ថ្ងៃទី២៨ ខែសីហា ឆ្នាំ២០២៥ លោក ណូ លីដា អគ្គនាយក CGCC មានក្តីសោមនស្សដែលបានទទួលស្វាគមន៍ដំណើរទស្សនកិច្ចនៃនិស្សិតវិទ្យាស្ថានខេមអេដ  (CamEd Business School) មកកាន់ការិយាល័យ CGCC តាមរយៈការដឹកនាំ និងសម្របសម្រួលដោយសាស្ត្រាចារ្យ ហូរ វរៈបុត្ត។

តាមរយៈដំណើរទស្សនកិច្ចនេះ លោកអគ្គនាយក បានចែករំលែកការយល់ដឹងអំពីតួនាទីសំខាន់របស់ CGCC ក្នុងការគាំទ្រសហគ្រាសធុនមីក្រូ តូច និងមធ្យម (MSMEs) នៅកម្ពុជា តាមរយៈការធានាឥណទាន ការធានាសញ្ញាបណ្ណ និងកម្មវិធីកសាងសមត្ថភាពសហគ្រិនរបស់ CGCC (EPIC)។ និស្សិតទាំងអស់ក៏ទទួលបានការយល់ដឹងកាន់តែស៊ីជម្រៅអំពីប្រតិបត្តិការនៃការធានាឥណទាន សមិទ្ធផលសំខាន់ៗរបស់ CGCC និងការរួមចំណែកដល់ការអភិវឌ្ឍវិស័យហិរញ្ញវត្ថុ និងសេដ្ឋកិច្ចកម្ពុជា។

គួរបញ្ជាក់ផងដែររថា ជាផ្នែកមួយនៃការប្តេជ្ញាចិត្តរបស់ CGCC ក្នុងការចូលរួមកសាងសមត្ថភាព និងអភិវឌ្ឍជំនាញដល់យុវជនកម្ពុជា CGCC ក៏បានចូលរួមយ៉ាងសកម្មជាមួយវិទ្យាស្ថានខេមអេដ ក្នុងការផ្តល់ឱកាសដល់សិស្សានុសិស្សរបស់វិទ្យាស្ថាន តាមរយៈកម្មវិធីហ្វឹកហាត់ការងារ  (Internship Program) របស់ CGCC ដែលជាក់ស្ដែងនិសិត្សដែលបានបញ្ចប់ការសិក្សាចំនួន ៣រូបបានចូលរួមកម្មវិធីហ្វឹកហាត់ការងារយ៉ាងជោគជ័យផងដែរ។