Category: ព្រឹត្តិការណ៍ និងសកម្មភាព

នាថ្ងៃទី១១ ខែធ្នូ ឆ្នាំ២០២៤ សាជីវកម្មធានាឥណទានកម្ពុជា (CGCC) និងសភាពាណិជ្ជកម្មកម្ពុជា (CCC) បានសហការរៀបចំវគ្គបណ្តុះបណ្តាលស្តីពី “ការរលើកកម្ពស់សមត្ថភាព និងចំណេះដឹងហិរញ្ញវត្ថុរបស់ សហគ្រាសធុនតូច និងមធ្យម” នៅឯខេត្តព្រះសីហនុ  ក្រោមកិច្ចសហការចូលរួមពី សភាពាណិជ្ជកម្មមណ្ឌលខេត្តព្រះសីហនុ ដែលក្នុងនោះមានសមាសភាពចូលរួមពីថ្នាក់ដឹកនាំ និងបុគ្គលិកនៃគ្រឹះស្ថានហិរញ្ញវត្ថុចូលរួម (PFIs) មួយចំនួន និងបណ្តាសហគ្រិនដែលជាម្ចាស់អាជីវកម្មខ្នាតតូចនិងមធ្យម នៅក្នុងខេត្តព្រះសីហនុ ប្រមាណ ៣០រូប។

វគ្គបណ្តុះបណ្តាលនេះទទួលបានការអញ្ជើញចូលរួមជាអធិបតីពី លោកឧកញ៉ា​ តាន់ តាត់  ប្រធានសភាពាណិជ្ជកម្មមណ្ឌលខេត្តព្រះសីហនុ លោកណូ លីដា អគ្គនាយករង CGCC ​លោក យុន ផន ប្រធាននាយកដ្ឋានយុទ្ធសាស្ត្រ និងអភិវឌ្ឍន៍អាជីវកម្ម នៃ​ CGCC និងព្រមទាំងមានការធ្វើបទបង្ហាញពីលោកសែ គឹមវាសនា បុគ្គលិកជំនាញជាន់ខ្ពស់ផ្នែកទីផ្សារ និងទំនាក់ទំនង​ នៃ​ CGCC  និងអ្នកតំណាងនៃ ធនាគារ ABA និងគ្រឹះស្ថានមីក្រូហិរញ្ញវត្ថុ LOLC ផងដែរ។

តាមរយៈវគ្គបណ្តុះបណ្តាលនេះ សហគ្រិននៃអាជីវកម្មខ្នាតតូចនិងមធ្យម បានយល់ដឹងអំពីអត្ថប្រយោជន៍នៃការធានាឥណទាន និងជាពិសេសបានយល់ពីការត្រៀមខ្លួនទទួលបានកម្ចីរបស់ធនាគារ និងគ្រឹះស្ថានមីក្រូហិរញ្ញវត្ថ យល់ដឹងពីរបៀបប្រើប្រាស់កម្ចីប្រកបដោយការទទួលខុសត្រូវ និងត្រឹមត្រូវ និងទទួលបានឱកាសអនុវត្តផ្ទាល់ និងទទួលបានមតិយោបល់កែលម្អពីគ្រូបង្គោល/អ្នកជំនាញតាមរយៈក្រុមពិភាក្សា លើប្រធានបទការត្រៀមខ្លួនដើម្បីទទួលបានកម្ចី។

នាថ្ងៃទី១៣ ខែធ្នូ ឆ្នាំ២០២៤ នៅឯមជ្ឈមណ្ឌលអភិវឌ្ឍន៍សហគ្រិនភាពស្រ្តី លោកស្រី សាន សុខរីណា ប្រធានការិយាល័យអភិវឌ្ឍន៍ផលិតផល និងកិច្ចសហប្រតិបត្តិការរបស់ CGCC បានចូលរួមជាវាគ្មិនកិត្តិយសមួយរូប នៅក្នុងវគ្គបណ្តុះបណ្តាលគ្រូបង្គោលស្តីពី “ពង្រឹងការអនុវត្តឧស្សាហកម្មបៃតង ដែលឆ្លើយតបនឹងយេនឌ័រឱ្យកាន់តែប្រសើរឡើង” នៅថ្នាក់ជាតិ ដែលជាគម្រោងសហការរៀបចំដោយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) និងក្រសួងកិច្ចការនារី (MoWA) និងអង្គការអភិវឌ្ឍន៍ឧស្សាហកម្មរបស់អង្គការសហប្រជាជាតិ (UNIDO) និងក្រោមការគាំទ្រពី ក្រសួងសហប្រតិបត្តិការសេដ្ឋកិច្ច និងអភិវឌ្ឍសេដ្ឋកិច្ចរបស់សហពន្ធ័អាល្លឺម៉ង់ (BMZ)  ក្នុងគោលបំណង ពង្រឹងការចូលរួម និងសមត្ថភាពពីក្រសួងស្ថាប័នពាក់ពន្ធ័ ក្នុងការរៀបចំ និងអនុវត្តគោលនយោបាយសេដ្ឋកិច្ចបៃតង និងឧស្សាហកម្មបៃតងដែលឆ្លើយតបនឹងយេនឌ័រ។

តាមរយៈវគ្គបណ្តុះបណ្តាលនេះ លោកស្រី សាន សុខរីណា បានចែករំលែកក្នុងនាមជាវាគ្មិនកិត្តិយសមួយរូប នៅក្នុងវគ្គទី៥ ដែលផ្តោតលើ ការវិនិយោគសំខាន់ៗនៅក្នុងឧស្សាហកម្មបៃតងដែលឆ្លើយតបនឹងយេនឌ័រ  ដោយលោកស្រីបានចែករំលែកអំពីយន្តការធានាឥណទានរបស់ CGCC ដើម្បីគាំទ្រដល់ហិរញ្ញប្បទានបៃតង និងបរិយាបន្នហិរញ្ញវត្ថុ។

សិក្ខាកាមដែលបានចូលរួមវគ្គបណ្តុះបណ្តាលនេះបានទទួលនូវជំនាញសំខាន់ៗ ដើម្បីលើកកម្ពស់សេដ្ឋកិច្ចបៃតងដែលប្រកាន់យកយេនឌ័រ និងជំរុញការផ្លាស់ប្តូរចំណេះដឹង។ CGCC ក៏​មាន​មោទនភាព​ផងដែរ ដែលបាន​ចូលរួមចែករំលែកនូវសារៈសំខាន់នៃយន្តការធានាឥណទាន សម្រាប់ការចូលរួមអភិវឌ្ឍគោលនយោបាយសេដ្ឋកិច្ចបៃតង និងឧស្សាហកម្មបៃតងដ៏មានសារៈសំខាន់ ដើម្បីការអភិវឌ្ឍប្រទេសកម្ពុជាប្រកបដោយចីរភាព៕

នារសៀលថ្ងៃទី១៣ ខែធ្នូ ឆ្នាំ២០២៤  លោក ណូ លីដា អគ្គនាយក CGCC និងសហការី បានចូលរួមកម្មវិធីកិច្ចសន្ទនាកាហ្វេថ្ងៃសុក្រ (Friday Coffee Talk) ដែលរៀបចំដោយ សមាគមសហគ្រិនវ័យក្មេងកម្ពុជា (YEAC) ដោយធ្វើការជជែកពិភាក្សាទៅលើប្រធានបទស្ដីពី “ការទទួលបានមូលធនតាមរយៈសញ្ញាបណ្ណមានការធានាពី​ CGCC” ដោយមាន លោក​ ណូ លីដា ជាវាគ្មិនកិត្តិយសមួយរូប និងវាគ្មិនកិត្តិយស២រូបទៀត គឺលោក អ៊ីវ គីមសួរ អគ្គនាយកនៃក្រុមហ៊ុន APM (Cambodia) និងលោក សេង ចាន់ធឿន នាយកប្រតិបត្តិនៃ ក្រុមហ៊ុនមូលបត្រ រ៉ូយ៉ាល់គ្រុប (RGS)។

ការជជែកពិភាក្សា បានផ្ដោតសំខាន់ទៅលើការត្រៀមខ្លួនបែបណាដើម្បីធ្វើឱ្យអាជីវកម្មមានស្តង់ដារ​ សារៈសំខាន់នៃការទទួលបានមូលធនតាមរយៈ​សញ្ញាបណ្ណ ការស្វែងយល់អំពីសាជីវកម្មធានាឥណទានកម្ពុជា នីតិវិធីក្នុងការទទួលបានការធានាពីសាជីវកម្មធានាឥណទានកម្ពុជា និងបញ្ហាមួយចំនួនទៀតដែលបានលើកឡើងដោយអ្នកចូលរួមដែលជាម្ចាស់អាជីវកម្ម៕

ដើម្បីរឹតចំណងសាមគ្គីភាព បង្កើនផលិតភាពការងារ និងថ្លែងអំណរគុណដល់បុគ្គលិកទាំងអស់ ក្នុងកិច្ចខិតខំប្រឹងប្រែងចូលរួមចំណែកគាំទ្រដល់ប្រតិបត្តិការនៃការធានាឥណទាន CGCC បានរៀបចំកម្មវិធីវិបស្សនា​ អមជាមួយវគ្គបណ្តុះបណ្តាលស្តីពី “ជំនាញទំនាក់ទំនងប្រកបដោយប្រសិទ្ធភាព” ព្រមទាំងសកម្មភាពរឹតចំណងសាមគ្គីក្រុមការងារ (Team Building) ប្រចាំឆ្នាំ២០២៤ នៅកោះស្ដេច ខេត្តកោះកុង កាលពីថ្ងៃទី២៩ ខែវិច្ឆិកា ដល់ថ្ងៃទី០១ ខែធ្នូ ឆ្នាំ២០២៤។

តាមរយៈកម្មវិធីនេះ ថ្នាក់ដឹកនាំ និងបុគ្គលិករបស់ CGCC មានឱកាសបានស្វែងយល់ពីគ្នាទៅវិញទៅមក បង្កើតទំនាក់ទំនងល្អប្រសើរជាមួយគ្នា និងបានផ្លាស់ប្តូរបទពិសោធន៍ការងារ ក៍ដូចជាបានជួយបង្កើននូវសមត្ថភាព និងចំណេះដឹងបន្ថែមអំពីគោលគំនិត និងការអនុវត្តស្តីពីជំនាញទំនាក់ទំនងដែលប្រកបដោយប្រសិទ្ធភាព ដើម្បីបង្កើន​លទ្ធភាពការងារជាក្រុម ក៍ដូចជារួមចំណែកដល់ប្រតិបត្តិការ និងការអភិវឌ្ឍរបស់ CGCC ដ៏មានប្រសិទ្ធផលស្របតាមចក្ខុវិស័យក្នុងការលើកកម្ពស់បរិយាបន្នហិរញ្ញវត្ថុ និងអភិវឌ្ឍសហគ្រាសខ្នាតតូច និងមធ្យមនៅកម្ពុជាផងដែរ៕

នាថ្ងៃទី២៩ ខែវិច្ឆិកា ឆ្នាំ២០២៤ កន្លងទៅនេះ សាជីវកម្មធានាឥណទានកម្ពុជា (CGCC) មានសេចក្ដីសោមនស្សរីករាយក្នុងការធ្វើដំណើរជាថ្មីម្តងទៀត ទៅកាន់វិទ្យាល័យកោះស្ដេច ខេត្តកោះកុង ក្រោមការដឹកនាំរបស់ លោក ណូ លីដា អគ្គនាយករបស់ CGCC ថ្នាក់ដឹកនាំ ព្រមទាំងបុគ្គលិករបស់ CGCC ទាំងអស់ ដើម្បីនាំយកនូវអំណោយឧបត្ថម្ភលើគ្រឿងបម្លាស់សម្រាប់ប្រព័ន្ធចម្រោះទឹកពិសា និងសម្ភារៈសិក្សាមួយចំនួន​ជូនដល់វិទ្យាល័យកោះស្តេចដែលទទួលបានការស្វាគមន៍យ៉ាងកក់ក្តៅពីសំណាក់ លោក ភោគ ហឿន នាយកវិទ្យាល័យកោះស្ដេច លោកគ្រូអ្នកគ្រូ និងសិស្សានុសិស្សវិទ្យាល័យកោះស្ដេចប្រមាណ ៩០នាក់។

គួរបញ្ជាក់ផងដែរថា កាលពីថ្ងៃទី៥ ខែកុម្ភៈ ឆ្នាំ២០២៣ កន្លងទៅ CGCC បានឧបត្ថម្ភប្រព័ន្ធចម្រោះទឹកស្អាត ទៅកាន់វិទ្យាល័យកោះស្ដេច ដើម្បីសម្រួលដល់សិស្សានុសិស្ស លោកគ្រូអ្នកគ្រូ និងសហគមន៍នៃកោះស្ដេចទាំងមូលមានទឹកស្អាតប្រើប្រាស់ដើម្បីកាត់បន្ថយកង្វះទឹកស្អាតដែលសហគមន៍បា​នប្រឈម កាត់បន្ថយការប្រើប្រាស់ដបទឹកផ្លាស្ទិច និងការកាត់បន្ថយការចំណាយប្រចាំថ្ងៃរបស់សិស្សានុសិស្ស និងបងប្អូនប្រជាពលរដ្ឋក្នុងសហគមន៍នៅលើកោះនេះ។

ដំណើរទស្សនកិច្ចទៅកាន់វិទ្យាល័យកោះស្ដេចជាថ្មីម្តងទៀតនេះត្រូវបានរៀបចំឡើងក្នុងគោលបំណងដើម្បីពិនិត្យមើលដំណើរការ ក៏ដូចជាឧបត្ថម្ភលើគ្រឿងបន្លាស់ សម្រាប់ការថែទាំត្រឹមត្រូវតាមបច្ចេកទេសរបស់ប្រព័ន្ធចម្រោះទឹកស្អាត។ បន្ថែមពីលើនេះ  ថ្នាក់ដឹកនាំ និងបុគ្គលិក CGCC ទាំងអស់ក៏បានជួបសំណេះសំណាលជាមួយប្អូនៗសិស្សនុសិស្សថ្នាក់ ទី១០ ទី១១ និងទី១២ ប្រហែល ៩០នាក់ ដើម្បីចែករំលែកនូវចំណេះដឹង បទពិសោធន៍ល្អៗ និងគន្លឹះសំខាន់ៗ ដែលជាការតម្រង់ទិសដល់ពួកគាត់ក្នុងការសម្រេចចិត្តលើការជ្រើសរើសមុខវិជ្ជាឱ្យបានត្រឹមត្រូវនិងកំណត់គោលដៅច្បាស់លាស់ក្នុងការសិក្សាបន្តនៅឯសាកលវិទ្យាល័យផងដែរ៕

នារសៀល ថ្ងៃទី២៦ ខែវិច្ឆិកា ឆ្នាំ២០២៤ នៅសណ្ឋាគារ Hyatt Regency ភ្នំពេញ សាជីវកម្មធានាឥណទានកម្ពុជា (CGCC) បានសហការរៀបចំ “ពិធីសម្ពោធដាក់ឱ្យដំណើរការកម្មវិធី Knowledge Sharing Program (KSP) ឆ្នាំ២០២៤/២០២៥” ក្រោមអធិបតីភាពដ៏ខ្ពង់ខ្ពស់របស់ ឯកឧត្តមបណ្ឌិត ម៉ី វ៉ាន់ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និង ឯកឧត្តម  Koh Seung Beom ប្រធានក្រុមប្រឹក្សាផ្នែកអប់រំហិរញ្ញវត្ថុ(Financial Education Council – FEC) នៃសាធារណរដ្ឋកូរ៉េ រួមទាំងវត្តមានគណប្រតិភូរបស់សាធារណរដ្ឋកូរ៉េ ថ្នាក់ដឹកនាំ និងបុគ្គលិក CGCC តំណាងគ្រឹះស្ថានហិរញ្ញវត្ថុចូលរួម (PFIs) និងដៃគូអភិវឌ្ឍន៍សរុបប្រមាណជាង៥០រូប។

ពិធីសម្ភោធដាក់ឱ្យដំណើរការនេះ ត្រូវបានរៀបចំឡើងជាសក្ខីភាពនៃកិច្ចសហប្រតិបត្តិការរវាង ក្រសួងសេដ្ឋកិច្ច និងហិរញ្ញវត្ថុ នៃព្រះរាជាណាចក្រកម្ពុជា តាមរយៈ CGCC និងក្រសួងសេដ្ឋកិច្ច និងហិរញ្ញវត្ថុនៃសាធារណរដ្ឋកូរ៉េ ក្នុងគោលបំណងដើម្បីផ្សព្វផ្សាយជូនដល់សាធារណជន និងដៃគូសហការរបស់ CGCC អំពីវឌ្ឍនភាព និងផែនការសកម្មភាពរបស់ CGCC សម្រាប់កម្មវិធី KSP ឆ្នាំ២០២៤/២០២៥នេះ។

CGCC ត្រូវបានជ្រើសរើសជាស្ថាប័នមួយរបស់ព្រះរាជាណាចក្រកម្ពុជាដើម្បីអនុវត្តគម្រោង KSP ឆ្នាំ ២០២៤/២០២៥ បន្ទាប់ពីមានការប្រគួតប្រជែងយ៉ាងស្វិតស្វាញជាមួយស្ថាប័ន​ និងប្រទេសជាច្រើនក្នុងពិភពលោក ដែលបានដាក់ស្នើសុំគម្រោងនេះ ជូនទៅរដ្ឋាភិបាលរបស់សាធារណរដ្ឋកូរ៉េ។ គម្រោង KSP នឹងផ្តោតទៅលើ (១) ការបង្កើនសមត្ថភាពវិភាគឥណទានសម្រាប់ប្រតិបត្តិការធានាឥណទាន (២) ការគ្រប់គ្រងហានិភ័យ និង (៣) ការបង្កើតគម្រោងធានាឥណទាន ដើម្បីគាំទ្រការអភិវឌ្ឍសហគ្រាសធុនតូច និងមធ្យមនៅកម្ពុជា។

កាលពីថ្ងៃទី២៥ ខែវិច្ឆិកា ឆ្នាំ២០២៤ លោក យុន ផន ប្រធាននាយកដ្ឋានយុទ្ធសាស្ត្រ និងអភិវឌ្ឍន៍អាជីវកម្ម នៃសាជីវកម្មធានាឥណទានកម្ពុជា (CGCC)  អមដំណើរដោយក្រុមការងារ បានសហការចូលរួម និងអបអរសាទរ ក្នុងកម្មវិធីសម្ពោធគម្រោង កម្មវិធីបណ្តុះបណ្តាល ស្តីពី «លទ្ធភាពក្នុងការទទួលបានហិរញ្ញប្បទាន សម្រាប់សហគ្រាសធុនតូច និងមធ្យម» ដែលត្រូវបានរៀបចំឡើងដោយសម្ព័ន្ធសមាគមសហគ្រាសធុនតូច និងមធ្យម កម្ពុជា (FASMEC), ក្រុមហ៊ុន មេគង្គអ៊ិនគ្លូស៊ីវ វេនឈ័រ (MiV) និងគាំទ្រថវិការបដិភាគដោយមូលនិធិអភិវឌ្ឍន៍ជំនាញ (SDF)។

លោក យុន ផន បានបង្ហាញចំណាប់អារម្មណ៍ថា “សហគ្រាស ធុនតូច និងមធ្យម នៅកម្ពុជា (SMEs) ពិតជាដើរតួរយ៉ាងសំខាន់ក្នុងការជំរុញសេដ្ឋកិច្ចជាតិឱ្យមាននិរន្ត៍ភាព និងចីរភាព។ ជាមួយគ្នានេះផងដែរ CGCC បានប្តេជ្ញាចិត្តក្នុងការចូលរួមអនុវត្តនូវគម្រោងនេះ ឱ្យបានដំណើរការទៅមុខដោយរលូនតាមរយៈការផ្តល់ការគាំទ្រដល់កម្មវិធីបណ្តុះបណ្តាលជំនាញនេះ និងការផ្តល់ការធានាឥណទានដល់ធនាគារ និងគ្រឹះស្ថានមីក្រូហិរញ្ញវត្ថុដៃគូ ក៍ដូចជាកិច្ចសហប្រតិបត្តិការ ជាមួយសមាគម និងស្ថាប័នដៃគូនានា ដើម្បីជំរុញវឌ្ឍនភាពរបស់សហគ្រិន និងសហគ្រាសធុនតូច និងមធ្យមនៅកម្ពុជា។ មួយវិញលទ្ធផលជោគជ័យនៃការអនុវត្តគម្រោងនេះក៏អាចជួយឱ្យ CGCC មានភាពងាយស្រួលក្នុងការវាយតម្លៃហានិភ័យរបស់អតិថិជន និងអាចផ្កល់ការធានាឥណទានក្នុងទ្រង់ទ្រាយទូលំទូលាយជាងមុន និងសេវាកម្មរហ័សទាន់តម្រូវការរបស់អតិថិជន។

គួរបញ្ជាក់ផងដែរថា កម្មវិធីបណ្តុះបណ្តាលនេះត្រូវបានបង្កើតឡើងក្នុងគោលបំណងដើម្បីផ្តល់ការបណ្តុះបណ្តាល ចំណេះដឹង ព្រមទាំងជំរុញការផ្សព្វផ្សាយអំពីលទ្ធភាពដើម្បីទទួលបានហិរញ្ញប្បទានសម្រាប់សហគ្រាសធុនតូច និងមធ្យម និងប្រើប្រាស់ឥណទាននេះត្រឹមត្រូវតាមគោលបំណង ចំគោលដៅដែលជំរុញឱ្យសហគ្រាស ធុនតូច និងមធ្យម (SMEs) នៅកម្ពុជា មាននិរន្តរភាព និងចីរភាពដែលចូលរួចចំណែកដល់កំណើនសេដ្ឋកិច្ចជាតិ។