គ្រឹះស្ថានហិរញ្ញវត្ថុ Archives

CGCC និងធនាគារប្រ៊ីដ ចុះកិច្ចព្រមព្រៀងលើការធានាឥណទាន ដើម្បីគាំទ្រដល់អាជីវកម្មឱ្យទទួលបានកម្ចីមានកាធានា

Posted on ខែកុម្ភៈ 7, 2024 by Sorn Chhorvyvatey

នៅថ្ងៃទី០៧ ខែកុម្ភៈ ឆ្នាំ២០២៤ សាជីវកម្មធានាឥណទានកម្ពុជា (CGCC) និងធនាគារប្រ៊ីដ បានប្រកាសកិច្ចសហការជាផ្លូវការ ដែលធ្វើឡើងនៅក្នុងពិធីចុះហត្ថលេខាលើកិច្ចព្រមព្រៀងធានាឥណទាន ដើម្បីសម្រួលដល់លទ្ធភាពទទួលបានកម្ចីចាំបាច់ សម្រាប់ការអភិវឌ្ឍអាជីវកម្មរបស់សហគ្រាសខ្នាតមីក្រូ តូចនិងមធ្យម (MSMEs) ក៏ដូចជាសហគ្រាសខ្នាតធំផងដែរ។

កិច្ចសហការរវាង CGCC ដែលជាសហគ្រាសសាធារណៈ ក្រោមអាណាព្យាបាលបច្ចេកទេស និងហិរញ្ញវត្ថុរបស់ក្រសួងសេដ្ឋកិច្ច និងហិរញ្ញវត្ថុ ជាមួយនឹងធនាគារប្រ៊ីដ ដែលជាធនាគារពាណិជ្ជមានការប្តេជ្ញាចិត្តខ្ពស់ក្នុងការគាំទ្រដល់ MSMEs ក្នុងស្រុកនេះ នឹងបង្កើនឱកាសដល់ធនាគារប្រ៊ីដ ឱ្យមានទំនុកចិត្តបញ្ចេញកម្ចីដែលមានការធានាពី CGCCដល់ក្រុមហ៊ុនអាជីវកម្មដែលមានសក្តានុពល ប៉ុន្តែខ្វះទ្រព្យធានាដើម្បីដាក់តម្កល់នៅពេលស្នើសុំកម្ចីពីធនាគារ។

លោក Wong Keet Loong អគ្គនាយក CGCC មានប្រសាសន៍ថា៖ “ភាពជាដៃគូជាមួយធនាគារប្រ៊ីដនេះ នឹងបើកផ្លូវថ្មីមួយទៀតដល់យើងក្នុងការគាំទ្រដល់ SMEs របស់ធនាគារក្នុងការទទួលបានកម្ចី នៅពេលដែលពួកគេប្រឈមនឹងបញ្ហាខ្វះទ្រព្យធានា។ គ្រឹះស្ថានហិរញ្ញវត្ថុចូលរួម (PFIs) របស់យើងនឹងវាយតម្លៃលើលទ្ធភាពរបស់ SMEs សម្រាប់កម្ចីមានការធានា ដោយសារតែ PFIs ដឹងពីតម្រូវការហិរញ្ញវត្ថុ និងលទ្ធភាពបង់សងរបស់អតិថិជនរបស់ពួកគេ។ ការធានាឥណទានរបស់ពួកយើងមានសារៈសំខាន់ក្នុងការធានានូវការបន្តផ្តល់នូវឥណទាន នៅក្នុងទីផ្សារ ដើម្បីគាំទ្រកំណើនសកម្មភាពសេដ្ឋកិច្ច”។

លោក Richard Liew នាយកប្រតិបត្តិ ធនាគារប្រ៊ីដ មានប្រសាសន៍ថា៖ “សហគ្រាសធុនតូច និងមធ្យម គឺជាឆ្អឹងខ្នងនៃសេដ្ឋកិច្ចកម្ពុជា ដែលរួមចំណែកយ៉ាងសំខាន់ដល់កំណើនទំហំផលិតផលក្នុងស្រុកសរុប ក៏ដូចជាការផ្តល់ឱកាសការងារដល់ប្រជាជនកម្ពុជាជាច្រើន។ ទោះជាយ៉ាងណាក៏ដោយអាជីវកម្មមួយចំនួនតែងតែជួបប្រទះបញ្ហាប្រឈមលើលទ្ធភាពទទួលបានសេវាឥណទាន (កម្ចី) ដើម្បីគាំទ្រដល់ការពង្រីកអាជីវកម្មរបស់ពួកគាត់។ ហើយដែលកិច្ចសហការវាងធនាគារប្រ៊ីដ និង CGCC នឹងចូលមក ចូលរួមចំណែកដោះស្រាយលើបញ្ហាមួយនេះ។ តាមរយៈកិច្ចព្រមព្រៀងនេះ យើងសង្ឃឹមថានឹងផ្តល់ឱ្យសហគ្រាសខ្នាតមីក្រូ តូច និងមធ្យម (MSMEs) នូវលទ្ធភាពទទួលបានកម្ចីសម្រាប់អាជីវកម្មកាន់តែងាយស្រួល តាមរយៈការធានាឥណទានរបស់ CGCC ដែលនឹងជួយកាត់បន្ថយហានិភ័យនៃការបាត់បង់របស់កម្ចី និងសម្រួលឱ្យធនាគារប្រ៊ីដអាចផ្តល់នូវភាពប្រកួតប្រជែងនៃកម្ចីកាន់តែខ្ពស់ជាងមុន ដែលនឹងបង្កើនដល់លទ្ធភាពទទួលបានកម្ចីសម្រាប់ MSMEs”។

តាមរយៈកិច្ចព្រមព្រៀងនេះ ធនាគារប្រ៊ីដ បានក្លាយជាគ្រឹះស្ថានហិរញ្ញវត្ថុចូលរួម (PFIs) មួយក្នុងចំណោម PFIs សរុប២៨ស្ថាប័ន របស់ CGCC ក្នុងការប្តេជ្ញាចិត្តគាំទ្រដល់អាជីវកម្មក្នុងស្រុក ស្របតាមទិសដៅរបស់រាជរដ្ឋាភិបាល ក្នុងការគាំទ្រដល់ MSMEs។ CGCC និងធនាគារប្រ៊ីដ ជឿជាក់ថា កិច្ចសហការនេះនឹងអាចចូលរួមជួយដោះស្រាយបញ្ហាគម្លាតហិរញ្ញវត្ថុរបស់ MSMEs ជាច្រើននៅក្នុងប្រទេសកម្ពុជា និងរួមចំណែកដល់កំណើន និងការអភិវឌ្ឍសេដ្ឋកិច្ចជាតិ។

អំពី CGCC

CGCC គឺជាសាជីវកម្មធានាឥណទានតែមួយគត់នៅកម្ពុជា ដែលត្រូវបានសម្រេចបង្កើតឡើង សម្តេចអគ្គមហាសេនាបតីតេជោ ហ៊ុន សែន ជាសហគ្រាសសាធារណៈ ដែលស្ថិតក្រោមអាណាព្យាបាលបច្ចេកទេស និងហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ។ បេសកកម្មចម្បងរបស់ CGCC គឺផ្តល់ការធានាឥណទានលើកម្ចីដែលផ្តល់ឱ្យអាជីវកម្ម ដើម្បីចែករំលែកហានិភ័យជាមួយស្ថាប័នផ្តល់កម្ចី និងបង្កើនបរិយាបន្នហិរញ្ញវត្ថុនៅក្នុងប្រទេស។

ព័ត៌មានបន្ថែមពី CGCC ៖ www.cgcc.com.kh

អំពីធនាគារប្រ៊ីដ

ធនាគារប្រ៊ីដ ជាធនាគារផ្តល់ជូនសេវាធនាគារជាច្រើនប្រភេទ ដូចជាសេវាឥណទានគេហដ្ឋាន ឥណទានរថយន្ត ឥណទានផ្ទាល់ខ្លួន និងឥណទានអាជីវកម្ម ក៏ដូចជា សេវាប្រាក់បញ្ញើ សេវាបើកប្រាក់បៀវត្សរ៍ និងសេវាផ្ទេរប្រាក់។ ធនាគារប្រ៊ីដ មានចក្ខុវិស័យ និងបេសកកម្ម ដើម្បីក្លាយជា សេវាហិរញ្ញវត្ថុដែលលោកអ្នកពេញចិត្តបំផុតក្នុងថ្ងៃនេះនិងថ្ងៃអនាគត ផ្តល់ជូនសេវាហិរញ្ញវត្ថុដែលលោកអ្នកជឿទុកចិត្តបានតាមរយៈស្តង់ដាសេវាកម្មសកល ធ្វើឱ្យការប្រើប្រាស់សេវាធនាគារមានភាពងាយស្រួលនឹងមានសុវត្ថិភាព។

ព័ត៌មានបន្ថែមពី ធនាគារប្រ៊ីដ៖ www.bridgebank.com.kh

ជំនួបសម្តែងការគួរសមរបស់ CGCC ជាមួយធនាគារកសិកន នៅប្រទេសថៃ

Posted on ខែធ្នូ 1, 2023ខែធ្នូ 20, 2023 by Sorn Chhorvyvatey

នៅថ្ងៃសុក្រ ទី០១ ខែធ្នូ ឆ្នាំ២០២៣ នៅទីក្រុងបាងកក ប្រទេសថៃ ឯកឧត្តមបណ្ឌិត ម៉ី វ៉ាន់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មាធិការគ្រប់គ្រងហានិភ័យរបស់សាជីវកម្មធានាឥណទានកម្ពុជា (CGCC) បានដឹកនាំគណៈប្រតិភូ CGCC ចូលជួបសម្តែងការគួរសម និងពិភាក្សាការងារជាមួយលោក Suwat Techawatanawana អគ្គនាយកប្រតិបត្តិរងធនាគារកសិកនប្រទេសថៃ នៅការិយាល័យរបស់ធនាគារកសិកនប្រទេសថៃ ដោយមានការចូលរួមពីថ្នាក់គ្រប់គ្រងរបស់ធនាគារកសិកនប្រទេសថៃ និងសាខាធនាគារកសិកន (ភ្នំពេញ) ដែលជាគ្រឹះស្ថានហិរញ្ញវត្ថុចូលរួមមួយរបស់ CGCC។

ជំនួបសម្តែងការគួរសមរបស់ CGCC ជាមួយធនាគារកសិកន នៅប្រទេសថៃ

ឯកឧត្តមបណ្ឌិតរដ្ឋលេខាធិការ បានសម្តែងក្តីសោមនស្ស ចំពោះការស្វាគមន៍ដ៏កក់ក្តៅរបស់លោកអគ្គនាយកប្រតិបត្តិរងរបស់ធនាគារកសិកនប្រទេសថៃ និងបានពិភាក្សាផ្លាស់ប្តូរទស្សនៈយោបល់ជុំវិញស្ថានភាពសេដ្ឋកិច្ចនៅក្នុងប្រទេសកម្ពុជា និងប្រទេសថៃ ព្រមទាំងកិច្ចសហប្រតិបត្តិការរវាង CGCC និង សាខាធនាគារកសិកន (ភ្នំពេញ) ដែលជាសាខារបស់ ធនាគារ កសិកន ផាប់ប្ល៊ីក ខមភេនី លីមីធីត ដែលទើបនឹងក្លាយជាគ្រឹះស្ថានហិរញ្ញវត្ថុចូលរួមមួយរបស់ CGCC នាពេលថ្មីៗនេះ។

ជាកិច្ចឆ្លើយតប លោកអគ្គនាយកប្រតិបត្តិរងរបស់ធនាគារកសិកនប្រទេសថៃ បានសម្តែងការត្រេកអរ និងថ្លែងអំណរគុណដល់វត្តមានរបស់គណៈប្រតិភូរបស់ CGCC និង បានចែករំលែកអំពីវឌ្ឍនភាពនៃធនាគារកសិកន រួមទាំង បទពិសោធន៍នៃការផ្តល់កម្ចី ដែលមានការធានាពីសាជីវកម្មធានាឥណទានថៃ នៅក្នុងប្រទេសថៃជាដើម។

ជំនួបសម្តែងការគួរសមនេះ ពិតជាឱកាសដ៏មានតម្លៃសម្រាប់ទាំង CGCC និងធនាគារកសិកន បានសិក្សាស្វែងយល់ពីស្ថានភាពនៃវិស័យសេដ្ឋកិច្ចរវាងប្រទេសទាំងពីរ និងជាពិសេស ដើម្បីពង្រឹងកិច្ចសហប្រតិបត្តិការនៃស្ថាប័នទាំងពីរ ក្នុងការគាំទ្រការអភិវឌ្ឍសហគ្រាសខ្នាតមីក្រូ តូច និងមធ្យម៕

CGCC និងសាខាធនាគារកសិកន ផាប់ប្ល៊ីក ខមភេនី លីមីធីត ចុះកិច្ចព្រមព្រៀងធានាឥណទាន គាំទ្រការទទួលបានកម្ចីដែលមានការធានា ដល់ SME នៅកម្ពុជា

Posted on ខែតុលា 3, 2023ខែតុលា 5, 2023 by Sorn Chhorvyvatey

(ភ្នំពេញ)៖ សាជីវកម្មធានាឥណទានកម្ពុជា (CGCC) និងសាខាធនាគារកសិកន ផាប់ប្ល៊ីក ខមភេនី លីមីធីត (ភ្នំពេញ) បានចុះហត្ថលេខាលើកិច្ចព្រមព្រៀងធានាឥណទាន។

ពិធីចុះហត្ថលេខាកាលពីថ្ងៃទី២៩ ខែកញ្ញា ឆ្នាំ២០២៣ ត្រូវបានប្រារព្ធឡើងជាផ្លូវការនៅការិយាល័យរបស់ CGCC ក្រោមវត្តមានរបស់លោក រស់ សីលវ៉ា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាភិបាល CGCC , លោក ឈើតកៀត អត្ថាករ ឯកអគ្គរាជទូតព្រះរាជាណាចក្រថៃ ប្រចាំនៅព្រះរាជាណាចក្រកម្ពុជា និង លោក Suwat Techawatanawana, អគ្គនាយកប្រតិបត្តិរងធនាគារកសិកនប្រទេសថៃ។

CGCC និងសាខាធនាគារកសិកន ផាប់ប្ល៊ីក ខមភេនី លីមីធីត ចុះកិច្ចព្រមព្រៀងធានាឥណទាន គាំទ្រការទទួលបានកម្ចីដែលមានការធានា ដល់ SME នៅកម្ពុជា

លោក Wong Keet Loong អគ្គនាយក CGCC បានមានប្រសាសន៍ថា «យើងមានកិត្តិយសខ្លាំងណាស់ ដែលបានចាប់ជាដៃគូជាមួយធនាគារឈានមុខគេ នៅក្នុងព្រះរាជាណាចក្រថៃ ក្នុងការផ្តល់ការធានាឥណទាន ដើម្បីគាំទ្រលទ្ធភាពទទួលបានហិរញ្ញប្បទាន សម្រាប់សហគ្រាសខ្នាតមីក្រូ តូច និងមធ្យម នៅកម្ពុជា។ សាខាធនាគារកសិកននៅទីនេះ នាំយកបទពិសោធន៍ពីប្រទេសថៃ ដែលវិស័យធនាគារនៅទីនោះមានការអភិវឌ្ឍខ្លាំង ក្នុងការផ្តល់កម្ចីដែលមានការធានា។ តាមរយៈបទពិសោធន៍ទាំងនេះ យើងសង្ឃឹមថាធនាគារកសិកន នៅកម្ពុជានឹងពង្រីកការផ្តល់ហិរញ្ញប្បទាន ដែលមានការធានា ជូនដល់ម្ចាស់អាជីវកម្ម នៅក្នុងប្រទេសកម្ពុជា»។

លោកក៏បានបន្តទៀតថា «កិច្ចសហការនេះក៏នឹងបើកឱកាសសម្រាប់ CGCC ដើម្បីស្វែងយល់បន្ថែមពីការធានាឥណទានឆ្លងព្រំដែន រវាងធុរកិច្ចក្នុងព្រះរាជាណាចក្រថៃ និងព្រះរាជាណាចក្រកម្ពុជា។ នៅចុងឆ្នាំនេះ យើងក៏មានគម្រោងសិក្សា និងសហការជាមួយសាជីវកម្មធានាឥណទានប្រទេសថៃ ដែលមានបទពិសោធន៍ជាង៣០ឆ្នាំផងដែរ»។

លោក រិទ្ធិវុទ្ធ វឌ្ឍនាឆៃ ប្រធានចាត់ការទូទៅនៃសាខាធនាគារកសិកន (ភ្នំពេញ) បានមានប្រសាសន៍ឱ្យដឹងដែរថា «ប្រទេសកម្ពុជាគឺជាចំណុចកណ្តាលនៃយុទ្ធសាស្ត្រ ការពង្រីកខ្លួនរបស់ធនាគារកសិកន ប្រចាំតំបន់ ។ គំនិតផ្តួចផ្តើមនេះ ស្របតាមផែនការអាជីវកម្មរបស់យើង សម្រាប់ប៉ុន្មានឆ្នាំខាងមុខ ដែលក្នុងនោះយើងមានគោលបំណង បង្កើនបទពិសោធន៍របស់យើង ក្នុងការគាំទ្រអាជីវកម្មខ្នាតតូច និងមធ្យមនៅក្នុងប្រទេសថៃ និងទាញយកគំរូស្រដៀងគ្នានេះ ដើម្បីបម្រើដល់សហគ្រាសធុនតូច និងមធ្យមនៅកម្ពុជា។ ភាពជាដៃគូជាមួយ CGCC នឹងក្លាយជាកត្តាជំរុញដ៏សំខាន់សម្រាប់យើងក្នុងការពង្រីកវិសាលភាពទៅកាន់សហគ្រិនឱ្យបានកាន់តែច្រើនជាងមុន ស្របពេលជាមួយការបង្កើន សមត្ថភាពសេវាកម្មរបស់យើងផងដែរ។ លើសពីនេះ ភាពជាដៃគូនេះបង្ហាញពីការប្តេជ្ញាចិត្តរបស់យើង ក្នុងការគាំទ្រចក្ខុវិស័យរបស់រាជរដ្ឋាភិបាល ក្នុងការអភិវឌ្ឍសហគ្រាសធុនតូច និងមធ្យម»។

CGCC ផ្តោតលើការបង្កើនបរិយាបន្នហិរញ្ញវត្ថុ និងអភិវឌ្ឍសហគ្រាសធុនតូច និងមធ្យម តាមរយៈបេសកកម្មចម្បងនៃការផ្តល់ការធានា លើកម្ចីអាជីវកម្មដែលផ្តល់ឱ្យតាមរយៈគ្រឹះស្ថានហិរញ្ញវត្ថុ ចូលរួម (PFIs) ដល់ MSMEs។

ស្របជាមួយគ្នានេះ សាខាធនាគារ កសិកន (ភ្នំពេញ) គឺជាសាខារបស់ ធនាគារ កសិកន ផាប់ប្ល៊ីក ខមភេនី លីមីធីត ដែលជាគ្រឹះស្ថានហិរញ្ញវត្ថុឈានមុខគេមួយ របស់ព្រះរាជាណាចក្រថៃ ដែលក៏មានគោលបំណងជួយគាំទ្រដល់អាជីវកម្មក្នុងស្រុករបស់កម្ពុជា តាមរយៈការផ្តល់សេវាហិរញ្ញវត្ថុ និងដំណោះស្រាយយ៉ាងទូលំទូលាយដល់ម្ចាស់អាជីវកម្ម និងក្រុមហ៊ុនផងដែរ។
ជាមួយនឹងវត្តមានដ៏រឹងមាំនៅក្នុងប្រទេសកម្ពុជា សាខារបស់ធនាគារ កសិកន (ភ្នំពេញ) ឥឡូវនេះបានក្លាយជាគ្រឹះស្ថានហិរញ្ញវត្ថុចូលរួម (PFIs) មួយក្នុងចំណោម PFIs សរុប២៧ស្ថាប័ន របស់ CGCC ក្នុងការប្តេជ្ញាចិត្តគាំទ្រដល់អាជីវកម្មក្នុងស្រុក ស្របតាមទិសដៅរបស់រាជរដ្ឋាភិបាល ក្នុងការគាំទ្រដល់ MSMEs។ CGCC និងសាខាធនាគារ កសិកន (ភ្នំពេញ) ជឿជាក់ថា កិច្ចសហការនេះនឹងជួយដោះស្រាយបញ្ហាហិរញ្ញវត្ថុរបស់ MSMEs ជាច្រើននៅក្នុងប្រទេសកម្ពុជា និងរួមចំណែកដល់កំណើន និងការអភិវឌ្ឍសេដ្ឋកិច្ចជាតិ។

អំពី CGCC

អំពីសាខាធនាគារកសិកន (ភ្នំពេញ)

សាខាធនាគារ កសិកន ផាប់ប្ល៊ីក ខមភេនី លីមីធីត (ភ្នំពេញ) ទទួលបានអាជ្ញាប័ណ្ណធនាគារពាណិជ្ជ ពីធនាគារជាតិនៃកម្ពុជា នៅខែវិច្ឆិកា ឆ្នាំ២០១៦ ជាមួយនឹងដើមទុនចុះបញ្ជីដំបូង៥០លានដុល្លារសហរដ្ឋអាមេរិក ហើយត្រូវបានបង្កើនដល់៨០លានដុល្លារសហរដ្ឋអាមេរិក គិតត្រឹមឆ្នាំ២០២៣នេះ។

ក្នុងនាមជាសមាហរណកម្មរបស់ធនាគារកសិកន សាខានៅកម្ពុជានេះមានគោលបំណងផ្តល់នូវផលិតផល និងសេវាកម្មហិរញ្ញវត្ថុដ៏ល្អបំផុត ដល់អាជីវកម្មទាំងក្នុងស្រុក និងបរទេសនៅក្នុងប្រទេសកម្ពុជា។ ដោយធនាគារកសិកមានវត្តមានសាខានៅក្នុងប្រទេសចិន ឥណ្ឌូនេស៊ី វៀតណាម ឡាវ និងថៃ សាខានៅកម្ពុជានេះ ក៏ផ្តោតលើការតភ្ជាប់អតិថិជនពីទូទាំងតំបន់ទាំងនោះផងដែរ៕

Credit to: Fresh News, Published on 02 October 2023

ការចុះអនុស្សរណៈនៃការយោគយល់គ្នា ដើម្បីបង្កើនលទ្ធភាពទទួលបាន កម្ចីដែលមានការធានាសម្រាប់ការអភិវឌ្ឍសហគ្រាសធុនតូច និងមធ្យម រវាង សាជីវកម្មធានាឥណទានកម្ពុជា សម្ព័ន្ធសមាគមសហគ្រាសធុនតូច និងមធ្យមកម្ពុជា និង ធនាគារវីង

Posted on ខែសីហា 23, 2023ខែតុលា 18, 2023 by Sorn Chhorvyvatey

នៅថ្ងៃទី២២ ខែសីហា ២០២៣ សាជីវកម្មធានាឥណទានកម្ពុជា (CGCC) សម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) និងធនាគារវីង បានចុះអនុស្សរណៈនៃការយោគយល់គ្នា លើភាពជាដៃគូយុទ្ធសាស្រ្ត ក្នុងគោលបំណងបង្កើនលទ្ធភាពទទួលបានកម្ចីដែលមានការធានា សម្រាប់ការអភិវឌ្ឍសហគ្រាសខ្នាតតូចនិងមធ្យម (SMEs) នៅកម្ពុជា។ កិច្ចសហប្រតិបត្តិការនេះ នឹងផ្តល់ការគាំទ្រដល់សមាជិកសមាជិកា FASMEC ក្នុងការទទួលហិរញ្ញប្បទាន ចាំបាច់ ឆ្លើយតបទៅនឹងបញ្ហាខ្វះទ្រព្យធានា តាមរយៈការធានាឥណទាន និង ជាពិសេសចូលរួមលើកស្ទួយចំណេះដឹងហិរញ្ញវត្ថុ ជូនដល់សមាជិកសមាជិការបស់ FASMEC នៅទូទាំងប្រទេស។

ការចុះអនុស្សរណៈនៃការយោគយល់គ្នា ដើម្បីបង្កើនលទ្ធភាពទទួលបាន កម្ចីដែលមានការធានាសម្រាប់ការអភិវឌ្ឍសហគ្រាសធុនតូច និងមធ្យម រវាង សាជីវកម្មធានាឥណទានកម្ពុជា សម្ព័ន្ធសមាគមសហគ្រាសធុនតូច និងមធ្យមកម្ពុជា និង ធនាគារវីង

ពិធីចុះអនុស្សរណៈនៃការយោគយល់គ្នានេះ ត្រូវបានប្រារព្ធឡើងនៅការិយាល័យកណ្ដាលធនាគារវីង នឹងត្រូវបានការអញ្ជើញចូលរួមចុះហត្ថលេខាដោយ លោក Wong Keet Loong អគ្គនាយក CGCC លោកឧកញ៉ា តែ តាំងប៉ ប្រធានក្រុមប្រឹក្សាភិបាល FASMEC និងលោក Han Peng Kwang នាយកប្រតិបត្តិរបស់ធនាគារ វីង។

លោក Wong Keet Loong អគ្គនាយក CGCC មានប្រសាសន៍ថា “យើងខ្ញុំមានសេចក្តីសោមនស្សរីករាយក្នុងការចាប់ដៃគូតាមរយៈអនុស្សរណៈនៃការយោគយល់គ្នាជាមួយធនាគារ វីង និង FASMEC ក្នុងឆ្នាំនេះ ដើម្បីបង្កើនការគាំទ្រដល់សមាជិករបស់ FASMEC ឱ្យទទួលបានកម្ចីដែលមានការធានាពី CGCC តាមរយៈធនាគារ វីង ឱ្យកាន់តែទូលំទូលាយជាងមុន។ យើងខ្ញុំជឿជាក់ថា តាមរយៈកិច្ចសហប្រតិបត្តិការនេះ នឹងអាចឲ្យ CGCC ជួយដល់ SMEs ជាច្រើនទៀតក្នុងអំឡុងពេលនៃកម្មវិធីផ្សព្វផ្សាយនានារបស់យើងខ្ញុំ ជាពិសេស ការរៀបចំសិក្ខាសាលាផ្សព្វផ្សាយស្តីពី ការអភិវឌ្ឍន៍សហគ្រាសខ្នាតតូច និងមធ្យម (SMEs) នៅទូទាំងខេត្ត-ក្រុង ដែលជាផ្នែកមួយនៃគោលដៅរយៈពេលវែងរបស់ CGCC ដើម្បីជំរុញការអភិវឌ្ឍរបស់ SMEs”។

ឧកញ៉ា តែ តាំងប៉ ប្រធាន FASMEC មានប្រសាសន៍ឱ្យដឹងថា “យើងពិតជាជាសប្បាយរីករាយក្នុងការចាប់ដៃគូជាមួយនិងធនាគារវីង និង សាជីវកម្មធានាឥណទានកម្ពុជា CGCC ព្រោះវាជាការផ្តល់ឱកាស ដល់សហគ្រាសធុនតូចនិងមធ្យមដែលជាសមាជិកសមាជិការរបស់ FASMEC ដែលកំពុងតែមានបញ្ហាប្រឈមកង្វះទ្រព្យធានា អាចទទួលបាននូវហិរញ្ញវត្ថុសម្រាប់ពង្រីកអាជីវកម្មរបស់ពួកគេ ឲ្យបានកាន់តែរីកចម្រើន”។

លោក Han Peng Kwang នាយកប្រតិបត្តិរបស់ធនាគារ វីង បានថ្លែងថា“តាមរយៈដំណោះស្រាយហិរញ្ញវត្ថុប្រកបដោយភាពច្នៃប្រឌិត ក៏ដូចជាភាពជាដៃគូសហការជាមួយ CGCC និង FASMEC យើងខ្ញុំមានការតាំងចិត្តជួយសម្រួលទៅដល់ SMEs ដើម្បីអាចទទួលបានហិរញ្ញវត្ថុកាន់តែប្រសើរជាងមុន។” លោក ហាន ប៉េងក្វាង បានបន្តថា៖ “តាមរយៈការផ្តល់សេវាធនាគារដែលមានភាពបត់បែន និងការគាំទ្រផ្នែកឥណទានដ៏ល្អប្រសើរ យើងនឹងអាចជួយទៅដល់ SMEs ក្នុងការចាប់យកាលានុវត្តភាពរីកលូតលាស់ នវានុវត្តន៍ភាព និងរួមចំណែកដល់វិបុលទាំងមូលនៅក្នុងប្រទេសកម្ពុជា”។

ភាពជាដៃគូរវាង CGCC, FASMEC, និងធនាគារវីង នេះបង្ហាញពីការប្តេជ្ញាចិត្តរួមគ្នាក្នុងការលើកកម្ពស់ការអភិវឌ្ឍកំណើនសេដ្ឋកិច្ចនៅកម្ពុជា។ តាមរយៈស្មារតីរួមគ្នានេះ ស្ថាប័នទាំងបីនឹងរួមគ្នាសម្រួលដល់ក្រុមហ៊ុន/អាជីវកម្ម ដោយដោះស្រាយនូវបញ្ហាប្រឈមផ្នែកហិរញ្ញប្បទាន និងចំណេះដឹងហិរញ្ញវត្ថុ ដើម្បីជំរុញកំណើនសេដ្ឋកិច្ចក្នុងប្រទេស។

អំពី CGCC

CGCC គឺជាក្រុមហ៊ុនធានាឥណទានមុនដំបូងគេបង្អស់នៅកម្ពុជា ដែលត្រូវបានសម្រេចបង្កើតឡើងដោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាសហគ្រាសសាធារណៈ ក្រោមអាណាព្យាបាលបច្ចេកទេស និងហិរញ្ញវត្ថុ របស់ក្រសួងសេដ្ឋកិច្ច និងហិរញ្ញវត្ថុ។ បេសកកម្មចម្បងរបស់ CGCC គឺផ្តល់ការធានាឥណទានលើកម្ចី ដែលផ្តល់ឱ្យអាជីវកម្ម ដើម្បីចែករំលែកហានិភ័យជាមួយស្ថាប័នផ្តល់កម្ចី និងបង្កើនបរិយាបន្នហិរញ្ញវត្ថុ។ ព័ត៌មានបន្ថែមសូមចូលទៅ៖ www.cgcc.com.kh

អំពី FASMEC

FASMEC គឺជាសម្ព័ន្ធដែលចងក្រងឡើង ដោយបណ្តុំសមាគម និង សហគ្រាសធុនតូច មធ្យមនៅកម្ពុជា ដែល បានបង្កើតឡើង និងចុះបញ្ជីអនុញ្ញាតពីក្រសួងមហាផ្ទៃ ឆ្នាំ២០១០។ ទស្សនវិស័យរបស់ FASMEC គឺផ្សារភ្ជាប់ទំនាក់ទំនងរវាងសហគ្រាសធុនតូចនិងមធ្យមនៅកម្ពុជាទៅទីផ្សារក្នុងស្រុកនិងអន្តរជាតិ។ បេសកម្មចម្បងរបស់ FASMEC គឺធ្វើឱ្យសហគ្រាសធុនតូចនិងមធ្យមនៅកម្ពុជាមានការប្រមូលផ្តុំគ្នា និងសហការគ្នា ដើម្បីឱ្យគុណភាពផលិតផលប្រទេសកម្ពុជាមានការទទួលស្គាល់ជាលក្ខណអន្តរជាតិ។ គោលបំណងជួយសម្របសម្រួលបរិយាកាសពាណិជ្ជកម្ម បង្កើតវគ្គបណ្តុះបណ្តាល បង្កើនផលិតភាព ការច្នៃប្រឌិត និងការប្រកួតប្រជែង ដោះស្រាយបញ្ហាប្រឈមរបស់សហគ្រាសធុនតូចនិងមធ្យម។

អំពីធនាគារ Wing

ធនាគារ វីង (ខេមបូឌា) ម.ក ជាធនាគារសម្រាប់ប្រជាជនកម្ពុជាគ្រប់រូប ត្រូវបានជំរុញដោយចក្ខុវិស័យដើម្បីផ្តល់ឲ្យប្រជាជនកម្ពុជាគ្រប់រូបនូវភាពងាយស្រួលក្នុងការទទួលបានសេវាកម្មហិរញ្ញវត្ថុដែលចាំបាច់ និងធ្វើឲ្យប្រសើរឡើងនូវការរស់នៅប្រចាំថ្ងៃរបស់ពួកគេចាប់តាំងពីឆ្នាំ ២០០៨ មកម្ល៉េះ។ សព្វថ្ងៃនេះ ធនាគារវីងបម្រើប្រជាជនកម្ពុជាទាំងមូល ដោយគ្របដណ្តប់១០០% នៃស្រុកនានាក្នុងប្រទេសកម្ពុជា តាមរយៈកម្មវិធីស្មាតហ្វូនវីងប្រកបដោយភាពច្នៃប្រឌិតថ្មីៗ ភ្នាក់ងារវីងដែលមានជាង ១១.០០០ កន្លែង ដៃគូអាជីវកម្មដែលមានជាង ១៥០.០០០ និងការសហការជាមួយក្រុមហ៊ុនហិរញ្ញវត្ថុធំៗជាច្រើនដូចជា៖ Mastercard, MoneyGram, AliPay, WeChat Pay, Western Union, Visa, និង Ria ជាដើម ។ ធនាគារវីងផ្តល់ជូននូវផលិតផល និងសេវាកម្មហិរញ្ញវត្ថុនាំមុខគេជាច្រើន សម្រាប់អតិថិជនជារូបវន្តបុគ្គល និងសាជីវកម្មនានា។ ផលិតផលទាំងនេះរួមមាន៖ សេវាប្រាក់កម្ចី សេវាប្រាក់បញ្ញើ សេវាសន្សំខ្នាតតូច សេវាណែនាំឥណទាន សេវាផ្ទេរប្រាក់ ការទូទាត់ថ្លៃទឹកភ្លើង និងធានារ៉ាប់រង ព្រមទាំងការបញ្ចូលទឹកប្រាក់តាមទូរស័ព្ទ។ ធនាគារវីងប្តេជ្ញាផ្តល់នូវបរិយាបន្នហិរញ្ញវត្ថុ យេនឌ័រ និងឌីជីថលដល់អ្នកមិនមានគណនីធនាគារ និងមិនស្ថិតក្នុងបណ្តាញធនាគារដែលអនុញ្ញាតឱ្យប្រជាជនកម្ពុជាគ្រប់រូបទទួលបាននូវភាពងាយស្រួលនិងសុវត្ថិភាពនៅពេលទទួលបានសេវាកម្មហិរញ្ញវត្ថុ៕

ធនាគារ ព្រីនស៍ សហការជាមួយ សាជីវកម្មធានាឥណទានកម្ពុជា លើគម្រោងធានាឥណទានជាកញ្ចប់សម្រាប់សហគ្រិនស្ត្រី

Posted on ខែកក្កដា 18, 2023ខែកក្កដា 25, 2023 by Sorn Chhorvyvatey

ធនាគារ ព្រីនស៍ ម.ក និងសាជីវកម្មធានាឥណទានកម្ពុជា (CGCC) នៅថ្ងៃទី ១៣ ខែកក្កដា បានចុះកិច្ចសហការគ្នាលើគម្រោងធានាឥណទានជាកញ្ចប់សម្រាប់សហគ្រិនស្ត្រី ដែលធនាគារ ព្រីនស៍ នឹងដើរតួជាស្ថាប័នផ្តល់ឥណទាន ដើម្បីផ្តល់ប្រាក់កម្ចីដល់សហគ្រាសដែលគ្រប់គ្រងដោយស្ត្រី ដោយមាន CGCC ជាសហគ្រាសសាធារណៈ ដែលផ្តល់ការធានាលើកម្ចីអាជីវកម្ម។

កិច្ចព្រមព្រៀងគម្រោងធានាឥណទានជាកញ្ចប់សម្រាប់សហគ្រិនស្រ្តីនេះ ត្រូវបានចុះហត្ថលេខារវាង លោក ហ៊ន់ សុរចនា អភិបាលគ្រប់គ្រង និងប្រធាននាយកប្រតិបត្តិនៃធនាគារ ព្រីនស៍ ម.ក និងលោក Wong Keet Loong អគ្គនាយកនៃសាជីវកម្មធានាឥណទានកម្ពុជា (CGCC) ដោយមានការចូលរួមជាសក្ខីភាពពីសំណាក់ លោកជំទាវ ឧកញ៉ា កែវ មុំ ប្រធានសមាគមសហគ្រិនស្ត្រីកម្ពុជា (CWEA) និងសមាជិកក្រុមប្រឹក្សាភិបាលចំនួនប្រាំរូបនៃសមាគមសហគ្រិនស្ត្រីកម្ពុជា ព្រមទាំងថ្នាក់ដឹកនាំជាន់ខ្ពស់នៃធនាគារ ព្រីនស៍ និងសាជីវកម្មធានាឥណទានកម្ពុជា។

ធនាគារ ព្រីនស៍ សហការជាមួយ សាជីវកម្មធានាឥណទានកម្ពុជា លើគម្រោងធានាឥណទានជាកញ្ចប់សម្រាប់សហគ្រិនស្ត្រី

នៅឆ្នាំ២០២១ ធនាគារ ព្រីនស៍ ជាក្លាយជាគ្រឹះស្ថានហិរញ្ញវត្ថុចូលរួមមួយរបស់ CGCC ដែលចូលរួមដោះស្រាយបញ្ហាប្រឈមនៃកង្វះទ្រព្យធានា សម្រាប់ប្រាក់កម្ចី របស់សហគ្រាសខ្នាតមីក្រូ តូច និងមធ្យម (MSMEs) ក្នុងអំឡុងពេលប្រតិបត្តិការអាជីវកម្មជួបជាមួយបញ្ហាប្រឈមបណ្តាលមកពី ជំងឺរាតត្បាតកូវីដ១៩។

នៅឆ្នាំនេះ ជាថ្មីម្តងទៀត យើងនៅតែខ្នះខ្នែងក្នុងការបន្តការគាំទ្ររបស់យើងចំពោះការស្តារឡើងវិញនៃសេដ្ឋកិច្ចក្នុងស្រុក តាមរយៈគម្រោងធានាឥណទានជាកញ្ចប់សម្រាប់សហគ្រិនស្ត្រី របស់ CGCC និងធនាគារព្រីសន៍ ដែលនឹងផ្តល់ប្រាក់កម្ចីដែលមានការធានាជាពិសេសដល់សហគ្រិនស្ត្រី ឬMSMEs ដែលគ្រប់គ្រងដោយស្ត្រី ដែលមានការលំបាកក្នុងការគ្រប់គ្រងលំហូរសាច់ប្រាក់ និងមានតម្រូវការទុនបន្ថែមដើម្បីពង្រីក ឬវិនិយោគ ឬទ្រទ្រង់អាជីវកម្មរបស់ពួកគេ។ នៅក្រោមគម្រោងនេះ CGCC នឹងផ្តល់ការធានាឥណទានរហូតដល់ ៨០% នៃទំហំឥណទាន ជាមួយនឹងអត្រាការប្រាក់ដ៏គួរឱ្យទាក់ទាញ និងរយៈពេលឥណទានរហូតដល់ ៦ឆ្នាំ ពីធនាគារ ព្រីនស៍។

លោក ហ៊ន់ សុរចនា អភិបាលគ្រប់គ្រង និងប្រធាននាយកប្រតិបត្តិនៃធនាគារ ព្រីនស៍ ម.ក បានថ្លែងថា “យើងមានកិត្តិយស និងសេចក្តីសោមនស្សរីករាយ ដែលបានចូលរួមជាមួយ CGCC ក្នុងការជំរុញសេដ្ឋកិច្ចក្នុងស្រុក ដោយ គាំទ្រដល់មីក្រូសហគ្រាស សហគ្រាសខ្នាតតូច និងមធ្យម ជាពិសេសសហគ្រាសដែលគ្រប់គ្រងដោយស្ត្រី។ ស្ត្រី គឺជាមូលដ្ឋានគ្រឹះដ៏រឹងមាំ សម្រាប់គ្រួសារ និងសហគមន៍ទាំងមូល។ ស្ត្រី គឺជាមូលដ្ឋានគ្រឹះមួយដ៏រឹងមាំ សម្រាប់គ្រួសារ និងសហគមន៍។ ការចូលរួម និងការរួមចំណែករបស់ស្រ្តីម្នាក់ៗ មានសារៈសំខាន់ណាស់នៅក្នុងវិស័យពាណិជ្ជកម្ម និងសេដ្ឋកិច្ចទាំងមូល ហើយសមត្ថភាព និងការតាំងចិត្តដ៏មុតមាំរបស់ពួកគាត់គួរទទួលបានការកោតសរសើរ និងការគោរព ព្រមទាំងគួរទទួលបានការគាំទ្រ និងការលើកទឹកចិត្តយ៉ាងពេញទំហឹង សម្រាប់ការបន្តអភិវឌ្ឍឆ្ពោះទៅរកភាពជោគជ័យ។ នៅក្រោមគម្រោងធានាឥណទានជាកញ្ចប់ សម្រាប់សហគ្រិនស្រ្តីនេះ យើងមានគោលបំណងផ្តល់នូវលំហូរសាច់ប្រាក់ដែលមានភាពងាយស្រួល និងកាន់តែប្រសើរ ជាមួយនឹងលក្ខខណ្ឌពិសេសដល់មីក្រូសហគ្រាស សហគ្រាសខ្នាតតូច និងមធ្យមដែលគ្រប់គ្រងដោយស្ត្រី ដើម្បីផ្តល់នូវការគាំទ្របន្ថែម លើការទទួលបានដើមទុន សម្រាប់ការវិនិយោគ និងការទ្រទ្រង់និរន្តរភាពអាជីវកម្មរបស់ពួកគាត់។ វាតែងតែជាអាទិភាពចម្បងរបស់ធនាគារ ក្នុងការគាំទ្រដល់បុគ្គល និងអាជីវកម្មកម្ពុជាលើតម្រូវការហិរញ្ញវត្ថុរបស់ពួកគេ។ យើងកំពុងបន្តខិតខំប្រឹងប្រែងកាន់តែខ្លាំងក្នុងការលើកកម្ពស់ផលិតផល និងសេវាកម្មរបស់យើង ឲ្យកាន់តែមានភាពងាយស្រួលសម្រាប់ប្រជាជនកម្ពុជាក្នុងការប្រើប្រាស់។”

លោក Wong Keet Loong អគ្គនាយកនៃCGCC បានមានប្រសាសន៍ឱ្យដឹងថា “គម្រោងធានាឥណទានជាកញ្ចប់ ជាមួយធនាគារព្រីនស៍នេះ បានបង្កើតឡើងជាពិសេស សម្រាប់គាំទ្រដល់សហគ្រិនស្រ្តី តាមរយៈកម្ចីដែលមានការធានា។ យើងសង្ឃឹមថា ជាមួយនឹងបណ្តាញដ៏រឹងមាំរបស់ធនាគារព្រីនស៍ យើងនឹងអាចបង្កើនការធានាឥណទានទៅកាន់អាជីវកម្មដែលគ្រប់គ្រងដោយស្រ្តីជាច្រើនទៀត។ មកដល់បច្ចុបន្ននេះ CGCC បានផ្តល់ការធានាប្រមាណ ៤០% នៃទំហំកម្ចីសរុបដែលមានការធានាប្រមាណ ១៣០លានដុល្លារ ដែលស្មើនឹង៥០លានដុល្លារទៅកាន់សហគ្រិនស្រ្តីខ្នាតមីក្រូ តូច និងមធ្យម (MSMEs)”។ លោកអគ្គនាយកក៏បានបន្ថែមទៀតថា “គម្រោងធានាឥណទានជាកញ្ចប់សម្រាប់សហគ្រិនស្រ្តីនេះ ក៏បានផ្តល់នូវលក្ខខណ្ឌអនុគ្រោះជាមួយនឹងអត្រាការប្រាក់ និងកម្រៃធានាឥណទានដែលទាបជាងមុន សម្រាប់ឆ្នាំដំបូង ដែលនឹងសម្រួលដល់សហគ្រិនស្រ្តី MSMEs អាចមានលទ្ធភាពទទួលបាននូវហិរញ្ញប្បទានដែលមានតម្លៃទាបជាងមុន។”

គម្រោងធានាឥណទានជាកញ្ចប់សម្រាប់សហគ្រិនស្ត្រី (PGS) មានសុពលភាពចាប់ពីថ្ងៃទី០១ ខែសីហា ឆ្នាំ២០២៣ នេះតទៅ។ ធនាគារ ព្រីនស៍ អាចផ្តល់ប្រាក់កម្ចីដែលមានការធានាដល់សហគ្រិនស្ត្រីដោយមិនចាំបាច់ទទួលបានការអនុម័តការធានាពីCGCC លើប្រាក់កម្ចីនីមួយៗមុនពេលផ្តល់ប្រាក់កម្ចីនោះឡើយ។ សូមទៅកាន់សាខាធនាគារ ព្រីនស៍ដែលនៅជិតបំផុតនៅថ្ងៃនេះ ដើម្បីដាក់ពាក្យស្នើឥណទានក្រោមគម្រោងធានាឥណទានជាកញ្ចប់សម្រាប់សហគ្រិនស្ត្រី (PGS) ឬទំនាក់ទំនងលេខ 1800 20 8888 (ឥតគិតថ្លៃ) សម្រាប់ព័ត៌មានបន្ថែម៕

Credit to: ខេមបូណូមីស, ១៤ កក្កដា ២០២៣, Fresh News, កោះសន្តិភាព, SWIFT NEWS

ធនាគារ មេយប៊ែង សាជីវកម្មធានាឥណទានកម្ពុជា BNI Super និងសមាគមសហគ្រិនស្ត្រី កម្ពុជា ចុះ MoU ដើម្បីលើកស្ទួយការកសាងសមត្ថភាព និងជំនាញរបស់ SME

Posted on ខែមិថុនា 12, 2023ខែមិថុនា 13, 2023 by Sorn Chhorvyvatey

រាជធានីភ្នំពេញ ៖ នាថ្ងៃទី ១០ ខែមិថុនា ឆ្នាំ ២០២៣ ធនាគារ មេយប៊ែង (ខេមបូឌា) ភីអិលស៊ី (ធនាគារ មេយប៊ែង) និងសាជីវកម្មធានាឥណទានកម្ពុជា (CGCC) បានចូលរួមជាដៃគូសហ ការយុទ្ធសាស្ត្រជាមួយ BNI Super និងសមាគមសហគ្រិនស្ត្រីកម្ពុជា (CWEA) ក្នុងគោលបំ ណងរួមគ្នាគាំទ្រដល់សហគ្រាសធុនតូច និងមធ្យមនៅក្នុងព្រះរាជាណាចក្រកម្ពុជា តាមរយៈ កម្មវិធី «កសាងសមត្ថភាព និងជំនាញសម្រាប់សហគ្រាសធុនតូច និងមធ្យម» ។

ក្រោមការចុះអនុស្សរណៈនៃការយោគយល់គ្នានេះ ធនាគារ មេយប៊េង សាជីវកម្មធានា ឥណទានកម្ពុជា BNI Super និងសមាគមសហគ្រិនស្ត្រីកម្ពុជា នឹងសហការគ្នាដើម្បីផ្តល់នូវវគ្គ បណ្តុះបណ្តាលតាមរយៈសិក្ខាសាលាទៅដល់សមាជិកនៃស្ថាប័នខាងលើ ក៏ដូចជាម្ចាស់សហ គ្រាសធុនតូច និងមធ្យមផ្សេងទៀតដែលបានចូលរួម ដើម្បីជួយក្នុងការពង្រីកអាជីវកម្មរបស់ ពួកគេ ។ វគ្គបណ្តុះបណ្តាលនេះ នឹងផ្តោតទៅលើប្រធានបទជាច្រើនដែលទាក់ទងទៅនឹង ចំណេះដឹងផ្នែកហិរញ្ញវត្ថុ និងប្រតិបត្តិការអាជីវកម្ម ។

ការចុះអនុស្សរណៈយោគយល់នេះ ក៏នឹងត្រួសត្រាយផ្លូវដល់ការពង្រីកបណ្តាញទំនាក់ ទំនង ក៏ដូចជាការអភិវឌ្ឍរយៈពេលយូរអង្វែងផ្នែកមុខជំនួញដល់សហគ្រាសធុនតូច និងមធ្យម ដែលបានចូលរួមក្នុងការបណ្តុះបណ្តាលនេះតាមរយៈវេទិកាប្រាស្រ័យទាក់ទងគ្នា និង ការចែករំលែកចំណេះដឹងទាំងផ្នែកទ្រឹស្តី និងបច្ចេកទេសនានា ។ ពិសេសលើសនេះទៅទៀត អ្នកចូលរួមក៏នឹងទទួលបានការលើកទឹកចិត្តពីធនាគារ មេយប៊េង ខេមបូឌា តាមរយៈការផ្តល់ ជូននូវអត្រាពិសេសដល់ពួកគេផងដែរ ។

ការចុះអនុស្សរណៈនៃការយោគយល់គ្នាប្រារព្ធឡើងនៅ អគារ ធនាគារ មេយប៊េង ថៅវើ ក្រោមការចូលរួមពីសំណាក់ ៖ លោក រ័ត្ន សោភ័ណ នាយកប្រតិបត្តិ និងនាយកប្រចាំប្រទេស របស់ ធនាគារ មេយប៊ែង ខេមបូឌា ភីអ៊ិលស៊ី, លោក Wong Keet Loong អគ្គនាយក សាជីវកម្មធានាឥណទានកម្ពុជា, លោក គ្រុយ រិទ្ធី ប្រធាន របស់ BNI Super និងលោកជំទាវ ជា រដ្ឋា អនុប្រធានសមាគមសហគ្រិនស្ត្រីកម្ពុជា។

លោក រ័ត្ន សោភ័ណ នាយកប្រតិបត្តិរបស់ធនាគារ មេយប៊ែង បានលើកឡើងថា «ការចុះអនុស្សរណៈនៃការយោគយល់គ្នា និងកម្មវិធីកសាងសមត្ថភាព និងជំនាញនេះជាការ បង្ហាញនូវការប្តេជ្ញាចិត្តរបស់ធនាគារ មេយប៊ែង ក្នុងការបន្តគាំទ្រដល់ការរីកចម្រើនរបស់ សហគ្រិនធនតូច និងមធ្យមនៅក្នុងប្រទេសកម្ពុជា ។ យើងជឿជាក់ថា ការផ្តល់ជាវេទិកាក្នុង វគ្គបណ្តុះបណ្តាលនេះ ដែលក៏ជាផ្នែកមួយនៃការផ្តល់ចំណេះដឹងផ្នែកហិរញ្ញវត្ថុ យើងបាននឹង កំពុងផ្តល់នូវឧបករណ៍ដ៏ត្រឹមត្រូវដើម្បីចីរភាពនៃមុខជំនួញរបស់ពួកគាត់ ដែលក៏ជាកិច្ចរួម ចំណែកដល់ការអភិវឌ្ឍន៍សេដ្ឋកិច្ចជារួមរបស់ប្រទេសកម្ពុជាផងដែរ» ។

«ឆ្នាំទៅមិញ កម្មវិធីកសាងសមត្ថភាព និងជំនាញនេះទទួលបានជោគជ័យគួរជាទីកត់ សម្គាល់ ។ ឆ្នាំនេះយើងចង់បន្តបំពេញនូវកិច្ចសន្យារបស់យើងក្នុងការផ្តល់សេវាហិរញ្ញវត្ថុ ប្រកបដោយអរិយ្យភាពដោយបង្កើននូវកម្រិតនៃការគាំទ្ររបស់យើងថែមមួយកម្រិតទៀត តាមរយៈការបន្តគាំទ្រ និងពង្រីកដៃគូសហការសរុបចំនួនបីដែលរួមមាន CGCC CWEA និង BNI Super» លោកបានបន្ថែម ។

លោក Wong Keet Loong អគ្គនាយក សាជីវកម្មធានាឥណទានកម្ពុជា មានប្រសា សន៍ថា «យើងមានសេចក្តីសោមនស្សរីករាយក្នុងការចាប់ដៃគូជាមួយធនាគារ មេយប៊ែងក្នុង ឆ្នាំនេះម្តងទៀតសម្រាប់កម្មវិធី BCC និងពិសេសក្នុងការបង្កើនកិច្ចសហប្រតិបត្តិការជាមួយ BNI និងសមាគមសហគ្រិនស្ត្រីកម្ពុជា ដើម្បីពង្រីកវិសាលភាពនៃ កម្មវិធីដ៏សំខាន់នេះ ។ យើង ជឿជាក់ថា កម្មវិធី BCC នឹងផ្តល់ជាធនធានដ៏សំខាន់ដល់សហគ្រាសធុនតូច និងមធ្យមនៅ កម្ពុជា និងជាជំនួយដល់សហគ្រិនរបស់យើងឱ្យកាន់តែរីកចម្រើន និងទទួលបានជោគជ័យ ជាមួយនឹងនឹងឱកាសដ៏ទូលំទូលាយក្នុងការទទួលបានហិរញ្ញប្បទាន និងបង្កើនចំណេះដឹង ហិរញ្ញវត្ថុ ដែលស្របជាមួយនឹងទិសដៅរបស់ CGCC» ។

លោកជំទាវ ជា រដ្ឋា អនុប្រធាននៃសមាគមសហគ្រិនស្ត្រីកម្ពុជា CWEA ក៏បានគាំទ្រ ផងដែរថា «យើងខ្ញុំមានសេចក្តីសោមនស្សរីករាយជាខ្លាំងដែលបានចូលរួមក្នុងគំនិតផ្តួចផ្តើម នេះ ដោយកម្មវិធីនេះស្របទៅតាមបេសកកម្មរបស់ CWEA ក្នុងការជួយជម្រុញវិស័យ សហគ្រិនភាពដល់ស្ត្រីកម្ពុជា តាមរយៈការបង្កើនជំនាញ និងបណ្តាញទំនាក់ទំនង ។ នាងខ្ញុំ សូមលើកទឹកចិត្តដល់សមាជិក CWEA និងសហគ្រិនស្ត្រីទាំងអស់ឱ្យចាប់យកឱកាសនេះ ដើម្បីជាប្រយោជន៍ក្នុងការយល់ដឹងបន្ថែម និងពង្រីកវិសាលភាពផ្ទាល់ខ្លួន» ។

លោក គ្រុយ ឬទ្ធី នៃ BNI Super ក៏បានបង្ហាញពីការគាំទ្ររបស់លោកមកកាន់វគ្គ បណ្តុះបណ្តាលនេះដែរ ។ លោកបានថ្លែងថា «យើងមានទំនុកចិត្តថា ការក្លាយជាដៃគូរសហ ការនេះនឹងផ្តល់ផលប្រយោជន៍ទៅវិញទៅមកដល់សមាជិករបស់ BNI ក៏ដូចជាសហគ្រិនដទៃ ព្រោះវាបានអនុញ្ញាតឱ្យសមាជិករបស់យើង ពង្រីកនូវបណ្តាញទំនាក់ទំនងរបស់ពួកគេ អភិវឌ្ឍជំនាញថ្មីៗ និងជំរុញដល់ការបើកទំព័រអាជីវកម្មរបស់ពួកគេជាដើម» ។

នៅក្នុងឆ្នាំ ២០២២ កម្មវិធី កសាងសមត្ថភាព និងជំនាញ បានបណ្តុះបណ្តាលសហ គ្រាសធុនតូច និងមធ្យម និងទីប្រឹក្សាផ្នែកហិរញ្ញវត្ថុជិត ១០០ នាក់ ទៅលើប្រធានបទផ្សេងៗ គ្នា រួមមានការចុះបញ្ជី អាជីវកម្មនៅកម្ពុជា សារៈសំខាន់គោលការណ៍គ្រប់គ្រងហិរញ្ញវត្ថុ ការធ្វើស្លាកយីហោ និងទីផ្សារឌីជីថល ក៏ដូចជាការគ្រប់គ្រងធនធានមនុស្សជាដើម ។ វគ្គ បណ្តុះបណ្តាលទាំងនេះ ត្រូវបានចែករំលែកដោយអ្នកជំនាញប្រកបដោយវិជ្ជាជីវៈដែល អញ្ជើញមកពីបណ្តាស្ថាប័ន ក្រុមហ៊ុន ច្បាប់ល្បីៗក្នុងស្រុក ទីប្រឹក្សាពាណិជ្ជកម្ម ភ្នាក់ងារ ផ្សព្វផ្សាយពាណិជ្ជកម្ម និងស្ថាប័នហិរញ្ញវត្ថុនានា ៕

Credit to: កោះសន្តិភាព, ១០ មិថុនា ២០២៣

ធនាគារ មេយប៊ែង ចុះ MoU ជាមួយស្ថាប័នចំនួន៣ នៅកម្ពុជា ដើម្បីលើកស្ទួយការកសាងសមត្ថភាព និងជំនាញរបស់សហគ្រាសធុនតូច និងមធ្យម

Posted on ខែមិថុនា 12, 2023ខែមិថុនា 22, 2023 by Sorn Chhorvyvatey

(ភ្នំពេញ)៖ ធនាគារ មេយប៊ែង (ខេមបូឌា) ភីអិលស៊ី បានចុះអនុស្សរណៈនៃការយោគយល់គ្នា (MoU) ជាមួយស្ថាប័នចំនួន៣ រួមមាន សហសាជីវកម្មធានាឥណទានកម្ពុជា (CGCC), ក្រុមហ៊ុន BNI Super និងសមាគមសហគ្រិនស្ត្រីកម្ពុជា (CWEA) ដើម្បីរួមគ្នាជួយគាំទ្រ ដល់សហគ្រាសធុនតូច និងមធ្យមនៅកម្ពុជា តាមរយៈកម្មវិធី «កសាងសមត្ថភាព និងជំនាញសម្រាប់ សហគ្រាសធុនតូច និងមធ្យម។

ការចុះអនុស្សរណៈនៃការយោគយល់គ្នានេះ ធ្វើឡើងនៅថ្ងៃទី១០ ខែមិថុនា ឆ្នាំ២០២៣ ក្រោមការចុះអនុស្សរណៈនៃការយោគយល់គ្នានេះ ធនាគារ មេយប៊ែង សាជីវកម្មធានាឥណទានកម្ពុជា BNI Super និងសមាគមសហគ្រិនស្ត្រីកម្ពុជា នឹងសហការគ្នាដើម្បីផ្តល់នូវវគ្គបណ្តុះបណ្តាល តាមរយៈសិក្ខាសាលាទៅ ដល់សមាជិកនៃស្ថាប័នខាងលើ ក៏ដូចជាម្ចាស់សហគ្រាសធុនតូច និងមធ្យមផ្សេងទៀតដែលបានចូលរួម ដើម្បីជួយក្នុងការពង្រីកអាជីវកម្មរបស់ពួកគេ។ វគ្គបណ្តុះបណ្តាលនេះ នឹងផ្តោតទៅលើប្រធានបទជាច្រើន ទាក់ទងទៅនឹងចំណេះដឹងផ្នែកហិរញ្ញវត្ថុ និងប្រតិបត្តិការអាជីវកម្ម។

ការចុះអនុស្សរណៈយោគយល់នេះ ក៏នឹងត្រួសត្រាយផ្លូវដល់ការពង្រីកបណ្តាញទំនាក់ទំនង ក៏ដូចជាការអភិវឌ្ឍរយៈពេលយូរអង្វែងផ្នែកមុខជំនួញ ដល់សហគ្រាសធុនតូច និងមធ្យមដែលបានចូលរួម ក្នុងការបណ្តុះបណ្តាលនេះ តាមរយៈវេទិកាប្រាស្រ័យទាក់ទងគ្នា និងការចែករំលែកចំណេះដឹងទាំងផ្នែកទ្រឹស្តី និងបច្ចេកទេសនានា។ ពិសេសលើសនេះទៅទៀត អ្នកចូលរួមក៏នឹងទទួលបានការលើកទឹកចិត្ត ពីធនាគារ មេយប៊េង ខេមបូឌា តាមរយៈការផ្តល់ជូននូវអត្រាពិសេស ដល់ពួកគេផងដែរ។

លោក រ័ត្ន សោភ័ណ នាយកប្រតិបត្តិរបស់ធនាគារ មេយប៊ែង បានលើកឡើងថា «ការចុះអនុស្សរណៈនៃការយោគយល់គ្នា និងកម្មវិធី កសាងសមត្ថភាព និងជំនាញនេះ ជាការបង្ហាញនូវការប្តេជ្ញាចិត្តរបស់ធនាគារ មេយប៊ែង ក្នុងការបន្តគាំទ្រដល់ការរីកចម្រើន របស់សហគ្រិនធនតូច និងមធ្យមនៅក្នុងប្រទេសកម្ពុជា ហើយជឿជាក់ថា ការផ្តល់ជាវេទិកាក្នុងវគ្គបណ្តុះបណ្តាលនេះ ជាផ្នែកមួយនៃការផ្តល់ចំណេះដឹងផ្នែកហិរញ្ញវត្ថុ បាននឹងកំពុងផ្តល់នូវឧបករណ៍ដ៏ត្រឹមត្រូវ ដើម្បីចីរភាពនៃមុខជំនួញជាកិច្ចរួមចំណែក ដល់ការអភិវឌ្ឍន៍សេដ្ឋកិច្ចរបស់ប្រទេសកម្ពុជា»។

លោកបានបន្ដថា ឆ្នាំទៅមិញកម្មវិធី កសាងសមត្ថភាព និងជំនាញនេះទទួលបានជោគជ័យគួរជាទីកត់សម្គាល់ ចំពោះឆ្នាំនេះ យើងចង់បន្តបំពេញនូវកិច្ចសន្យា ក្នុងការផ្តល់សេវាហិរញ្ញវត្ថុ ប្រកបដោយអរិយ្យភាពដោយបង្កើននូវកម្រិតនៃ ការគាំទ្រថែមមួយកម្រិតទៀត តាមរយៈការបន្តគាំទ្រ និងពង្រីកដៃគូសហការ សរុបចំនួនបីដែលរួមមាន CGCC CWEA និង BNI Super។

លោក Wong Keet Loong អគ្គនាយកសាជីវកម្មធានាឥណទានកម្ពុជា បានថ្លែងថា «យើងមានសេចក្តីសោមនស្សរីករាយ ក្នុងការចាប់ដៃគូជាមួយធនាគារ មេយប៊ែង ក្នុងឆ្នាំនេះម្តងទៀត សម្រាប់កម្មវិធី BCC និងពិសេសក្នុងការបង្កើនកិច្ចសហប្រតិបត្តិការជាមួយ BNI និងសមាគមសហគ្រិនស្រ្តីកម្ពុជា ដើម្បីពង្រីកវិសាលភាពនៃ កម្មវិធីដ៏សំខាន់នេះ ក្នុងនោះជឿជាក់ថា កម្មវិធី BCC នឹងផ្តល់ជាធនធានដ៏សំខាន់ ដល់សហគ្រាសធុនតូច និងមធ្យមនៅកម្ពុជា និងជាជំនួយដល់សហគ្រិនឱ្យកាន់តែរីកចម្រើន និងទទួលបានជោគជ័យ ជាមួយនឹងនឹងឱកាសដ៏ទូលំទូលាយ ក្នុងការទទួលបានហិរញ្ញប្បទាន និងបង្កើនចំណេះដឹងហិរញ្ញវត្ថុ ស្របជាមួយនឹងទិសដៅរបស់ CGCC។

លោកស្រី ជា រដ្ឋា អនុប្រធាននៃសមាគមសហគ្រិនស្រ្តីកម្ពុជា CWEA ក៏បានលើកឡើងថា «ខ្ញុំមានសេចក្តីសោមនស្សរីករាយជាខ្លាំង ដែលបានចូលរួមក្នុងគំនិតផ្តួចផ្តើមនេះ ដោយកម្មវិធីនេះស្របទៅតាមបេសកកម្មរបស់ CWEA ក្នុងការជួយជំរុញវិស័យសហគ្រិនភាព ដល់ស្ត្រីកម្ពុជា តាមរយៈការបង្កើនជំនាញ និងបណ្តាញទំនាក់ទំនង នាងខ្ញុំសូមលើកទឹកចិត្តដល់សមាជិក CWEA និងសហគ្រិនស្រ្តីទាំងអស់ ឱ្យចាប់យកឱកាសនេះ ដើម្បីជាប្រយោជន៍ក្នុងការយល់ដឹងបន្ថែម និងពង្រីកវិសាលភាពផ្ទាល់ខ្លួន»។

លោក គ្រុយ ឬទ្ធី នៃ BNI Super បានឲ្យដឹងថា «ការក្លាយជាដៃគូរសហការនេះ នឹងផ្តល់ផលប្រយោជន៍ ទៅវិញទៅមកដល់សមាជិករបស់ BNI ក៏ដូចជាសហគ្រិនដទៃ ព្រោះបានអនុញ្ញាតឲ្យសមាជិក ពង្រីកនូវបណ្តាញទំនាក់ទំនងរបស់ពួកគេ អភិវឌ្ឍជំនាញថ្មីៗ និងជំរុញដល់ការបើកទំព័រអាជីវកម្មរបស់ពួកគេជាដើម»។

សូមជម្រាបថា ឆ្នាំ២០២២ កម្មវិធីកសាងសមត្ថភាព និងជំនាញ បានបណ្តុះបណ្តាលសហគ្រាសធុនតូច និងមធ្យម និងទីប្រឹក្សាផ្នែកហិរញ្ញវត្ថុជិត១០០នាក់ ទៅលើប្រធានបទផ្សេងៗគ្នា រួមមានការចុះបញ្ជី អាជីវកម្មនៅកម្ពុជា សារៈសំខាន់គោលការណ៍គ្រប់គ្រងហិរញ្ញវត្ថុ ការធ្វើស្លាកយីហោ និងទីផ្សារឌីជីថល ក៏ដូចជាការគ្រប់គ្រងធនធានមនុស្សជាដើម។

វគ្គបណ្តុះបណ្តាលទាំងនេះ ត្រូវបានចែករំលែកដោយអ្នកជំនាញប្រកបដោយវិជ្ជាជីវៈ អញ្ជើញមកពីបណ្តាស្ថាប័ន ក្រុមហ៊ុន ច្បាប់ល្បីៗក្នុងស្រុក ទីប្រឹក្សាពាណិជ្ជកម្ម ភ្នាក់ងារផ្សព្វផ្សាយពាណិជ្ជកម្ម និងស្ថាប័នហិរញ្ញវត្ថុនានា៕

ធនាគារ មេយប៊ែង ចុះ MoU ជាមួយស្ថាប័នចំនួន៣នៅកម្ពុជា ដើម្បីលើកស្ទួយការកសាងសមត្ថភាព និងជំនាញរបស់សហគ្រាសធុនតូច និងមធ្យម

Credit to: Fresh News, Published on 10 June 2023

ស្វែងយល់អំពីការធានាឥណទាន “កិច្ចសម្ភាសន៍ជាមួយគ្រឹះស្ថានមីក្រូហិរញ្ញវត្ថុ អិលអូអិលស៊ី ”

Posted on ខែមិថុនា 9, 2023ខែមិថុនា 12, 2023 by Sorn Chhorvyvatey

អាននិងទាញយកជា PDF: កិច្ចសម្ភាសន៍ជាមួយនាយកប្រតិបត្តិ គ្រឹះស្ថានមីក្រូហិរញ្ញវត្ថុ អិលអូអិលស៊ី

១. តើគ្រឹះស្ថានមីក្រូហិរញ្ញវត្ថុ អិលអូអិលស៊ី យល់ឃើញដូចម្តេច ចំពោះគម្រោងធានាឥណទាន? ហេតុអ្វីបានជា អិលអូអិលស៊ី ចូលរួមជាដៃគូជាមួយ CGCC?

គណៈគ្រប់គ្រងអិលអូអិលស៊ី ពិតជារីករាយក្នុងការចូលរួមជាមួយ CGCC ដើម្បីចាប់យកឱកាសនៃភាពជាដៃគូក្នុងការពង្រីកទីផ្សារបន្ថែម តាមរយៈការផ្តល់ប្រាក់កម្ចីថ្មីជាមួយនឹងការធានាពីCGCC ដែលគម្រោងធានាឥណទាននេះពិតជាមានសារៈសំខាន់ខ្លាំងណាស់ ទាំងសម្រាប់អិលអូអិលស៊ី និងអតិថិជនផងដែរ ជាពិសេសអតិថិជនដែលពុំមានទ្រព្យដាក់ធានា ដើម្បីផ្តល់លទ្ធភាព និងជម្រុញឱ្យសហគ្រាសធុនតូចនិងមធ្យមនៅកម្ពុជា ទទួលបានដើមទុនងាយស្រួលជាងមុន ក្នុងអត្រាការប្រាក់ទាប ដើម្បីស្តារ ចាប់ផ្តើម ឬពង្រីកអាជីវកម្មរបស់ខ្លួន។
អិលអូអិលស៊ីចូលរួមជាមួយ CGCC ក្នុងនាមជាគ្រឹះស្ថានហិរញ្ញវត្ថុចូលរួម ដោយមើលឃើញថាគម្រោងធានាឥណទាននេះដើរតួនាទីយ៉ាងសំខាន់ក្នុងការគាំទ្រកំណើនសេដ្ឋកិច្ចជាតិទាំងមូល ដោយបានផ្តល់ លទ្ធភាពដល់សហគ្រាសធុនតូចនិងមធ្យមនៅកម្ពុជាឱ្យទទួលបានហិរញ្ញប្បទាន ដើម្បីស្តារ ចាប់ផ្តើម និងពង្រីកអាជីវកម្មរបស់ពួកគាត់ ទន្ទឹមគ្នានេះដែរក៏បានផ្តល់នូវឱកាសការងារក្នុងស្រុកដល់ប្រជាជនឱ្យមានការងារធ្វើ និងមានប្រាក់ចំណូលសម្រាប់ផ្គត់ផ្គង់ក្នុងគ្រួសារផងដែរ។

២. តើគម្រោងធានាឥណទានបានផ្តល់អត្ថប្រយោជន៍ដូចម្តេចខ្លះចំពោះ អិលអូអិលស៊ី និងអតិថិជន?

តាមរយៈការសហការជាមួយ CGCC អិលអូអិលស៊ីមានឱកាសក្នុងការពង្រីកទីផ្សារសក្តានុពលបន្ថែមទៀត និងមានទំនុកចិត្ត ក្នុងការពង្រីកការផ្តល់កម្ចីដល់អតិថិជនដែលមានលទ្ធភាព និងចង់ពង្រីកអាជីវកម្មបន្ថែម ប៉ុន្តែមិនមានទ្រព្យធានាគ្រប់គ្រាន់។ បន្ថែមលើនេះទៅទៀត គម្រោងធានាឥណទានរបស់ CGCC នេះ គឺជាចំណែកមួយយ៉ាងសំខាន់ ក្នុងការបំពេញនូវតម្រូវការរបស់អតិថិជនដើម្បីពង្រីកអាជីវកម្មរបស់ពួកគាត់ និងលុបបំបាត់ការព្រួយបារម្ភរបស់គាត់ពីពាក្យថា “ទោះបីមុខរបរគាត់ល្អប៉ុណ្ណាក៏ដោយ បើគ្មានទ្រព្យធានា ចង់ខ្ចីលុយគេមករកស៊ី គឺគេមិនឱ្យទេ” ប៉ុន្តែពេលនេះទោះគ្មានទ្រព្យធានា ក៏អតិថិជនអាចខ្ចីលុយពីគ្រឹះស្ថានមីក្រូហិរញ្ញវត្ថុ ឬធនាគារមករកស៊ីបានដែរ ឱ្យតែយើងមានលទ្ធភាពបង់សងទៅគ្រឹះស្ថានមីក្រូហិរញ្ញវត្ថុ ឬធនាគារវិញ និងមានផែនការរអាជីវកម្មច្បាស់លាស់។

៣. តើគ្រឹះស្ថានមីក្រូហិរញ្ញវត្ថុ អិលអូអិលស៊ី មានយុទ្ធសាស្រ្តក្នុងការរៀបចំកម្ចីក្រោមការធានាឥណទានពី CGCC យ៉ាងដូចម្តេច? និងតើស្ថាប័នមានលក្ខខណ្ឌក្នុងការវាយតម្លៃសំណើកម្ចីពីអតិថិជនយ៉ាងដូចម្តេចខ្លះ?

ការពិតណាស់ អិលអូអិលស៊ី បានរៀបចំយុទ្ធសាស្រ្តច្បាស់លាស់មួយចំនួន ក្នុងការរៀបចំកម្ចីក្រោមការធានាឥណទាន ពី CGCC ដូចជា៖

ផ្តល់កម្ចីទៅកាន់អតិថិជនដែលមានមុខរបរច្បាស់លាស់ ស្របច្បាប់ មានលំហូរសាច់ប្រាក់ល្អ មានប្រវត្តិឥណទានល្អ ទោះបីអតិថិជននោះ មានទ្រព្យធានា ឬមិនមានទ្រព្យធានាក៏ដោយ ជាពិសេស គឺផ្តល់កម្ចីទៅកាន់អតិថិជនដែលជាសហគ្រាសខ្នាតតូច និងមធ្យម (SME) ដែលមានបំណងពង្រីកអាជីវកម្មរបស់ខ្លួនឱ្យរីកចម្រើន ដែលអាជីវកម្មរបស់សហគ្រិននោះ បានចូលរួមចំណែកជួយសង្គមតាមរយៈការផ្តល់ការងារធ្វើដល់ប្រជាជនឱ្យមានចំណូលសមរម្យ សម្រាប់ទ្រទ្រង់ជីវភាពគ្រួសារប្រចាំថ្ងៃរបស់ពួកគាត់។
ផ្តល់កម្ចីទៅកាន់អតិថិជនដែលមានមុខរបរមានហានិភ័យ ប៉ុន្តែរំពឹងថាមុខរបរនោះ នឹងមានភាពល្អប្រសើរនៅក្នុងរយៈពេលដ៏ខ្លីខាងមុខ។
ផ្តល់កម្ចីទៅដល់វិស័យសំខាន់ៗដែលជាអាទិភាព ដែលអាចចូលរួមចំណែក ក្នុងការស្តារ និងលើកស្ទួយដល់អតិថិជន ដែលកំពុងតែទទួលរងឥទ្ធិពលបន្ទាប់ពីវិបត្តិនៃការរីករាលដាលនៃជំងឺកូវីដ-១៩ ដែលអិលអូអិលស៊ីរំពឹងថា អាជីវកម្មរបស់អតិថិជននឹងមានភាពល្អប្រសើរនៅក្នុងរយៈពេលដ៏ខ្លីខាងមុខ។

ដើម្បីជាជំនួយស្មារតីដល់អតិថិជនដែលមានសក្តានុពលក្នុងការទទួលបានកម្ចីដែលមានការធានាអាចស្វែងយល់ និងរៀបចំខ្លួនជាមុន មុនពេលស្នើកម្ចីពី LOLC គ្រឹះស្ថានអិលអូអិលស៊ីមានលក្ខខណ្ឌក្នុងការវាយតម្លៃសំណើកម្ចីពីអតិថិជន មួយចំនួន៖

អតិថិជនត្រូវមានមុខរបរច្បាស់លាស់ ស្របច្បាប់
អតិថិជនមានលំហូរសាច់ប្រាក់ល្អ ដែលអាចទទួលបានកម្ចីហើយមានលទ្ធភាពគ្រប់គ្រាន់នៅពេល ទូទាត់កម្ចីសងត្រលប់មកវិញ
អតិថិជនមានកេរ្តិ៍ឈ្មោះល្អ និងមានប្រវត្តិឥណទានល្អ
អតិថិជនត្រូវមានផែនការ និងគោលបំណងច្បាស់លាស់ក្នុងការប្រើប្រាស់កម្ចីប្រកបដោយប្រសិទ្ធភាព
អតិថិជនអាចមានដើមទុនខ្លះ ក្នុងការប្រតិបត្តិការនៅក្នុងអាជីវកម្មរបស់ពួកគាត់
អាជីវកម្មរបស់អតិថិជន មានលក្ខខណ្ឌល្អ ដូចជាផលិតផល និងសេវាកម្មមានគុណភាព តម្លៃសមរម្យ មានតម្រូវការទីផ្សារ បុគ្គលិក និងអ្នកដឹកនាំមានជំនាញ បទពិសោធន៍ច្បាស់លាស់
អាចមាន ឬមិនមានទ្រព្យធានា ឬមានទ្រព្យធានាដែរ ប៉ុន្តែទ្រព្យធានាមិនគ្រប់លក្ខខណ្ឌកម្ចីក៏អាចទទួលបានកម្ចីបានដែរ។

៤. គ្រឹះស្ថានមីក្រូហិរញ្ញវត្ថុ អិលអូអិលស៊ី គឺជាគ្រឹះស្ថានហិរញ្ញវត្ថុឆ្នើមទី៤របស់ CGCC ប្រចាំឆ្នាំ២០២២។ តើគ្រឹះស្ថានមីក្រូហិរញ្ញវត្ថុ អិលអូអិលស៊ី មានយុទ្ធសាស្រ្ត ឬផែនការដូចម្តេច ដើម្បីបន្តបង្កើនការបញ្ចេញកម្ចីដែល ការធានា នាឆ្នាំ២០២៣ នេះ?

ជាការពិតណាស់ អិលអូអិលស៊ីនឹងបន្តផ្តល់ឥណទានបន្ថែមទៀតដល់អតិថិជន ដែលមានទ្រព្យដាក់ធានា និងគ្មានទ្រព្យដាក់ធានា ដើម្បីបំពេញនូវតម្រូវការរបស់អតិថិជន លើគ្រប់វិស័យទាំងអស់ និងជួយលើកស្ទួយកម្រិតជីវភាពរបស់ពួកគាត់ ព្រមទាំងដើម្បីបន្តរួមចំណែកជាមួយរាជរដ្ឋាភិបាល ក្នុងការជម្រុញដល់ការរីកចម្រើនសេដ្ឋកិច្ចរបស់ប្រទេសកម្ពុជា។ តាមរយៈនេះ អិលអូអិលស៊ី នឹងជំរុញបន្ថែមដល់ថ្នាក់គ្រប់គ្រងសាខាដើម្បីផ្សព្វផ្សាយគម្រោងធានាឥណទាននេះឱ្យបានទូលំទូលាយ ទៅដល់គ្រប់អតិថិជនគោលដៅ ជាពិសេសអតិថិជនថ្មីៗបន្ថែមទៀតដែលមិនទាន់ទទួលបានកម្ចីពី អិលអូអិលស៊ីទាំងអតិថិជនមានទ្រព្យដាក់ធានា និងមានទ្រព្យដាក់ធានាមិនគ្រប់តម្រូវការ ឬមិនមានទ្រព្យដាក់ធានា សំខាន់គឺអតិថិជនមានមុខរបរច្បាស់លាស់ ស្របច្បាប់ មានកេរ្តិ៍ឈ្មោះល្អ មានប្រវត្តិឥណទានល្អ មានលំហូរសាច់ប្រាក់រឹងមាំ ព្រមទាំងលក្ខខណ្ឌអាជីវកម្មរបស់អតិថិជនល្អ។

៥. ក្រៅពីការផ្តល់កម្ចីដែលមានធានាឥណទាន តើគ្រឹះស្ថានមីក្រូហិរញ្ញវត្ថុអិលអូអិលស៊ី និង CGCC គួរសហការគ្នាយ៉ាងដូចម្តេចទៀត ដើម្បីអភិវឌ្ឍសហគ្រាសខ្នាតមីក្រូ តូចនិងមធ្យម នៅកម្ពុជា?

ក្រៅពីការផ្តល់សេវាឥណទាន CGCC និង អិលអូអិលស៊ី ក៏នឹងបន្តធ្វើការសហការគ្នា ដើម្បីធ្វើការគាំទ្រសេវាមិនមែនហិរញ្ញវត្ថុផ្សេងៗ ដើម្បីជួយបង្កើនការយល់ដឹង ឬជំនាញបន្ថែម ទាក់ទងនឹងចំណេះដឹងផ្នែកហិរញ្ញវត្ថុ ដល់សហគ្រិន ជាពិសេសម្ចាស់សហគ្រាសខ្នាតតូច និងមធ្យម នៅកម្ពុជា ដើម្បីធ្វើយ៉ាងណាឱ្យពួកគាត់ កាន់តែមានចំណេះដឹងបន្ថែមលើអភិបាលកិច្ច ចំណេះដឹងហិរញ្ញវត្ថុ ដូចជាការគ្រប់គ្រងសាច់ប្រាក់ គ្រប់គ្រងចំណាយ ដែលចូលរួមចំណែកដល់ការគ្រប់គ្រងអាជីវកម្មរបស់អតិថិជនកាន់តែមានប្រសិទ្ធភាពបន្ថែមទៀត។

ស្វែងយល់ពីអត្រាការប្រាក់

Posted on ខែមិថុនា 9, 2023ខែមិថុនា 9, 2023 by Sorn Chhorvyvatey

ហេតុអ្វីអត្រាការប្រាក់មានសារៈសំខាន់សម្រាប់អ្នក? តើអ្នកយល់អំពីអត្រាការប្រាក់បានកម្រិតណា? អត្រាការប្រាក់មានឥទ្ធិពលយ៉ាងខ្លាំង លើការសម្រេចចិត្តរបស់បុគ្គលម្នាក់ៗ ស្ថាប័ននីមួយៗ ក៏ដូចជាប្រទេសទាំងមូល ក្នុងការខ្ចីប្រាក់ពីគេ ការផ្តល់ប្រាក់ឱ្យគេខ្ចី ការបង្កើនវិនិយោគ និងការបន្ថយការវិនិយោគ ជាដើម។ ប្រសិនអត្រាការប្រាក់កើនឡើងខ្ពស់ ក្រុមហ៊ុនអាជីវកម្មនឹងពន្យាពេល ក្នុងការកៀរគរដើមទុនមកវិនិយោគ ឬពង្រីកអាជីវកម្ម ដែលធ្វើឱ្យភាពមានការងារធ្វើ និងប្រាក់ចំណូលរបស់បុគ្គលម្នាក់ៗធ្លាក់ចុះ។ ដូច្នេះ ការស្វែងយល់អំពីអត្រាការប្រាក់មានសារៈសំខាន់ ក្នុងការសម្រេចចិត្តឱ្យបានត្រឹមត្រូវ ក្នុងការខ្ចីប្រាក់ ការឱ្យប្រាក់គេខ្ចី ឬការវិនិយោគលើអាជីវកម្ម។

១. និយមន័យនៃអត្រាការប្រាក់

ដូចគ្នានឹងទំនិញ ឬសេវាផ្សេងៗនៅក្នុងសេដ្ឋកិច្ចដែរ ការផ្តល់កម្ចីឬការខ្ចីគឺមានតម្លៃ (price) របស់វា។ ឧទាហរណ៍ ការជួលផ្ទះស្នាក់នៅ ១ខែ មានតម្លៃ ១.០០០ដុល្លារ រីឯការជួលសាច់ប្រាក់មកប្រើប្រាស់ ចំនួន ១០.០០០ដុល្លារ (ខ្ចីប្រាក់) ក្នុង ១ខែ មានតម្លៃ ១០០ដុល្លារ។ តាមរយៈឧទាហរណ៍នេះ អត្រាការប្រាក់សម្រាប់ការខ្ចីប្រាក់ ឬឱ្យប្រាក់គេខ្ចី (cost of borrowing) ចំនួន ១០.០០០ដុល្លារ ស្មើនឹង ១% ក្នុង ១ខែ (១០០ ចែកកនឹង ១០.០០០)។ ការជួលផ្ទះ មានតម្លៃ ខុសគ្នា ទៅតាមប្រភេទផ្ទះ, រយៈពេលនៃការជួលផ្ទះ, និងប្រភេទអតិថិជនដែលជួល។ល។ ដូចគ្នាដែរ អត្រាការប្រាក់ មានកម្រិតខុសគ្នា អាស្រ័យលើប្រភេទកម្ចី រយៈពេលកម្ចី និងអតិថិជនដែលស្នើសុំកម្ចី។ ជាទូទៅ អត្រាការប្រាក់ ត្រូវបានគិតជាភាគរយនៃប្រាក់ដើម ក្នុងមួយឆ្នាំ។ ដូច្នេះ នៅពេលគេនិយាយថា អត្រាការប្រាក់ចំនួន ៥% ឬ ១០% មានន័យថា ៥% ឬ ១០% ក្នុងមួយឆ្នាំ នៃប្រាក់ដើម។ និយាយឱ្យខ្លី អត្រាការប្រាក់គឺជាថ្លៃ (price) នៃការឱ្យប្រាក់គេខ្ចី ឬការស្នើសុំខ្ចីប្រាក់គេ។

អានបន្ត៖ ស្វែងយល់ពីអត្រាការប្រាក់

ស្វែងយល់អំពីការធានាឥណទាន “កិច្ចសម្ភាសន៍ជាមួយគ្រឹះស្ថានមីក្រូហិរញ្ញវត្ថុ អេ អឹម ខេ”

Posted on ខែមិថុនា 9, 2023ខែមិថុនា 9, 2023 by Sorn Chhorvyvatey

អាននិងទាញយកជា PDF: កិច្ចសម្ភាសន៍ជាមួយប្រធាននាយកប្រតិបត្តិ គ្រឹះស្ថានមីក្រូហិរញ្ញវត្ថុ អេ អឹម ខេ

១. តើគ្រឹះស្ថានមីក្រូហិរញ្ញវត្ថុ អេ អឹម ខេ យល់ឃើញដូចម្តេច ចំពោះគម្រោងធានាឥណទាននៅកម្ពុជា? ហេតុអ្វីបានជាអេ អឹម ខេ ចូលរួមជាដៃគូជាមួយ CGCC?

គម្រោងធានាឥណទាន មានសារៈសំខាន់យ៉ាងខ្លាំងសម្រាប់អតិថិជនទំាងឡាយណា ដែលមិនមានលទ្ធភាពក្នុងការទទួលបានហិរញ្ញប្បទាន ដោយគ្មានទ្រព្យធានា។ CGCC ដើរតួរយ៉ាងសំខាន់ក្នុងការគាំទ្រដល់អាជីវកម្មក្នុងស្រុក ដើម្បីបង្កើនភាពមានការងារធ្វើ ក៏ដូចជាគាំទ្រដល់កំណើនសេដ្ឋកិច្ចកម្ពុជាទាំងមូលផងដែរ។ ជាមួយគ្នានេះ គម្រោងធានាឥណទាន បានគាំទ្រដល់បេសកកម្មរបស់ អេ អឹម ខេ ក្នុងការគាំទ្រដល់ប្រជាជនកម្ពុជា ដើម្បីទទួលបានហិរញ្ញប្បទានដោយគ្មានទ្រព្យធានា ព្រោះកម្ចីភាគច្រើនរបស់ អេ អឹម ខេ សុទ្ធសឹងតែជាកម្ចីដែលគ្មានទ្រព្យធានា។

២. បន្ទាប់ពីបានចុះហត្ថលេខាលើកិច្ចព្រមព្រៀមធានាឥណទានជាមួយ CGCC និងកំពុងក្លាយជា PFI ដែលផ្តល់កម្ចីដែលមានការធានាច្រើនជាងគេមួយរបស់ CGCC តើ អេ អឹម ខេ យល់ឃើញថា គម្រោងធានាឥណទានបានផ្តល់អត្ថប្រយោជន៍ដូចម្តេចខ្លះចំពោះ អេ អឹម ខេ និងអតិថិជន?

តាមរយៈគម្រោងធានាឥណទានរបស់ CGCC អេ អឹម ខេ អាចពង្រីកការផ្តល់កម្ចីដែលមិនមានទ្រព្យធានាបានកាន់តែច្រើនឡើងៗ។ បើគ្មាន CGCC ទេ យើងក៏មិនមានទំនុកចិត្ត ក្នុងការផ្តល់កម្ចីយ៉ាងច្រើនបែបនេះដែរ ដោយសារយើងត្រូវពិចារណាយ៉ាងលម្អិតលើកម្ចីដែលគ្មានទ្រព្យធានា ពិសេសលើហានិភ័យ ដូចជាលទ្ធភាពនៃលំហូរសាច់ប្រាក់ដែលមិនប្រក្រតី និងក្នុងករណីអាជីវកម្មដែលអតិថិជនបានជួបបញ្ហា។ សម្រាប់អតិថិជន ពួកគាត់អាចរីករាយនឹងការគាំទ្រផ្នែកហិរញ្ញប្បទានពី អេ អឹម ខេ ដែលអាចបំពេញសេចក្តីត្រូវការរបស់ពួកគាត់ ដើម្បីកំណើនអាជីវកម្ម ដោយពួកគាត់មិនចាំបាច់ព្រួយបារម្ភច្រើនពេកទៅលើតម្រូវការទ្រព្យធានា។

៣. តើគ្រឹះស្ថានមីក្រូហិរញ្ញវត្ថុ អេ អឹម ខេ យល់យ៉ាងដូចម្តេចចំពោះការធានាឥណទានជាកញ្ជប់ក្រោមការធានារបស់ CGCC? តើគម្រោងនេះអាចផ្តល់អត្ថប្រយោជន៍យ៉ាងណាខ្លះដល់ អេ អឹម ខេ ក្នុងការបញ្ចេញកម្ចីដែលខ្វះទ្រព្យបញ្ចាំ?

ពិតណាស់ ចំពោះ អេ អឹម ខេ គម្រោងធានាឥណទានជាកញ្ចប់នេះ គឺជាគំនិតផ្តួចផ្តើមដ៏ល្អ ព្រោះថាវានឹងធ្វើឱ្យប្រសើរឡើងនូវពេលវេលាដំណើរការ និងបន្ទុកការងារ ដែលជះឥទ្ធិពលដល់ដំណើរការក្នុងការស្នើសុំប្រាក់កម្ចីទាំងមូល។ យ៉ាងណាក៏ដោយ យើងចង់ឃើញកម្រៃធានាឥណទានទាបសម្រាប់គម្រោងនេះ បើប្រៀបធៀបទៅនឹងគម្រោងបច្ចុប្បន្ន។

៤.ដោយមើលឃើញថា មួយរយៈចុងក្រោយនេះ អេ អឹម ខេ បាននិងកំពុងតែបន្តបញ្ចេញឥណទានដែលគ្មានទ្រព្យធានាក្រោមការធានាពី CGCC ដល់អាជីវកម្ម កាន់តែច្រើន ដូច្នេះ តើ អេ អឹម ខេ មានយុទ្ធសាស្រ្ត ឬផែនការដូចម្តេច ដើម្បីបង្កើនការប្រើប្រាស់ការធានាឥណទានឱ្យកាន់តែច្រើនទៀត នៅទូទាំងប្រទេសកម្ពុជា នាឆ្នាំ២០២៣ ខាងមុខនេះ?

ពួកយើង (AMK) នឹងបន្តផ្តោតលើការបំពេញតម្រូវការរបស់អតិថិជនរបស់យើងក្នុងគ្រប់វិស័យ។ លើសពីនេះ ពួកយើងនឹងផ្តោតសំខាន់លើអាជីវកម្មពាក់ព័ន្ធនឹងថាមពលកកើតឡើងវិញ (renewable energy) និងវិស័យកសិកម្ម។

៥. ដោយសារតែប្រធានបទនៃការធានាឥណទាននៅតែជារឿងថ្មីនៅឡើយសម្រាប់កម្ពុជា តើ អេ អឹម ខេ និង CGCC គួរតែបន្តធ្វើអ្វីខ្លះទៀត ដើម្បីលើកកម្ពស់ការយល់ដឹងនៃការធានាឥណទានសម្រាប់អតិថិជននាឆ្នាំ២០២៣ខាងមុខនេះ?

វាជាការល្អប្រសិនបើ CGCC និង AMK អាចចូលរួមសហប្រតិបត្តិជាមួយគ្នា ធ្វើកម្មវិធីសិក្ខាសាលាជាបន្តបន្ទាប់ ដើម្បីបង្កើនការយល់ដឹងអំពីភាពជាដៃគូនេះដល់សហគ្រាសធុនតូច និងមធ្យម តាមរយៈសមាគមឯកជន និងអាជីវកម្មនៅកម្ពុជា។

Tag: គ្រឹះស្ថានហិរញ្ញវត្ថុ

CGCC និងធនាគារប្រ៊ីដ ចុះកិច្ចព្រមព្រៀងលើការធានាឥណទាន ដើម្បីគាំទ្រដល់អាជីវកម្មឱ្យទទួលបានកម្ចីមានកាធានា

ជំនួបសម្តែងការគួរសមរបស់ CGCC ជាមួយធនាគារកសិកន នៅប្រទេសថៃ

ធនាគារ ព្រីនស៍ សហការជាមួយ សាជីវកម្មធានាឥណទានកម្ពុជា លើគម្រោងធានាឥណទានជាកញ្ចប់សម្រាប់សហគ្រិនស្ត្រី

ស្វែងយល់អំពីការធានាឥណទាន “កិច្ចសម្ភាសន៍ជាមួយគ្រឹះស្ថានមីក្រូហិរញ្ញវត្ថុ អិលអូអិលស៊ី ”

ស្វែងយល់ពីអត្រាការប្រាក់

ស្វែងយល់អំពីការធានាឥណទាន “កិច្ចសម្ភាសន៍ជាមួយគ្រឹះស្ថានមីក្រូហិរញ្ញវត្ថុ អេ អឹម ខេ”

ទំនាក់ទំនង

បណ្តាញសង្គម

តំណភ្ជាប់រហ័ស