![Exposure Visit to a Demonstration Site, Biogas-Based Power Plant of a Pig Farm in Preah Sihanouk Province](https://www.cgcc.com.kh/wp-content/uploads/2022/12/photo_2022-12-15_09-11-17.jpg)
ទស្សនកិច្ចសិក្សាស្ដីពីការប្រើប្រាស់ប្រព័ន្ធជីវឧស្ម័នដើម្បីផលិតអគ្គិសនីនៅកសិដ្ឋានចញ្ចឹមជ្រូកនៅ ខេត្តព្រះសីហនុ
ខែធ្នូ 16, 2022ព្រឹត្តិការណ៍ និងសកម្មភាព
ថ្ងៃអង្គារ ទី១៣ ខែធ្នូ ឆ្នាំ២០២២ លោក ណូ លីដា អគ្គនាយករង CGCC បានដឹកនាំ សហការី ចូលរួមដំណើរទស្សនកិច្ច នៅឯកសិដ្ឋានចិញ្ចឹមជ្រូកសាច់មួយកន្លែង នៅស្រុកព្រៃនប់ ខេត្តព្រះសីហនុ និងបានចែករំលែកអំពីគម្រោងធានាឥណទានរបស់ CGCC ជូនដល់គណៈប្រតិភូនៃដំណើរទស្សនកិច្ច ក្រោមអធិបតីភាព ឯកឧត្តម ទិន ពន្លក រដ្ឋលេខាធិការក្រសួងបរិស្ថាន និង លោកបណ្ឌិត សរ ចិត្រា អគ្គលេខាធិការរងក្រសួងកសិកម្ម រុក្ខាប្រមាញ់ និងនេសាទ និងក្រោមការសម្របសម្រួលរបស់ អង្គការសហប្រជាជាតិដើម្បីអភិវឌ្ឍន៍ឧស្សាហកម្ម (UNIDO)។
ដំណើរទស្សនកិច្ចនេះរៀបចំឡើងដើម្បីបង្កើនចំណេះដឹង ក៏ដូចជាផ្សព្វផ្សាយអំពីអត្ថប្រយោជន៍ និងបញ្ហាប្រឈមនានាដែលទាក់ទងនឹងការអនុវត្តបច្ចេកវិទ្យាជីវឧស្ម័ននៅក្នុងវិស័យកសិកម្ម ជាពិសេសលើការ ចិញ្ចឹមជ្រូកសាច់ក្នុងប្រទេសកម្ពុជា និងបង្កើនកិច្ចសហការរវាងស្ថាប័នពាក់ព័ន្ធ រួមមានស្ថាប័នរដ្ឋ ដៃគូអភិវឌ្ឍ វិស័យឯកជន គ្រឹះស្ថានហិរញ្ញវត្ថុ និងអ្នកសិក្សាស្រាវជ្រាវផងដែរ។
តាមរយៈដំណើរទស្សនកិច្ចនេះ អ្នកចូលរួម ជាពិសេសគ្រឹះស្ថានហិរញ្ញវត្ថុ បានយល់ដឹងនិងទស្សនាដោយផ្ទាល់អំពីការប្រើប្រាសប្រព័ន្ធជីវឧស្ម័ន ដើម្បីផលិតអគ្គិសនី និងអត្ថប្រយោជន៍ដល់ដំណើរការរបស់កសិដ្ឋាន ទាំងលើផ្នែកសេដ្ឋកិច្ច និងការចូលរួមចំណែកការពារបរិស្ថាន។ ការណ៍នេះ នឹងជំរុញឱ្យបង្កើននូវការបង្កើតផលិតផលឥណទានដែលមានលក្ខណៈអនុគ្រោះដល់អាជីវកម្មដែលនៅក្នុងវិស័យនេះកាន់តែច្រើនជាងមុន។ ជាមួយគ្នានេះ CGCC ក៏រីករាយនឹងចូលរួមចំណែកផ្តល់នូវការធានាឥណទានជូនដល់ម្ចាស់អាជីវកម្ម ដែលមានតម្រូវការកម្ចីសម្រាប់អាជីវកម្ម ក្នុងគោលបំណងបម្រើឱ្យផលប្រយោជន៍បរិស្ថាន។
![Exposure Visit to a Demonstration Site, Biogas-Based Power Plant of a Pig Farm in Preah Sihanouk Province](https://cgcc.com.kh/wp-content/uploads/2022/12/photo_2022-12-13_18-57-07.jpg)
![Exposure Visit to a Demonstration Site, Biogas-Based Power Plant of a Pig Farm in Preah Sihanouk Province](https://cgcc.com.kh/wp-content/uploads/2022/12/photo_2022-12-13_19-01-03.jpg)
![Exposure Visit to a Demonstration Site, Biogas-Based Power Plant of a Pig Farm in Preah Sihanouk Province](https://cgcc.com.kh/wp-content/uploads/2022/12/photo_2022-12-15_09-11-32.jpg)