នាថ្ងៃទី៩ ខែសីហា ឆ្នាំ២០២៥ ក្រុមការងារ CGCC ដឹកនាំដោយ លោក ណូ លីដា អគ្គនាយក CGCC បានចុះជួបសម្ដែងការគួរសម និងពិភាក្សាជាមួយថ្នាក់ដឹកនាំ និងសហការីនៃគ្រឹះស្ថានហិរញ្ញវត្ថុចូលរួម (PFIs) ចំនួនពីរ ក្នុងខេត្តសៀមរាប រួមមាន ធនាគារពាណិជ្ជកម្មក្រៅប្រទេស នៃកម្ពុជា (FTB) និងធនាគារវឌ្ឍនៈ អាស៊ី ចំកាត់​ (ABA)។

ក្នុងជំនួបពិភាក្សានេះ លោក ណូ លីដា អគ្គនាយក CGCC បានសម្តែងនូវការកោតសរសើរចំពោះកិច្ចសហប្រតិបត្តិការរបស់ធនាគារ FTB និងធនាគារ ABA ក្នុងការលើកកម្ពស់លទ្ធភាពទទួលបានហិរញ្ញប្បទាន សម្រាប់សហគ្រាសធុនតូច និងមធ្យម  ជាពិសេសទៅលើការចូលរួមរបស់ធនាគារទាំងពីរជាមួយ CGCC ក្នុងគម្រោងធានាឥណទានថ្មីៗ ដើម្បីគាំទ្រដល់កំណើនអាជីវកម្មរបស់ SMEs។ បន្ថែមពីនេះ លោកក៏បានចែករំលែកពីបច្ចុប្បន្នភាពនៃគម្រោងឥណទាន និងយន្តការគាំទ្ររបស់ CGCC ដែលពង្រីកលទ្ធភាពក្នុងការផ្តល់ហិរញ្ញប្បទានរបស់ PFIs និងមានលក្ខខណ្ឌប្រសើរជាងមុន​។

កិច្ចពិភាក្សានេះក៏ជាឱកាសមួយដ៏ពិសេសសម្រាប់ CGCC និងសាខាខេត្តរបស់ PFIs ក្នុងការពិភាក្សាដោយបើកចំហរអំពីស្ថានភាពអាជីវកម្មនៅក្នុងតំបន់, បញ្ហាប្រឈមដែលធនាគារ និងម្ចាស់អាជីវកម្មជួបប្រទះ, និងទទួលយកអនុសាសន៍ ក៏ដូចជាសំណូមពរនានាលើកិច្ចសហប្រតិបត្តិការកន្លងមក៕