកម្ពុជា (FTB) ក៏បានចែករំលែកអំពី “នីតិវិធីនៃការវាយតម្លៃឥណទាន និងដំណោះស្រាយហិរញ្ញវត្ថុសម្រាប់សហគ្រាសខ្នាតតូច និងមធ្យម” និងបានគូសបញ្ជាក់អំពីដំណោះស្រាយហិរញ្ញវត្ថុដែលធនាគារFTB អាចផ្តល់ជូនដល់ប្រតិបត្តិករទឹកស្អាតឯកជន និងម្ចាស់អាជីវកម្ម/សហគ្រាសផងដែរ។

បន្ថែមពីនេះ សិក្ខាកាមបានស្វែងយល់អំពីប្រធានបទបណ្តុះបណ្តាលគោលស្តីអំពី “គន្លឹះក្នុងការទទួលបាន និងការប្រើប្រាស់ហិរញ្ញប្បទានផ្លូវការ ប្រកបដោយការទទួលខុសត្រូវ និងប្រសិទ្ធភាព” ដែលចែករំលែកដោយ លោក ទិត្យ កំរង អ្នកឯកទេស​ផ្នែកចំណេះ​ដឹង​ហិរញ្ញវត្ថុ និងជាស្ថាបនិក ក្រុមហ៊ុន ឫទ្ធិពល និងអេបកត់លុយ។ ក្រោយពីបានសិក្សាស្វែងយល់លើប្រធានបទបណ្តុះបណ្តាល សិក្ខាកាមទាំងអស់បានបែងចែកជា៤ក្រុម និងពិភាក្សាក្នុងការបង្កើតផែនការហិរញ្ញវត្ថុអាជីវកម្ម ដោយផ្អែកលើតារាងគម្រោងចំណូល ចំណាយ រយៈពេល១ឆ្នាំ។ ជាលទ្ធផលនៃការពិភាក្សា សិក្ខាកាមបានចែករំលែកអំពីគម្រោងចំណូល ចំណាយអាជីវកម្មតាមក្រុមនីមួយៗ ព្រមទាំងទទួលបានយោបល់កែលម្អពីគ្រូបង្គោលផងដែរ។

EPIC គឺជាកម្មវិធីកសាងសមត្ថភាពសហគ្រិនរបស់ CGCC ដែលនឹងនាំមកនូវប្រធានបទពាក់ព័ន្ធការប្រតិ​បត្តិនិងគ្រប់គ្រងអាជីវកម្ម ដើម្បីអភិវឌ្ឍសមត្ថភាពសហគ្រាសធុនមីក្រូ តូច និងមធ្យម តាមរយៈកិច្ចសហការជាមួយស្ថាប័នពាក់ព័ន្ធ/គ្រឹះស្ថានហិរញ្ញវត្ថុចូលរួម៕

 

CGCC ចូលរួមសន្និសីទជាតិកម្ពុជាឆ្នាំ ២០២៥

Posted on by Sorn Chhorvyvatey

នៅថ្ងៃទី២២ ខែសីហា ឆ្នាំ២០២៥ នៅសណ្ឋាគារ SUN & MOON, លោក ណូ លីដា អគ្គនាយក CGCC និងសហការី​ បានចូលរួមជាវាគ្មិនកិត្តិយសនៅក្នុងសន្និសីទជាតិកម្ពុជាឆ្នាំ ២០២៥ (Cambodia National Conference 2025) របស់ស្ថាប័ន CorporateConnections Cambodia ដែលមានការចូលរួមដោយផ្ទាល់ពី ថ្នាក់ដឹកនាំ សមាជិក វាគ្មិនថ្នាក់ជាតិ និងវាគ្មិនអន្តរជាតិ ព្រមទាំងភ្ញៀវកិត្តិយស។ សន្និសីទនេះគឺជាឱកាសដ៏មានតម្លៃក្នុងការបង្កើតទំនាក់ទំនងជាមួយម្ចាស់អាជីវកម្មទាំងក្នុង និងក្រៅប្រទេស ព្រមទាំងស្វែងយល់បន្ថែមពី បទពិសោធន៍ក្នុងការដឹកនាំអាជីវកម្មផ្ទាល់។

តាមរយៈសន្និសីទនេះ លោក ណូ ​លីដា ​ក៏បាន​ចែករំលែកអំពីការគាំទ្ររបស់ CGCC ទៅកាន់សហគ្រាសធុនតូច និងមធ្យមតាមរយៈសេវាកម្ម និងផលិតផលរបស់ CGCC ដែលរួមមាន ការធានាលើកម្ចីអាជីវកម្ម ការធានាសញ្ញាបណ្ណ និងកម្មវិធីកសាងសមត្ថភាពសម្រាប់សហគ្រិនរបស់ CGCC  ដើម្បីគាំទ្រដល់ការអភិវឌ្ឍរបស់សហគ្រាសធុនតូច និងមធ្យមនៅកម្ពុជា។

គួរបញ្ជាក់ផងដែរថា ស្ថាប័ន CorporateConnections គឺជាសហគមន៍បណ្តាញធុរកិច្ចសកល ដែលបានបង្កើតឡើងក្នុងគោលដៅ ផ្សារភ្ជាប់អ្នកដឹកនាំជុំវិញពិភពលោក និងផ្តល់សិទ្ធិអំណាចដល់ពួកគេដើម្បីបង្កើតឱកាសអាជីវកម្ម និងការផ្លាស់ប្តូរជាវិជ្ជមានប្រកបដោយអត្ថន័យនៅក្នុងស្ថាប័ន សហគមន៍ និងជីវិតរស់នៅរបស់ពួកគេ។ បច្ចុប្បន្ននេះ ស្ថាប័ន CorporateConnections មាននៅក្នុងប្រទេស ចំនួន ៣៣ប្រទេស និងមានសមាជិកសរុបចំនួន ១.៧០០នាក់។ គោលបំណងរបស់ CorporateConnections Cambodia គឺផ្សារភ្ជាប់ប្រទេសកម្ពុជាទៅកាន់ពិភពលោក និងផ្សារភ្ជាប់ពិភពលោកមកកាន់ប្រទេសកម្ពុជា។

 

កម្មវិធីកសាងសមត្ថភាព និងជំនាញសម្រាប់សហគ្រាសធុនតូច និងមធ្យម (BCC) ឆ្នាំ២០២៥ ក្នុងខេត្តបាត់ដំបង

Posted on by Sorn Chhorvyvatey

នាថ្ងៃទី៨ ខែសីហា ឆ្នាំ២០២៥ សាជីវកម្មធានាឥណទានកម្ពុជា (CGCC) និង ធនាគារ មេយប៊ែង ខេមបូឌា​ (Maybank) បានសហការគ្នាជាលើកទី៦ ក្នុងការរៀបចំកម្មវិធីកសាងសមត្ថភាព និងជំនាញសម្រាប់សហគ្រាសធុនតូច និងមធ្យម (BCC) ឆ្នាំ២០២៥ នៅក្នុងខេត្តបាត់ដំបង ដែលមានការចូលរួមពីសហគ្រិននាំចេញអង្ករ ម្ចាស់រោងម៉ាស៊ីនកិនស្រូវដែលអញ្ជើញមកពីតំបន់ភូមិភាគពាយ័ព្យ ព្រមទាំងខេត្តដែលនៅជុំវិញសរុបប្រមាណ ៣០រូប និងអ្នកប្រឹក្សាហិរញ្ញវត្ថុ ថ្នាក់ដឹកនាំ និងបុគ្គលិកនៃស្ថាប័នទាំងពីរផងដែរ។

កម្មវិធីនេះត្រូវបានប្រារព្ធឡើងក្រោមអធិបតីភាពពីសំណាក់ ឯកឧត្តម អ្នកឧកញ៉ា ភួ ពុយ ប្រធានក្រុមប្រឹក្សាភិបាល និងប្រធានគ្រប់គ្រងក្រុមហ៊ុន បៃតងកម្ពុជា ដែលបានផ្តល់នូវសុន្ទរកថាគន្លឹះ និងចែករំលែកអំពីសក្តានុពលនៃការនាំចេញអង្កររបស់កម្ពុជា និងការចូលរួមជាកិត្តិយសពីសំណាក់ លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា (CRF) ដែលបានផ្តល់នូវទស្សនវិស័យទូលំទូលាយអំពីនិន្នាការបច្ចុប្បន្ន និងឱកាសនៅក្នុងឧស្សាហកម្មស្រូវអង្ករ។

ជាមួយគ្នានេះផងដែរ លោក រ័ត្ន សោភ័ណ នាយកប្រតិបត្តិ និងនាយកប្រចាំប្រទេសនៃធនាគារ Maybank ក៏បានលើកឡើងអំពីការប្តេជ្ញាចិត្តរបស់ Maybank លើសពីការផ្តល់សេវាហិរញ្ញវត្ថុ ដោយការចូលរួមពង្រឹងសមត្ថភាព SMEs ដូចជាសហគ្រិននាំចេញអង្ករ និងរោងម៉ាស៊ីនកិនស្រូវជាដើម។

លោក ណូ លីដា អគ្គនាយក CGCC បានសម្តែងនូវការកោតសរសើរចំពោះធនាគារ Maybank ដែលបានផ្តួចផ្តើម និងបន្តសហការជាមួយ CGCC ក្នុងការរៀបចំកម្មវិធី BCC ចាប់តាំងពីឆ្នាំ ២០២២ រួមទាំងលើកឡើងអំពីយន្តការគាំទ្រពីរាជរដ្ឋាភិបាលកម្ពុជា តាមរយៈគម្រោងធានាឥណទានសម្រាប់ការនាំចេញអង្កររបស់ CGCC សម្រាប់សហគ្រិននាំចេញអង្ករ និងសមាជិករោងម៉ាស៊ីនកិនស្រូវរបស់ CRF ដើម្បីជំរុញដល់ការនាំចេញស្រូវអង្ករកម្ពុជា។

តាមរយៈសិក្ខាសាលានេះ សហគ្រិនក្នុងវិស័យស្រូវអង្ករទទួលបានការចែករំលែកចំណេះដឹងដោយផ្ទាល់លើការរំពឹងទុក និងតម្រូវការរបស់អតិថិជន ការត្រៀមខ្លួនសម្រាប់ទីផ្សារ និងភាពជាដៃគូអាជីវកម្ម ដែលជាយុទ្ធសាស្ត្រនៅក្នុងបរិបទពាណិជ្ជកម្មដែលកំពុងផ្លាស់ប្តូរ។ គំនិតផ្តួចផ្តើមនេះ បានឆ្លុះបញ្ចាំងអំពីការប្តេជ្ញាចិត្តរួមគ្នារវាងធនាគារ Maybank និង CGCC ក្នុងការផ្តល់ជូនលើសពីលទ្ធភាពទទួលបានហិរញ្ញវត្ថុ ដោយផ្តោតលើការពង្រឹងសមត្ថភាព ទំនុកចិត្ត និងការបង្កើនទំនាក់ទំនងដែលចាំបាច់ដល់សហគ្រាសធុនតូច និងមធ្យម ដើម្បីជំរុញភាពលូតលាស់​ក្នុងអំឡុងស្ថានភាពសេដ្ឋកិច្ចសកល ដែលកំពុងបន្តមានភាពស្មុគស្មាញនាពេលបច្ចុប្បន្ននេះ។

ក្នុងរយៈពេល៧ខែ នៃឆ្នាំ២០២៥ កម្ពុជាបាននាំចេញអង្ករសរុបចំនួន ៤២០ ៥៧២តោន ទៅកាន់ទីផ្សារ៦៥គោលដៅនៅទូទាំងពិភពលោក នេះបើយោងតាមរបាយការណ៍នាំចេញអង្ករបស់សហព័ន្ធស្រូវអង្ករកម្ពុជា (CRF)។។ ដើម្បីចូលរួមគាំទ្រគោលដៅរបស់រាជរដ្ឋាភិបាលកម្ពុជា ក្នុងការបង្កើនការនាំចេញអង្ករឱ្យបាន១លានតោនក្នុងមួយឆ្នាំ CGCC និងគ្រឹះស្ថានហិរញ្ញវត្ថុចូលរួម (PFIs) ដែលរួមមានធនាគារមេយប៊ែង (ខេមបូឌា) ផងដែរ បាននិងកំពុងបន្តសហការអនុវត្តគម្រោងធានាឥណទានសម្រាប់ការនាំចេញអង្ករ (REGS)។ ក្នុងនោះ CGCC បានអនុម័តការធានាលើកម្ចីសរុបទឹកប្រាក់ប្រមាណ​​៣៨ លានដុល្លារ គិតត្រឹមបំណាច់ខែកក្កដា ឆ្នាំ២០២៥ ដើម្បីគាំទ្រផ្នែកហិរញ្ញប្បទានដល់រោងម៉ាស៊ីនកិនស្រូវ និងក្រុមហ៊ុននាំចេញអង្ករ។ ទន្ទឹមនឹងការគាំទ្រផ្នែកហិរញ្ញប្បទាន ធនាគារ មេយប៊ែង (ខេមបូឌា) និង CGCC ក៏បានសហការគ្នារៀបចំកម្មវិធី BCC ចំនួន៥លើក ចាប់តាំងពីឆ្នាំ២០២២ មកម្ល៉េះ។

CGCC ចូលរួមចែករំលែក អំពីការធានាលើសញ្ញាបណ្ណ នៅក្នុងសិក្ខាសាលាផ្សព្វផ្សាយ ស្ដីពី របាយការណ៍វាយតម្លៃទីផ្សារមូលបត្ររបស់ប្រទេសកម្ពុជា

Posted on by Sorn Chhorvyvatey

កាលពីថ្ងៃទី១១ ខែកក្កដា ឆ្នាំ២០២៥ កញ្ញាជុំ សិលារ័ត្ន ប្រធានការិយាល័យអភិវឌ្ឍន៍អាជីវកម្ម (ការធានាសញ្ញាបណ្ណ) នៃ CGCC  បានចូលរួមជាវាគ្មិនកិត្តិយសនៅក្នុងសិក្ខាសាលាផ្សព្វផ្សាយ ស្ដីពី “របាយការណ៍វាយតម្លៃទីផ្សារមូលបត្ររបស់ប្រទេសកម្ពុជា” ទៅលើប្រធានបទ “អាទិភាពសម្រាប់ជំរុញការអភិវឌ្ឍទីផ្សារមូលបត្រក្នុងស្រុក” ដែលរៀបចំដោយ និយ័តករមូលបត្រកម្ពុជា (ន.ម.ក.) និងសាជីវកម្មហិរញ្ញវត្ថុអន្តរជាតិ (IFC) នៅសណ្ឋាគារ ហៃយ៉ាត់ រីជិនស៊ី ភ្នំពេញ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃ ន.ម.ក.។

សិក្ខាសាលាផ្សព្វផ្សាយនេះ ត្រូវបានរៀបចំឡើងដើម្បីផ្សព្វផ្សាយអំពីការយល់ដឹងឱ្យកាន់តែច្បាស់ និងរបៀបនៃការមើលរបាយការណ៍នៃការវាយតម្លៃនៅក្នុងទីផ្សារមូលបត្រនៅក្នុងព្រះរាជាណាចក្រកម្ពុជា ក្នុងគោលដៅជំរុញដល់ការបោះផ្សាយលក់មូលបត្រនៅក្នុងប្រទេស។

តាមរយៈសិក្ខាសាលាផ្សព្វផ្សាយនេះ កញ្ញា ជុំ សិលារ័ត្ន បានចែករំលែកអំពីអាទិភាពសម្រាប់ជំរុញការអភិវឌ្ឍទីផ្សារមូលបត្រក្នុងស្រុក ដោយសង្កត់ធ្ងន់លើការជំរុញទីផ្សារឱ្យកាន់តែមានភាពស៊ីជម្រៅតាមរយៈឧបករណ៍ជួញដូរដែលមានលក្ខណៈច្នៃប្រឌិត និងការជំរុញប្រតិបត្តិការទីផ្សារបន្ទាប់។ កញ្ញាក៏បានបញ្ជាក់ផងដែរពីការពង្រឹងកិច្ចសហប្រតិបត្តិការជាមួយភ្នាក់ងារទីផ្សារផ្សេងទៀតដូចជា ក្រុមហ៊ុនធានាអន្តរជាតិដើម្បីពង្រីកសមត្ថភាពធានាសញ្ញាបណ្ណ និងក្រុមហ៊ុនមូលបត្រក្នុងការរៀបចំប្រតិបត្តិការធានាសញ្ញាបណ្ណឱ្យកាន់តែឆ្លើយតបទៅនឹងតម្រូវការ និងបើកទូលាយការចុះបំពេញកាតព្វកិច្ចតាមច្បាប់ពីសំណាក់អ្នកវិនិយោគ និងកិច្ចពិភាក្សាផ្សេងៗដើម្បីបញ្ច្រាបអំពីសមត្ថភាពធានារបស់ CGCC ។

ពិធីចុះអនុស្សរណៈនៃការយោគយល់ត្រីភាគី រវាង CGCC, SME Bank និង FASMEC ស្តីពីកិច្ចសហប្រតិបត្តិការលើការផ្តល់កម្ចីមានការធានាជូនដល់សមាជិក FASMEC

Posted on by Sorn Chhorvyvatey

នាថ្ងៃទី១៦ ខែមិថុនា ឆ្នាំ២០២៥ នៅទីស្នាក់ការកណ្តាល សម័្ពន្ធសមាគមសហគ្រាសធុនតូច និងមធ្យមកម្ពុជា (FASMEC) ពិធីចុះហត្ថលេខាលើអនុស្សរណៈនៃការយោគយល់គ្នាជាត្រីភាគី ស្តីពីកិច្ចសហប្រតិបត្តិការ រវាង សាជីវកម្មធានាឥណទានកម្ពុជា​​(CGCC), ធនាគារសហគ្រាសធុនតូច និងមធ្យមកម្ពុជា ម.ក (SME Bank) និងសម័្ពន្ធសមាគមសហគ្រាសធុនតូច និងមធ្យមកម្ពុជា (FASMEC) ត្រូវបានរៀបចំឡើង ក្រោមការចូលរួមជាកិត្តិយសពីសំណាក់ ឧកញ៉ា តែ តាំងប៉ ប្រធានក្រុមប្រឹក្សាភិបាល FASMEC, លោក ណូ លីដា អគ្គនាយក CGCC,  លោក ជា សុភ័ក្ដ អគ្គនាយក SME​ Bank និងមានការចូលរួមពីសមាជិកក្រុមប្រឹក្សាភិបាលរបស់ FASMEC ថ្នាក់ដឹកនាំ និងបុគ្គលិកនៃស្ថាប័នទាំងបី សរុបប្រមាណ៣០រូប។

អនុស្សរណៈនៃការយោគយល់គ្នានេះ ត្រូវបានរៀបចំឡើងក្នុងគោលបំណងដើម្បីជំរុញការអភិវឌ្ឍសហគ្រាសធុនតូច និងមធ្យមនៅកម្ពុជា តាមរយៈការធានាឥណទានរបស់ CGCC លើកម្ចីដែលផ្តល់ជូនដោយធនាគារ SME Bank ទៅកាន់សមាជិករបស់ FASMEC។ កិច្ចសហការនេះនឹងគាំទ្រដល់ការជួយបង្កើនលទ្ធភាពទទួលបានកម្ចីចាំបាច់របស់ក្រុមហ៊ុន/អាជីវកម្ម ជាពិសេសក្នុងវិស័យអាទិភាព ដែលជាសមាជិករបស់ FASMEC ឆ្លើយតបទៅនឹងបញ្ហាប្រឈមនៃការខ្វះទ្រព្យធានា និងជាការបើកផ្លូវដល់កិច្ចសហការរវាងស្ថាប័នទាំងបី ក្នុងការបង្កើនសមត្ថភាព និងចំណេះដឹងហិរញ្ញវត្ថុដល់ SMEs ផងដែរ។

ពិធីចុះហត្ថលេខានេះ បានបញ្ចប់ជាមួយនឹងលទ្ធផលជាផ្លែផ្កា ក្នុងការគាំទ្រដល់ប្រព័ន្ធអេកូឡូស៊ីសហគ្រាសធុនតូច និងមធ្យម ដែលស្របតាមយុទ្ធសាស្ត្របញ្ចកោណរបស់រាជរដ្ឋាភិបាល សំដៅជំរុញឱកាសក្នុងការពង្រីកផលិតកម្មក្នុងស្រុក ជាមួយនឹងការធ្វើឱ្យប្រសើរឡើងនូវគុណភាព ផលិតភាព និងការប្រកួតប្រជែងជាសកល៕​

CGCC ចូលរួមបេសកកម្មទៅកាន់ទីស្នាក់ការកណ្តាលអង្គការ UNIDO នៅប្រទេសអូទ្រីស

Posted on by Sorn Chhorvyvatey

ចាប់ពីថ្ងៃទី០៦ ដល់ថ្ងៃទី ១១ ខែមេសា ឆ្នាំ២០២៥ លោក ណូ លីដា អគ្គនាយកសាជីវកម្មធានាឥណទានកម្ពុជា(CGCC) ត្រូវបានអញ្ជើញឱ្យទៅចូលរួមក្នុងបេសកកម្ម ទៅកាន់ទីស្នាក់ការកណ្ដាល នៃអង្គការសហប្រជាជាតិដើម្បីអភិវឌ្ឍន៍ឧស្សាហកម្ម(UNIDO) នៅទីក្រុងវីយ៉ែន ប្រទេសអូទ្រីស។

គោលបំណងនៃដំណើរទស្សនកិច្ចនេះ គឺ (១) ដើម្បីបង្ហាញជូនក្រុមការងារពាក់ព័ន្ធ នៅទីស្នាក់ការកណ្តាលនៃអង្គការ UNIDO អំពីវឌ្ឍនភាព និងបញ្ហាប្រឈម និងមេរៀន នៃការអនុវត្តកម្មវិធីហិរញ្ញវត្ថុគាំទ្រការវិនិយោគ (Investment Support Facility – ISF) នៃគម្រោងអភិវឌ្ឍន៍វិស័យជលផល (CAPFISH-Capture) ដែល CGCC ជាស្ថាប័នគ្រប់គ្រងមូលធិនិ ISF និង (២) ដើម្បីបង្កើនការយល់ដឹងរបស់ CGCC អំពីនីតិវិធីពាក់ព័ន្ធរបស់ UNIDO ក្នុងការបង្កើនប្រសិទ្ធភាពនៃការការគ្រប់គ្រងមូលនិធិ ISF របស់ CGCC។

តាមរយៈដំណើរទស្សនកិច្ចនេះ លោក ណូ លីដា បានជួបប្រជុំពិភាក្សាជាមួយក្រុមការងារពាក់ព័ន្ធ នៅទីស្នាក់ការកណ្តាលនៃអង្គការ UNIDO រួមមាន៖ Islamic Finance Taskforce, Procurement and Finance Division, Agirculture Division និង Innovative Finance Division ជាដើម ដើម្បីពិភាក្សាអំពីបញ្ហាប្រឈម, ដំណោះស្រាយ ដើម្បីធ្វើឱ្យប្រសើរឡើងនូវកម្មវិធី ISF, និងឱកាសក្នុងការពង្រីកកិច្ចសហប្រតិបត្តិការនាពេលអនាគត។

កម្មវិធី ISF គឺជាគំរូ​ហិរញ្ញវត្ថុថ្មីមួយរបស់គម្រោង CAPFISH-Capture ក្រោមការគាំទ្រថវិកាពីសហភាពអឺរ៉ុប (EU) អនុវត្តដោយអង្គការ UNIDO និងរដ្ឋបាលជលផល (FiA) ហើយកម្មវិធីនេះត្រូវបានគ្រប់គ្រង និងចាត់ចែងមូលនិធិដោយ CGCC។  CGCC ក៏បានដាក់ឱ្យដំណើរការគម្រោងធានាឥណទានសម្រាប់វិស័យជលផលក្រោយប្រមូលផល (PFGS) ដើម្បីផ្តល់ការធានាឥណទាន ដល់កម្ចីដែលនៅក្រោមកម្មវិធី​ ISF នេះ។ ជាលទ្ធផល គិតមកដល់ដំណាច់ខែមីនា ឆ្នាំ២០២៥ ក្រោមគម្រោង​នេះ CGCC បានអនុម័តការធានាឥណទានដល់សហគ្រាសសរុបចំនួន ១២ គិតជាទំហំកម្ចីស្មើនឹងប្រមាណជិត ៣០ម៉ឺនដុល្លារ៕

កម្មវិធីកសាងសមត្ថភាពសហគ្រិនរបស់សាជីវកម្មធានាឥណទានកម្ពុជា (EPIC) វគ្គទី៤

Posted on by Sorn Chhorvyvatey

នាថ្ងៃទី២៥ ខែមេសា ឆ្នាំ២០២៥ នៅខេត្តកំពង់ចាម សាជីវកម្មធានាឥណទានកម្ពុជា (CGCC) និងមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តកំពង់ចាម បានសហការរៀបចំកម្មវិធី EPIC វគ្គទី៤​ ស្តីអំពី “ការរៀបចំផែនការអាជីវកម្មសម្រាប់កម្ចីអាជីវកម្មខ្នាតតូច និងមធ្យម” ក្រោមអធិបតីភាព លោក ពូន រុន ប្រធានមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តកំពង់ចាម និងវត្តមានជាកិត្តិយសរបស់លោក ណូ លីដា អគ្គនាយក CGCC និងមានការចូលរួមពីសិក្ខាកាមដែលជាម្ចាស់សហគ្រាសខ្នាតមីក្រូ តូច និងមធ្យមជាពិសេសប្រតិបត្តិករផ្គត់ផ្គង់ទឹកស្អាតនៅក្នុងខេត្តកំពង់ចាម និងបណ្តាខេត្តនានា សរុបប្រមាណ៧៥រូប ក្នុងនោះស្រ្តីមាន ២៨រូប។

តាមរយៈកម្មវិធី EPIC 4 សិក្ខាកាមបានស្វែងយល់អំពីប្រធានបទបណ្តុះបណ្តាលគោលស្តីអំពី “ការរៀបចំផែនការអាជីវកម្មសម្រាប់កម្ចីអាជីវកម្មខ្នាតតូច និងមធ្យម”     ដែលចែករំលែក ដោយ លោកស្រី ចៅ លន់មូលីការ នាយិកាប្រតិបត្តិ និងស្ថាបនិកក្រុមហ៊ុន Cambodian Standard Development & Supply Co., Ltd. និងជាក្រុមប្រឹក្សាភិបាលទទួលបន្ទុកគណៈកម្មការលទ្ធភាពទទួលបានហិរញ្ញប្បទានរបស់សាគមសហគ្រិនវ័យក្មេងកម្ពុជា (YEAC)។ ក្រោយពីបានសិក្សាស្វែងយល់លើប្រធានបទបណ្តុះបណ្តាល សិក្ខាកាមទាំងអស់ក៏បានចែករំលែកនូវបទពិសោធន៍ជាក់ស្តែងផ្ទាល់ខ្លួន ពីគ្នាទៅវិញទៅមក តាមរយៈវេទិកាពិភាក្សាជាក្រុមទៅលើការបង្កើតផែនការអាជីវកម្មតែមួយទំព័រ (Business Plan Model Lean Canvas) ដែលជាឱកាសសម្រាប់សិក្ខាកាមក្នុងការអនុវត្តផ្ទាល់ និងទទួលបានយោបល់កែលម្អនានាពីគ្រូបង្គោល និងវាគ្មិនកិត្តិយសនៅក្នុងកម្មវិធីផងដែរ។

បន្ថែមពីនេះ សិក្ខាកាមក៏ទទួលបានស្វែងយល់អំពី “យន្តការធានាឥណទាន ក្នុងការគាំទ្រលទ្ធភាពទទួលបានហិរញ្ញប្បទានរបស់   សហគ្រាសធុនតូច និងមធ្យម”  តាមរយៈបទបង្ហាញដោយ លោក យុន ផន  ប្រធាននាយកដ្ឋានយុទ្ធសាស្រ្ត និងអភិវឌ្ឍន៍អាជីវកម្មនៃ CGCC ដែលក្នុងនោះក៏មាននូវការចែករំលែកអំពីគម្រោងធានាឥណទានសម្រាប់អភិវឌ្ឍសេវាសាធារណៈ សម្រាប់ប្រតិបត្តិករទឹកស្អាតឯកជន ដែលជាគម្រោងធានាឥណទានគ្រោងនឹងដាក់ចេញក្នុងពេលឆាប់ៗ ដើម្បីគាំទ្រដល់ប្រតិបត្តិករទឹកស្អាតឯកជន។

ស្របជាមួយនឹងយន្តការធានាឥណទានរបស់ CGCC លោក លោក តាំង ហុកឡេង នាយកឥណទាន អាជីវកម្មខ្នាតតូច និង មធ្យម នៃធនាគារ មេយប៊ែង ខេមបូឌា ក៏បានចែករំលែកអំពី “ “នីតិវិធីនៃការវាយតម្លៃឥណទាន និងដំណោះស្រាយហិរញ្ញវត្ថុសម្រាប់សហគ្រាសខ្នាតតូច និងមធ្យម” និងក៏បានគូសបញ្ជាក់អំពីដំណោះស្រាយហិរញ្ញវត្ថុដែលធនាគារមេយប៊ែង អាចផ្តល់ជូនដល់ប្រតិបត្តិករទឹកស្អាតឯកជនផងដែរ។

ការកសាងសមត្ថភាពសហគ្រិន គឺជាការងារអាទិភាពមួយរបស់ CGCC ក្នុងបេសកកម្មបង្កើនបរិយាបន្នហិរញ្ញវត្ថុ និងអភិវឌ្ឍសហគ្រាសខ្នាតតូច និងមធ្យម នៅកម្ពុជា។ EPIC គឺជាកម្មវិធីកសាងសមត្ថភាពសហគ្រិនរបស់ CGCC ដែល នឹងនាំមកនូវប្រធានបទពាក់ព័ន្ធការប្រតិ​បត្តិនិងគ្រប់គ្រងអាជីវកម្ម ដើម្បីអភិវឌ្ឍសមត្ថភាពសហគ្រាសធុនមីក្រូ តូច និងមធ្យម តាមរយៈកិច្ចសហការជាមួយស្ថាប័នពាក់ព័ន្ធ/គ្រឹះស្ថានហិរញ្ញវត្ថុចូលរួម៕

ពិធីចុះហត្ថលេខាលើកិច្ចព្រមព្រៀងគម្រោងធានាឥណទាន សម្រាប់វិស័យជលផលក្រោយប្រមូលផល រវាង CGCC និងធនាគារ FTB

Posted on by Sorn Chhorvyvatey

នាថ្ងៃទី២១ ខែមីនា ឆ្នាំ២០២៥ សាជីវកម្មធានាឥណទានកម្ពុជា(CGCC) និងធនាគារពាណិជ្ជកម្មក្រៅប្រទេសនៃកម្ពុជា (FTB) បានសហការរៀបចំពិធីចុះហត្ថលេខាលើកិច្ចព្រមព្រៀង ស្តីពី គម្រោងធានាឥណទានសម្រាប់វិស័យជលផលក្រោយប្រមូលផល ក្រោមវត្តមានរបស់ថ្នាក់គ្រប់គ្រង និងបុគ្គលិកនៃ  CGCC,  ធនាគារ FTB, និងតំណាងអង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO)  ក្នុងគោលបំណងប្រកាសជាផ្លូវការ នូវការពង្រីកកិច្ចសហការបន្ថែមរវាងស្ថាប័នទាំងពីរ លើការផ្តល់កម្ចីដែលមានការធានាពី CGCC តាមរយៈធនាគារ FTB ដល់សហគ្រាស ដែលស្ថិតនៅក្នុងវិស័យជលផលក្រោយប្រមូលផល និងអ្នកផ្គត់ផ្គង់ដែលពាក់ព័ន្ធ។

គម្រោងធានាឥណទានសម្រាប់វិស័យជលផលក្រោយប្រមូលផលរបស់ CGCC ត្រូវបានបង្កើតឡើងដើម្បីផ្តល់ឥណទានដែលមានការធានាជូនដល់ក្រុមហ៊ុន/អាជីវកម្ម ឬសហគ្រាសដែលស្ថិតនៅក្នុងវិស័យជលផលក្រោយប្រមូលផល ក្រោមកម្មវិធីហិរញ្ញវត្ថុគាំទ្រការវិនិយោគ (ISF) ដែលជាគំរូ​ហិរញ្ញវត្ថុថ្មីមួយរបស់គម្រោងអភិវឌ្ឍន៍ជលផលក្រោយប្រមូលផល (CAPFISH-Capture) ក្រោមការគាំទ្រថវិកាពីសហភាពអឺរ៉ុប (EU) អនុវត្តដោយអង្គការ UNIDO និងរដ្ឋបាលជលផល  ហើយកម្មវិធីនេះត្រូវបានគ្រប់គ្រងមូលនិធិដោយ CGCC។ សហគ្រាសដែលស្ថិតនៅក្នុងវិស័យជលផលក្រោយប្រមូលផល អាចដាក់ពាក្យស្នើសុំការគាំទ្រពីគម្រោង ISF លើជំនួយបច្ចេកទេស ដើម្បីកែលម្អប្រតិបត្តិការអាជីវកម្ម ការលើកកម្ពស់ការអនុវត្តសុវត្ថិភាពម្ហូបអាហារ និងកញ្ចប់មូលនិធិរបស់គម្រោងគាំទ្រជាសម្ភារបរិក្ខារ ដើម្បីជំរុញនវានុវត្តន៍ និងបង្កើនប្រសិទ្ធភាព និងប្រសិទ្ធផលប្រតិបត្តិការអាជីវកម្ម ព្រមទាំងឥណទានអាជីវកម្មដែលមានការធានាពី CGCC តាមរយៈគ្រឹះស្ថានហិរញ្ញវត្ថុចូលរួម (PFI) របស់ CGCC រួមមានធនាគារ FTB ដែលបានចុះកិច្ចព្រមព្រៀងលើគម្រោងធានាឥណទានសម្រាប់វិស័យជលផលក្រោយប្រមូលនេះជាមួយ CGCC។

លោក ណូ លីដា អគ្គនាយក CGCC បានមានប្រសាសន៍ឲ្យដឹងថា ៖ “CGCC មានសេចក្តីរីករាយដែលធនាគារ FTB ក្លាយជាគ្រឹះស្ថានហិរញ្ញវត្ថុចូលរួមថ្មីមួយបន្ថែមទៀត ដើម្បីអនុវត្តកម្មវិធីហិរញ្ញវត្ថុគាំទ្រការវិនិយោគ (ISF) របស់ CGCC។ ការចូលរួមរបស់ធនាគារ FTB នឹងធ្វើឱ្យការអនុវត្តកម្មវិធី ISF កាន់តែមានប្រសិទ្ធភាព ឆ្លើយតបនឹងតម្រូវការរបស់សហគ្រាសក្នុងវិស័យជលផលក្រោយប្រមូលផល ក្នុងការទទួលបានការគាំទ្រហិរញ្ញវត្ថុ និងកម្ចីមានការធានា​ ដែលចាំបាច់ ដើម្បីលើកកម្ពស់ភាពប្រកួតប្រជែង ផលិតភាព និងស្តង់ដារអាជីវកម្មរបស់សហគ្រាស ដែលមានសក្តានុពលក្នុងវិស័យជលផលក្រោយប្រមូលផលនៅកម្ពុជា។”

លោក ឌិត សុចល ប្រធាននាយកប្រតិបត្តិនៃធនាគារ FTB បានមានប្រសាសន៍ឲ្យដឹងថា ៖ “ស្ថាប័នយើងទាំងពីរ បានត្រៀមខ្លួនរួចជាស្រេចក្នុងការបង្កើន ពង្រីកកិច្ចសហការរួមគ្នា និងរំពឹងថា អាចជួយជំរុញនវានុវត្តន៍ បង្កើនប្រសិទ្ធភាព ប្រសិទ្ធផលប្រតិបត្តិការអាជីវកម្មដល់ក្រុមហ៊ុន ឬសហគ្រាស ដែលស្ថិតនៅក្នុងវិស័យជលផលក្រោយប្រមូលផល សម្រាប់អ្នកផ្គត់ផ្គង់ក្នុងស្រុក និងនាំចេញទៅកាន់ទីផ្សារអន្តរជាតិ។ កិច្ចព្រមព្រៀងនេះបានឆ្លុះបញ្ចាំងពីការចូលរួមដ៏សកម្ម និងការផ្សារភ្ជាប់ទំនាក់ទំនងដ៏ល្អរវាងធនាគារ FTB ជាមួយ CGCC ចាប់តាំងពីឆ្នាំ ២០២១ ជាមួយការរំពឹងទទួលបានជោគជ័យ និងការរក្សាកិច្ចសហប្រតិបត្តិការគ្រប់ជ្រុងជ្រោយរវាងស្ថាប័នទាំងពីរ។”

តាមរយៈកិច្ចព្រមព្រៀងលើគម្រោងធានាឥណទានសម្រាប់វិស័យជលផលក្រោយប្រមូលផលនេះ CGCC និងធនាគារ FTB ប្តេជ្ញាចូលរួមចំណែកគាំទ្រសហគ្រាសស្ថិតក្នុងខ្សែច្រវាក់តម្លៃជលផលក្រោយប្រមូលផល សំដៅបង្កើនផលិតភាព ការអនុវត្តសុវត្ថិភាពម្ហូបអាហារ លើកកម្ពស់គុណភាពផលិតផលជលផល ដើម្បីឈានចូលទីផ្សារថ្មីរួមទាំង ទីផ្សារអន្តរជាតិ កែលម្អប្រតិបត្តិការអាជីវកម្មឱ្យមានប្រសិទ្ធផល និរន្តរភាព និងបរិយាបន្ន។

សហគ្រាសជលផលក្រោយប្រមូលផលដែលមានចំណាប់អារម្មណ៍ សូមដាក់ពាក្យស្នើសុំកញ្ចប់ហិរញ្ញគាំទ្រការវិនិយោគ (ISF) ឥឡូវនេះ! ផ្អែកតាមថវិកាមានកំណត់ ដាក់ពាក្យស្នើសុំមុន មានឱកាសទទួលបានមុន។

សម្រាប់ព័ត៌មានបន្ថែមអំពីកម្មវិធីISF និងដំណើរការដាក់ពាក្យស្នើសុំ សូមចូលទៅកាន់៖ https://www.cgcc.com.kh/en/post-harvest-fishery-guarantee-scheme/

សារអេឡិចត្រូនិក៖ [email protected]

អំពីធនាគារ FTB៖ ក្នុងនាមជាធនាគារពាណិជ្ជក្នុងស្រុកទី១នៅកម្ពុជា ដែលទទួលបានការទុកចិត្តចាប់តាំងពីឆ្នាំ ១៩៧៩ ធនាគារ FTB បានដើរតួនាទីយ៉ាងសំខាន់ក្នុងការជួយលើកកម្ពស់ និងអភិវឌ្ឍទីផ្សារ និងសេដ្ឋកិច្ច និងសង្គមជាតិតាមរយៈការជំរុញ គាំទ្រ និងផ្តល់សេវាហិរញ្ញវត្ថុជាមូលដ្ឋានចាំបាច់ដល់អតិថិជន អាជីវករ និងពាណិជ្ជករក្នុងស្រុក។ គិតត្រឹមឆ្នាំ២០២៤ ទ្រព្យសកម្មសរុបរបស់ធនាគារបានកើនឡើងដល់ ២,២៨ ពាន់លានដុល្លារអាមេរិក ឥណទានសរុបចំនួន ១,៣៤ ពាន់លានដុល្លារ និងប្រាក់បញ្ញើសរុបជាង ១,៩៣ ពាន់លានដុល្លារ។ ធនាគារ FTB នឹងបន្តជួយគាំទ្រអតិថិជនឱ្យកាន់តែរីកចម្រើន និងមានវិបុលភាពបន្ថែមទៀត ក្រោមចង្ខុវិស័យរយៈពេលវែងរបស់ខ្លួន ដើម្បីក្លាយជាធនាគារពាណិជ្ជ ដែលទទួលបានការពេញចិត្តជាងគេនៅក្នុងព្រះរាជាណាចក្រកម្ពុជា។

អំពី CGCC៖ CGCC គឺជាសហគ្រាសសាធារណៈ ដែលត្រូវបានបង្កើតឡើងដោយអនុក្រឹត្យរបស់រាជរដ្ឋាភិបាលកម្ពុជា ក្នុងខែកញ្ញា ឆ្នាំ២០២០ ដែលស្ថិតក្រោមអាណាព្យាបាលបច្ចេកទេស និងហិរញ្ញវត្ថុរបស់ក្រសួងសេដ្ឋកិច្ច និងហិរញ្ញវត្ថុ។ CGCC មានបេសកកម្មចម្បងក្នុងការផ្តល់ការធានាឥណទាន ដើម្បីបង្កើនបរិយាបន្នហិរញ្ញវត្ថុ និងអភិវឌ្ឍសហគ្រាសធុនតូច និងមធ្យម។ គិតត្រឹមចុងខែកុម្ភៈ ឆ្នាំ២០២៥ CGCC បានអនុម័តការធានាឥណទានជូនដល់ ៣.៩៧៩ គណនី ក្នុងទំហំទឹកប្រាក់កម្ចីប្រហាក់ប្រហែល ២៧៤,១៤ លានដុល្លារ៕

 

CGCC គ្រឹះស្ថានហិរញ្ញវត្ថុចូលរួម និងគម្រោង CAPFISH-Capture គាំទ្រថវិកាដោយសហភាពអឺរ៉ុប រួមគ្នាជំរុញកំណើនការវិនិយោគក្នុងអនុវិស័យជលផលតាមរយៈកម្មវិធីហិរញ្ញវត្ថុគាំទ្រការវិនិយោគ (ISF)

Posted on by Sorn Chhorvyvatey

ទាញយកសេចក្តីប្រកាសព័ត៌មាន