កាលពីថ្ងៃទី១ ដល់ ថ្ងៃទី៥ ខែធ្នូ ឆ្នាំ២០២៥ សាជីវកម្មធានាឥណទានកម្ពុជា (CGCC) ដឹកនាំដោយលោកស្រី ជុន សុថានី ប្រធាននាយកដ្ឋានយុទ្ធសាស្រ្ដ និងអភិវឌ្ឍន៍អាជីវកម្មនៃ CGCC បានជួបពិភាក្សាស្វែងយល់អំពីការអនុវត្តយន្តការធានាឥណទាន និងផ្សព្វផ្សាយបន្ថែមអំពីគម្រោងធានាឥណទានរបស់ CGCC ដោយផ្ទាល់ជាមួយថ្នាក់ដឹកនាំ និងបុគ្គលិករបស់សាខានៃគ្រឹះស្ថានហិរញ្ញវត្ថុចូលរួម (PFIs) មួយចំនួនរបស់ CGCC រួមមាន៖

– ខេត្តកំពង់ឆ្នាំង៖ ធនាគារស្ថាបនា, ធនាគារហ្វីលីព និងធនាគារ ABA

– ខេត្តពោធិ៍សាត់៖ គ្រឹះស្ថានមីក្រូហិរញ្ញវត្ថុ LOLC, ធនាគារស្ថាបនា និងធនាគារ ABA

– ខេត្តបាត់ដំបង៖ ធនាគារ FTB និងធនាគារប្រេដ

– ខេត្តសៀមរាប៖ ធនាគារ ABA

ការពិភាក្សាជាមួយ PFIs នៅតាមសាខានានានៃខេត្តនីមួយៗ បានផ្តល់ឱកាសសម្រាប់ CGCC និង PFIs ក្នុងការជំរុញការយល់ដឹងកាន់តែច្បាស់អំពីសេវាធានាឥណទាន បង្កើនគុណភាពនៃសេវាកម្ម ដើម្បីពង្រឹងកិច្ចសហប្រតិបត្តិការលើការធានាឥណទាន និងអាចបង្កើនការផ្តល់កម្ចីជូនទៅដល់ក្រុមហ៊ុនអាជីវកម្ម ដែលមានសក្តានុពលនិងមានតម្រូវការកម្ចីចាំបាច់ រួមទាំងការអភិវឌ្ឍសេដ្ឋកិច្ចនៅតំបន់ជនបទផងដែរ៕